Category: FreeNews

Օգոստոսի 12-ին՝ ժամը 09։55-ի սահմաններում, Ազատության պողոտա և Մամիկոնյանց փողոցի խաչմերուկում բախվել են Երևանի բնակիչներ 56-ամյա Կարեն Ա․-ի վարած «Նիսսան Տիդա» մակնիշի և 47-ամյա Արման Բ․-ի վարած «Ֆորդ» մակնիշի շտապօգնության ավտոմեքենաները։

Shamshyan.com-ի հաղորդմամբ՝ վթարի հետևանքով Կարեն Ա․-ի ուղևոր, Ռուսաստանի Դաշնության քաղաքացի 39-ամյա Էմիլլիա Ս.-ն մարմնական վնասվածքներով տեղափոխվել է «Երևան» բժշկական կենտրոն։

Վթարի փաստով քննչական բաժնում նախաձեռնվել է քրեական վարույթ։

«Քննարկվում է ԱԺ պետական-իրավական հարցերի մշտական հանձնաժողովի նախագահի թեկնածությունը, և բոլորս էլ մատնանշեցինք, թե ինչպիսի առանցքային հանձնաժողովի մասին է խոսքը: 8-րդ գումարման Ազգային ժողովն ընդունել է 2613 օրենք, որոնցից 833-ը քննարկվել են հենց այս հանձնաժողովում»:

Այս մասին «Քաղաքացիական պայմանագիր» խմբակցության անունից ելույթում հայտարարեց ՔՊ պատգամավոր Ալխաս Ղազարյանը: 

Նրա խոսքով՝ այս թվերը պարզապես վիճակագրություն չեն, այլ վկայում են վերոնշյալ հանձնաժողովի աշխատանքի ծավալի ու ծանրաբեռնվածության մասին:

Բարձր գնահատելով Արուսյակ Ջուլհակյանի գործունեությունը՝ թե՛ որպես այդ հանձնաժողովի անդամ, հանձնաժողովի նախագահի տեղակալ ու թե՛ որպես հանձնաժողովի նախագահ, Ղազարյանը ասաց՝ նա կարող է կրել այդ պարտականությունը մեծ պատասխանատվությամբ:  

Վերջին օրերին, նրա խոսքով, կարմիր թելով անցնում են մի քանի թեմաներ, որոնց չի կարող չանդրադառնալ:

Դրանցից մեկը, օրինակ, ըստ Ղազարյանի, վերաբերում է Հայ առաքելական եկեղեցուն:

Դիմելով ընդդիմադիր գործընկերներին՝ նա նկատեց՝ նրանք, ելնելով քաղաքական նպատակահարմարությունից, շարունակում են այդ թեման տաք պահել՝ հստակ իմանալով իրենց դիրքորոշումը այդ հարցի շուրջ: 

«Մեզ համար կաթողիկոսի աթոռը զբաղեցրած անձն ունի կանոնական խախտում, որի հիմքով չպետք է զբաղեցնի այդ աթոռը: Ամեն ինչ շատ պարզ է, և սա հատկապես կարևոր է ընդգծել այն քննարկման շրջանակում, երբ մենք խոսում ենք օրենքի և իրավունքի մասին:

Ի դեպ, այդ հանգամանքով որևէ փաստարկված և հիմնավոր հերքում որևէ մեկս երբեք չի լսել: Եվ ևս մեկ հստակ բան՝ Հայ առաքելական եկեղեցին այդ անձը չէ, եկեղեցին նույնականացնելով մեկ անձի հետ՝ դուք հստակ միտում ունեք մոլորեցնել ձեր և մեր ընտրողներին»,- հայտարարեց Ալխաս Ղազարյանը:

«iPhone 17-երով եկել, «iPhone 4»-ի սոֆթով «բուքսավատ» եք անում, ժողովրդին էլ նույնն եք ստիպում»:

Այս մասին Ազգային ժողովում իր ելույթի ժամանակ ասաց ԱԺ փոխնախագահ Հայկ Կոնջորյանը՝ դիմելով ընդդիմությանը՝ մասնավորապես «Ուժեղ Հայաստան» խմբակցության ղեկավար Նարեկ Կարապետյանին:

«Ձեր սոֆթը ուրիշ սոֆթ է, պարո՛ն Կարապետյան, 100 տարի առաջվա սոֆթ է, հասկանո՞ւմ եք, ձեր սոֆթը հին է, պրոբլեմն այն է, որ դուք Ձեր iPhone 17-երով եկել եք, բայց, ասենք, iPhone 4-5-ի սոֆթով ուզում եք «բուքսավատ» անել, մեր ժողովրդին էլ մտցնում եք այդ բուքսավատի մեջ: Դուք այս ժամանակակից աշխարհի մեջ եկել եք, ուզում եք նավատորմով գնալ և հասնել չգիտեմ ուր: Դա նույնն է, որ պատմական Հայաստանի նավիգատորով գնաք և փորձեք ուղևորվել դեպի Արարատ լեռ, կամ Էրզրում»,- ընդգծեց Կոնջորյանը:

Նա նաև նկատեց. «Դուք Հայաստանի Հանրապետության քաղաքացիներին վաճառում եք պատմական Հայաստանի երազանքը, որովհետև դա հեշտ է: Մարդկանց էմոցիաների վրա գնալ, խաղարկել և քաղաքական օրակարգ գեներացնելը շատ հեշտ է, բայց այդ նարատիվը կենսունակ չէ: Քաղաքականությունն այն մասին է, որ քո գաղափարախոսությունը համապատասխանի իրական կյանքի պրակտիկ դրսևորումներին»:

Երիտասարդության միջազգային օրվա առթիվ ԿԳՄՍ նախարարությունը կարևորել է երիտասարդների կրթության, զարգացման, ստեղծարարության և քաղաքացիական մասնակցության դերը՝ ընդգծելով, որ պետության ռազմավարական առաջնահերթություններից է յուրաքանչյուր երիտասարդի ներուժի լիարժեք իրացման համար անհրաժեշտ պայմանների ստեղծումը։

«Սիրելի՛ երիտասարդներ, սրտանց շնորհավորում եմ ձեզ Երիտասարդության միջազգային օրվա կապակցությամբ։

Այս տարվա խորագիրը՝ «Տարբեր միջավայրեր, ընդհանուր ձգտումներ», մեզ հիշեցնում է, որ անկախ այն հանգամանքից՝ երիտասարդները որ համայնքում կամ բնակավայրում են ապրում, սովորում, աշխատում, ստեղծագործում կամ նոր են սկսում իրենց կյանքի ուղին, նրանց միավորում են նույն արժեքներն ու ձգտումները՝ կրթվել, զարգանալ, ստեղծել, մասնակցել և իրենց ներդրումն ունենալ Հայաստանի ու աշխարհի ապագայի կերտման գործում։

 

Այսօր, առավել քան երբևէ, ակնհայտ է, որ պետության ամենամեծ հարստությունը մարդն է։ ՀՀ կառավարության զարգացման տեսլականում մարդկային կապիտալը դիտարկվում է որպես մեր երկրի գլխավոր ռազմավարական ռեսուրսը, իսկ կրթված, նախաձեռնող, ստեղծարար և պատասխանատու քաղաքացին՝ Հայաստանի զարգացման և մրցունակության հիմքը։ Այդ մարդկային կապիտալի ձևավորման առանցքում դուք եք՝ մեր երիտասարդները, որոնց գիտելիքը, արժեքները, մասնագիտական կարողությունները, ստեղծագործ միտքն ու ակտիվ քաղաքացիական մասնակցությունն են ձևավորում Հայաստանը։

 

Վերջին տարիներին Հայաստանում իրականացվել են երիտասարդական ոլորտի կարևորագույն բարեփոխումներ։ «Երիտասարդական քաղաքականության մասին» օրենքի ընդունմամբ ձևավորվել է ոլորտի նոր իրավական հիմքը, որն ամրագրում է երիտասարդների մասնակցությունը հանրային կյանքին, երիտասարդական աշխատանքի զարգացումը, միջոլորտային համագործակցությունը և երիտասարդների ներուժի լիարժեք իրացման համար անհրաժեշտ պայմանների ստեղծումը։ Մեր նպատակն է՝ յուրաքանչյուր երիտասարդ լինի ոչ միայն պետական քաղաքականության շահառու, այլև դրա համահեղինակն ու գործընկերը։

 

Այս ճանապարհին կարևոր ձեռքբերումներից է 2018–2026 թվականների ընթացքում իրականացվող երիտասարդական միջավայրերի (կենտրոն ու տարածք) ստեղծման պետական միջոցառումը, որի շրջանակում ՀՀ կրթության, գիտության, մշակույթի և սպորտի նախարարությունը, տեղական ինքնակառավարման մարմիններն ու հասարակական կազմակերպությունները միավորել են իրենց ջանքերը՝ ձևավորելու երիտասարդների համար ժամանակակից, անվտանգ և զարգացման հնարավորություններով հարուստ միջավայրեր։ Արդեն իսկ կնքված համագործակցության հուշագրերի շնորհիվ ընդլայնվում է երիտասարդական ենթակառուցվածքների ցանցը, և 2026 թվականի ավարտին Հայաստանում կգործեն 27 երիտասարդական միջավայրեր։

 

Այս կենտրոններն ու տարածքները պարզապես ֆիզիկական վայրեր չեն. դրանք դարձել են համայնքային կյանքի ակտիվ կենտրոններ, որոնցում երիտասարդները ձեռք են բերում նոր գիտելիք ու հմտություններ, ներգրավվում են ոչ ֆորմալ կրթության, կամավորության, առաջնորդության, ձեռնարկատիրության և քաղաքացիական մասնակցության ծրագրերում, նախաձեռնում ու իրականացնում են փոփոխություններ իրենց համայնքներում։

 

Այսպիսով՝ այս տարվա խորագիրը՝ «Տարբեր միջավայրեր, ընդհանուր ձգտումներ», Հայաստանում ստանում է իր գործնական արտահայտությունը․ տարբեր համայնքներում ստեղծվող հնարավորությունները միավորվում են մեկ նպատակի շուրջ՝ ստեղծելու պայմաններ, որ յուրաքանչյուր երիտասարդ, անկախ բնակության վայրից, ունենա հավասար հնարավորություն զարգանալու, իրացնելու իր ներուժը և մասնակցելու երկրի զարգացմանը։

 

Սիրելի՛ երիտասարդներ, ձեր սերունդն ապրում է փոփոխությունների ժամանակաշրջանում։ Դրանք պահանջում են գիտելիք, ճկունություն, պատասխանատվություն և համարձակություն։ Համոզված եմ, որ դուք ունեք այդ ներուժը և պատրաստ եք այն ծառայեցնել՝ ի բարօրություն մեր պետության ու հասարակության։

 

Հավատացե՛ք ձեր ուժերին, մի՛ դադարեք սովորել, ստեղծագործել և նոր գաղափարներ կյանքի կոչել։ Պետությունը շարունակելու է ներդրումներ կատարել ձեր կրթության, կարողությունների զարգացման և ինքնիրացման հնարավորությունների ընդլայնման գործում, որովհետև յուրաքանչյուր երիտասարդի հաջողություն նաև Հայաստանի Հանրապետության հաջողությունն է։

 

Շնորհավո՛ր Երիտասարդության միջազգային օրը»,- ասված է նախարարի ուղերձում։

Մեր Սահմանադրության մեջ գրված չէ, որ եկեղեցին անջատ է պետությունից, առավել ևս՝ Հայ Առաքելական եկեղեցին։ Երբ 1995 թվականին ընդունվեց Սահմանադրությունը, դրանում եկեղեցու մասին որևէ դրույթ չկար, կար միայն կրոնի և խղճի ազատության մասին դրույթ։

2005 թվականին, երբ Ռոբերտ Քոչարյանի նախագահության օրոք անցկացվեցին Սահմանադրական փոփոխությունները, առաջին անգամ ներառվեց դրույթ, ըստ որի՝ եկեղեցին անջատ է պետությունից, և նշվեց նաև, որ օրենքն ապահովում է բոլոր կրոնական կազմակերպությունների ազատությունը։

Այս մասին Ազգային ժողովի օգոստոսի 11-ի նիստում ասաց «Քաղաքացիական պայմանագիր» խմբակցության պատգամավոր Սիսակ Գաբրիելյանը՝ անդրադառնալով պետություն-եկեղեցի հարաբերությունների քննարկումներին։

«Այս պահին գործող Սահմանադրությունն ասում է, որ կրոնական կազմակերպություններն են անջատ պետությունից, բայց հետո, երբ խոսում է, մասնավորապես, ՀԱԵ-ի մասին, ասում է, որ, ի տարբերություն բոլոր կրոնական կազմակերպությունների, ՀԱԵ-պետություն հարաբերությունները կարող են կարգավորվել օրենքով։ Այսինքն՝ մեզ՝ օրենսդիրներիս, Սահմանադրությունը տվել է այդ հնարավորությունը, որպեսզի գանք այստեղ և կարգավորենք պետություն-ՀԱԵ հարաբերությունները։

Մի բան, որը, ըստ Սահմանադրության, չենք կարող անել այլ կրոնական կազմակերպությունների դեպքում։ Օրինակ՝ չենք կարող հայ կաթոլիկ եկեղեցու մասին օրենք ընդունել»,— ասաց նա։