Category: ArmPulse

Լիտվայի մայրաքաղաք Վիլնյուսում անցկացվել է «Կենսաբանություն» առարկայի 37-րդ միջազգային օլիմպիադան, որին մասնակցել է նաև Հայաստանի թիմը: Այս մասին հայտնում են ՀՀ ԿԳՄՍ նախարարությունից:

Մտավոր ստուգատեսին մասնակցել է ավելի քան 300 աշակերտ՝ 78 երկրից (յուրաքանչյուր պետությունից առավելագույնը 4 մասնակից):

Հայաստանը ներկայացրած աշակերտներն արձանագրել են հետևյալ արդյունքները․

• Արեգ Գալստյան (Ա․ Շահինյանի անվան ֆիզմաթ դպրոց, 12-րդ դասարան) — արծաթե մեդալ,

• Հովհաննես Սարգսյան («Հերացի» ավագ դպրոց, 12-րդ դասարան) — բրոնզե մեդալ,

• Սամվել Հարությունյան («Քվանտ» վարժարան, 11-րդ դասարան) — գովասանագիր։

Թիմի կազմում էր նաև «Հերացի» ավագ դպրոցի 12-րդ դասարանի աշակերտուհի Ստելլա Բադալյանը։

Հայաստանի թիմը ղեկավարել են Սյուզան Մարությանը (ԵՊՀ ՍԹԵՄ դպրոց), Հակոբ Փերիխանյանը (ԵՊՀ) և Գևորգ Ավանեսյանը («Հերացի» ավագ դպրոց):

Օլիմպիադայի ընթացքում մասնակիցները կատարել են 2 տեսական առաջադրանք և 4 փորձարարական աշխատանք (մոլեկուլային կենսաբանություն և կենսաքիմիա, կենդանիների ֆիզիոլոգիա, կենդանիների մորֆոլոգիա և դասակարգում, բույսերի հաշվարկային կենսաբանություն):

Հիշեցնենք, որ «Կենսաբանություն» առարկայի 36-րդ միջազգային օլիմպիադայում, որն անցկացվել էր Ֆիլիպինների Կեսոն-Սիթի քաղաքում, Հայաստանի թիմն արժանացել էր 1 ոսկե և 2 բրոնզե մեդալների։

Շրջակա միջավայրի նախարար Համբարձում Մաթևոսյանն ընդունել է կենսաբազմազանության և բազմակողմ բանակցությունների ոլորտի միջազգային փորձագետ Բասիլ վան Հավրեին։ Այս մասին հայտնում են ՇՄՆ-ից:

Հանդիպման ընթացքում զրուցակիցները հանգամանալից քննարկել են հոկտեմբերին Երևանում կայանալիք COP17 համաժողովի նախապատրաստական աշխատանքների ընթացքը, ինչպես նաև միջոցառմանը նախորդող բանակցային գործընթացի առանցքային ուղղություններն ու առկա մարտահրավերները։

Անդրադարձ է կատարվել Հայաստանի՝ որպես COP17-ը նախագահող երկրի դերակատարությանը և ռազմավարական առաջնահերթություններին։ Քննարկվել են․

• Բանակցային գործընթացի արդյունավետ կազմակերպման մոտեցումները,

• Համաժողովի ընթացքում կառուցողական երկխոսության, փոխվստահության և կոնսենսուսի ձևավորմանն ուղղված քայլերը։

Հանդիպմանը կարևորվել է COP17-ի նախագահության դերը ոչ միայն համաժողովի արդյունավետ անցկացման, այլև կենսաբազմազանության գլոբալ օրակարգի առաջմղման, Կունմինգ–Մոնրեալի գլոբալ շրջանակի իրականացման արագացման և երկրների միջև համագործակցության ամրապնդման գործում։

ՇՄՆ-ից ընդգծում են, որ Հայաստանը հետևողականորեն շարունակում է նախապատրաստվել COP17-ին՝ նպատակ ունենալով ապահովել բարձր մակարդակի համաժողով, ներառական ու թափանցիկ բանակցային գործընթաց և արդյունքահենք նախագահություն։

Վաղարշապատի Կոմիտասի անվան մշակույթի պալատի մեծ համերգասրահում տեղի է ունեցել «Փոքրիկ քայլ» երաժիշտ-կատարողների մանկապատանեկան 7-րդ միջազգային մրցույթ-փառատոնի մրցանակաբաշխության և գալա համերգի հանդիսավոր արարողությունը: Այս մասին հայտնում են ՀՀ ԿԳՄՍ նախարարությունից:

Միջոցառման ընթացքում հայտարարվել են լավագույն մասնակիցների անունները, որոնք արժանացել են «Մեծ մրցանակի» (Gran Prix) և «Հատուկ մրցանակների»:

Փառատոնն անցկացվել է հունիսի 9-30-ը՝ ՀՀ ԿԳՄՍ նախարարության աջակցությամբ։ Նախաձեռնության հիմնադիրներն են «Արտպրոգրես» մշակութային հասարակական կազմակերպությունը և Վաղարշապատի համայնքապետարանը։

• Այս տարի ստուգատեսին մասնակցության հայտ է ներկայացրել Հայաստանի 150-ից ավելի երաժշտական և արվեստի դպրոցների 8-20 տարեկան շուրջ 1500 աշակերտ։

•  Օնլայն ձևաչափով փառատոնին հայտեր են ներկայացրել նաև Ռուսաստանի Դաշնության և ԱՄՆ-ի համապատասխան հաստատություններից:

Մրցույթի ժյուրիի կազմում ընդգրկված են եղել Հայաստանի երաժշտարվեստի ոլորտի ճանաչված ներկայացուցիչներ, վաստակավոր արտիստներ և փորձառու մանկավարժներ։

Կոտայքի մարզպետ Ահարոն Սահակյանը պատրաստվում է վայր դնել մարզպետի լիազորությունները և վերցնել պատգամավորական մանդատը։ Այս մասին հայտնում է ArmLur.am-ը։

Լրատվամիջոցի հետ զրույցում Ահարոն Սահակյանը հաստատել է տեղեկությունը՝ նշելով․ «Այո՛, գնալու եմ ԱԺ»։

Ստեղծված իրավիճակում իշխանությունն այժմ Կոտայքի մարզպետի նոր թեկնածու է փնտրում։

Հիշեցնենք՝ Ահարոն Սահակյանը Կոտայքի մարզպետի պաշտոնը զբաղեցնում է 2021 թվականի մայիսից։ Վաղը՝ հուլիսի 21-ին, Կենտրոնական ընտրական հանձնաժողովում (ԿԸՀ) տեղի կունենա պատգամավորական թափուր մանդատների հանձնման արարողությունը։

Թուրքիան աջակցել է Իրանին՝ ձախողելու երկիրը մասնատելու Վաշինգտոնի ծրագրերը։ Այս մասին իրանական Majaraa Media պարբերականին տված տեսահարցազրույցում հայտարարել է Իրանի արտաքին գործերի նախարար Աբբաս Արաղչին։

Իրանի արտգործնախարարի խոսքով՝ հակամարտության չորրորդ օրը Վաշինգտոնը ծրագրում էր գործարկել Իրանի տարրալուծման/մասնատման գործընթացը։

Արաղչին նշել է, որ դա թույլ չտալու համար Թեհրանն օպերատիվ կապ է հաստատել տարածաշրջանային դերակատարների հետ՝ ամերիկյան սպառազինության մատակարարման ուղիները արգելափակելու նպատակով։ Կապ է հաստատվել․

• Իրաքի վարչապետ Ալ-Սուդանիի,

• Թուրքիայի ԱԳ նախարար Հաքան Ֆիդանի,

• Քրդական առաջնորդների հետ։

Իրանցի նախարարն ընդգծել է, որ թուրքական կողմն այս հարցում զբաղեցրել է պրինցիպիալ դիրքորոշում և կոշտ բանակցություններ է վարել ԱՄՆ ներկայացուցիչների հետ։

«Համատեղ ջանքերի այս ամբողջ համալիրը հանգեցրեց նրան, որ այդ դավադրությունը լիովին ձախողվեց», — ամփոփել է Արաղչին։

ԱՄՆ նախագահ Դոնալդ Թրամփը պաշտպանության նախարար Փիթ Հեգսեթին, Շտաբների պետերի միացյալ կոմիտեի նախագահ Դենիել Քեյնին և զինված ուժերի ղեկավարությանը հրահանգել է պատասխան գործողություններ ձեռնարկել իրանական կողմի դեմ՝ ամերիկացի զինծառայողների զոհվելու պատճառով։ Այս մասին ԱՄՆ ղեկավարը գրել է Truth Social սոցիալական ցանցի իր էջում։

«Ամեն անգամ, երբ Իրանը սպանի ամերիկացի զինվորի, նա բազմապատիկ գին է վճարելու այդ սպանության համար», — հայտարարել է Թրամփը։

Օրեր առաջ՝ հուլիսի 17-ին, Հորդանանում իրանական հարվածի հետևանքով զոհվել էր երկու ամերիկացի զինծառայող։ Բացի այդ, մեկ զինծառայող համարվում է անհետ կորած, իսկ ևս չորսը տեղափոխվել են հիվանդանոց։

Հայաստանը զբաղեցրել է 33-րդ տեղը աշխարհի ամենաազդեցիկ մշակութային և պատմամշակութային ժառանգություն ունեցող երկրների ցանկում։ Այս մասին, վկայակոչելով CEOWORLD Magazine-ի տվյալները, հայտնում է The US Armenians-ը:

Ըստ հրապարակված վարկանիշային աղյուսակի՝ Հայաստանը 100 հնարավորից ստացել է 88.09 միավոր: Հետազոտությունն ընդգծում է երկրի հարուստ պատմական ժառանգությունը, դարավոր ավանդույթները, ճարտարապետական կոթողները և համաշխարհային ճանաչում ունեցող մշակութային ավանդը:

Հնագույն վանքերից ու ՅՈՒՆԵՍԿՕ-ի համաշխարհային ժառանգության ցանկում ընդգրկված հուշարձաններից մինչև սերնդեսերունդ փոխանցվող հայկական արվեստը, երաժշտությունն ու ավանդույթները՝ Հայաստանը շարունակում է ուրույն տեղ զբաղեցնել համաշխարհային մշակույթում:

Քրեական ոստիկանության Երևան քաղաքի վարչության ծառայողները օպերատիվ տեղեկություններ էին ստացել, որ 43-ամյա տղամարդն իր շահագործած ավտոմեքենայում ապօրինի զենք և զինամթերք է պահում։ Այս մասին հայտնում են ՀՀ ՆԳՆ ոստիկանությունից:

Ձեռնարկված միջոցառումների արդյունքում ոստիկանները Ավան համայնքի Մարշալ Բաբաջանյան փողոցում ստուգման նպատակով կանգնեցրել են նշված մեքենան, որի սրահի ակնհայտ տեսանելի հատվածում նկատվել է զենքի նմանվող առարկա։ Վարորդը ձերբակալվել է և մեքենայով հանդերձ տեղափոխվել ոստիկանության վարչություն։

Նախաձեռնված քրեական վարույթի շրջանակում իրականացված խուզարկությամբ մեքենայի սրահում հայտնաբերվել են․

• «Hagan» տեսակի ակոսափող թմբուկավոր ատրճանակ՝ լիցքավորված 7,62 մմ տրամաչափի 7 փամփուշտով,

• «Մեթամֆետամին» տեսակի թմրամիջոց,

• Թմրամիջոցի հետքերով տարա,

• «Մեթադոն» տեսակի թմրամիջոց։

Երևանի բնակիչ 43-ամյա տղամարդը ձերբակալված է, կատարվում է նախաքննություն։