Category: FreeNews

Աշխատանքի և սոցիալական հարցերի նախարարությունը տեղեկացնում է՝ նախատեսվում է սահմանել բուլինգի ենթարկված երեխաների հայտնաբերման, պաշտպանության և աջակցության կարգը:

e-draft.am իրավական ակտերի նախագծերի հրապարակման միասնական կայքում հանրային քննարկման է ներկայացվել «Բուլինգի ենթարկված երեխաների հայտնաբերման, նրանց պաշտպանության, ուղղորդման և նրանց հետ աշխատանքների իրականացման կարգը սահմանելու մասին» ՀՀ Կառավարության որոշման նախագիծը։

Նախագծի նպատակն է ստեղծել հստակ, թափանցիկ և կանխատեսելի մեխանիզմներ՝ բուլինգի ենթարկված երեխաներին ժամանակին հայտնաբերելու, պաշտպանելու և անհրաժեշտ աջակցություն տրամադրելու համար։ Նոր կարգը կկիրառվի երեխաների խնամք և պաշտպանություն իրականացնող կենտրոններում, կրթական (այդ թվում՝ նախադպրոցական և արտադպրոցական) հաստատություններում, սպորտային, մշակութային կազմակերպություններում և արդարադատության համակարգում գործող պատժի կամ քրեաիրավական ներգործության միջոցներ իրականացնող մարմիններում։

Բուլինգը երեխայի նկատմամբ բռնության մասնավոր դրսևորում է, և նման դեպքերի հայտնաբերումը նախատեսվում է իրականացնել հետևյալ ուղղություններով․

մանկավարժական և ուսումնաօժանդակ անձնակազմի, ինչպես նաև հոգեբանի կողմից երեխաների միջանձնային շփումների, վարքագծային կտրուկ փոփոխությունների և հուզական վիճակի ամենօրյա մշտադիտարկում,

բուլինգի դեպքերի մասին անանուն հայտնելու համար «Վստահության արկղեր» կամ առցանց հարթակներ ներդնելու միջոցով,

մեկուսացված կամ թիրախավորված երեխաներին հայտնաբերելու նպատակով հատուկ մշակված հարցազրույցների իրականացում թիմի կողմից,

վստահության մթնոլորտի ձևավորում, որտեղ երեխան իրեն անվտանգ է զգում հոգեբանին, մանկավարժին կամ թիմի համակարգողին դիմելու՝ սեփական փորձառության կամ այլ երեխայի նկատմամբ կիրառվող բուլինգի հնարավոր դեպքի մասին պատմելու համար։

Մյասնիկյան պողոտայում ավտոբուսի և ավտոմեքենայի վթարի հեղինակ, 19-ամյա Վարդան Մարկոսյանի խափանման միջոց տնային կալանքը փոխվել է:

«Անձի նկատմամբ որպես խափանման միջոց դատարանը կիրառել է վարչական հսկողություն՝ համացանցից օգտվելու սահմանափակումով, բացակայելու արգելք»,- այդ մասին 1lurer.am-ին հայտնեցին Քննչական կոմիտեից:

Դատարանի որոշման առնչությամբ ՀՀ գլխավոր դատախազությունից 1lurer.am հայտնեցին, որ այն բողոքարկվելու է:

Հիշեցնենք, որ 19-ամյա երիտասարդը Երևանում գերազանցել էր ավտոմեքենայի արագությունը, վթարային իրավիճակ ստեղծել և տեսանկարահանել իր գործողությունը:

Դատախազը հանրային քրեական հետապնդում էր հարուցել Վարդան Մարկոսյանի նկատմամբ՝ Քրեական օրենսգրքի 342-րդ հոդվածի (Ճանապարհային երթևեկության անվտանգության ապահովմանն ուղղված պահանջները կամ ճանապարհային երթևեկության կամ տրանսպորտային միջոցների շահագործման անվտանգությունն ապահովող կանոնները խախտելը) 1-ին մասով, 297-րդ հոդվածի (խուլիգանությունը) 2-րդ մասի 3-րդ կետով և 344-րդ հոդվածի (Տրանսպորտային միջոցներ վարելու իրավունքից զրկված կամ այդ իրավունքը կասեցված կամ այդ իրավունքը չունեցող անձի կողմից տրանսպորտային միջոցներ վարելը) 1-ին մասով:

ՆԳՆ ոստիկանության վետերանների խորհրդի կազմավորման տարեդարձին ընդառաջ՝ հուլիսի 10-ին, «Դինամո» մարզադաշտում անցկացվել է Հայրենական մեծ պատերազմի մասնակից ոստիկանության վետերանների հիշատակին նվիրված շախմատի հուշամրցաշարը։

Մասնակցել են մայրաքաղաքի տարբեր վարչական շրջանները ներկայացնող ինը թիմեր, իսկ մրցավարությունն իրականացրել են Երևանի շախմատի ֆեդերացիայի ներկայացուցիչները։

Մրցաշարն անցել է առողջ մրցակցության և ընկերական մթնոլորտում՝ համախմբելով մասնակիցներին ընդհանուր նպատակի շուրջ։ Այն դարձել է ոչ միայն շախմատային կարողություններն ու մտածողությունը ցուցադրելու հնարավորություն, այլև առիթ՝ արժևորելու ոստիկանության վետերանների ծառայության ու թողած ժառանգության կարևորությունը։

Հուշամրցաշարի ավարտին լավագույն արդյունքներ գրանցած թիմերը ՆԳՆ ոստիկանության վետերանների խորհրդի կողմից պարգևատրվել են գավաթներով, մեդալներով և դիպլոմներով։