Blog

Թրամփի վարչակազմը հավանություն է տվել Իրանի բարձրաստիճան պաշտոնյաների, այդ թվում՝ նախագահ Մասուդ Փեզեշքիանի և արտգործնախարար Աբբաս Արաղչիի մուտքի արտոնագրերի տրամադրմանը։

Նրանք նախատեսում են հաջորդ շաբաթ Նյու Յորքում մասնակցել ՄԱԿ-ի Գլխավոր ասամբլեայի բարձր մակարդակի նիստերին։

ԱՄՆ Պետդեպարտամենտը հայտարարել է, որ հավանություն է տվել Իրանի «հիմնական պատվիրակության» անդամների, ինչպես նաև ՄԱԿ-ի նիստերին մասնակցելու համար անհրաժեշտ առանցքային աշխատակիցների վիզաների տրամադրմանը։ Ամերիկացի պաշտոնյաների խոսքով՝ հիմնական պատվիրակության կազմում են Իրանի նախագահ Մասուդ Փեզեշքիանը և արտաքին գործերի նախարար Աբբաս Արաղչին։ Պաշտոնյաները խոսել են անանունության պայմանով՝ վիզաների վերաբերյալ տեղեկատվության գաղտնիությանն առնչվող օրենսդրության պահանջներին համապատասխան։

Որոշումը ուշագրավ է՝ հաշվի առնելով Իրանի և ԱՄՆ-ի միջև ավելի քան վեց ամիս շարունակվող հակամարտությունը։ Միաժամանակ, դեռևս չկան հստակ նշաններ, որ կողմերը մոտ են Հորմուզի նեղուցի գործունեության վերականգնման կամ Իրանի միջուկային ծրագրի շուրջ բանակցություններին վերադառնալու համաձայնությանը։

Վիզաների տրամադրումը տեղի է ունենում նաև տարածաշրջանում լարվածության աճի պայմաններում։

Որպես ՄԱԿ-ի կենտրոնակայանը հյուրընկալող երկիր՝ ԱՄՆ-ի հնարավորությունները սահմանափակ են օտարերկրյա առաջնորդների՝ Գլխավոր ասամբլեայի նիստերին մասնակցելուն խոչընդոտելու հարցում։ Այնուամենայնիվ, նախկինում Վաշինգտոնը հրաժարվել է մուտքի արտոնագիր տրամադրել ԱՄՆ-ի հետ ակտիվ հակամարտության մեջ գտնվող երկրների որոշ առաջնորդների կամ փորձել է սահմանափակել նրանց վիզայի դիմումների գործընթացը։

Լոռու մարզի դատախազության միջնորդագրի արդյունքում՝ լուծվել է օրենքի էական խախտմամբ կնքված վարձակալության պայմանագիրը, և 2 միլիոն 710 հազար դրամ կադաստրային արժեքով 4 հա մակերեսով հողամասը վերադարձվել է համայնքի տիրապետմանը։ Այս մասին տեղեկացնում են ՀՀ գլխավոր դատախազությունից:

Հակակոռուպցիոն կոմիտեում քննված քրեական վարույթի շրջանակում պարզվել էր, որ Ս.Ա.-ն, 1993-2017 թվականներին զբաղեցնելով Լոռու մարզի Պուշկինո համայնքի ղեկավարի պաշտոնը, 2007 թվականի հունիսի 26-ին անձամբ մասնակցել և հաղթող էր ճանաչվել համայնքին սեփականության իրավունքով պատկանող 4 հա մակերեսով վարելահողի՝ 25 տարի ժամկետով վարձակալության տրամադրման նպատակով կազմակերպված մրցույթում։

Միաժամանակ, Ս.Ա.-ն հանդիսացել էր մրցույթի կազմակերպիչ և մրցութային հանձնաժողովի նախագահ, որպիսի պայմաններում մրցույթին իր մասնակցությունը հակասել էր «Հրապարակային սակարկությունների մասին» օրենքով սահմանված արգելքին։

Քրեական վարույթի շրջանակում 2026 թվականի հուլիսի 14-ին Ս.Ա.-ի նկատմամբ կայացվել էր քրեական հետապնդում չհարուցելու մասին որոշում՝ քրեական պատասխանատվության ենթարկելու վաղեմության ժամկետն անցած լինելու հիմքով։

Միաժամանակ, քրեական վարույթի նյութերը ստացվել էին Լոռու մարզի դատախազությունում՝ պետական շահերի պաշտպանության նպատակով համապատասխան միջոցներ ձեռնարկելու հարցը քննարկելու համար։

Ուսումնասիրության արդյունքում Լոռու մարզի դատախազությունը, հաշվի առնելով, որ հողամասի վարձակալության մրցույթում Պուշկինո համայնքի ղեկավարի պաշտոնը զբաղեցնող անձի կողմից հաղթող ճանաչվելը տեղի էր ունեցել օրենքի էական խախտմամբ, Գյուլագարակ համայնքի ղեկավարին միջնորդագիր էր ներկայացրել՝ վարձակալության պայմանագիրը լուծելու վերաբերյալ։

Միջնորդագրի հիման վրա՝ վարձակալության պայմանագիրը լուծվել է։

2026 թվականի սեպտեմբերի 11-ին Կադաստրի կոմիտեում կատարված պետական գրանցման արդյունքում Գյուլագարակ համայնքի տիրապետմանն է վերադարձվել 4 հա մակերեսով հողամաս՝ 2 միլիոն 710 հազար դրամ կադաստրային արժեքով։

ԱՄՆ-ն նախատեսում է Կիևին փոխանցել 29,6 մլն դոլար արժողությամբ Patriot որսացող հրթիռներ, որոնք ավելի վաղ ձեռք էր բերել Բեռլինը: Կանոնների համաձայն՝ գնորդ երկիրը չի կարող ամերիկյան սպառազինությունը փոխանցել երրորդ կողմին՝ առանց Վաշինգտոնի համաձայնության։ Այժմ հրթիռների փոխանցումը պետք է հաստատի ԱՄՆ Կոնգրեսը։

«Ամերիկյան կառավարությունը պատրաստ է թույլտվություն տրամադրել՝ հաշվի առնելով քաղաքական, ռազմական և տնտեսական բնույթի նկատառումները, ինչպես նաև Մարդու իրավունքների և սպառազինությունների վերահսկման հարցերը։ Ուկրաինան ձգտում է ձեռք բերել այդ համակարգերը՝ իր ՀՕՊ ներուժն ամրապնդելու համար և արդեն ունի նույն տեսակի զինամթերք»,- ասվում է ԱՄՆ պետքարտուղարության հայտարարության մեջ։

ԱՄՆ պետքարտուղարությունը նաև հաստատել է Սաուդյան Արաբիային 48 F-35 կործանիչի վաճառքը՝ ավելի քան 24 միլիոն դոլարով` այդ քայլը որակելով որպես «ՆԱՏՕ-ից դուրս ԱՄՆ-ի կարևոր գործընկերոջ անվտանգության ամրապնդում»։ Եթե Կոնգրեսը հաստատի համաձայնագիրը, Սաուդյան Արաբիան կստանա ամերիկյան F-35 կործանիչների առաջին խմբաքանակը։