Category: ArmPulse

Գլխավոր դատախազությունը 2026 թվականի սեպտեմբերի 29-ին, պետական շահերի պաշտպանության լիազորության շրջանակում, հայցադիմում է ներկայացրել Հակակոռուպցիոն դատարան՝ ընդդեմ Պետական գույքի կառավարման կոմիտեի, ՍՊ ընկերության, ՓԲ ընկերության՝ պահանջելով, ի թիվս այլնի, բռնագանձում տարածել Երևան քաղաքի Տիգրան Մեծի պողոտա 16 հասցեում գտնվող (նախկին հասցե՝ Մ. Խորենացի 43, «Այրարատ» կինոթատրոն) անշարժ գույքի վրա:

Գլխավոր դատախազության պահանջի հիմքում դրված է այն հանգամանքը, որ մինչև 2017 թվականի հունվարի 14-ը Երևան քաղաքի Տիգրան Մեծի պողոտա 16 հասցեում գտնվող անշարժ գույքի սեփականաշնորհմանն ուղղված մասնավորեցման գործարքով սահմանված՝ 1.550.000 ԱՄՆ դոլարին համարժեք դրամի ներդրումներ չեն կատարվել:  

Հակակոռուպցիոն դատարանի՝ 2026 թվականի հոկտեմբերի 5-ի որոշմամբ, հայցադիմումն ընդունվել է վարույթ, նույն օրվա մեկ այլ որոշմամբ կիրառվել է հայցի ապահովման միջոց. ՍՊ ընկերությանն արգելվել է կատարել ցանկացած գործողություն, որը կհանգեցնի Տիգրան Մեծի պողոտա 16 հասցեում գտնվող անշարժ գույքի փաստացի կամ իրավական վիճակի փոփոխության:

ՀՀ շուկայի վերահսկողության տեսչական մարմնի կողմից իրականացվող վերահսկողական գործողությունների շրջանակում ավտոմոբիլային բենզինի և դիզել վառելիքի վաճառքով զբաղվող «Ֆասթ Սոլյուշն Քոմփանի» ՍՊԸ-ին պատկանող լցակայանում (հասցե՝ ՀՀ Կոտայքի մարզ, ք․ Եղվարդ, Երևանյան 1) բացահայտվել են խախտումներ։

Ստուգմամբ պարզվել է, որ տնտեսավարողը շահագործում է չստուգաչափված չափիչ միջոցներ, որի արդյունքում կասեցվել է լցակայանի գործունեությունը մինչև հայտնաբերված խախտումների վերացումը։

Կազմակերպության տնօրենին հանձնարարվել է ձեռնարկել անհրաժեշտ միջոցներ խախտումները վերացնելու ուղղությամբ:

Տնտեսավարող սուբյեկտը կենթարկվի վարչական պատասխանատվության՝ օրենքով սահմանված կարգով։

Գոռ Վարդանյանը ֆեյսբուքյան իր էջում գրում է. «Ալեն Սիմոնյա՛ն, լավ կլիներ, որ ժամանակին՝ գոնե մի քանի ամիս հաճախած լինեիք մեր դպրոց մարզվելու, վստահ եմ՝ այլ դաստիարակություն կստանայիք մեր դպրոցում և հիմա կկարողանայիք ձեզ հավասարակշռված պահել։

Գեղարվեստական ֆիլմը դիտեք մինչև վերջ, հասկացեք ֆիլմի իմաստը, մի լսեք ձեր կողքինների ասածները, նրանք ձեզ ծաղրում են, ինքնուրույն մտածեք և մի տրվեք էժանագին մեթոդներին հաճոյանալու համար:

Խորհուրդս ձեզ, դուք պետական բարձր պաշտոն եք զբաղեցնում, խոսելուց առաջ մտածեք՝ նոր արտահայտեք ձեր մտքերը»։

Վարչապետ Նիկոլ Փաշինյանի որոշմամբ ստեղծվել է միջգերատեսչական հանձնաժողով՝ Ռուսաստանի Դաշնության Իրկուտսկի մարզից Հայաստան ժանտախտի ներբերման և տարածման կանխարգելման միջոցառումների համաձայնեցման նպատակով։

Հանձնաժողովը կգործի որպես խորհրդակցական մարմին։ Որոշմամբ հաստատվել են նաև հանձնաժողովի կազմը և գործունեության կարգը։

Հանձնաժողովի նախագահը պետք է ապահովի դրա աշխատանքների կազմակերպումը, իսկ միջգերատեսչական համաձայնեցում պահանջող հարցերի վերաբերյալ անհրաժեշտ առաջարկություններն անհապաղ ներկայացնի վարչապետին։

Առողջապահության նախարարությանը հանձնարարվել է ապահովել հանձնաժողովի կազմակերպատեխնիկական սպասարկումը՝ «Հիվանդությունների վերահսկման և կանխարգելման ազգային կենտրոն» ՊՈԱԿ-ի մասնակցությամբ, ինչպես նաև որոշումն ուժի մեջ մտնելուց հետո հինգ աշխատանքային օրվա ընթացքում նշանակել հանձնաժողովի քարտուղարին։

Հանձնաժողովին անհրաժեշտ մասնագիտական տեղեկատվությունը, ռիսկի գնահատումները և արձագանքման առաջարկությունները պետք է ներկայացվեն Առողջապահության նախարարության և համապատասխան կառույցների կողմից։

Որոշման համաձայն՝ հանձնաժողովի առաջին նիստը պետք է գումարվի որոշումն ուժի մեջ մտնելուց հետո տասը աշխատանքային օրվա ընթացքում։ Նիստում նախատեսվում է քննարկել Իրկուտսկի մարզից Հայաստան ժանտախտի ներբերման և տարածման ռիսկի գնահատումը, կանխարգելման միջոցառումների համաձայնեցումը և առկա պատրաստվածության վիճակը։

Մինչև առաջին նիստը, հրատապ արձագանքման անհրաժեշտություն առաջանալու դեպքում, հանձնաժողովը պետք է գործի հաստատված գործունեության կարգով։

Վարչապետ Նիկոլ Փաշինյանը երկօրյա աշխատանքային այցով մեկնել է Թուրքմենստան: Վարչապետը Թուրքմենբաշի քաղաքում կմասնակցի ԱՊՀ անդամ պետությունների ղեկավարների խորհրդի հերթական նիստին:

Այսօր ավելի վաղ Նիկոլ Փաշինյանը հայտարարել էր, որ ՌԴ նախագահ Վլադիմիր Պուտինի և Ադրբեջանի նախագահ Իլհամ Ալիևի հետ հանդիպումներ նախատեսված չեն, սակայն չի բացառվում, որ շփումներ կարող են լինել։

Լրագրողների հետ  ճեպազրույցում  Հայաստանի վարչապետ Նիկոլ Փաշինյանը հայտնեց, որ Անկախ պետությունների համագործակցության գագաթնաժողովի ընթացքում Հայաստանի վարչապետի հանդիպումներ նախատեսված չեն Ռուսաստանի Դաշնության և Ադրբեջանի նախագահների հետ։

«Վստահաբար, շփումներ կլինեն, այսօր, վաղը միասին նույն տարածքում ենք լինելու։ Պաշտոնապես հանդիպում նախատեսված չէ, բայց շփումներ, զրույցներ լինելու են։ Նախկինում էլ եղել է՝ տեղում պայմանավորվել, խոսել ենք»,- ասաց Փաշինյանը։

Հայաստանի վարչապետը նաև հավելեց՝ Ռուսաստանի և Ադրբեջանի նախագահների հետ հանդիպումներ եղել են դեռ նախորդ ամիս՝ Բիշքեկում, իսկ երեկ կայացել է իր և ՌԴ նախագահ Վլադիմիր Պուտինի հեռախոսազրույցը։

ԱՊՀ գագաթնաժողովը, որի մասնակցելու է նաև Հայաստանի վարչապետը, տեղի կունենա հոկտեմբերի 8-9-ը Թուրքմենստանում։

Մոսկվայում ԱՄՆ դեսպանատունն առողջապահական տագնապ է տարածել Ռուսաստանի Իրկուտսկի մարզում ժանտախտի մասին հաղորդագրությունների վերաբերյալ:

ԱՄՆ դեսպանատունը կոչ է արել ԱՄՆ քաղաքացիներին անհապաղ լքել Ռուսաստանի տարածքը, քանի որ կառավարությունը սահմանափակ հնարավորություններ ունի օգնություն ցուցաբերելու համար։

Դեսպանատունից նշել են, որ տեղյակ են Իրկուտսկի մարզում թոքային ժանտախտի կասկածելի դեպքի վերաբերյալ լրատվամիջոցների հաղորդագրությունների մասին, որը հանգեցրել է մահվան:

Գործակալությունը նաև տեղյակ է Իրկուտսկում տեղի ունեցած միջադեպի հետ կապված կարանտինային միջոցառումների և հիվանդանոցների փակման մասին: 

Դեսպանատունը նաև նշում է, որ ԱՄՆ Պետքարտուղարությունը 4-րդ մակարդակի տագնապ է հայտարարել՝ ամերիկացիներին խորհուրդ տալով ձեռնպահ մնալ Ռուսաստան ճանապարհորդելուց, բայց նաև կոչ է արել իր քաղաքացիներին լքել Ռուսաստանի Դաշնությունը։

Հայաստանն ու Հնդկաստանը քննարկում են Հայաստանում Pinaka Mk-II հրթիռների տեղական արտադրություն և հավաքում կազմակերպելու հնարավորությունը։ Եթե բանակցությունները հանգեն համաձայնության, Հայաստանը կարող է աստիճանաբար անցնել պատրաստի զինամթերքի ներկրումից դեպի սեփական արտադրական կարողությունների ձևավորում, այս մասին հայտնում է Indian Defence Research Wing_ը․

Հնարավոր մոդելը կարող է ներառել հնդկական տեխնոլոգիաների և արտադրական փորձի փոխանցում, հայկական մասնագետների ուսուցում, հավաքում, առանձին բաղադրիչների արտադրություն և հետագայում՝ տեղական արտադրության մասնաբաժնի ավելացում։

Հոդվածի համաձայն՝ տեղական արտադրությունը կարող է Հայաստանին ապահովել զինամթերքի ավելի կայուն մատակարարում և նվազեցնել կրկնվող ներմուծումների անհրաժեշտությունը։

Միաժամանակ, քննարկումները դեռ վերջնական փուլում չեն․ Pinaka-ի կոնկրետ տարբերակը, արտադրության ծավալներն ու տեխնոլոգիաների փոխանցման պայմանները դեռ պետք է համաձայնեցվեն։