Category: YN.am

Ջերմոցային տնտեսություններին տրամադրվող վարկերի տոկոսադրույքների սուբսիդավորման ծրագրում փոփոխություններ են կատարվել։

Օգոստոսի 13-ին Հայաստանի կառավարության նիստում ընդունված նոր որոշման համաձայն՝ աջակցության ծրագրի մասնակիցներ կդառնան 1 հա և ավելի ընդհանուր մակերեսով ջերմոցներ կառավարող այն ձեռնարկատերերը, որոնք 2026 թվականի ընթացքում արտադրել և իրացրել են գյուղատնտեսական արտադրանք։

Բացի այդ, մինչև 2027 թվականի հունիսի 1-ը երկարաձգվել է ֆինանսական հաստատություններ հայտ ներկայացնելու ժամկետը, և վերացվել է հայտը միայն մեկ անգամ ներկայացնելու պահանջը։ Որոշման ընդունման արդյունքում հնարավոր կլինի ապահովել ջերմոցների աշխատանքի անընդհատությունը և բարձրացնել դրանց արտադրողականությունը։

Սահմանվել է բանակում ծառայությունից տարկետում ստանալու իրավունք՝ պետության համար առաջնահերթ նշանակություն ունեցող բնական-տեխնոլոգիական և ինժեներամաթեմատիկական ուղղություններով բուհերում սովորելու նպատակով։ Համապատասխան որոշումն ընդունվել է օգոստոսի 13-ին Հայաստանի կառավարության նիստում։

Այդ իրավունքը տարածվում է այն քաղաքացիների վրա, որոնց «Պատիվ ունեմ» ծրագրի շրջանակում տրամադրված տարկետումը դադարեցվել էր առողջական վիճակի պատճառով։

Բացի այդ, գիտության և կրթության ոլորտներում նշանակալի ձեռքբերումներ ունեցող քաղաքացուն կտրվի տարկետում աշխարհի լավագույն բարձրագույն ուսումնական հաստատությունների ակադեմիական վարկանիշի թոփ-50-ում ընդգրկված հաստատություններում ուսումնառության ժամանակահատվածի համար, սակայն ոչ ավելի, քան մինչև 27 տարին լրանալը։

ԱՄՆ նախագահ Դոնալդ Թրամփն այժմ գոլֆ է խաղում բանակային հակաօդային պաշտպանության համակարգի քողի տակ։ Նրա դաշտից արված լուսանկարներում երևում է Avenger համալիրը, որը տեղադրված է պետության ղեկավարի գտնվելու վայրից ընդամենը մի քանի մետր հեռավորության վրա, հաղորդում է Bild-ը։ Համալիրի աշխատանքի համար պատասխանատու են ավելի քան մեկ տասնյակ զինծառայողներ։

Avenger-ը նախատեսված է մարտական գործողությունների համար և հագեցած է Stinger հրթիռներով։ Ամերիկյան լրատվամիջոցների տվյալներով՝ համակարգը կարող էին տեղակայել հնարավոր անօդաչու թռչող սարքերի հարձակումներից պաշտպանվելու համար։

Անվտանգության լրացուցիչ միջոցները կապված են այն բանի հետ, որ Թրամփն արդեն մի քանի մահափորձերի թիրախ է դարձել։ 2024 թվականի հուլիսին նախընտրական հանրահավաքի ժամանակ հրաձիգը վիրավորել էր նրա ականջը, իսկ ավելի ուշ Ֆլորիդայում նրա գոլֆի դաշտում ձերբակալել էին զինված մի տղամարդու։ ԱՄՆ-ի՝ Իրանի դեմ գործողության ֆոնին իշխանությունները նաև մտավախություն ունեն Թեհրանի կողմից հնարավոր վրեժխնդրության վերաբերյալ։

Վարչապետ Նիկոլ Փաշինյանը Կառավարության նիստից հետո ճեպազրույցում հայտնել է, որ բանակում գրանցված վերջին մահվան դեպքի հետևանքով Ռազմական ոստիկանությունում, ՊՆ բարոյահոգեբանական ապահովման վարչությունում կլինեն կադրային փոփոխություններ։

«Ես արդեն կայացրել եմ որոշում, որի համաձայն՝ Ռազմական ոստիկանությունում կունենանք փոփոխություն, բարոյահոգեբանական ապահովման վարչությունում նույնպես կունենանք կադրային փոփոխություն։ Մանրամասն կվերլուծենք, թե ինչու այդ ուղղությամբ մեր գործադրած ջանքերը մեզ համար ցանկալի արդյունքներ չեն տալիս, և կգանք հետևությունների։ Այո, պետք է լինի անհատական պատասխանատվություն»,- նշել է Փաշինյանը։

Ավելի վաղ Պաշտպանության նախարարությունը հայտնել էր, որ օգոստոսի 13-ին հայտնաբերվել է ՊՆ N զորամասի զինծառայող Գրիգոր Էդգարի Զաքարյանի դին՝ հրազենային վնասվածքով:

Հանրապետության տարածքում`

Օգոստոսի 12-16-ի գիշերը և կեսօրից հետո շրջանների մեծ մասում սպասվում է կարճատև անձրև և ամպրոպ, առանձին վայրերում տեղումները կլինեն հորդառատ, հնարավոր է կարկուտ:

Քամին` հյուսիսարևելյան և արևելյան` 4-7 մ/վ, ամպրոպի ժամանակ սպասվում է քամու ուժգնացում 20-25 մ/վ։ Օգոստոսի 11-16-ն Արմավիրի մարզում, Արագածոտնի և Կոտայքի նախալեռներում, Շիրակի մարզի առանձին հատվածներում երեկոյան ժամերին սպասվում է քամու ուժգնացում՝ 17-20 մ/վ արագությամբ։

Օդի ջերմաստիճանն էապես չի փոխվի:

Երևան քաղաքում`

Օգոստոսի 12-16-ի գիշերը և երեկոյան քաղաքի առանձին հատվածներում սպասվում է կարճատև անձրև և ամպրոպ, ամպրոպի ժամանակ քամու ուժգնացում՝ 18-23 մ/վ։ Օգոստոսի 12-16-ի երեկոյան ժամերին սպասվում է քամու ուժգնացում՝ 15-18 մ/վ։

«Ժողովուրդ» օրաթերթը գրում է. ««Ժողովուրդ»-ը վարչապետի աշխատակազմին 8 կետից բաղկացած հարցում էր ուղարկել՝ պարզելու հուլիսի 27-ին Նիկոլ Փաշինյանի և Վլադիմիր Պուտինի հեռախոսազրույցի իրական օրակարգն ու ձեռք բերված պայմանավորվածությունները։

Մեզ հետաքրքրում էր՝ ո՞ւմ նախաձեռնությամբ է կայացել զրույցը, քննարկվե՞լ են ընտրությունները, նոր իշխանության ձևավորումը, հայ-ռուսական հարաբերությունների հետագա ընթացքը, ինչպես նաև ռուսական շուկայում հայկական արտադրանքի նկատմամբ սահմանափակումները։

Առանձին հարցրել էինք նաև՝ ի՞նչ պատասխան է տվել Պուտինը Փաշինյանի բարձրացրած խնդրին, խոստացե՞լ է որևէ կոնկրետ քայլ կամ հանձնարարական, և ի՞նչ ապրանքների արտահանման մասին է խոսքը։

Վարչապետի աշխատակազմի պատասխանը, սակայն, այս հարցերին չի տալիս։ Փոխարենը մեզ հայտնել են, որ Նիկոլ Փաշինյանը հուլիսի 29-ին լրագրողների հետ զրույցում արդեն անդրադարձել է Պուտինի հետ հեռախոսազրույցի մանրամասներին։

Այսինքն՝ վարչապետի աշխատակազմը 8 կոնկրետ հարցերի պատասխանելու փոխարեն լրագրողին ուղղորդում է վարչապետի՝ ավելի վաղ հրապարակային հայտարարությանը, որտեղ չկային մեր հարցերի պատասխանները։

Հատկապես ուշագրավ է, որ մենք հարցրել էինք ոչ թե ընդհանուր գնահատականների, այլ կոնկրետ պայմանավորվածությունների, Պուտինի դիրքորոշումների և հնարավոր քայլերի մասին։

Իսկ ռուսական շուկայում հայկական արտադրանքի սահմանափակումների թեման այս պահին պարզապես դիվանագիտական դետալ չէ։ Դա կենսական հարց է ՀՀ տնտեսության համար»։

Մանրամասները՝ «Ժողովուրդ» օրաթերթի այսօրվա համարում:

Մեր տեսլականն այն է, որ վերջնական արդյունքում, եթե դա հնարավոր լինի, Մեքքայի համաձայնագրի շրջանակում միավորենք տարածաշրջանի բոլոր երկրները։ Այդ մասին հայտարարել է Թուրքիայի նախագահ Էրդողանը, հաղորդում են տեղական լրատվամիջոցները։

«Այս համաձայնագիրը ուղղված չէ որևէ երկրի դեմ։ Դրա միակ նպատակը տարածաշրջանում խաղաղության և կայունության, ինչպես նաև մեր ժողովուրդների բարեկեցության խթանումն է։

Մենք մեզ վրա ենք վերցրել պատմական պատասխանատվություն՝ նպաստելու մեր տարածաշրջանում կայունությանը։

Համաձայնագրի գլխավոր նպատակը զսպման ուժեղացումն է։ Այն բաց է բոլոր եղբայրական ժողովուրդների համար»,- հավաստիացրել է Էրդողանը։

Բուլղարացի գուշակ Վանգային վերագրվող կանխատեսումները 2026 թվականին կրկին հայտնվել են ուշադրության կենտրոնում, գրել է Daily Mail-ը։

Նրա հետևորդների խոսքով՝ այս տարվա հինգ կանխատեսումներից երկուսն արդեն, իբր թե, իրականացել են, սակայն ևս երեքը՝ առավել մտահոգիչները, պետք է իրականանան մինչև տարվա վերջ։

Մասնավորապես, Վանգայի կողմնակիցները նրա կանխատեսումների հետ են կապում բնական աղետների մի շարք և արհեստական բանականության արագ տարածումը, որն աստիճանաբար մարդկանց փոխարինում է աշխատաշուկայում։

Միևնույն ժամանակ, երեք ենթադրյալ իրադարձությունները, որոնք դեռ տեղի չեն ունեցել, զգալիորեն ավելի դրամատիկ տեսք ունեն։ Դրանց թվում են՝ հսկայական տիեզերանավի հայտնվելը և մարդկության առաջին շփումն արտաերկրային քաղաքակրթության հետ, երրորդ համաշխարհային պատերազմի սկիզբը և իշխանափոխությունը Ռուսաստանում։

Վանգան, որը մահացել է 1996 թվականին, իբր թե կանխատեսել էր 2001 թվականի սեպտեմբերի 11-ի ահաբեկչությունները ԱՄՆ-ում, Չեռնոբիլի ԱԷԿ-ի աղետը, արքայադուստր Դիանայի մահը, 2004 թվականին Հնդկական օվկիանոսում տեղի ունեցած ցունամին և COVID-19 համավարակը։ Սակայն այս պնդումների հուսալի հաստատումներ չկան։

Գուշակն իր կանխատեսումների մասին գրավոր գրառումներ չի թողել։ Նրան վերագրվող մարգարեությունների մեծ մասը գրի են առել հարազատներն ու հետևորդները միայն նրա մահից հետո և հետագայում դրանք մեկնաբանել են իրենք։ Այդ պատճառով անհնար է հավաստիորեն պարզել, թե կոնկրետ որ արտահայտություններն են իսկապես պատկանել Վանգային և արդյոք դրանք արվել են մինչև այն իրադարձությունները, որոնց այսօր դրանք վերագրում են։

2026 թվականի ենթադրյալ կանխատեսումներից մեկը վերաբերում էր լայնածավալ բնական աղետներին։ Վանգայի հետևորդները դա կապում են մարտին Մյանմայում տեղի ունեցած 7,7 մագնիտուդով երկրաշարժի, ինչպես նաև աշխարհի տարբեր տարածաշրջաններում ուժեղ շոգի, անտառային հրդեհների, ջրհեղեղների և փոթորիկների հետ։ Ընդ որում, կանխատեսումը չէր պարունակում աղետների կոնկրետ ժամկետներ, վայրեր կամ բնույթ, իսկ նման երևույթներ տեղի են ունենում ամեն տարի։

Երկրորդ կանխատեսումը կապում են աշխատաշուկայում մարդկանց մեքենաներով լայնածավալ փոխարինման հետ։ Սակայն արհեստական բանականության զարգացումը սկսվել է 2026 թվականից շատ առաջ, իսկ պարզել, թե կոնկրետ երբ է Վանգան, իբր թե, արել նման կանխատեսում և ինչ է նա իրականում ասել, անհնար է։

Մնացած ամենաանսովոր կանխատեսումներից մեկը համարվում է արտաերկրային կյանքի հետ ենթադրյալ շփումը։ Տարածված մեկնաբանության համաձայն՝ 2026 թվականի նոյեմբերին հսկայական տիեզերանավը պետք է մտնի Երկրի մթնոլորտ։ Այս մարգարեության նկատմամբ հետաքրքրությունն ուժեղացել է ամերիկյան իշխանությունների կողմից չբացահայտված անոմալ երևույթների մասին գաղտնազերծված նյութերի հրապարակման ֆոնին։ Սակայն չբացահայտված օբյեկտների առկայությունն ինքնին արտաերկրային նավերի գոյության ապացույց չէ․ նման երևույթները կարող են բացատրվել անօդաչու սարքերով, օդապարիկներով, ինքնաթիռներով, արբանյակներով, մթնոլորտային երևույթներով կամ սենսորների սխալներով։

Ավելի մտահոգիչ կանխատեսումը վերաբերում է երրորդ համաշխարհային պատերազմի հնարավոր սկզբին։ Դրա մեկնաբանությունների համաձայն՝ Չինաստանը, իբր թե, կփորձի գրավել Թայվանը, որից հետո Ռուսաստանի և ԱՄՆ-ի միջև հարաբերությունների սրումը կվերածվի ուղիղ ռազմական հակամարտության։ Օգոստոսի 7-ի դրությամբ այս իրադարձություններից ոչ մեկը տեղի չի ունեցել։

Վերջապես, Վանգայի կողմնակիցները նրան վերագրում են մինչև 2026 թվականի վերջը Ռուսաստանի ղեկավարության փոփոխության մասին կանխատեսում։ Ըստ այս վարկածի՝ Վլադիմիր Պուտինը պետք է կորցնի իշխանությունը և իր տեղը զիջի նոր առաջնորդի։

Միևնույն ժամանակ, Ռուսաստանի նախագահի մոտալուտ հրաժարականի հրապարակային նշաններ չկան։ Նրա առողջության և քաղաքական ապագայի մասին բազմաթիվ լուրեր շրջանառվում են արդեն երկար տարիներ, սակայն մինչ այժմ չեն հանգեցրել իշխանափոխության։

Փորձագետներն ու հետազոտողները զգուշացնում են, որ Վանգայի մարգարեությունները հուսալի ապացուցողական հիմք չունեն։ Այն պնդումները, թե նա, իբր թե, կանխատեսել է տեղի ունեցած իրադարձությունների մինչև 85 տոկոսը, նույնպես անկախ հաստատում չեն ստացել։