Category: FreeNews

«Ուժեղ Հայաստան» խմբակցության պատգամավոր Սյուզան Ավետիսյանը, ով «Ապրելու երկիր» կուսակցության անդամ է, պարզվում է, 2020 թվականին խիստ դժգոհություն է ունեցել ՀԷՑ-ի կառավարումից։ Այն ժամանակ, հիշեցնենք, ընկերությունը պատկանում էր ռուսաստանցի օլիգարխ Սամվել Կարապետյանին, որի քաղաքական թիմում այսօր հանգրվանել է տիկին Ավետիսյանը։ ԱԺ փոխնախագահ Վահագն Ալեքսանյանն այսօր խորհրդարանում մեջբերեց «Ուժեղ Հայաստան»-ի  պատգամավորի 2020 թվականի գրառումները, որտեղ Ավետիսյանը նշում էր, որ ՀԷՑ-ն ամենավատ մոնոպոլ կազմակերպությունն է, պատկանում է ռուսական օլիգարխիային։ Պատգամավորը 2018-ի դեկտեմբերին մի գրառմամբ նույնիսկ առաջարկել է ՀԷՑ-ին դատել ու վտարել։

Դժգոհ էր տիկին Ավետիսյանը, որ մարզով մեկ լույս չունեն, բայց ահա 6 տարի անց այլևս Կարապետյանների նկատմամբ առարկություն չունի, մանդատ է ստացել ու հանգրվանել խորհրդարանում։

ԱԺ նախկին պատգամավոր Մարտուն Գրիգորյանը 2 ամսով կալանավորվել է:

Այս մասին հայտնել է փաստաբան Արսեն Բաբայանը:

Ավելի վաղ հայտնել էինք, որ դատարան ներկայացնելու նպատակով ձերբակալվել էր ՀՀ ԱԺ նախորդ գումարման պատգամավոր Մարտուն Գրիգորյանը։

«Հայկական ժամանակ»-ի հարցին ի պատասխան՝ Հակակոռուպցիոն կոմիտեից հայտնել էին, որ Մարտուն Գրիգորյանը ձերբակալվել էր ընտրական հանցագործության դեպքով նախաձեռնված քրեական վարույթի շրջանակներում։

Ալեն Սիմոնյանին ներկայացրի որպես Անվտանգության խորհրդի նորանշանակ քարտուղար, Արմեն Գրիգորյանին շնորհակալություն հայտնեցի այդ պաշտոնում իր կատարած աշխատանքի համար: Այս մասին սոցցանցի իր էջում գրել է ՀՀ վարչապետ Նիկոլ Փաշինյանը և կից տեսանյութ հրապարակել:

Հիշեցնենք, որ նախօրեին վարչապետը ՀՀ ԱԺ նախկին նախագահ Ալեն Սիմոնյանին նշանակել էր ԱԽ քարտուղար:

Civic.am-ը գրում է.

Այսօր Ազգային ժողովի նիստին «Ուժեղ Հայաստան» և «Հայաստան» խմբակցությունների մի շարք ներկայացուցիչներ ներկայացել են առանց փողկապի։  

Փաստորեն երեկ ԱԺ-ում Էդգար Ղազարյանի ելույթից հետո տեղի ունեցած միջադեպից ընդամենը մեկ օր անց «Ուժեղ Հայաստան» և «Հայաստան» խմբակցությունների ներկայացուցիչները՝ որոշել են խորհրդարան ներկայանալ առանց փողկապի, արդյոք սա կարո՞ղ ենք դիտարկել որպես պատահականություն, թե՞  սա նախապես մտածված քաղաքական ժեստ է կամ հերթական միջադեպը հրահրելու նախապատրաստական փուլ։

ԱԺ «Քաղաքացիական պայմանագիր» խմբակցությունը տնտեսական հարցերի մշտական հանձնաժողովի նախագահի պաշտոնում առաջադրել է իշխող խմբակցության պատգամավոր Բաբկեն Թունյանի թեկնածությունը: Նրան խորհրդարանում ներկայացրեց «Քաղաքացիական պայմանագիր» խմբակցության պատգամավոր Լիլիթ Մինասյանը:

Մեկնարկել է ԱԺ հերթական նիստը, որի հենց սկզբում ԱԺ նախագահ Ռուբեն Ռուբինյանը հարց է ուղղել «Ուժեղ Հայաստան» խմբակցության պատգամավոր Էդգար Ղազարյանին, թե վերջինս ասելիք ունի՞:

«ԱԺ կանոնակարգը պատգամավորների միջև նման ձևաչափով քննարկում չի նախատեսում»,- պատասխանել է Ղազարյանը:

Ռուբինյանը հարց է ուղղել նաև խմբակցության ղեկավար Նարեկ Կարապետյանին. «Պարոն Նարեկ Կարապետյան, Դուք ասելիք ունե՞ք»:

«Ո՛չ»,- կարճ պատասխանել է Կարապետյանը:

Ռուբինյանն արձագանքել է՝ ասելով. «Շատ լավ, դուք ընտրեցիք այս ճանապարհը»:

Հիշեցնենք՝ ԱԺ հերթական նիստերի նախորդ օրը՝ օգոստոսի 13-ին, իրավիճակն ԱԺ դահլիճում լարվել էր Էդգար Ղազարյանի ելույթից հետո, որը ԱԺ պատգամավորներին ու իշխանությանը վիրավորել էր:

ԱԺ նախագահ Ռուբեն Ռուբինյանը, խոսքն ուղղելով «Ուժեղ Հայաստան» խմբակցության ղեկավարին, ասել էր, թե արդեն երկրորդ անգամ բարեկրթության կանոններն ԱԺ դահլիճում խախտվում են: 10 օրվա ընթացքում 2 անգամ հնչել է վիրավորական արտահայտություն:  Ռուբինյանը հավելել էր, որ ակնկալում է՝ Էդգար Ղազարյանը կգա և ներողություն կխնդրի իր արտահայտության համար:

ՀՀ հակակոռուպցիոն կոմիտեում նախաձեռնված քրեական վարույթի շրջանակում ձերբակալվել են «Գազպրոմ Արմենիա» ՓԲԸ-ի 4 աշխատակից և ՀՀ քաղաքաշինության, տեխնիկական և հրդեհային անվտանգության տեսչական մարմնի 1 պաշտոնատար անձ:

Այս մասին տեղեկությունը «Հայկական ժամանակ»-ի հարցմանն ի պատասխան հատատել են Հակակոռուպցիոն կոմիտեից՝ նշելով, որ վարույթն առնչվում է նորակառույց շենքերում գազամակատակարարման գործընթացում թույլ տրված խախտումներն անտեսելու պայմաններում դրական եզրակացություն տրամադրելու համար կաշառք տալու դեպքերին։

Ձերբակալված անձանցից 4-ի նկատմամբ որպես խափանման միջոց է ընտրվել կալանքը, մեկի նկատմամբ՝ տնային կալանքը:

Վարչապետ Նիկոլ Փաշինյանը Անվտանգության խորհրդի աշխատակազմին է ներկայացրել նորանշանակ քարտուղար Ալեն Սիմոնյանին։

Վարչապետը շնորհակալություն է հայտնել Արմեն Գրիգորյանին՝ ԱԽ քարտուղարի պաշտոնում գործունեության համար և նշել, որ այս ողջ ընթացքում ամբողջ ծավալով նա ներգրավված է եղել անվտանգության ոլորտի հետ կապված օրակարգում, այդ թվում՝ խաղաղության հաստատման գործընթացում. «Պարոն Գրիգորյանն ունի շատ էական ներդրում այդ ոլորտում մեր ունեցած ձեռքբերումների հարցում, և դա շատ գնահատելի է»։

Նիկոլ Փաշինյանը հաջողություններ է մաղթել ԱԽ նորանշանակ քարտուղար Ալեն Սիմոնյանին և նշել. «Պարոն Սիմոնյանն էլ է ներգրավված եղել նախորդող շրջանում մեր կարևոր և ռազմավարական որոշումների կայացման գործում։ Կարծում եմ, նաև լինելով ԱԺ նախագահ, աշխատանքային տեղեկատվության պակաս չունի և կարող է միանգամից անցնել Անվտանգության խորհրդի քարտուղարի արդյունավետ գործունեությանը»։

Արմեն Գրիգորյանը շնորհակալություն է հայտնել ԱԽ գրասենյակի թիմին համատեղ կատարված աշխատանքի համար՝ ընդգծելով, որ վերջինս մեծ ներդրում է ունեցել խորհրդի հաջող աշխատանքում։ Արմեն Գրիգորյանը շնորհավորել է նաև Ալեն Սիմոնյանին և հաջողություններ մաղթել։

Ալեն Սիմոնյանն էլ իր հերթին շնորհակալություն է հայտնել վարչապետին՝ վստահության և Արմեն Գրիգորյանին՝ կատարված աշխատանքի համար։ Դիմելով աշխատակազմին՝ Ալեն Սիմոնյանը նշել է․«Կարծում եմ, որ կկարողանանք միասին աշխատել՝ անկախ այն բանից, ինչպես վարչապետն ասաց, որ տեղյակ եմ և մասնակցել եմ գործընթացներին։ Կարծում եմ՝ պետք է ինձ օգնեք մտնել աշխատանքային գործընթացի մեջ ավելի խորը և հուսով եմ՝ կկարողանանք իրար հետ աշխատել»։

Վարչապետը հաջողություն է մաղթել ներկաներին առաջիկա գործունեության մեջ՝ միաժամանակ ընդգծելով նախորդող շրջանում կատարված կարևոր աշխատանքը։ «Առաջիկայում նույնպես նույնքան մեծ և կարևոր աշխատանք պիտի կատարվի։ Կարծում եմ, առաջին բանը, որ պետք է անենք, նախ՝ վերլուծելն է նախորդ շրջանի աշխատանքը և որոշելն այն առաջնահերթությունները, որոնց վրա Անվտանգության խորհրդի գրասենյակը և ԱԽ քարտուղարն առաջիկայում պետք է կենտրոնանան։ Ես դրա վերաբերյալ ունեմ կոնկրետ պատկերացումներ։ Ունեմ կոնկրետ խնդիրներ առաջադրելու ԱԽ քարտուղարին և գրասենյակին։ Առաջիկայում մենք այդ թեմայով քննարկումներ կունենանք, և ես կտամ անհրաժեշտ հանձնարարականներ»։