Blog

20:59 – 26/հոկտեմբերի/2026

Շուրջ երեք հազար քվեն ոչ միայն վստահություն է, այլև պատասխանատվություն։ Այս մասին գրել է Արտաշատում համայնքապետի ՀՅԴ թեկնածու Գերասիմ Վարդանյանը՝ անդրադառնալով երեկ կայացած ընտրություններին։

«Շնորհակալություն եմ հայտնում Արտաշատ համայնքի շուրջ երեք հազար քաղաքացիներին, որոնք ՏԻՄ ընտրություններում իրենց քվեն տվեցին Հայ Յեղափոխական Դաշնակցությանը։

Մենք այս ընտրությունները դիտարկել ենք որպես քաղաքական ընտրություն՝ հանուն ազգային արժեքների, պետականամետ մտածողության, սկզբունքային դիրքորոշման և Հայաստանի ապագայի վերաբերյալ մեր պատկերացումների։

Ձեր քվեն վկայում է, որ չնայած ճնշումներին ու հալածանքներին Արտաշատում կա ազգային արժեքներին հավատարիմ, պետական մտածողություն ունեցող քաղաքացիների զգալի շրջանակ, որը պատրաստ է հստակ արտահայտել իր քաղաքական դիրքորոշումն ու պաշտպանել իր համոզմունքները։

Հայ Յեղափոխական Դաշնակցությունը ներկայացված կլինի համայնքի ավագանիում. մեր ավագանու անդամների աշխատանքը ծառայելու է Արտաշատի զարգացմանը, բնակիչների խնդիրների բարձրաձայնմանն ու լուծմանը և համայնքի շահերի հետևողական պաշտպանությանը։ Մեր քաղաքական սկզբունքները համադրելու ենք գործնական աշխատանքի հետ՝ հանուն համայնքի առաջընթացի և մեր հայրենակիցների բարօրության։

Շուրջ երեք հազար քվեն ոչ միայն վստահություն է, այլև պատասխանատվություն։ Եվ որպես Արտաշատ համայնքում գործող գլխավոր ընդդիմադիր ուժ՝ մենք շարունակելու ենք մեր քաղաքական պայքարը՝ հավատարիմ մնալով մեր ազգային արժեքներին, պետականամետ մտածողությանը և սկզբունքային քաղաքական ուղեգծին։

Շնորհակալ եմ ձեր վստահության համար։ Ինչպես խոստացել ենք՝ մեր աշխատանքն ու պայքարը շարունակվելու է այնքան, մինչև մեր ժողովուրդը հաղթանակ ունենա»։

21:06 – 26/հոկտեմբերի/2026

ՀՀ կենտրոնական բանկից տեղեկացնում են, որ հոկտեմբերի 26-ին, բանկի կողմից սահմանվել են հետևյալ փոխարժեքները. ԱՄՆ դոլարի փոխարժեքը նվազել է 0.26 դրամով և կազմել 360.88 դրամ:

Եվրոյի փոխարժեքը նվազել է 0.22 դրամով և կազմել 404.11 դրամ:

Ռուսական ռուբլու փոխարժեքը նվազել է 0.0106 դրամով և կազմել 4.4762 դրամ: Բրիտանական ֆունտի փոխարժեքը նվազել է 1.22 դրամով և կազմել 481.77 դրամ:

Ինչ վերաբերում է թանկարժեք մետաղներին, ապա ոսկու գինը նվազել է 439 դրամով և կազմել 46565 դրամ:

17:39 – 26/հոկտեմբերի/2026

ՀՀ Առաջին նախագահ Լևոն Տեր-Պետրոսյանն այսօր այցելել է «Բեսթ լայֆ» բժշկական կենտրոն՝ պլանային հետազոտության:

Այս մասին ֆեյսբուքի էջում գրել է առաջին նախագահի խոսնակ Արման Մուսինյանը։ Նա այլ մանրամասներ չի հաղորդել։

17:43 – 26/հոկտեմբերի/2026

Պետական եկամուտների կոմիտեն հայտնում է, որ ՊԵԿ պաշտոնական կայքում հրապարակվել է 2026 թվականի 9 ամիսների ընթացքում առաջին 1,000 խոշոր հարկ վճարողների կողմից վճարված հարկերի և վճարների վերաբերյալ տեղեկատվությունը:

Առաջին տեղում «Մոբայլ Սենթր»-ն է։ Ցանկում երկրորդը Զանգեզուրի պղնձամոլիբդենային կոմբինատն է, երրորդը՝ «Գրանդ Տոբակո»-ն։ Չորրորդ հորիզոնականում «Գազպրոմ Արմենիա»-ն է, հինգերորդում՝ «Արդշինբանկ»-ը, վեցերորդում՝ «Ամերիաբանկ»-ը, յոթերորդում՝ «Սոֆթ Կոնստրակտ»-ը, ութերորդում՝ «Դիջիթեյն»-ը, իններորդում՝ «Ֆիլիպ Մորիս Արմենիա»-ն, իսկ 10-րդ հորիզոնականում «Ինտերնեյշնլ Մասիս Տաբակ»-ն է։

1,000 խոշոր հարկ վճարողների կողմից 2026 թվականի հունվար-սեպտեմբեր ամիսների ընթացքում պետական բյուջե ընդհանուր առմամբ վճարվել է 1 տրիլիոն 638 միլիարդ դրամ՝ գերազանցելով նախորդ տարվա նույն ցուցանիշը 199 միլիարդ դրամով․ նախորդ տարվա ցուցանիշը կազմել է 1 տրիլիոն 439 միլիարդ դրամ:

Հարկային մարմին կատարված վճարումների գումարը կազմել է 1 տրիլիոն 367 միլիարդ դրամ․ պետական բյուջե է մուտքագրվել նախորդ տարվա նույն ցուցանիշից ավելի 188 միլիարդ դրամ։

Մաքսային մարմին կատարված վճարումների գումարը կազմել է 271 միլիարդ դրամ․ պետական բյուջե է մուտքագրվել նախորդ տարվա նույն ցուցանիշից ավելի 10 միլիարդ դրամ։

1000 խոշոր հարկ վճարողների վերաբերյալ ցանկը հասանելի է ՊԵԿ պաշտոնական կայքի «Տեղեկություն հարկ վճարողների վերաբերյալ» բաժնի «Հարկ վճարողների վերաբերյալ տեղեկատվական ցանկեր» ենթաբաժնում:

20:35 – 26/հոկտեմբերի/2026

Ղազախստանի մայրաքաղաք Աստանայում ընթացող հունահռոմեական ոճի ըմբշամարտի աշխարհի առաջնությունում 63 կգ քաշային Կարեն Ասլանյանը վստահ ելույթների շնորհիվ կարիերայում առաջին անգամ դուրս է եկել մեծահասակների աշխարհի առաջնության եզրափակիչ։

Կիսաեզրափակիչում հայ ըմբիշը հիանալի գոտեմարտ է անցկացրել և ժամանակից շուտ առավելության հասել Էդմոնդ Նազարյանի նկատմամբ։ Ասլանյանը վաղը կգոտեմարտի աշխարհի չեմպիոնի տիտղոսի և ոսկե մեդալի համար։

Կիսաեզրափակիչ հասած Հայաստանի հավաքականի մյուս երկու ներկայացուցիչներն, ցավոք, պարտություններ են կրել և վաղը կփորձեն բավարարվել բրոնզե մեդալներով։

87 կգ քաշային Գևորգ Թադևոսյանը 1-10 հաշվով զիջել է Փարիզի Օլիմպիական խաղերի արծաթե մեդալակիր, Իրանի ներկայացուցիչ Ալիռեզա Մոհմադիպիանիին։ Հատկանշական է, որ Թադևոսյանն իր կարիերայում առաջին անգամ էր հասել աշխարհի առաջնության այս փուլին, ընդ որում՝ նա գորգ էր դուրս եկել ծնկի վնասվածքով։

67 կգ քաշային Սլավիկ Գալստյանն էլ 0-4 հաշվով պարտվել է աշխարհի չեմպիոն, Ուզբեկստանը ներկայացնող Այթժան Խալմախանովին։ Թեև Բուդապեշտում կայացած վարկանիշային մրցաշարում հայ ըմբիշը հաղթել էր այս մրցակցին, սակայն այս անգամ կրկնել հաջողությունը չի ստացվել։ Վաղը Գալստյանը կփորձի նվաճել աշխարհի առաջնության իր կարիերայի երրորդ բրոնզե մեդալը։

Հիշեցնենք, որ Կարեն Ասլանյանը մինչև եզրափակիչ հասնելը ժամանակից շուտ հաղթանակներ էր տարել նաև Կոռնելիու Ռուսուի և ուզբեկ Աֆթանդիլ Ուուլուի նկատմամբ։ Եզրափակիչ և բրոնզե մեդալների համար գոտեմարտերը կկայանան վաղը։

Աղբյուրը՝ Armsport.am:

20:20 – 26/հոկտեմբերի/2026

Այսօր՝ հոկտեմբերի 25-ին, ավտովթար է տեղի ունեցել Լոռու մարզում։ Ժամը 15։15-ի  սահմններում Սպիտակ-Երևան ավտոճանապարհին, Սարամեջ բնակավայրի խաչմերուկում բախվել են 57-ամյա Հակոբ Բ․-ի վարած «Opel Zafira» մակնիշի, 39-ամյա Կարեն Հ․-ի վարած «Chevrolet» մակնիշի և 58-ամյա Նիկոլ Զ․-ի վարած «ՎԱԶ 2106» մակնիշի ավտոմեքենաները։

Ինչպես հայտնում է ֆոտոլրագրող Գագիկ Շամշյանը, վթարի հետևանքով Նիկոլ Զ․-ի ուղևոր Երևանի բնակիչ 55-ամյա Նազիկ Ն․-ն օպերատիվորեն ժամանած շտապօգնության ավտոմեքենայով տեղափոխվել է «Սպիտակ» բժշկական կենտրոն, որտեղ նրա առողջական վիճակը գնահատվել է կայուն ծանր։

Դեպքի վայր են ժամանել ՀՀ ներքին գործերի նախարարության փրկարար ծառայության Լոռու մարզային փրկարարական վարչության Սպիտակի հրշեջ-փրկարարական ջոկատից՝ մեկ մարտական հաշվարկ՝ մարզային փրկարարական վարչության պետ Սերոբ Գաբրիելյանի և ջոկատի հրամանատար Արգամ Հակոբյանի գլխավորությամբ։

Դեպքի վայր են ժամանել նաև ՀՀ ՆԳՆ ոստիկանության պարեկային ծառայության Լոռու մարզի գումարտակի 2-րդ վաշտի 1-ին դասակի պարեկները՝ գումարտակի հրամանատար Ավետիք Նիկողոսյանի, գումարտակի հրամանատարի տեղակալ Մհեր Խալաթյանի, գումարտակի ծառայության ավագ տեսուչ Արման Սուքիասյանի, վաշտի հրամանատար Հրաչ Մխթարյանի և դասակի հրամանատար Արամ Պետրոսյանի գլխավորությամբ։

Տարածքը սահմանազատել են նույն դասակի պարեկներ Գոռ Ղուկասյանը և Նարեկ Նորեկյանը։

Դեպքի վայր է ժամանել նաև ՀՀ ՆԳՆ ոստիկանության համայնքային ոստիկանության գլխավոր վարչության Սպիտակի բաժնի օպերատիվ խումբ՝ բաժնի պետի տեղակալի գլխավորությամբ։

Վթարի մասին ոստիկանության Սպիտակի բաժնից տեղեկությունը փոխանցել են ՀՀ քննչական կոմիտեի Լոռու մարզային քննչական վարչության Սպիտակի քննչական բաժին, որտեղից ժամանել է քննչական խումբը՝ բաժնի պետ Երեմ Դանիելյանի և օրվա պատասխանատու հերթապահ քննիչի գլխավորությամբ։

Վթարի փաստով Սպիտակի քննչական բաժնում նախաձեռնվել է քրեական վարույթ։