Category: Hayelia.am

«Ժողովուրդ» օրաթերթը գրում է. ««Ժողովուրդ» օրաթերթի կառավարական աղբյուրների փոխանցմամբ՝ առաջիկայում Կոտայքի մարզպետի պաշտոնում կարող է նշանակվել ՔՊ-ական պատգամավոր Լիլիթ Ստեփանյանը։

Թեև Ստեփանյանը լրագրողների հետ զրույցում հերքել էր մարզպետ նշանակվելու մասին հրապարակումները, մեր տեղեկություններով՝ որոշումն արդեն կայացված է, և նա մոտ օրերս կարող է վայր դնել պատգամավորական մանդատը՝ տեղափոխվելով գործադիր իշխանություն։

Լիլիթ Ստեփանյանը մինչև պատգամավոր ընտրվելը զբաղեցրել է Հրազդանի քաղաքապետի ժամանակավոր պաշտոնակատարի պաշտոնը։ Այնուհետև ընտրվել է Ազգային ժողովի պատգամավոր։ Նա ունի նաև դասախոսական գործունեության և երկարամյա մասնագիտական աշխատանքի փորձ։

Մեր աղբյուրների փոխանցմամբ՝ նշանակման վերաբերյալ պաշտոնական որոշումը կարող է հրապարակվել առաջիկա օրերին։

Ըստ նույն աղբյուրների՝ իշխանությունները փորձում են այդ պաշտոնում նշանակել այնպիսի անձի, որը կկարողանա Կոտայքում հոկտեմբեր-նոյեմբերին սպասվող ՏԻՄ ընտրությունների ընթացքում արդյունավետ վերահսկողություն իրականացնել և իշխանություններին տեղում առկա իրավիճակի վերաբերյալ ամբողջական տեղեկություններ փոխանցել։

«Ժողովուրդ»-ը երեկ ևս մեկ անգամ փորձել է Լիլիթ Ստեփանյանից ճշտել այս տեղեկությունները, սակայն վերջինս հայտարարել է, որ նման տեղեկությունների չի տիրապետում»։

Առնվազն 15 մարդ է զոհվել, տասնյակ մարդիկ վիրավորվել են Կիևի և Կիևի մարզի ուղղությամբ Ռուսաստանի գիշերային հրթիռային և անօդաչու թռչող սարքերով հարվածի հետևանքով, հայտնել են ուկրաինական իշխանությունները:

Հաղորդվում է, որ սա Ուկրաինայի վրա ամենամասշտաբային հարձակումներից մեկն էր:

Կիևի ռազմական վարչակազմը հայտնել է, որ հրթիռներն ու անօդաչու թռչող սարքերը հարվածել են բնակելի շենքերի և մի քանի պահեստների:

«Հակառակորդը նորից նպատակադրված հարվածներ է հասցնում խաղաղ բնակիչներին և քաղաքացիական ենթակառուցվածքներին», – ասվում է գերատեսչության հաղորդագրության մեջ:

Վարչակազմի տվյալներով՝ մայրաքաղաքում զոհվել է մեկ կին, առնվազն 26 մարդ վիրավորվել է. հարվածները հրդեհներ են առաջացրել քաղաքի չորս շրջաններում:

Կիևի մարզում, տարածաշրջանային իշխանությունների տվյալներով, հարվածների հետևանքով զոհվել է 14 մարդ, որոնցից ինը՝ Բրովարիի շրջանում, ավելի քան 20-ը վիրավորվել են:

Իսրայելը չի նահանջի Գազայի հատվածում իր դիրքերից այնքան ժամանակ, քանի դեռ պաղեստինյան ՀԱՄԱՍ ծայրահեղական շարժումը չի զինաթափվել: Նման հայտարարությամբ հանդես է եկել Իսրայելի վարչապետ Բենիամին Նեթանյահուն, հաղորդում է ՏԱՍՍ-ը։

«Ես ամուր կանգնած եմ մեր անվտանգային շահերի պաշտպանության դիրքերում: Մենք չենք նահանջի ներկայիս սահմանագծերից, քանի դեռ ՀԱՄԱՍ-ը ամբողջությամբ զինաթափված չէ», – հայտարարել է Նեթանյահուն:

Նեթանյահուի խոսքով՝ Դոնալդ Թրամփը և նրա թիմը կարծում են, որ կարող են զինաթափել ՀԱՄԱՍ-ին և ապառազմականացնել Գազան:

«Մենք ուսումնասիրում ենք այդ հարցը։ Նրանք մեզ նախագիծ են ուղարկել, մենք դրա հետ համաձայն չենք, և մենք նրանց ուղարկել ենք մեր դիտողությունները», – շարունակել է իսրայելցի վարչապետը:

Նեթանյահուն հավելել է, որ Գազայի հատվածում իսրայելցի զինվորները հրաման են ստացել անելու անհրաժեշտ ամեն ինչ իրենց, Իսրայելի տարածքն ու իսրայելցի քաղաքացիներին պաշտպանելու համար:

Իսրայելի վարչապետի խորհրդական Դմիտրի Գենդելմանն անցյալ շաբաթվա վերջին հայտարարել էր, որ Իսրայելը պահանջում է ՀԱՄԱՍ-ի ամբողջական զինաթափում, ներառյալ զենքի դուրսբերումը Գազայից և հատվածի ամբողջական ապառազմականացումը՝ որպես ցանկացած գործընթացի նախապայման:

Նրա խոսքով՝ քննարկվող 15 կետից բաղկացած փաստաթղթում չկա բավարար պատասխան այդ պահանջներին, և Իսրայելն իր առարկություններն այս կապակցությամբ փոխանցել է հատուկ բանագնաց Թոնի Բլերին:

Մի քանի օր է՝ հանրությունը տեղեկացել է, որ Հայփոստի տնօրենը ստանում է ամսական 10,000 դոլար աշխատավարձ։ Այս մասին գրել է «Ապրելու երկիր» կուսակցության համահիմնադիր Մեսրոպ Առաքելյանը:

«Իսկ գիտե՞ք՝ որտեղից իմացանք։ Պարզապես պետական ընկերության տնօրենը պաշտոնատար անձի կին է և ամուսնու հետ հայտարարագիր է ներկայացրել։ Եվ եթե Հայփոստի տնօրենը լիներ ոչ թե այդ պատգամավորի կինը, այլ մեկ այլ պատգամավորի քեռակինը, ապա մենք այդպես էլ չէինք իմացա, թե նա ինչքան աշխատավարձ է ստանում։

Չէինք իմանա այնպես, ինչպես չգիտենք մնացած այլ պետական ընկերությունների ղեկավարների աշխատավարձերը և ծախսերը, օրինակ տարեկան 300 մլն դոլար շրջանառություն ունեցող պետական ինչ-որ հիմնադրամի ղեկավարների աշխատավարձերը և ընդհանրապես, այդ շատ հետաքրքիր հիմնադրամի գործունեության մասին շատ ու շատ բաներ։

Առաջիկայում կխոսենք այդ շատ հետաքրքիր հիմնադրամի մասին ու Հայփոստը դրա կողքին ուղղակի հրաշք կդառնա»,-գրել է նա։

Ռուսաստանը զանգվածային հարված է հասցրել Կիևին։ ՌԴ օդային հարվածների արդյունքում Կիևի մի շարք բնակելի շենքերում հրդեհներ են բռնկվել, ինչի հետևանքով զոհվել է առնվազն 15 մարդ, վիրավորվել՝ ավելի քան 40-ը։

 Հրթիռային հարձակման մասին հայտնել է նաև Կիևի քաղաքապետ Վիտալի Կլիչկոն՝ զգուշացնելով, որ քաղաքում գործում են հակաօդային պաշտպանության համակարգերը։ Ըստ նախնական տեղեկությունների՝ հարձակման հիմնական թիրախը եղել է «ՄԼՊ-Չայկա» լոգիստիկ կենտրոնը, որտեղ, ըստ հրապարակումների, պահվում են անօդաչու թռչող սարքեր, դրանց բաղադրիչներ և արտասահմանյան սպառազինություն։ Mash Telegram ալիքի տեղեկություններով՝ Կիևի ուղղությամբ արձակվել է առնվազն 35 հրթիռ։

 Հաղորդվում է նաև, որ ուկրաինական անօդաչու թռչող սարքերի գիշերային հարձակումից հետո այրվել է Տուլայի մարզում գտնվող Wildberries-ի խոշորագույն բաշխիչ կենտրոններից մեկը։

 Համալիրի ընդհանուր մակերեսը կազմում է 194 500 քառակուսի մետր։ Հաղորդվում է նաև, որ Տուլայի մարզում ԱԹՍ-ների հարձակումների հետևանքով վնասվել են նաև երկու բազմաբնակարան շենք և երկու արտադրական օբյեկտ։

ՀՀԿ ԳՄ անդամ, նախկին պատգամավոր Արտակ Զաքարյանը գրում է․

«Իրանի հետ հինգ ամիս տևած պատերազմի ընթացքում, ԱՄՆ բանակը զգալիորեն սպառել է բարձր ճշգրտության հեռահար հրթիռների իր պաշարները։ Այդ մասին Reuters գործակալությանը հայտնել են իրավիճակին ծանոթ իր աղբյուրները։ Այն մտահոգություն է առաջացրել ԱՄՆ ԶՈւ պատրաստվածության հարցում՝ ապագա հակամարտություններին արձագանքելու տեսանկյունից։

Խոսքը նախևառաջ «երկիր-երկիր» տիպի տակտիկական հրթիռների՝ Army Tactical Missile Systems (ATACMS) և Precision Strike Missile (PrSM) մասին է։ Reuters-ի աղբյուրների խոսքով՝ ԱՄՆ-ն օգտագործել է այդ սպառազինության «գրեթե ողջ» առկա պաշարը։ Այս հեռահար զինամթերքը համարվում է ամերիկյան զինանոցի կարևորագույն բաղադրիչներից մեկը, քանի որ հնարավորություն է տալիս անվտանգ հեռավորությունից իրականացնել բարձր ճշգրտության հարվածներ։
Նշենք, որ ԱՄՆ-ի կողմից Ուկրաինային տրամադրված ATACMS հրթիռները կարևոր դեր են ունեցել պատերազմում՝ թույլ տալով ուկրաինական ուժերին խոցել թիրախներ Ռուսաստանի տարածքում։ Իսկ PrSM-ը նոր սերնդի հրթիռ է՝ ավելի մեծ հեռահարությամբ և ժամանակակից հնարավորություններով, որն աստիճանաբար պետք է փոխարինի ATACMS-ին։
Վերլուծաբանների գնահատմամբ՝ մեկ միլիոն դոլարից ավելի արժողությամբ այս հրթիռները կարևոր նշանակություն կունենան մեծ մասշտաբի հնարավոր հակամարտության դեպքում։ Սակայն նրանք մտահոգություն են հայտնել, որ պատերազմի ձգձգման պայմաններում, հրթիռների պաշարների նվազումը կարող է սահմանափակել պոտենցիալ հակառակորդներին զսպելու ԱՄՆ-ի հնարավորությունները։
Reuters-ի հարցմանն ի պատասխան՝ Սպիտակ տունը տարածել է նախագահ Դոնալդ Թրամփի հայտարարությունը, նշելով՝ «Միացյալ Նահանգներն ունի շատ ավելի մեծ քանակությամբ զինամթերք, քան աշխարհի ցանկացած այլ երկիր։ Եվ շատ ավելին, քան մեզ անհրաժեշտ է»։
ATACMS, PrSM և THAAD հակահրթիռային համակարգեր արտադրող Lockheed Martin ընկերությունը չի պատասխանել զինամթերքի պաշարների համալրման մասին Reuters-ի հարցմանը: Նույն կերպ չի արձագանքել նաև Raytheon ընկերությունը, որն արտադրում է Tomahawk թևավոր հրթիռները և Patriot հակահրթիռային համակարգը։
Միևնույն ժամանակ, Պենտագոնի ներկայացուցիչ Շոն Փարնելը Reuters-ին հայտարարել է, որ ԱՄՆ-ի բանակն աշխարհում ամենահզորն է և ունի այն ամենը, ինչ անհրաժեշտ է նախագահի որոշմամբ ցանկացած ժամանակ և ցանկացած վայրում առաջադրանքներ կատարելու համար։
Գործակալության տվյալներով՝ վերջին շաբաթվա ընթացքում զինամթերքի առկա պաշարների վերաբերյալ տվյալներն ակտիվորեն քննարկվել են ԱՄՆ դաշնային կառավարությունում։ Նախագահ Թրամփի վարչակազմում ակտիվ քննարկումներ են ընթացել այն մասին, թե որքան ժամանակ Վաշինգտոնը կկարողանա շարունակել հարվածներ հասցնել Իրանին՝ առանց զինամթերքի պաշարները համալրելու։
Reuters-ի երկու աղբյուրների խոսքով՝ վերջին շաբաթների ընթացքում ռազմական ղեկավարությունը բազմիցս զգուշացրել է պաշտպանական սպառազինության, այդ թվում՝ Patriot համակարգի հրթիռների պաշարների նվազման մասին, որոնք օգտագործվում են հիմնականում բալիստիկ հրթիռների ոչնչացման համար։
Նախորդ շաբաթ, մի շարք լրատվամիջոցներ հաղորդեցին, որ Դոնալդ Թրամփը հրաժարվել է Իրանի դեմ նոր լայնածավալ ռազմական գործողությունից նաև այն պատճառով, որ ռազմական խորհրդականները նրան նախազգուշացրել էին զինամթերքի պաշարների նվազման մասին։ Սակայն ՄԱԿ-ում ԱՄՆ դեսպան Մայք Ուոլցը կտրականապես հերքել է այդ տեղեկությունները՝ հայտարարելով, որ Միացյալ Նահանգներն ունեն բավարար սպառազինություն, Իրանի դեմ գործողությունները շարունակելու համար։
Մի քանի օր առաջ, Ռազմավարական և միջազգային հետազոտությունների կենտրոնը (CSIS), հրապարակել է զեկույց, ըստ որի՝ 2026թ. փետրվարից հուլիս ընկած ժամանակահատվածում ԱՄՆ-ն սպառել է Patriot համակարգի հրթիռների պաշարների շուրջ 65%-ը։ Բացի այդ, պատերազմի մեկնարկի համեմատ, THAAD հակահրթիռների քանակը նվազել է շուրջ 38%-ով՝։
Reuters-ին չի հաջողվել ծանոթանալ պաշտոնական տվյալներին, այնուամենայնիվ, գործակալությունը նշում է, որ իր երկու աղբյուրները հաստատել են CSIS-ի վերոնշյալ գնահատականները։
Բացի այդ, աղբյուրներից մեկի խոսքով՝ պատերազմի սկզբից ի վեր, ԱՄՆ-ն օգտագործել է Tomahawk թևավոր հրթիռների համաշխարհային պաշարի գրեթե կեսը։
Նշենք, որ Tomahawk-ը ԱՄՆ ռազմածովային ուժերի հիմնական հեռահար հարվածային սպառազինությունն է։ Այդ հրթիռներն արձակվում են կործանիչներից, հածանավերից, սուզանավերից և արդեն երկար տարիներ հնարավորություն են տալիս խոցել լավ պաշտպանված թիրախներ՝ առանց օդաչուների կյանքը վտանգելու։

Արագածոտնի թեմի երիտասարդաց միության շուրջ 200 անդամներ մասնակցեցին համաթեմական ուխտագնացությանը՝ դեպի Գուգարաց թեմի առաջնորդանիստ Սուրբ Գրիգոր Նարեկացի եկեղեցի։
Գուգարաց թեմի առաջնորդ Գերաշնորհ Տեր Հովնան եպիսկոպոս Հակոբյաննի հանդիսապետությխմբ մատուցվեց
Սուրբ և Անմահ Պատարագ:
Սուրբ Պատարագը մատուցեց Արագածոտնի թեմի երիտասարդաց միության հոգևոր պատասխանատու արժանապատիվ Տեր Փառեն քահանա Առաքելյանը։
Տեր Հայրն, իր շնորհակալությունն հայտնեց Գուգարաց թեմի առաջնորդ Գերաշնորհ Տեր Հովնան եպիսկոպոս Հակոբյանին՝ հայրական օրհնության և ջերմ հյուրընկալության համար, ինչպես նաև Արագածոտնի թեմի վարչական խորհրդի ատենապետ Հոգեշնորհ Տեր Շնորհք աբեղա Պալոյանին՝ երիտասարդական ծրագրերի իրականացման և համաթեմական ուխտագնացության կազմակերպմանը իր օրհնության և աջակցության համար:
Տեր Հայրն իր որդիական առանձնակի երախտագիտությունն հայտնեց Արագածոտնի թեմի առաջնորդ Գերաշնորհ Տեր Մկրտիչ եպիսկոպոս Պռոշյանին՝ թեմի երիտասարդական կյանքի զարգացմանն ու երիտասարդների հոգևոր դաստիարակությանը մշտապես հայրական հոգածությամբ և օրհնությամբ աջակցելու համար։
Տեր հայրը դիմելով երիտասարդներին՝ պատգամեց հավատարիմ մնալ իրենց քրիստոնեական հավատքին ու ազգային արժեքներին, սիրել և պահպանել Սուրբ Եկեղեցին, լինել պատասխանատու ու նվիրված իրենց համայնքների կյանքում։ Տեր Հայրն ընդգծեց, որ երիտասարդները երբեք միայնակ չեն իրենց ծառայության և կյանքի ճանապարհին՝ հավաստիացնելով, որ Եկեղեցին մշտապես իրենց կողքին է՝ աղոթքով, օրհնությամբ և հոգածությամբ։
Հատկանշական էր երիտասարդների մասնակցությունը Սուրբ Պատարագին. Սուրբ Խորհրդին երգում էին համայնքների եկեղեցական երգչախմբերի անդամները, իսկ Սուրբ խորանում սպասավորում էին այն դպիրները, ովքեր իրենց համայնքների եկեղեցիներում հավատարմորեն ծառայում են իրենց հոգևոր հովիվների հետ։
Սուրբ Պատարագից հետո երիտասարդները մասնակցեցին սիրո ճաշի:
Այնուհետև անցկացվեց հոգևոր-ուսուցողական հանդիպում-քննարկում ՝ «Տասը պատվիրանները և Ինը երանիները թեմայով»:
Երիտասարդները բաժանվեցին խմբերի, քննարկեցին, ներկայացրին իրենց մտորումներն ու ընկալումները՝ անդրադառնալով, թե ինչպես են Աստծո պատվիրաններն ու Քրիստոսի երանիները դրսևորվում իրենց առօրյա կյանքում։ Քննարկումն ամփոփեց արժանապատիվ Տեր Փառեն քահանա Առաքելյանը՝ ներկայացնելով Սուրբ Գրքի Տասը պատվիրանների և Ինը երանիների հոգևոր նշանակությունը՝ պատասխանելով նաև երիտասարդներին հուզող հարցերին։
Համաթեմական ուխտագնացությունն ավարտվեց միասնական աղոթքով, նոր ծանոթություններով և հոգևոր մեծ ուժ ստացած։
Այս օրը ևս մեկ առիթ է վերհաստատելու, որ երիտասարդությունը, միավորված Սուրբ Եկեղեցու շուրջ, կոչված է լինելու հավատքի, սիրո և ծառայության կրողը՝ իր համայնքներում և հասարակության մեջ: