Հայաստանում բոլորը գիտակցում են, որ Թուրքիայի հետ չկարգավորված հարաբերությունները և Ադրբեջանի հետ վերջնականապես չինստիտուցիոնալացված խաղաղությունը սպառնալիքներ են։ Այս մասին Ազգային ժողովում հայտարարել է ԱԺ նախագահ Ռուբեն Ռուբինյանը։
Ռուբինյանը կարծիք է հայտնել, որ մեր սպառնալիքները գալիս են, առաջինը՝ Ադրբեջանից։
«Ադրբեջանի հետ մենք ունենք խաղաղություն, բայց այդ խաղաղությունը դեռ անշրջելի չէ և վերջնականապես ինստիտուցիոնալացված չէ։ Այսինքն՝ Ադրբեջանի հետ լիարժեք խաղաղության բացակայությունը միանշանակ և աներկբայորեն սպառնալիք է Հայաստանի Հանրապետության անվտանգությանը»,- ասել է Ռուբինյանը։
Աժ նախագահի գնահատմամբ՝ սպառնալիք է նաև Թուրքիայի հետ սահմանի փակ լինելն ու երկու երկրների միջև դիվանագիտական հարաբերությունների բացակայությունը։ Նա ասել է, որ մենք ունենք սպառնալիք Թուրքիայի կողմից, որովհետև անմիջական հարևանի հետ փակ սահման ունենալն առնվազն տնտեսական սպառնալիք է, իսկ հաստատված դիվանագիտական հարաբերություններ չունենալն առնվազն դիվանագիտական սպառնալիք։
«Մենք տեսնում ենք սպառնալիքը և ուզում ենք վերացնել կամ չեզոքացնել այն»,- ասել է ԱԺ նաժագահը։
Նրա խոսքով՝ իշխանության և ընդդիմության մոտեցումների տարբերությունն այն է, որ իշխանությունը փորձում է արձանագրված սպառնալիքները չեզոքացնել և դրանց լուծումներ գտնել։
