Նոյեմբերի 12-ին կայանալիք կառավարության նիստում կքննարկվի «Հայաստանի Հանրապետության քրեական օրենսգրքում փոփոխություն կատարելու մասին» օրենքի նախագծի վերաբերյալ կառավարության առաջարկությունը։ Հարցը զեկուցելու է արդարադատության նախարար Սրբուհի Գալյանը։
Նախագծով առաջարկվում է մինչև դատավճռի օրինական ուժի մեջ մտնելը անազատության մեջ գտնվելու ժամանակահատվածը ազատազրկման պատժի ժամկետում հաշվակցելու գործող կարգը փոխել։ Ներկայումս գործում է մեկ օրը մեկ օրվա դիմաց հաշվակցելու կանոնը, իսկ նախագծով առաջարկվում էր անազատության մեջ գտնվելու մեկ օրը հաշվարկել ազատազրկման երկու օրվա դիմաց։
Կառավարությունը, ընդհանուր առմամբ ընդունելի համարելով կալանքի տակ գտնվելու և ազատազրկման պայմանների տարբերությունները հաշվի առնելու անհրաժեշտությունը, միաժամանակ առաջարկում է ավելի տարբերակված մոտեցում՝ կախված կատարված հանցագործության ծանրությունից։
Կառավարության առաջարկով՝ ոչ մեծ և միջին ծանրության հանցագործությունների համար դատապարտվելու դեպքում մինչև դատավճռի օրինական ուժի մեջ մտնելը կալանքի տակ գտնվելու մեկ օրը ազատազրկման ձևով նշանակված պատժին հաշվակցվելու է 1.5 օրվա դիմաց։
Այս կարգավորումը առաջարկվում է կիրառել նաև հանցագործությունների համակցությամբ վերջնական պատիժ նշանակելիս, եթե համակցությունը ներառում է միայն ոչ մեծ կամ միջին ծանրության հանցանքներ։
Միաժամանակ առաջարկվում է սահմանել, որ նշված հաշվակցման կանոնը չի կիրառվի, եթե հանցագործությունների համակցությունն ընդգրկում է ծանր կամ առանձնապես ծանր հանցանք։
Կառավարության հիմնավորմամբ՝ գործող պայմաններում կալանքի տակ գտնվող անձանց նկատմամբ արտաքին աշխարհի հետ հաղորդակցության, տեսակցությունների, հեռախոսակապից օգտվելու և տեղաշարժի սահմանափակումները կարող են ավելի խիստ լինել, քան ազատազրկման ձևով պատիժ կրող դատապարտյալների նկատմամբ կիրառվող սահմանափակումները։
Մասնավորապես, ոչ մեծ և միջին ծանրության հանցագործությունների համար դատապարտված անձինք կարող են պատիժ կրել ցածր անվտանգային գոտում, որտեղ իրավունքների իրականացման հնարավորություններն ավելի լայն են։ Իսկ մինչև դատավճռի օրինական ուժի մեջ մտնելը կալանքի տակ գտնվող անձինք պահվում են առավել սահմանափակող մեկուսացման և վերահսկողության պայմաններում։
Կառավարության առաջարկի համաձայն՝ հաշվակցման նոր կարգավորումը պետք է հավասարակշռի կալանքի պայմանների առանձնահատկությունները հաշվի առնելու անհրաժեշտությունը, պատժի նպատակների իրացումը և համաչափության սկզբունքը։
Հարցը կառավարության նիստում քննարկվելուց հետո կառավարության առաջարկությունը սահմանված կարգով կներկայացվի Ազգային ժողովի աշխատակազմ։
Leave a Reply