Category: ArmPulse

ՀՀ էկոնոմիկայի նախարար Գևորգ Պապոյանը օգոստոսի 13-ին Ալմաթիում մասնակցել է Եվրասիական տնտեսական միության ագրոարդյունաբերական քաղաքականության խորհրդի յոթերորդ նիստին։

Այս մասին տեղեկանում ենք ՀՀ էկոնոմիկայի նախարարությունից, նախարարը ներկայացրել է Հայաստանի ագրոարդյունաբերական համալիրի վիճակը և զարգացման առաջնահերթությունները՝ ընդգծելով գյուղատնտեսության ինտենսիվացումը, արտադրողականության բարձրացումը, ժամանակակից տեխնոլոգիաների ներդրումը և թվային գյուղատնտեսության զարգացումը։

Անդրադարձ է կատարվել նաև վերամշակող հզորությունների ընդլայնմանը, «խելացի» ֆերմաների, կաթիլային ոռոգման և հողերի արբանյակային մշտադիտարկման համակարգերի զարգացմանը։

Քննարկվել են նաև ոլորտային մի շարք այլ հարցեր։

Ադրբեջանական լրատվամիջոցները հաղորդում են, որ Ռուսաստանից Ադրբեջանի տարածքով Հայաստան է ուղարկվում 20 վագոն ցորեն:

Նշվում է, որ ցորենով բեռնված 20 վագոնից բաղկացած երկաթուղային շարժակազմը ճանապարհվում է Բիլաջարի կայարանից։

Հիշեցնենք, որ նախորդ անգամ ՌԴ-ից Ադրբեջանի տարածքով Հայաստան էր ուղարկվել 8 վագոն ցորեն և 10 վագոն քարածուխ։

ՀՀ ԱԺ նախագահ Ռուբեն Ռուբինյանն օգոստոսի 13-ին ընդունել է Հայաստանի Հանրապետությունում Մեծ Բրիտանիայի և Հյուսիսային Իռլանդիայի Միացյալ Թագավորության արտակարգ և լիազոր դեսպան Ալեքսանդրա Քոուլին։ Այս մասին հայտնում են ԱԺ-ից։

Դեսպանը շնորհավորել է Ռուբեն Ռուբինյանին ՀՀ Ազգային ժողովի նախագահի պաշտոնում ընտրվելու կապակցությամբ։

Հանդիպման ընթացքում կողմերը գոհունակությամբ արձանագրել են, որ Հայաստանի և Միացյալ Թագավորության միջև հարաբերությունները վերջին տարիներին նշանակալի առաջընթաց են արձանագրել ու զարգանում են ռազմավարական գործընկերության շրջանակում։ Այս համատեքստում անդրադարձ է կատարվել ռազմավարական գործընկերության մասին համատեղ հռչակագրի կարևորությանը, ինչպես նաև ժողովրդավարական բարեփոխումների, խաղաղության գործընթացի և երկկողմ հարաբերությունների զարգացման գործում Միացյալ Թագավորության ցուցաբերած աջակցությանը և ունեցած դերակատարությանը։

Քննարկվել են նաև տարածաշրջանային զարգացումներին առնչվող հարցեր։

Կարևորվել է Հայաստանի և Միացյալ Թագավորության միջև քաղաքական, տնտեսական և այլ ուղղություններով փոխգործակցության հետագա խորացումն ու ընդլայնումը, ինչպես նաև միջխորհրդարանական համագործակցության շարունակական զարգացումը։

Շամշյանի տեղեկացմամբ ՝այսօր՝ օգոստոսի 13-ին, խոշոր ու շղթայական ավտովթար է տեղի ունեցել Երևանում․ Ժամը 15:40-ի սահմաններում Դավիթ Բեկի փողոցում ժողովրդին հայտնի Թոխմախի ՄՌՈւ»-ի մոտ բախվել են «Toyota Camry», «Nissan», «Mitsubishi», «Tesla», «Opel» և մարդատար «Գազել» մակնիշի ավտոմեքենաները։

Վթարի հետևանքով ըստ նախնական տեղեկությունների բարեբախտաբար տուժածներ չկան, իսկ բախման հետևանքով «Գազել»-ը հայտնվել է մայթին, մի քանի ավտոմեքենաներ էլ եղել են կայանված։

Վթարի փաստով ՊԾ Երևան քաղաքի գնդի 1-ին գումարտակում փաստաթղթեր են կազմվում որտեղ էլ պարզում են ավտոմեքենաների սեփականատերերի և վարորդների ինքնությունը։

Մրցակցության և սպառողների շահերի պաշտպանության հանձնաժողովը  հարուցված վարույթի շրջանակում պարզել է, որ «ԱԿԶ» ապրանքային նշանի ներքո գործող ընկերության կողմից «ARMENIAN COGNAC/ՀԱՅԿԱԿԱՆ ԿՈՆՅԱԿ» գրառմամբ իրացվող երեք արտադրատեսակներ մի շարք ֆիզիկաքիմիական ցուցանիշներով չեն համապատասխանում Ռ 59570-2023 ԳՈՍՏ-ի պահանջներին։

Ինչպես  տեղեկանում ենք Մրցակցության և սպառողների շահերի պաշտպանության հանձնաժողովի տարածած հաղորդագրությունից, լաբորատոր փորձաքննությամբ հաստատվել է, որ վերը նշված արտադրանքները պարունակել են ոչ խաղողային ծագման սպիրտ։

Այդ արտադրատեսակներն են՝

·         «ARMENIAN COGNAC URARTU ՀԱՅԿԱԿԱՆ ԿՈՆՅԱԿ ՈՒՐԱՐՏՈՒ» անվանումով 3 տարի, 0,5 լ, 40%,

·         «ARMENIAN COGNAC URARTU ՀԱՅԿԱԿԱՆ ԿՈՆՅԱԿ ՈՒՐԱՐՏՈՒ» անվանումով 15 տարի, 0,5 լ, 40%,

·         «ARMENIAN COGNAC SARGIS ՀԱՅԿԱԿԱՆ ԿՈՆՅԱԿ ՍԱՐԳԻՍ» անվանումով, 5 տարի, 0,5 լ, 40% ։

Տնտեսավարողի վարքագիծը  որակվել է  որպես սպառողների շահերը խախտող, այդ թվում՝ անարդար առևտրային գործելակերպ՝ վերջինիս նկատմամբ նշանակելով  տուգանք։ 

Հանձնարարվել է դադարեցնել նշված ապրանքների իրացումը, իսկ այլ տնտեսավարող սուբյեկտների միջոցով դրանք իրացնելու դեպքում՝ գրավոր հետ կանչել։

Վրաստանի էկոնոմիկայի փոխնախարար Ինգա Փխալաձեն հայտարարել է, որ բանակցություններ են ընթանում ցամաքային էլեկտրաէներգիայի տարանցիկ միջանցքի վերաբերյալ։ Այս մասին գրում են վրացական ԶԼՄ-ները։

Փոխնախարարն ասել է, որ նախաձեռնության մշակման գործում ներգրավված են Ադրբեջանի, Վրաստանի, Թուրքիայի և Բուլղարիայի կառավարությունները։

«Վրաստանը ևս մեկ անգամ ընդգծում է իր շատ կարևոր դիրքը, որը մեր երկիրը դարձնում է Հարավային Կովկասի էներգետիկ հանգույց։ Սա երաշխավորում է, որ ցանկացած շահագրգիռ երկրից, առաջին հերթին՝ հարևան երկրներից, էլեկտրաէներգիան կարող է Եվրոպա մատակարարվել Վրաստանի միջոցով», – նշել է  փոխնախարարը։

Փխալաձեն կարծում է, որ այս նախագիծը, նախևառաջ, Վրաստանին կապահովի Եվրոպայի հետ ուղիղ էներգետիկ կապ, որը երկիրը նախկինում չի ունեցել աշխարհագրական գործոնների պատճառով։

 Կառավարության նիստի ժամանակ ասել է վարչապետ Նիկոլ Փաշինյանն ասել է, որ COP17-ը Հայասատանի  միջազգային ճանաչելիության համար շատ կարևոր է։ Նա նաև տեղեկացրել է, որ այս առիթով Հայաստան է ժամանելու շուրջ 15000 մարդ։

COP17-ի նախապատրաստական աշխատանքներին է անդրադարձել նաև Շրջակա միջավայրի նախարար Համբարձում Մաթևոսյանը։Նախարարը նշել է, որ համաժողովին կմասնակցեն կոնվենցիայի անդամ 196 երկրների ներկայացուցիչներ և տասնյակ հազարավոր մասնակիցներ ամբողջ աշխարհից։ 

Նախարար Մաթևոսյանը նշել է, որ COP17-ը առանձնահատուկ նշանակություն ունի այն առումով, որ Հայաստանում իրականացվելու Կումնիկ-Մոնթրեալի կենսաբազմազանության գլոբալ շրջանակի իրականացման առաջընթացի առաջին համաշխարհային գնահատումը։

«Հայաստանի համար սա բացառիկ հնարավորություն է ամրապնդելու մեր երկրի դերակատարումը միջազգային բնապահպանական գործընթացներում և աշխարհին ներկայացնելու Հայաստանի բնապահպանական օրակարգն ու հարուստ կենսաբազմազանությունը»,– ասել է նա։

ՀՀ Շուկայի վերահսկողության տեսչական մարմինը վերահսկողական միջոցառումներ է իրականացրել «Ժորա Գևորգյան Սամվելի» Ա/Ձ-ին (հասցե՝ ք․ Երևան, Զ․ Քանաքեռցու փ․ 121) և «ԱՄՄ» ՍՊԸ-ին  (հասցե՝ ք․ Աբովյան, Պիոներական փ․ 1/30)  պատկանող տարածքներում։

Իրականացված նմուշառման և լաբորատոր փորձաքննության արդյունքում պարզվել է , որ տնտեսավարողների կողմից իրացվող՝ նկարում պատկերված երեք պլաստմասե խաղալիքների բաղադրության մեջ առկա են երեխաների առողջության համար վտանգավոր (թունավոր) նյութեր։

Տեսչական մարմնի ղեկավար Արմեն Կոտոլյանի կողմից տրվել են համապատասխան հանձնարարականներ՝

• արտադրանքի կամ արտադրանքի խմբաքանակի իրացման կասեցման,
• արտադրանքի հետկանչման,
• և արտադրանքի ոչնչացման վերաբերյալ։

Տեսչական մարմինը հորդորում է բոլոր սպառողներին, ովքեր ձեռք են բերել վերոնշյալ խաղալիքները, կապ հաստատել Տեսչական մարմնի հետ և վերադարձնել դրանք՝ երեխաների առողջության հնարավոր վնաս պատճառելու ռիսկից խուսափելու նպատակով։

Հանրապետության նախագահ Վահագն Խաչատուրյանն ընդունել է Հայաստանում Եգիպտոսի արտակարգ և լիազոր դեսպան Ամալ Աֆիֆին՝ Եգիպտոսի ազգային տոնի՝ Հեղափոխության օրվա կապակցությամբ։

Նախագահ Վահագն Խաչատուրյանը շնորհավորել է դեսպանին և Եգիպտոսի բարեկամ ժողովրդին՝ խնդրելով իր շնորհավորանքները փոխանցել Եգիպտոսի նախագահ Աբդել Ֆաթթահ Ալ-Սիսիին։

«Մեր երկու ժողովուրդների հազարամյա պատմության ընթացքում մենք չենք ունեցել պատմական էջ, որտեղ խնդիրներ են եղել երկու երկրների ժողովուրդների միջև, և սա շատ գնահատելի է։ Գնահատելի է այն առումով, որ մենք անկախությունից հետո լավագույն ավանդույթները շարունակում ենք։ Մեր կառավարությունը, իշխանությունը շահագրգռված է Եգիպտոսի հետ հարաբերությունները խորացնելու, ամրապնդելու և զարգացնելու հարցում»,- մասնավորապես ասել է նախագահը։

Դեսպանն իր հերթին շնորհակալություն է հայտնել նախագահ Խաչատուրյանին ընդունելության և շնորհավորանքի համար։

Հանդիպման ընթացքում կողմերն անդրադարձել են Հայաստանի և Եգիպտոսի միջև քաղաքական, տնտեսական, մշակութային, զբոսաշրջային և այլ ոլորտներում ձևավորված սերտ համագործակցությանը՝ ընդգծելով դրա հետագա ընդլայնման և նոր ուղղություններով զարգացման կարևորությունը։

Առանձնահատուկ կարևորվել է բարձր տեխնոլոգիաների, արհեստական բանականության և կիբերանվտանգության ոլորտներում համագործակցության ներուժը։ Նշվել է, որ այս ուղղություններում փորձի և գիտելիքի փոխանակումը կարող է հիմք դառնալ համատեղ նորարարական ծրագրերի իրականացման և նոր տեխնոլոգիական լուծումների զարգացման համար, նկատի ունենալով նաև այն, որ օրեր առաջ Հայաստանում բացվել է Արհեստական բանականության գործարան։

Կողմերը կարևորել են նաև կրթության և գիտության ոլորտներում համագործակցության խորացումը՝ ընդգծելով գիտակրթական ծրագրերի, ուսանողների, երիտասարդ մասնագետների և գիտնականների փոխանակման ընդլայնման անհրաժեշտությունը։

Բարձր է գնահատվել միջազգային հարթակներում Հայաստանի և Եգիպտոսի միջև ձևավորված արդյունավետ համագործակցությունը։ Նշվել է, որ փոխադարձ վստահության վրա հիմնված գործակցությունը կարևոր նշանակություն ունի ինչպես երկու երկրների շահերի առաջմղման, այնպես էլ երկկողմ հարաբերությունների հետագա զարգացման համար։

Շեշտվել է բարձր մակարդակի փոխայցելությունների կարևորությունը, որոնք լրացուցիչ խթան են հաղորդում քաղաքական երկխոսությանը և նպաստում տնտեսական, գործարար, մշակութային ու զբոսաշրջային կապերի ընդլայնմանը։

Հանդիպմանն անդրադարձ է կատարվել նաև հոկտեմբերին Հայաստանում կայանալիք Կլիմայի փոփոխության մասին ՄԱԿ-ի շրջանակային կոնվենցիայի կողմերի համաժողովին՝ COP17-ին։ Նախագահը կարևորել է Եգիպտոսի բարձր մակարդակով մասնակցության ակնկալիքը՝ ընդգծելով, որ համաժողովը կարող է նոր հնարավորություններ ստեղծել նաև Հայաստանի և Եգիպտոսի միջև կլիմայական օրակարգի, կայուն զարգացման, կանաչ տեխնոլոգիաների և նորարարությունների ուղղություններով համագործակցության խորացման համար։