Երեւան: Մեդիամաքս: Ադրբեջանի նախագահի օգնական Հիքմեթ Հաջիեւն այսօր հայտարարել է, որ «խաղաղության պայմանագիրը պետք է իրական օգուտ բերի Հայաստանին եւ Ադրբեջանին, այլ ոչ թե մնա թղթի վրա»:
Ինչպես հաղորդում է Trend-ը, ելույթ ունենալով Բաքվի մշակութային եւ մեդիա երկխոսության հարթակի «Խաղաղության լեզուն եւ պայքարը ապատեղեկատվության դեմ» նստաշրջանում՝ նա նշել է, որ առաջնահերթ ուշադրություն պետք է դարձվի ժողովուրդների միջեւ վստահության վերականգնման եւ հաշտեցման հարցերին:
«Եկեք նայենք Բալկաններին։ 1990-ականների կեսերին այնտեղ բոլոր հակամարտությունները կարգավորվեցին, սակայն տարածաշրջանի երկրների միջեւ մինչ օրս անվստահություն գոյություն ունի», – նշել է նա:
Հիքմեթ Հաջիեւն ընդգծել է, որ հայ-ադրբեջանական հարաբերությունների համատեքստում «անհրաժեշտ է անկեղծորեն մոտենալ անցյալին»։
«Մենք չենք ջնջում այդ անցյալը, բայց նայում ենք դեպի ապագա՝ խաղաղությամբ», – հավելել է նա:
Trend-ը նշում է, որ այսօր Նիդերլանդների ԱԳ նախարարի հետ համատեղ մամուլի ասուլիսում Ադրբեջանի արտգործնախարար Ջեյհուն Բայրամովը նշել է.
«Մենք հետեւում ենք Հայաստանում տեղի ունեցող քաղաքական գործընթացներին։ Խաղաղությունը պետք է կարեւոր լինի հայկական հասարակության համար։ Ադրբեջանը պատրաստ է վերջակետ դնել այս հարցում»։
Leave a Reply