Category: MegaNews

ԲՀԿ առաջնորդ Գագիկ Ծառուկյանը ֆեյսբուքյան էջից տեղեկացնում է․

«Նոր ԱԺ-ում միշտ զգացվելու է ԲՀԿ-ի և մեր ծրագրի (Առաջարկ Հայաստանին) պակասը։ Պատճառը գրագետ և պատրաստված գործիչների քչությունը չէ. նման պատգամավորներ բոլոր խմբակցություններում էլ կան։ Խնդիրը այլ տեսանկյունների, այլընտրանքային արդյունավետ լուծումների, առաջարկվող ծրագրային այլ մոտեցումների և դրանց կրող ամբողջական ուժի բացակայությունն է։

Մեծ հաշվով, ես իմ թիմին նախապատրաստել էի հենց խորքային ծրագրային պայքարի, որը ցավոք չստացվեց ու ամենևին՝ ոչ մեր մեղքով։

Ինչպես գիտեք, վերջին 10-15 տարում ես չեմ առնչվել որևէ բիզնեսի միկրոկառավարմանը, ընթացիկ կառավարման պրոցեսներին (և´ օրենքը թույլ չէր տալիս, և´ իրականում դա ինձ արդեն հետաքրքիր չէր), և դա ինձ թույլ էր տալիս Հայաստանի տնտեսությանը, նրա զարգացման ռիսկերին և պոտենցիալին նայել մակրոտեսանկյունից։ Հիմա էլ, կտրված լինելով ինֆորմացիոն շատ հոսքերից, քաղաքական-հանրային միկրոպրոցեսներից, միկրոհարաբերություններից, ես հնարավորություն ունեմ խնդիրներին մակրոտեսանկյունից նայելու։ Չեմ օգտագործում «կողքից նայել» ձևակերպումը, որովհետև իմ կենսագրությամբ, որպես Ծառուկյան, ես չեմ կարող և երբեք չեմ կարողացել կողքից նայել իմ երկրում տեղի ունեցող պրոցեսներին։ Եթե կարողանայի, եթե ունենայի իմ երկրի հանդեպ որոշակի անտարբերության ունակություն, ապա լրիվ ուրիշ պայմաններում կլինեի։ Դա էլ իմ տեսակն է։

Ինչ եմ տեսնում ես հիմա՝ այդ հայացքով

Ես տեսնում եմ, որ Հայաստանը կանգնած է ցնցումների մեծ հավանականության առաջ։ Ընդ որում, խոսքը ոչ թե տեսական ապագայի, այլ՝ շատ իրական, ամիսների հեռանկարի մասին է։ Աչք չենք թարթի՝ կհայտնվենք բարդագույն վիճակում։ Միայն ռուս-ուկրաինական հակամարտության և Իրան-ԱՄՆ առճակատման բերած ռիսկերը հերիք են սա հասկանալու համար։

Ինձ չափազանց մտահոգում են մեր երկրի տնտեսական պրոբլեմները, և արհեստականորեն մեզ պարտադրված ընտրության հարցը՝ ԵՄ, թե ԵԱՏՄ։ Մեր առաջ նման սուր ընտրության հարց դնում են թե´ Արևմուտքը, թե´ Ռուսաստանը, բայց խնդիրն այն է, որ մենք ինքներս ենք մեզ հասցրել նման կոշտ, արհեստական ջրբաժանի։

Իրավիճակին գումարեք ադրբեջանական պահանջները, թուրքական հորդորները։

Սա արդեն երկու աթոռի վրա նստելու խնդիր չէ, ինչպես միամտորեն կարծում են շատերը։ Երկու աթոռն ամեն դեպքում ընտրության հնարավորություն տալիս է։ Սա մի վիճակ է, որտեղ ցանկացած որոշում, ցանկացած քայլ կարող է հակառակ կողմից լուրջ ռիսկերի, լուրջ հակազդեցության բերել։

Հիմա ի՞նչ ենք անելու, որ մեր փոքր Հայաստանը չմտնի խոշոր աշխարհաքաղաքական ցնցումների մեջ։ Սա է այսօրվա համապետական ամենաիրական օրակարգը։

Ես չգիտեմ՝ այս խորհրդարանը ինչքան կաշխատի, տարբեր վարկածներ եմ լսում, բայց քանի դեռ կա իմ քաղաքական ուժը, ես՝ որպես ղեկավար, և իմ գործընկերների նեղ թիմը, որոնց հետ միշտ քննարկում ենք նման հարցերը, մենք այս գիծն ենք տանելու. Հայաստանը աշխարհաքաղաքական մոտիվացիաներով չպետք է մտնի ցնցումների մեջ։ Ձևեր կան, քայլեր կան՝ սրությունը հանելու, ուժեղների բախումների ժամանակ «ոտնատակ» չլինելու համար։

Մենք պարտավոր ենք մեր երկիրը հանել այս վերջնագրային բանաձևերից։ Սա արդեն իշխանություն-ընդդիմություն պայքարի խնդիր չի։ Վնասները կրելու են բոլորը, առանց բացառության։ Ինձ սա շատ է մտահոգում։ Լուծումներ կան, գուցե հեշտ չեն, գուցե բարդ են, գուցե մեծ ջանք են պահանջում, բայց դրանք կան»։

«Ժողովուրդ» օրաթերթը գրում է. «Վարչապետ Նիկոլ Փաշինյանը շարունակում է անակնկալների մեջ պահել ոչ միայն հանրությանը, այլև սեփական թիմին։ Վերջին շրջանում իշխող «Քաղաքացիական պայմանագիր» կուսակցության շրջանակներում դժվարանում են հասկանալ վարչապետի քաղաքական և կադրային որոշումների տրամաբանությունը։

«Ժողովուրդ»-ի իշխանական աղբյուրների փոխանցմամբ՝ մի շարք նշանակումներ և վերադասավորումներ իրականացվում են արագ և հաճախ առանց նախնական լայն քննարկումների, ինչն էլ թիմի ներսում առաջացնում է անորոշություն ու զարմանք։ Վերջին ամիսներին նման քննարկումների առիթ են դարձել Ազգային ժողովի նախագահ Ալեն Սիմոնյանի շուրջ ստեղծված իրավիճակը, Արայիկ Հարությունյանի՝ վարչապետի աշխատակազմից խորհրդարան տեղափոխվելը, ինչպես նաև այլ կադրային փոփոխություններ։

«Ժողովուրդ» օրաթերթի տեղեկություններով՝ հերթական անակնկալը կապված է «Արարատցեմենտ» գործարանի ժամանակավոր կառավարման հետ։

Մինչ այս իշխանական շրջանակներում գրեթե որոշված էր համարվում, որ գործարանի ժամանակավոր կառավարիչ կնշանակվի Էկոնոմիկայի նախարարի տեղակալ Էդգար Զաքարյանը։ Ըստ նույն աղբյուրների՝ նա արդեն պատրաստվում էր նոր պաշտոնին, հավաքել էր իրերը նախարարությունում և սպասում էր տեղափոխմանը։

Սակայն կառավարության երեկվա նիստից հետո իրավիճակը կտրուկ փոխվել է։ «Ժողովուրդ» օրաթերթի տեղեկություններով՝ Նիկոլ Փաշինյանը նիստից հետո Էկոնոմիկայի նախարար Գևորգ Պապոյանին հայտնել է, որ «Արարատցեմենտի» ժամանակավոր կառավարիչը լինելու է ոչ թե փոխնախարար Զաքարյանը, այլ վարչապետի օգնական, Արագածոտնի նախկին մարզպետ Դավիթ Գևորգյանը։

Այս որոշումն անակնկալի է բերել թե՛ նախարարության աշխատակիցներին, թե՛ գործարանի հետ կապված գործընթացներում ներգրավված պաշտոնյաներին։ Արդյունքում Զաքարյանը մնացել է նախկին կարգավիճակում, իսկ արդեն սկսված տեղափոխության գործընթացը փաստացի դադարեցվել է։

Իշխանական կուլիսներում այս փոփոխությունը դիտարկվում է որպես ևս մեկ ազդակ, որ Փաշինյանը շարունակում է անձամբ և հաճախ վերջին պահին վերաձևել իր թիմի ներսում ազդեցության և պատասխանատվության բաշխումը»։

Վարչապետի մամուլի խոսնակ Նազելի Բաղդասարյանը գրել է.

«Հարգելի՛ հայրենակիցներ,

տեղեկացնում եմ, որ ավարտում եմ իմ աշխատանքը Հայաստանի Հանրապետության վարչապետի մամուլի քարտուղարի պաշտոնում՝ Ազգային ժողովի պատգամավորի լիազորություններ ստանձնելու կապակցությամբ։

Վերջին երեքուկես տարիների ընթացքում աշխատել եմ վարչապետի աշխատակազմում։ Մամուլի քարտուղարի պատասխանատու պաշտոնը ստանձնել եմ մեր երկրի համար բարդ ժամանակահատվածում՝ փորձելով առավելագույնս ապահովել հանրային հաղորդակցության, թափանցիկության և հաշվետվողականության անհրաժեշտ պայմանները, լինել հնարավորինս հասանելի և նպաստել հանրության հետ արդյունավետ հաղորդակցությանը։

Շնորհակալություն եմ հայտնում Հայաստանի Հանրապետության վարչապետ Նիկոլ Փաշինյանին՝ բարձր վստահության, համատեղ աշխատանքի, ձեռք բերած արժեքավոր փորձի և ընձեռած բացառիկ հնարավորության համար։

Իմ շնորհակալությունն եմ հայտնում նաև պետական կառավարման տարբեր մարմինների գործընկերներին, մամուլի քարտուղարներին և խոսնակներին՝ փոխվստահության վրա հիմնված համագործակցության համար։

Առանձնահատուկ ուզում եմ ընդգծել վարչապետի աշխատակազմի «Տեղեկատվության և հասարակայնության հետ կապերի» վարչության, «Ռազմավարական հաղորդակցության» վարչության, ինչպես նաև Հանրային կապերի և տեղեկատվության կենտրոնի բոլոր գործընկերների հետ աշխատանքը, որը կարևոր է եղել հաղորդակցության արդյունավետ կազմակերպման համար։

Եվ, իհարկե, հատուկ շնորհակալություն բոլոր լրագրողներին և զանգվածային լրատվության միջոցների ներկայացուցիչներին։ Մեր համագործակցությունը ինձ համար մշտապես եղել է կարևոր։ Ձեր աշխատանքն ու հետևողականությունը չափազանց կարևոր են հանրության իրազեկման և պետական կառույցների գործունեության լուսաբանման հարցում։

Ինչպես գիտեք նախօրեին, «Քաղաքացիական պայմանագիր» կուսակցության Վարչության որոշմամբ ընտրվել եմ Ազգային ժողովի Աշխատանքի և բարեկեցության հարցերի մշտական հանձնաժողովի նախագահի թեկնածու։

Կհանդիպենք Ազգային ժողովում»։

ՀՀ էկոնոմիկայի նախարար Գևորգ Պապոյանը հրաման է ստորագրել, ըստ որի՝ Դավիթ Գևորգյանը նշանակվել է  «Արարատցեմենտ» ՓԲԸ կառավարիչ: 

Հրամանը՝ ստորև.

ՀՀ վարչապետ Նիկոլ Փաշինյանը երեկ լրագրողների հետ զրույցում հայտարարել է, որ Արփինե Սարգսյանը կվերանշանակվի Ներքին գործերի նախարարի պաշտոնում։ Թեև պաշտոնական նշանակման գործընթացը դեռ պետք է ավարտվի սահմանադրական կարգով, վարչապետի հայտարարությունը փաստացի ցույց է տալիս, որ կառավարությունը շարունակելու է վստահել վերջին տարիներին ՆԳ նախարարությունում իրականացված քաղաքականության ղեկավարումը հենց Արփինե Սարգսյանին։

Բայց ո՞վ է Արփինե Սարգսյանը, և ինչպիսի՞ մասնագիտական ճանապարհ է անցել մինչև Հայաստանի ամենապատասխանատու գերատեսչություններից մեկի ղեկավար դառնալը։

Իրավաբանական ոլորտից՝ պետական կառավարման համակարգ

Արփինե Սարգսյանի մասնագիտական գործունեությունը պետական կառավարման համակարգում սկսվել է 2015 թվականին, երբ նա նշանակվեց ՀՀ արդարադատության նախարարության աշխատակազմի օրենսդրության զարգացման և իրավական վերլուծությունների վարչության քրեաիրավական օրենսդրության բաժնի փորձագետ։

Նույն ժամանակահատվածում նա մասնագիտացել է քրեական արդարադատության և քրեակատարողական ոլորտներում՝ ներգրավվելով իրավական բարեփոխումների մշակման աշխատանքներում։ Արդեն մեկ տարի անց Եվրոպայի խորհրդի «Աջակցություն Հայաստանում պրոբացիոն ծառայության ստեղծմանը» ծրագրում նա աշխատում էր որպես ազգային փորձագետ և վերապատրաստող՝ մասնակցելով Հայաստանում պրոբացիայի համակարգի ներդրմանը։

Քայլ առ քայլ՝ ավելի մեծ պատասխանատվություն

2016-2020 թվականներին Արփինե Սարգսյանը զբաղեցրել է արդարադատության նախարարության տարբեր պաշտոններ՝ նախարարի տեղակալի օգնականից մինչև վարչության պետ։

Այս տարիներին նրա գործունեությունը կենտրոնացած էր քրեական արդարադատության համակարգի խոշոր բարեփոխումների վրա։ Նա մասնակցել է Հայաստանի նոր Քրեական և Քրեական դատավարության օրենսգրքերի մշակման և լրամշակման գործընթացներին, համակարգել է նոր օրենսգրքերին գործող օրենսդրության համապատասխանեցման աշխատանքները, ինչպես նաև ղեկավարել է քրեակատարողական և պրոբացիայի ոլորտների առաջին ռազմավարական փաստաթղթերի մշակումը։

Նրա մասնակցությամբ իրականացվել են նաև քրեակատարողական համակարգի արդիականացմանն ուղղված մի շարք ծրագրեր, իսկ 2019-2022 թվականներին նա եղել է քրեակատարողական ծառայության կենտրոնական մարմնի տեղաբաշխման հանձնաժողովի անդամ։

Հակակոռուպցիոն քաղաքականությունից մինչև միջազգային հարթակներ

Արփինե Սարգսյանի գործունեությունը չի սահմանափակվել միայն օրենսդրական աշխատանքով։

2017 թվականից նա վերապատրաստել է պետական կառավարման մարմինների հակակոռուպցիոն ոլորտի պատասխանատուներին, եղել է նոր Քրեակատարողական օրենսգրքի մշակման աշխատանքային խմբի անդամ, դասավանդել է մասնագիտական վերապատրաստման ծրագրերում և շարունակել գիտական գործունեությունը Երևանի պետական համալսարանի իրավագիտության ֆակուլտետում։

2022 թվականին նա գլխավորել է ՀՀ հակակոռուպցիոն կոմիտեի ծառայողների առաջին կազմի ընտրության մրցութային հանձնաժողովը, ինչպես նաև մասնակցել է ՄԱԿ-ի «Կանանց նկատմամբ խտրականության բոլոր ձևերի վերացման մասին» կոնվենցիայի շրջանակում Հայաստանի ազգային զեկույցի ներկայացմանը։

Նույն ժամանակահատվածում նա ներկայացրել է Հայաստանի Հանրապետությունը Եվրոպայի խորհրդի Խոշտանգումների կանխարգելման կոմիտեում և ՄԱԿ-ի Խոշտանգումների դեմ կոմիտեում։

ՆԳ նախարարության ստեղծման առանցքային մասնակիցներից

2022 թվականը դարձավ նրա պետական կարիերայի ամենակարևոր շրջադարձային փուլերից մեկը։

Հունվարի 21-ին Արփինե Սարգսյանը նշանակվեց արդարադատության նախարարի տեղակալ, իսկ նույն թվականից գլխավորեց նաև Ոստիկանության բարեփոխումների բազմաշահառու աշխատանքային խումբը։

Հենց այդ շրջանում մեկնարկեցին ոստիկանության համակարգի խորքային բարեփոխումները, որոնց արդյունքում ստեղծվեց Հայաստանի Հանրապետության Ներքին գործերի նախարարությունը։ Արփինե Սարգսյանը համարվում է այդ գործընթացի հիմնական համակարգողներից և գաղափարական պատասխանատուներից մեկը։

2023 թվականի հունվարի 9-ին նա նշանակվեց Ներքին գործերի նախարարի տեղակալ՝ շարունակելով համակարգել արդեն մեկնարկած ինստիտուցիոնալ փոփոխությունները։

ՆԳ նախարար

2024 թվականի նոյեմբերի 20-ին Հանրապետության նախագահի հրամանագրով, վարչապետ Նիկոլ Փաշինյանի առաջարկությամբ, Արփինե Սարգսյանը նշանակվեց Հայաստանի Հանրապետության ներքին գործերի նախարար։

Նրա պաշտոնավարման ընթացքում շարունակվել են ոստիկանության, փրկարար ծառայության, միգրացիայի և քաղաքացիական պաշտպանության ոլորտների կառավարման բարեփոխումները, ինչպես նաև ՆԳ նախարարության նոր կառավարման մոդելի ներդրման աշխատանքները։

Վերանշանակման սպասում

Երեկ լրագրողների հետ զրույցում վարչապետ Նիկոլ Փաշինյանը հայտարարեց, որ Արփինե Սարգսյանը կվերանշանակվի Ներքին գործերի նախարարի պաշտոնում։ Եթե այդ որոշումը պաշտոնապես ձևակերպվի, ապա սա կլինի նրա երկրորդ անընդմեջ պաշտոնավարման ժամկետը նախարարի կարգավիճակում։

Սա նաև քաղաքական ուղերձ է կառավարության կողմից՝ շարունակելու այն բարեփոխումները, որոնք վերջին տարիներին իրականացվել են ՆԳ նախարարությունում՝ սկսած ոստիկանության վերափոխումից մինչև նոր նախարարության ինստիտուցիոնալ կայացումը։

Կին՝ ուժային գերատեսչության ղեկավար

Հայաստանի անկախության պատմության ընթացքում Ներքին գործերի համակարգը երկար տարիներ ղեկավարել են հիմնականում իրավապահ կամ ուժային համակարգերից եկած տղամարդ պաշտոնյաներ։ Արփինե Սարգսյանի նշանակումը այս առումով առանձնահատուկ էր. նա համակարգ է եկել ոչ թե ոստիկանությունից կամ ռազմական կառույցներից, այլ իրավաբանական և օրենսդրական ոլորտից։

Նրա մասնագիտական կենսագրությունը կառուցվել է փորձագիտական աշխատանքի, պետական ծառայության և իրավական քաղաքականության մշակման շուրջ՝ առանց ընդգծված կուսակցական կամ հրապարակային քաղաքական գործունեության։

Այսօր Արփինե Սարգսյանը համարվում է այն պետական պաշտոնյաներից մեկը, որի կարիերան ձևավորվել է պետական ծառայության աստիճանական առաջխաղացման ճանապարհով՝ փորձագետից մինչև Հայաստանի ամենամեծ և ամենապատասխանատու գերատեսչություններից մեկի ղեկավար։

Մարգարիտա Դավթյան

Հայաստանի Հանրապետության կառավարությունը որոշման նախագիծ է հրապարակել, որով նախատեսվում է Ահարոն Սահակյանին 2026 թվականի հուլիսի 31-ից ազատել Հայաստանի Հանրապետության Կոտայքի մարզպետի պաշտոնից։

Որոշման նախագծի համաձայն՝ պաշտոնից ազատումը կատարվում է Հայաստանի Հանրապետության Սահմանադրության 160-րդ հոդվածի 2-րդ մասի, ինչպես նաև «Տարածքային կառավարման մասին» օրենքի 6-րդ հոդվածի 1-ին մասի և 5-րդ մասի 1-ին կետի հիման վրա։

Նախագծով սահմանվում է, որ Ահարոն Սահակյանը կդադարեցնի Կոտայքի մարզպետի լիազորությունները 2026 թվականի հուլիսի 31-ից։