Այսօր երեկոյան «Քաղաքացիական պայմանագիր» կուսակցության վարչությունում Նիկոլ Փաշինյանի գլխավորությամբ նիստ է նախատեսված։
Նիստի հիմնական օրակարգային հարցերից մեկը Սյունիքի մարզում սպասվող ՏԻՄ ընտրություններին ՔՊ-ի թեկնածուների վերջնական հաստատումն է։ Մասնավորապես, պետք է հստակեցվի, թե ովքեր են գլխավորելու ՔՊ-ի ցուցակները Գորիսում, Կապանում և Մեղրիում։
Գորիսի դեպքում իշխանությունը որոշել է ընտրական ցուցակը գլխավորել գործող համայնքապետ Առուշ Առուշանյանի անունով, սակայն ՔՊ-ն նախատեսում է ունենալ նաև իր թեկնածուներին։ Կապանում, ըստ մեր տեղեկությունների, ՔՊ-ի ցուցակը կգլխավորի Նարեկ Բաբայանը։
Մեղրիի հարցում, սակայն, իրավիճակը շարունակում է քննարկումների առարկա մնալ։ Ինչպես ավելի վաղ հայտնել էինք, իշխանությունը դիտարկում էր գործող համայնքապետ Խաչատուր Անդրեասյանի թեկնածությունը, բայց նա այժմ կալանքի տակ է: Այժմ քննարկվել և որոշվել է նրան փոխարինել և ՔՊ-ի կողմից առաջադրել Սերգեյ Գրիգորյանին:
Այսօր նախատեսված նիստում հենց այս երեք համայնքների թեկնածուների հարցը պետք է վերջնականապես հաստատվի։
Օրակարգը, սակայն, միայն Սյունիքով չի սահմանափակվելու։ ՔՊ վարչությունում քննարկվելու է նաև Կոտայքի մարզպետի նշանակման հարցը, ինչպես նաև տարբեր համայնքներում թեկնածուների առաջադրման շուրջ առաջացած ներքին տարաձայնություններն ու դիմադրությունները։
Այսպիսով, Փաշինյանի գլխավորությամբ սպասվող այսօրվա նիստը կարող է առանցքային լինել ինչպես Սյունիքի, այնպես էլ առաջիկա ՏԻՄ ընտրությունների ամբողջական իշխանական դասավորության համար։
Leave a Reply