Category: ArmPulse

Երևանի ընդհանուր իրավասության քրեական դատարանում, դատավոր Սարգիս Դադոյանի նախագահությամբ, հետաձգվել է «Ուժեղ Հայաստան» կուսակցության անդամ, հետախույզ, գնդապետ Արթուր Ավանեսյանի (հայտնի որպես «Կանդազ») և ևս երկու մեղադրյալների՝ Արթուր Իսկանդարյանի ու Գեղամ Զաքարյանի գործով դատական նիստը։

Հիշեցնենք, որ հունիսի 25-ի նիստում դատարանը որոշում էր կայացրել Արթուր Ավանեսյանի նկատմամբ կիրառված կալանքը փոխարինել տնային կալանքով և բացակայելու արգելքով։

Դատական նիստի մեկնարկին հանրային մեղադրողը հրապարակել է ձայնագրություններ, որոնք, ըստ մեղադրանքի կողմի պնդման, արտացոլում են գործով անցնող երեք մեղադրյալների՝ Ավանեսյանի, Իսկանդարյանի և Զաքարյանի խոսակցությունները։ Նշված ձայնագրություններից մեկում զրուցակիցներից մեկը նշում է, թե «մարդիկ չարչարվել են, իրենց են ընտրել», իսկ մեկ այլ դրվագում կողմերը քննարկում են որոշակի կանխատեսումներ։

Դատավոր Սարգիս Դադոյանը հետաքրքրվել է՝ արդյոք պաշտպանական կողմն ունի առարկություններ կամ պարզաբանումներ հրապարակված նյութերի վերաբերյալ։ Մեղադրյալների շահերի պաշտպան, փաստաբան Արմեն Ֆերոյանը հայտարարել է, որ այս փուլում ասելիք չունի, սակայն միջնորդել է պահպանել ձայնագրությունները՝ հետագա նիստերի ընթացքում հարցաքննությունների ժամանակ դրանց անդրադառնալու և հարցեր ձևակերպելու նպատակով։

Անդրադառնալով դատավարության հաջորդ՝ հարցաքննությունների փուլին՝ պաշտպան Արմեն Ֆերոյանը խնդրել է այն տեղափոխել հաջորդ նիստ, քանի որ մեղադրյալներին նախապատրաստվելու ժամանակ է անհրաժեշտ։

«Մենք քննարկել ենք պաշտպաններով այս հարցը, և տակտիկական տեսանկյունից ցուցմունք տալու ցանկություն կա, ինչպես ի սկզբանե ասել ենք։ Մի փոքր նախապատրաստվելու անհրաժեշտություն կա, հաջորդ նիստին, վստահաբար, պատրաստ ենք հարցաքննության»,– նշել է փաստաբանը։

Նիստի ընթացքում դատավոր Դադոյանն անդրադարձել է նաև նախորդող նիստում պաշտպանական կողմի բարձրացրած խնդրին՝ մեղադրյալների էլեկտրոնային սարքերը վերադարձնելու վերաբերյալ։ Դատարանը պարզաբանել է, որ քանի որ նշված սարքերը դատարանին չեն ներկայացվել, պաշտպանական կողմը պետք է այդ հարցով անմիջականորեն դիմի նախաքննությունն իրականացնող քննիչին։

Սույն գործով հաջորդ դատական նիստը նշանակվել է սույն թվականի օգոստոսի 12-ին, ժամը 15:00-ին։

Ադրբեջանում պահվող հայ բանտարկյալներին այցելելու նպատակով կանանց  միջազգային մարդասիրական պատվիրակության՝ Բաքու այցի նախապատրաստման շրջանակում հրապարակային նամակներ եմ հղել միջազգային ևպետական այն կառույցներին, որոնց մասնակցությունից կարող է կախված լինել այցի կազմակերպումն ու պատվիրակության անդամների անվտանգությունը։ Այս մասին հայտարարություն է տարածել Բաքվում ազատազրկված Ռուբեն Վարդանյանի կինը՝ Վերանիկա Զոնաբենդը։

Հայտարարությունում, մասնավորապես, ասվում է. «Նախաձեռնության նպատակը բացառապես մարդասիրական է. հանդիպել Ադրբեջանի Հանրապետության օմբուդսմենի հետ, տեսակցել Ադրբեջանում պահվող Հայաստանի քաղաքացիներին, նրանց փոխանցել հարազատների նամակները, լուսանկարներն ու թույլատրելի այլ անձնական իրեր։

Հենց այդ պատճառով կարևոր եմ համարում  հանդես գալ բաց և հրապարակային՝ պաշտոնական ու դիվանագիտական ուղիների միջոցով: Առանձնահատուկ նշանակություն ունի հնարավոր այցի բոլոր փուլերի կանխատեսելիությունն ու համաձայնեցվածությունը՝ մուտքը Ադրբեջան, գերիների տեսակցության կազմակերպումը և պատվիրակության անդամների բարեհաջող վերադարձը։

Մասնակիցների և նրանց ընտանիքների համար կարևոր է իմանալ, որ նախաձեռնությունը նախապատրաստվում է պաշտոնական ձևաչափով  և  անվտանգության երաշխիքների առկայությամբ, որպեսզի այն որևէվտանգ չներկայացնի նրանց կյանքի և անվտանգության համար։ Այս նպատակով ես բաց նամակներով դիմել եմ՝

• Ադրբեջանի Հանրապետության մարդու իրավունքների պաշտպան Սաբինա Ալիևային՝ խնդրելով աջակցել, որպեսզի այցը կազմակերպվի իր գրասենյակի հովանու ներքո և դրա իրականացման համար ստեղծվեն անհրաժեշտ պայմաններ։

• Կարմիր խաչի միջազգային կոմիտեի նախագահ Միրյանա Սպոլյարիչ Էգգերին՝ խնդրելով դիտարկել ԿԽՄԿ-ի մանդատի շրջանակում աջակցություն, խորհրդատվական օժանդակություն կամ մասնակցություն ցուցաբերելու հնարավորությունը։

• Հայաստանի Հանրապետության վարչապետ Նիկոլ Փաշինյանին՝ խնդրելով տեղեկացնել ՀՀ կառավարության կողմից հնարավոր քայլերի, համակարգման կամ գործնական աջակցության մասին։

• Եվրոպական միության արտաքին գործերի և անվտանգության քաղաքականության հարցերով բարձր ներկայացուցիչ Կայա Կալլասին՝ դիվանագիտական ուշադրության և եվրոպական կառույցների կողմից հնարավոր աջակցության խնդրանքով:

Երկարատև կալանքի տակ գտնվող մարդկանց համար նման նախաձեռնությունը մեծ նշանակություն ունի։ Նրանց առողջական վիճակը, պահման պայմանները և ընտանիքների հետ կապը չպետք է մատնվեն անուշադրության կամ կախված լինեն պատահականությունից։  

Խոսքը մարդու հիմնարար իրավունքի մասին է՝ իմանալ, թե ինչ է տեղի ունենում իրենց հարազատների հետ,  նրանց աջակցության խոսքեր փոխանցելու հնարավորություն ունենալ և համոզվել, որ իրենք մոռացված չեն։

Հուլիսի 7-ին, Թուրքիայի Հանրապետությունում «Դաշնակիցներն Անկարայում» միջոցառման շրջանակներում, Վրաստանի փոխվարչապետ և արտաքին գործերի նախարար Մակա Բոչորիշվիլին մասնակցել է «Սառը պատերազմից հետո ստեղծված աշխարհակարգից այն կողմ. նավարկություն ռազմավարական անորոշության դարաշրջանում» թեմայով պանելային քննարկմանը, հաղորդում են վրացական լրատվամիջոցները։

Իր ելույթում Մակա Բոչորիշվիլին կենտրոնացել էՎրաստանի և ՆԱՏՕ-ի միջև երկարատև գործընկերության վրա և նշել, որ Դաշինքը և նրա անդամ պետությունները զգալի ներդրում են ունեցել Վրաստանի պաշտպանական կարողությունների ամրապնդման գործում, մինչդեռ Վրաստանը ակտիվորեն ներգրավված է եղել Դաշինքի առաքելություններում և գործողություններում:

«Վրաստանի և ՆԱՏՕ-ի միջև սերտ գործընկերությունը զարգանում է երկար տարիներ: ՆԱՏՕ-ն և նրա անդամ պետությունները զգալի ներդրում են ունեցել Վրաստանի պաշտպանական կարողությունների ամրապնդման գործում: Միևնույն ժամանակ, պետք է նշել, որ Վրաստանը միշտ զգալի ներդրում է ունեցել տրանսատլանտյան անվտանգության օրակարգում և ՆԱՏՕ-ի առաքելություններում և գործողություններում», – նշել է նախարարության ղեկավարը։:

Նախարարը նաև խոսել է Վրաստանի առջև ծառացած անվտանգության մարտահրավերների մասին և նշել որ խաղաղության և կայունության պահպանումը մնում է երկրի արտաքին և ներքին քաղաքականության գերակա խնդիրը։

Նախարարը ընդգծել է Վրաստան-Թուրքիա-Ադրբեջան ռազմավարական համագործակցության կարևորությունը և նշել, որ տարածաշրջանային կապը և համատեղ նախագծերը կարևոր են նաև անվտանգության տեսանկյունից։ Նա նաև նշել է «Միջին միջանցքի» աճող դերը, որը կարևոր աշխարհատնտեսական և աշխարհաքաղաքական տարածք է։

«Մեր տարածաշրջանում կա հաջող համագործակցության օրինակ՝ ի դեմս Վրաստանի, Թուրքիայի և Ադրբեջանի։ Տասնամյակների ընթացքում ստեղծված ռազմավարական գործընկերությունն այսօր ավելի մեծ նշանակություն է ստանում անվտանգության առումով, քանի որ համատեղ իրականացվող էներգետիկ նախագծերն ու տրանսպորտային միջանցքներն այսօր բոլորովին այլ նշանակություն ունեն», – ասել է նախարարության ղեկավարը։

Մամլո ասուլիսի ժամանակ ասել է ՀՀ-ում Իրանի Իսլամական Հանրապետության արտակարգ և լիազոր դեսպան Խալիլ Շիրղոլամին ասել, է, որ  ԹՐԻՓՓ նախագծի իրականացման հետ կապված ՀՀ-ն հավաստիացրել է, որ Իրանի համար որևէ սպառնալիք չի ստեղծվի:

« ՀՀ-ի Կառավարությունը հավաստիացրել է, որ այս ծրագրի իրականացման հետևանքով որևէ մարտահրավեր կամ սպառնալիք Իրանի համար չի ստեղծվի:  Ես կարծում եմ, որ Իրանի տրամաբանական անհանգստությունը իր սահմանների հարևանությամբ ամերիկացիների ներկայության վերաբերյալ պետք է հստակ արձագանք ստանա և պատասխան տրվի:

Կարծում եմ, որ մենք պետք է ձեռք բերենք մի մեխանիզմ, որի շրջանակներում Հայաստանի Հանրապետությունը կկարողանա իրացնել և իրականացնել ապաշրջափակման ամբողջ ներուժը, սակայն ի լրումն դրա, պետք է կառավարվի և հստակ կերպով արձագանք տրվի ԱՄՆ-ի ներկայության հնարավոր ռիսկերի և Իրանի դեմ ունեցած սպառնալիքներին»,-ասել է դեսպան Խալիլ Շիրղոլամին։

Հաջողությամբ իրականացվել է առաջին ուղիղ սեզոնային չարտերային չվերթը Բուլղարիայի Բուրգաս քաղաքի և Հայաստանի մայրաքաղաք Երևանի միջև։

Այս մասին հաղորդագրություն է տարածել Բուլղարիայում Հայաստանի դեսպանությունը։ 

Առաջին չվերթը, որն իրականացվեց Bulgaria Air ավիաընկերության կողմից, այսօր առավոտյան մեկնեց Բուրգասից և հաջող վայրէջք կատարեց Երևանում՝ ազդարարելով երկու քաղաքների միջև նոր սեզոնային ավիահաղորդակցության մեկնարկը։

Չվերթը կիրականացվի շաբաթը մեկ անգամ՝ յուրաքանչյուր երեքշաբթի, մինչև օգոստոսի վերջ, ապահովելով հարմար և ուղիղ ճանապարհորդություն Բուլղարիայի Սևծովյան ափի և մայրաքաղաք Երեւանի միջև ամառային սեզոնի ընթացքում։

Ակնկալվում է, որ այս նոր չարտերային ծառայությունը կնպաստի զբոսաշրջության զարգացմանը, կխթանի մշակութային փոխանակումը և կստեղծի համագործակցության նոր հնարավորություններ Բուլղարիայի և Հայաստանի միջև։ Ուղիղ ավիահաղորդակցության շնորհիվ ճանապարհորդներն ավելի հեշտ հնարավորություն կունենան բացահայտելու երկու երկրների յուրահատուկ տեսարժան վայրերը, հարուստ պատմությունն ու ջերմ հյուրընկալությունը։

Մեր անկեղծ շնորհակալությունն ենք հայտնում բոլոր գործընկերներին, օդանավակայանների ղեկավարություններին, տուրօպերատորներին և բոլոր նրանց, ում ջանքերի շնորհիվ հնարավոր դարձավ այս նոր երթուղու մեկնարկը։ Շնորհակալություն ենք հայտնում նաև այն ուղևորներին, ովքեր մասնակցեցին այս մեկնարկային չվերթին։

ԲՀԿ առաջնորդ Գագիկ Ծառուկյանի կալանքի միջնորդության վեց ժամ տևած քննությունն ավարտվեց։ Դատարանը՝ դատավոր Գարիկ Աբելյանի նախագահությամբ, հեռացավ խորհրդակցական սենյակ՝ որոշում կայացնելու։ Այս մասին դատարանի բակում լրագրողներին հայտնեցին նրա փաստաբանները։

ՀՀ Քննչական կոմիտեն միջնորդել էր երկու ամսով կալանավորել ԲՀԿ առաջնորդին։

Երեկ վերջինիս առանձնատանն ու բիզնեսներում շուրջ 12 ժամ խուզարկություններ իրականացվեցին, որից հետո նրան ձերբակալեցին և տարան Քննչական կոմիտե, ապա գիշերը տեղափոխեցին դատարան, նիստը, սակայն, հետաձգվեց: Քննությունը սկսվեց այսօր առավոտյան:

Քննչական կոմիտեն 69-ամյա Ծառուկյանին մեղադրանք է առաջադրել առանձնապես խոշոր չափերով խարդախությանն օժանդակելու և փողերի լվացմանն օժանդակելու համար։ Նույն գործով ձերբակալվել է ևս մեկ անձ։

 Դատարանի բակում լրագրողների հետ զրույցում «Ուժեղ Հայաստան» կուսակցության առաջնորդ  Սամվել Կարապետյանը հայտարարել է, որ փողոցային պայքար անպայման լինելու է, մեկ անգամ և վերջնական։

Լրագրողները հիշեցրեցին, վերջին անգամ դատարանի բակում Սամվել Կարապետյանը հայտարարել էր, որ եթե Վարդևանյանը գազ տա, ինքը վարչապետ կդառնա․ Ի՞նչ պատահեց։

«Վարդևանյանն իմ սպասելիքներից էլ շատ գազ տվեց, բայց դեմը զապորոժեց էր կանգնած, ոչ մի գազ չվերցրեց»,-պատասխանեց Կարապետյանը։

Սամվել Կարապետյանը հիշեցրեց, ՍԴ որոշումից հետո եղել է ընդդիմադիր ուժերի հայտարարությունը, այդ ուղղությամբ աշխատաքները շարունակվում են։ Այս օրերին Կարապետյանը հանդիպել է նաև այն թիմակիցների հետ, որոնք աշխատելու են Ազգային Ժողովում։

« Գնում ենք օրինական ճանապարհով իշխանափոխության․ Կգա օրը, մենք բոլորս հիացմունքով ականատես կլինենք»,ասել է Սամվել Կարապետյանը։

Ընդդիմադիր ուժերը միասնական ճակատով պատրաստվում են դիմել Ռուսաստանի Դաշնությանը՝ գործող սահմանափակումները վերանայելու նպատակով, դատարանի բակում լրագրողների հետ զրույցում ասել է «Ուժեղ Հայաստան» կուսակցության նախագահ Սամվել Կարապետյանը։

«Մենք բոլոր ընդդիմադիր ուժերով միասին ենք դիմելու։ Հենց առաջին հավաքը կլինի, մենք այդ քայլին կգնանք»,–ասել է Կարապետյանը։

Նա նաև հաստատել է՝ Նարեկ Կարապետյանն անձամբ վերցնելու է մանդատը։