Սեպտեմբերի 3-ի գիշերը Օդեսան կրկին ենթարկվել է ռուս զինվորականների օդային հարձակմանը, հայտնել է մարզային վարչակազմի ղեկավար Սերգեյ Լիսակը։ Հարվածի տակ է հայտնվել 21-հարկանի բնակելի շենք, որտեղ վնասվել են 10-րդից մինչև 17-րդ հարկերի բնակարանները։ Տուժել է 17 մարդ, որոնցից երեքը երեխաներ են։ «Հարձակման հետևանքների վերացումը շարունակվում է։ Տեղում աշխատում են կոմունալ և բոլոր համապատասխան ծառայությունները», — նշել է Լիսակը։
Անցած գիշերը ռուսական բանակը նույնպես զանգվածային օդային հարված է հասցրել Օդեսային։ Հարվածներից մեկը բաժին է ընկել 24-հարկանի բնակելի շենքին։ Մի քանի հարկերում բնակարաններ են ավերվել, իսկ հարևան տներում ապակիները կոտրվել են։ Տուժել է ութ մարդ, այդ թվում՝ մեկ երեխա։ Բացի այդ, վնասվել են երկու ուսումնական հաստատություն, գրասենյակային շենքեր, մասնավոր ձեռնարկություն և ավտոմեքենաներ։ Հրդեհներ են բռնկվել։ Պրիմորսկի, Խաջիբեյի և Պերեսիպի շրջանների բնակիչները մնացել են առանց էլեկտրականության։ Ընդ որում, հարվածը հասցվել է Քաղաքի օրը՝ սեպտեմբերի 2-ին Օդեսան դարձել էր 232 տարեկան։
Սեպտեմբերի 1-ի գիշերը ռուսական բանակը նույնպես հարձակվել է Օդեսայի և Օդեսայի մարզի վրա՝ անօդաչուների և հրթիռների միջոցով։ Թիրախներից մեկը եղել է Ռումինիայի հետ սահմանին գտնվող «Օրլովկա» միջազգային լաստանավային անցակետը։ Տուժել է յոթ մարդ, որոնցից չորսը հոսպիտալացվել են։
Օդեսայի մարզը ամեն օր ենթարկվում է ռուսական հարձակումների օգոստոսի 29-ից ի վեր։ Այդ ընթացքում տարածաշրջանում մեկ մարդ է զոհվել։ Արդյունքում վնասվել են բնակելի շենքեր, «Նովայա պոչտա»-ի տերմինալը, կարի արտադրամաս, մթերային պահեստներ և հացահատիկով բեռնատարներ։
Բացի այդ, Ռուսաստանը ամենօրյա ռեժիմով սկսել է հարվածել նաև Կիևին և Կիևի մարզին։ Սեպտեմբերի 2-ի ցերեկը հարվածային անօդաչուները Ուկրաինայի մայրաքաղաքում հարձակվել են համալսարաններից մեկի, հիվանդանոցի և վեցհարկանի բնակելի շենքի վրա։ Ընդհանուր առմամբ, գրոհի ընթացքում տուժել է յոթ մարդ։
Մինչ այդ Կրեմլում խոստացել էին հարվածներ հասցնել Ուկրաինային «ամեն օր և ամեն գիշեր»՝ ի պատասխան Ռուսաստանի տարածքում մարքեթփլեյսների պահեստների և այլ առևտրային ենթակառուցվածքների վրա ուկրաինական անօդաչուների հարձակումների։ Վլադիմիր Պուտինը նշել էր, որ «կիևյան ռեժիմը նպատակ է դրել վնաս հասցնել մեր տնտեսությանը» և բացել է «Պանդորայի արկղը»։ Նա ընդգծել էր, որ Կիևում և ուկրաինական այլ քաղաքներում քաղաքացիական ենթակառուցվածքների վրա հարվածները «արդյունավետ» և «ժամանակին» են։
