Միլանում բացվել է ճարտարապետ Ջիմ Թորոսյանի 100-ամյակին նվիրված կամերային ցուցահանդեսը:
Իտալիայում Հայաստանի դեսպանության աջակցությամբ իրականացված նախագծի համադրողը ճարտարապետ Մարկո Պոլետին է:
Լուսանկարը` Emerging Talents Milan
Residenza Vignale-ի Կանաչ սրահում ներկայացված են Ջիմ Թորոսյանի էսքիզները, գծանկարներն ու նամակները, ինչպես նաեւ՝ որոշ անձնական իրեր:
Լուսանկարը` Emerging Talents Milan
Ցուցանմուշներից մեկը «Երեւակայական այգի» մետաքսե գլխաշորն է, որը ստեղծվել է հայկական Artuyt բրենդի կողմից՝ Ջիմ Թորոսյանի էսքիզների հիման վրա։
Նուրբ մետաքսից գլխաշորը արտադրվել է Իտալիայում՝ 100 օրինակով։
Լուսանկարը` Emerging Talents Milan
Ջիմ Թորոսյանը ծնվել է Երեւանում 1926 թվականի ապրիլի 18-ին։ Նա Հայաստանի ամենաանվանի ճարտարապետներից մեկն է։
Լուսանկարը` Emerging Talents Milan
1972-ից 1982 թվականը նա Երեւանի գլխավոր ճարտարապետն էր։
Երեւանի «Կասկադը» Ջիմ Թորոսյանի ամենահայտնի գործերից է։
2012 թվականին Մեդիամաքսին տված հարցազրույցում ճարտարապետն ասել էր.
«Կասկադը յուրահատուկ տեղ ունի իմ եւ գործընկերներիս կյանքում: Դա շենք չէ, սովորական կառույց չէ, այլ հանդիսավոր առանցք` կապված գեղեցկության գաղափարի հետ: Հիշում եմ, ինչքան էինք մտածում, ինչպես այն պետք է ներքեւից դեպի վեր ձգտի, զարգանա եւ հասնի իր տրամաբանական ավարտին`հայկական պետականությանը նվիրված օբելիսկին:
Ինձ համար ամենակարեւորն այն է, որ Կասկադը գտավ իր տեղը քաղաքում եւ դարձավ երեւանցիների ամենասիրելի վայրերից մեկը: Շատ հուզիչ է, երբ փողոցում մարդիկ մոտենում են ինձ եւ խոստովանում, որ չեն պատկերացնում Երեւանն առանց Կասկադի: Դա ամենաթանկ գնահատականն է ինձ համար»:
Leave a Reply