Category: TIV 1

ՀՀ վարչապետ Նիկոլ Փաշինյանը և Երևանի քաղաքապետի առաջին տեղակալ Արմեն Փամբուխչյանն այցելել են Կիևյան կամուրջ՝ ծանոթանալու կամրջի երթևեկելի հատվածի հիմնանորոգման աշխատանքներին, որոնք ավարտվել են երկու շաբաթ շուտ՝ օգոստոսի 14-ին՝ նախատեսված օգոստոսի 29-ի փոխարեն։ Այս մասին հայտնում են Երևանի քաղաքապետարանից։

«Իրականացված բոլոր աշխատանքների առաջնային նպատակը երթևեկության անվտանգության բարձրացումն ու քաղաքացիների համար առավել անվտանգ և հարմարավետ պայմանների ապահովումն է։ Մասնավորապես՝ վերականգնվել են դեֆորմացիոն կարերը, վերականգնվել և ներդրվել են ջրահեռացման և ջրամեկուսացման համակարգեր, տեղադրվել են նոր, ցինկապատ արգելափակոցներ, լուսավորության սյուներից էլեկտրական մալուխներն ապամոնտաժվել և տեղափոխվել են մայթի տակ գտնվող դիտահորեր, տեղադրվել է ասֆալտբետոնե վերին շերտը, ասֆալտապատվել են երկու կողմերի մայթերը, իրականացվել են ճանապարհային գծանշման աշխատանքներ։

Մինչև տարեվերջ կշարունակվեն կամրջի թռիչքային կամարի և հենարանների վնասված հատվածների ամրացման ու վերականգնման, ինչպես նաև նախատեսված մյուս աշխատանքները՝ առանց երթևեկությանը խոչընդոտելու»,- նշվում է հաղորդագրությունում։

Ռուսաստանի արտաքին գործերի նախարարությունը պարզաբանումներ է խնդրել Միացյալ Նահանգներից և Թուրքիայից Կիևին զենք մատակարարելու ծրագրերի վերաբերյալ տեղեկատվության վերաբերյալ: Այս մասին օգոստոսի 15-ին հայտարարել է Ռուսաստանի արտաքին գործերի նախարարության մամուլի խոսնակ Մարիա Զախարովան։

Նրա խոսքով, հրապարակված փաստաթղթերը վկայում են զգալի զինատեսակների, այդ թվում՝ հարձակողական զենքի փոխանցման նախապատրաստական ​​աշխատանքների մասին: Դրանք ներառում են 12 բազմակի օգտագործման հրթիռային համակարգեր, ավելի քան 2500 չկառավարվող կլաստերային զինամթերք, 47000 203 մմ կլաստերային զինամթերք և 70 ATACMS օպերատիվ-մարտավարական հրթիռներ։

«Մահացու զենքի նման մեծածավալ փոխանցման հանգամանքներն ու պայմանները մնում են խիստ վիճելի: Հստակ չէ, թե ո՞վ է նախաձեռնել վերաարտահանումը, ինչպե՞ս և ե՞րբ է նախատեսվում մեծածավալ մահացու բեռը փոխանցել Կիևի ստացողներին», – Զախարովայի խոսքերը մեջբերվել են Ռուսաստանի արտաքին գործերի նախարարության կայքում: 

Ռուսաստանի արտաքին գործերի նախարարության խոսնակը նաև նշել է, որ նման գործողություններ ձեռնարկում են այն երկրները, որոնք հայտարարում են, որ ձգտում են ճգնաժամի քաղաքական և դիվանագիտական ​​լուծման: Դիվանագետը հավելել է, որ Ուկրաինային զենք մատակարարելու փորձերը խաղաղապահ հռետորաբանության ֆոնին խաթարում են փոխադարձ վստահությունը՝ հաշվի առնելով Անկարայի հավաստիացումները  մատակարարումները մերժելու մասին։

« Զելենսկու խունտային ավելի շատ զենք մատակարարելը անկարող է որևէ էական ազդեցություն ունենալ արդարացի ռուսական սցենարով հատուկ ռազմական գործողության զարգացման վրա։ Սակայն նման մատակարարումներից բազմակողմանի վնասը անխուսափելի է», – հայտարարել է Զախարովան։

 Օգոստոսի 13-ին Զելենսկին հայտարարել էր  երկրի Patriot հրթիռային պաշարների 5%-ը Միացյալ Նահանգներից ստանալու անհրաժեշտության մասին՝ ձմեռը գոյատևելու համար։

Օգոստոսի 15-ին ՀՀ ԱԳ նախարարի տեղակալի ժամանակավոր պաշտոնակատար Վահան Կոստանյանը Կիև աշխատանքային այցի շրջանակներում հանդիպում է ունեցել Ուկրաինայի Գերագույն ռադայի արտաքին քաղաքականության և միջխորհրդարանական համագործակցության հանձնաժողովի նախագահ Օլեկսանդր Մերեժկոյի հետ:

Զրուցակիցները քննարկել են Հայաստան-Ուկրաինա համագործակցության օրակարգը՝ կարևորելով փոխադարձ հետաքրքրություն ներկայացնող տարբեր ոլորտներում փոխգործակցության ակտիվացումը: 

Վահան Կոստանյանն ու Օլեկսանդր Մերեժկոն անդրադարձ են կատարել նաև միջխորհրդարանական կապերի զարգացմանը, մասնավորապես երկու երկրների խորհրդարանների համապատասխան հանձնաժողովների միջև կապերի առավել ակտիվացմանը՝ փոխայցելությունների և պարբերական շփումների միջոցով:  

Մտքեր են փոխանակվել նաև տարածաշրջանային և միջազգային օրակարգի մի շարք հարցերի շուրջ։ 

ՑԱՀԱԼ-ը գիշերը մի շարք ավիահարվածներ է հասցրել Լիբանանի հարավին: Տան ուղղությամբ հարվածի հետևանքով զոհվել է առնվազն յոթ մարդ, ևս երեքը վիրավորվել են:

Հարձակումն ամենամասշտաբայինն է դարձել հունիսի 17-ին ԱՄՆ-ի և Իրանի միջև հուշագրի ստորագրումից հետո, որը ենթադրում է ռազմական գործողությունների դադարեցում լիբանանյան տարածքներում:

Երկու մարդ էլ զոհվել է, ևս ինը՝ վիրավորվել Լիբանանի հարավում Դեյր Էզ Զահրանի բնակավայրի ուղղությամբ իսրայելական ավիահարվածի հետևանքով:

Իսրայելի ԱԳ նախարար Գեդեոն Սաարն էլ հայտարարել է, որ երկրները պետք է ինքնապաշտպանության իրավունք ունենան, և Իսրայելն իրեն պաշտպանել է «ամենաբարոյական ձևով»:

ԱԺ «Ուժեղ Հայաստան» խմբակցության պատգամավոր Էդգար Ղազարյանն անդրադարձել է իր շուրջ տեղի ունեցող քննադատություններին, որը ստեղծվել է երեկվա միջադեպից հետո։

«Ես քննադատությունն ադեկվատ եմ համարում։ Մեր խմբակցության գործընկերները, խմբակցությունում ընդհանուր շատ լավ մթնոլորտ է։ Եվ ամեն մի ելույթ, ամեն մի հարցադրում, ամեն մի քննարկում չի կարող դառնալ մեծ իրադարձություն»,- նշել է Ղազարյանը և անդրադարձել այն հարցին, թե արդյոք նա կարող է դառնալ անկախ պատգամավոր, թե ոչ։

«Ես «Ուժեղ Հայաստան» խմբակցության պատգամավոր եմ և շարունակելու եմ իմ գործունեությունը»,- ընդգծել է պատգամավորը։

Պլատֆորմ փոդքասթի շրջանակներում խոսելով ԱԺ վերջին օրերի զարգացումների, մասնավորապես Էդգար Ղազարյանի հայտարարության ու ՔՊ-ականների արձագանքների մասին, ԼՀԿ ղեկավար Էդմոն Մարուքյանն ասել է․

«Էդգարը հազար բան կարա անի, որ հետը համաձայն չլինենք, բայց որ ինքը ունի ինստիտուցիոնալ հիշողություն ու կարողանում է դրանով դասավորել միտքն ու սուր խոսել, դա, բնականաբար, ՔՊ-ին հունից հանում է․․․ Չգիտեմ՝ ինչու, ընդդիմությունը ՔՊ-ի հետ բան է պայմանավորվել ու պրոբլեմը սկսել է այստեղից, այնինչ, նրանց հետ չի կարելի որևէ բան պայմանավորվել։ Հիմա, քանի որ պայմանավորվել են՝ եկեք բարեկիրթ լինենք, խայծը կերել են ու Էդգար Ղազարյանի մի ելույթ, որտեղ ասում է «սրիկայաբար», դարձավ քննարկման թեմա»։

Իրանը դեռևս որոշում չի կայացրել ԱՄՆ-ի հետ բանակցությունները վերսկսելու վերաբերյալ։ Այս մասին ISNA գործակալությանը հայտնել է Իրանի ԱԳ նախարար Աբաս Արաղչին։

Նրա խոսքով՝ չնայած Քաթարի ու Պակիստանի միջնորդական ջանքերին, նախկին կապի ուղիներն արդյունավետ չեն։ Այժմ Թեհրանը մշակում է ժամանակավոր նոր տարբերակ, որը կարող է դառնալ մշտական, սակայն նախարարը չի հստակեցրել, թե խոսքն ինչ կապուղու մասին է։

Արաղչին նաև հիշեցրել է, որ ըստ «Իսլամաբադի հուշագրի»՝ կողմերը պարտավորվել էին դադարեցնել ռազմական գործողությունները, սակայն ԱՄՆ-ն խախտել է այդ պայմանավորվածությունը։

ՀԱՊԿ անդամ երկրները Հայաստանին համարում են կառույցի դաշնակից և պատրաստ են Երևանի հետ քննարկել համատեղ աշխատանքի լիարժեք վերսկսման բոլոր հարցերը։ Այս մասին հայտարարել է կազմակերպության գլխավոր քարտուղար Թաալաթբեկ Մասադիկովը։  

«ՀԱՊԿ անդամ երկրները Հայաստանին համարում են դաշնակից: Հենց սկզբից Հայաստանը եղել է ակտիվ և ներդաշնակ անդամ պետություն՝ արժանի ներդրում ունենալով կոլեկտիվ ներուժի ամրապնդման գործում»:

​Նշենք, որ Հայաստանը 2024 թվականին սառեցրել է իր մասնակցությունը ՀԱՊԿ-ին։  

​Ըստ կառույցի կանոնադրության՝ եթե երկիրը չմարի բյուջեի հանդեպ ունեցած պարտքը, ապա երկու տարվա ընթացքում կզրկվի կառույցի մարմիններում ձայնի իրավունքից։  

Հայաստանը միգրանտներ ուղարկող երկրից վերածվել է տրանզիտի և միգրանտներ ընդունող երկրի։ Այդ մասին օգոստոսի 14-ին կայացած մամուլի ասուլիսի ժամանակ ասել է ՀՀ ներքին գործերի նախարարի տեղակալի ժամանակավոր պաշտոնակատար Արմեն Ղազարյանը։

«Վերոնշյալ միտումը պահպանվում է և ինչ-որ իմաստով թափ է հավաքում, իսկ երկրորդ կարևորագույն միտումն այն է, որ օտարերկրացիների կողմից Հայաստանի նկատմամբ հետաքրքրությունն աճել է։ Այս միտումը ևս պահպանվում է, և մենք դրա արդյուքները տեսնում ենք նաև 2026 թվականի առաջին կիսամյակի վիճակագրական պատկերում»,- ասաց բանախոսը։

Ղազարյանը նշեց, որ ՆԳ նախարարությունը նախաձեռնել է միգրացիայի ոլորտի ռազմավարության մշակում և վերանայում։

«Նախկինում նույնպես Հայաստանն ունեցել է միգրացիոն ոլորտի ռազմավարություններ, սակայն այժմ համալիր վերանայում է իրականացվում և առաջին անգամ ռազմավարության մեջ դիտարկվում է այնպիսի կարևոր ոլորտ, ինչպիսին է քաղաքացիությունը։ Նախկին բոլոր ռազմավարական փաստաթղթերում քաղաքացիության մասով առկա են որոշակի բացեր, հետևաբար առաջին անգամ վերանայվում են քաղաքացիության ինստիտուտի հանդեպ մոտեցումները»,- ասաց ՆԳ նախարարի տեղակալի ժամանակավոր պաշտոնակատարը։

Մոսկվան ԱՄՆ-ից պարզաբանումներ է պահանջել Ուկրաինայի կողմից Ռուսաստանի դեմ ուղղված հարվածներում ամերիկյան հետախուզության դերի վերաբերյալ։ Այս մասին հայտարարել է ՌԴ ԱԳ նախարար Սերգեյ Լավրովը «Վեստիին» տված ծավալուն հարցազրույցում։

«Մենք վերջնագրեր չենք ներկայացնում։ Մենք մի շարք հարցեր ենք ներկայացրել Պետդեպարտամենտին՝ մեկնաբանություն խնդրելով, այդ թվում՝ հետախուզական տվյալների և այն փաստի վերաբերյալ, որ ԱՄՆ-ն շատ ավելի խորն է ներգրավված Ռուսաստանի տարածքի խորքում քաղաքացիական թիրախների դեմ հարվածների կազմակերպման և իրականացման գործում։ Մենք կսպասենք պատասխանի», – ասել է Լավրովը։