ԱՄՆ վարչակազմը ուկրաինական կարգավորման նոր մոտեցման շրջանակում դիտարկում է հակամարտության ավարտից առաջ Ռուսաստանի հետ բիզնես գործարքներ կնքելու հնարավորությունը, հաղորդում է The New York Times-ը՝ հղում անելով աղբյուրներին։
«Սպիտակ տունը այժմ դիտարկում է Ուկրաինայում ռազմական գործողությունների դադարեցումից առաջ Ռուսաստանի հետ բիզնես գործարքներ կնքելու հնարավորությունը», – հայտնում է թերթը։
NYT-ի աղբյուրի խոսքով՝ Մոսկվայի հետ նման հնարավոր բիզնես համաձայնագրերը ցույց կտան Վաշինգտոնի տրամադրվածության լրջությունը՝ երկու երկրների հարաբերությունները վերագործարկելու հարցում։
Թե կոնկրետ ինչ գործարքների մասին կարող է խոսք լինել, հրապարակման մեջ չի հստակեցվում, սակայն ընդգծվում է, որ ամերիկյան վարչակազմի այս մոտեցումը հակադրվում է նախագահ Դոնալդ Թրամփի նախկին դիրքորոշմանը։
Նախօրեին Թրամփը, ելույթ ունենալով Հյուսիսային Կարոլինայում անցկացված հանրահավաքում, հավաստիացրել էր, որ աշխատում է ուկրաինական ճգնաժամի լուծման վրա, և հույս էր հայտնել, որ «այն շուտով կավարտվի»։
