Blog

«Ереванский Наблюдатель» ալիքը, որը պարբերաբար հրապարակում է նյութեր` հղում անելով Փաշինյանի վարչակազմի աղբյուրներին, հրապարակել է նյութ, ըստ որի ՌԴ-ում ՀՀ դեսպան Գուրգեն Արսենյանին դեսպանի պաշտոնից հետ կանչելու որոշումը Փաշինյանը չի կայացրել

Հայաստանի իշխանություններն ակտիվորեն առաջ են մղում այն «վարկածը», թե Արսենյանի հնարավոր փոխարինման պատճառը նրա՝ իբր ոչ բավարար կոշտ դիրքորոշումն է և, նույնիսկ, վերջին շրջանում Փաշինյանի հակառուսական քաղաքականության հետ նրա անհամաձայնությունը։

Ըստ հրապարակման, Հայաստանի դեսպանատան աշխատակիցները բացահայտվել են ռուսական լրատվամիջոցներում վճարովի նյութեր տեղադրելու փորձի ժամանակ։ Նշվում է, որ այդ նյութերը նպատակ ունեին վարկաբեկել ՌԴ ԱԴԾ-ին, ՌԴ նախագահի աշխատակազմի ղեկավարի առաջին տեղակալ Սերգեյ Կիրիենկոյին և Հայ Առաքելական եկեղեցու բարձրաստիճան հոգևորականներին՝ Ռուսաստանի և Նոր Նախիջևանի հայոց թեմի առաջնորդ Եզրաս արքեպիսկոպոսի գլխավորությամբ։

Աղբյուրի պնդմամբ՝ երկու հայ դիվանագետների բռնել են «գործողության պահին»՝ կանխիկ գումարով, իսկ նրանց նամակագրությունն ու հեռախոսային խոսակցությունները արձանագրվել են։

Ուշադրության կենտրոնում է հայտնվել նաև դեսպան Գուրգեն Արսենյանը։ Աղբյուրը պնդում է, որ արձանագրվել են Մոսկվայում նրա բանակցությունները մի անձի հետ, որն իբր առնչություն ունի Մեծ Բրիտանիայի դեսպանատան հետ։ Այդ բանակցությունների ընթացքում պայմանավորվածություններ են ձեռք բերվել ռուսական օբյեկտներին և կառույցներին վերաբերող ռազմաքաղաքական բնույթի գաղտնի տեղեկատվության փոխադարձ փոխանցման վերաբերյալ։

Հրապարակման հեղինակները պնդում են, որ Մոսկվան, չցանկանալով հարցը վերածել հրապարակային սկանդալի, Երևանին առաջարկել է փոխարինել խնդրահարույց դիվանագետներին։

Այս տեղեկությունները, ըստ «Ереванский наблюдатель»-ի, փոխանցել են Հայաստանի ԱԳՆ-ի աղբյուրները։

Հայ քրիստոնյա, կարդա՛ եւ խորհի՛ր, թող բացվեն հոգուդ, սրտիդ եւ մտքիդ աչքերը, որպեսզի տեսնես, զգաս եւ ընկալես Ճշմարտությունը, այս մասին գրել է Մայր աթոռ Սուրբ Էջմիածնի Թանգարանների և արխիվի տնօրեն Հայր Ասողիկ աբեղա Կարապետյանը։

«Հայոց Եկեղեցու լուսավորիչ վարդապետաց դասի ԺԳ. (13-րդ) դարի ականավոր դեմքերից Տ. Հովհաննես Երզնկացի Մեծ վարդապետի այս վկայությունը բոլոր ժամանակների համար անսասան ճշմարտություն է։ Մանավանդ մեր օրերի այս խորին խավար իրականության մեջ Մեծ վարդապետի այս վկայությունն աստվածային Լույս է՝ առ Աստված հուսացյալ բոլո՛ր հայ քրիստոնյաների համար, որպեսզի մենք մնանք հաստատուն եւ հավատարիմ մեր Սուրբ Եկեղեցու հավատքին, վարդապետությանը, կարգաց ու կանոններին, մեզ հոգեւոր կյանք եւ առավել՝ հավիտենական կյանք հուղարկավորող եկեղեցական դասին՝ ի գլուխ ազգընտիր եւ աստվածարյալ, ողջ տիեզերքում Սբ Եկեղեցու միակ Օծյալ հոգեւոր պետ, գահակալ Ամենայն Հայոց Կաթողիկոսի։

Եւ Տ. Հովհաննես Երզնկացի Մեծ վարդապետի այս վկայությունը, սիրելի ազգակիցներ, ձեզ ամենքիդ եմ մատուցում մեր Նախնյաց լեզվով՝ աստվածային գրաբարով. հոգով եւ սրտով կարդացեք եւ ձեր միտքը խորապես կընկալի այս Լույս ճշմարտությունը, որով կփարատվի անգիտության խավարը կործանարար եւ կծագի աստվածգիտության ճշմարիտ ու փրկարար լույսը.

«Ուղղափառ հաւատոյ Քո լոյս՝ ո՜վ Եկեղեցի Հայոց , ո՛չ նուազեցաւ, ի բարի սերմանս ցորենոյդ որոմն ո՛չ խառնեցաւ (Մատթ. ԺԳ. 25). զաղբիւր յստակ աւանդութեանց Քոց՝ աղտաղտուկ ջուր օտարոտի ուսմանց ո՛չ պղտորեաց (Սաղմ. ՃԶ. 34). ի ստուգութեան եւ ի ճշմարտութեան հացն Քո կենդանական՝ մեռելական խմոր եւ հերձուած քացախութեան չարութեանն ո՛չ զանգեցաւ (Ա. Կորնթ. Ե. 8 ). յոսկի ամբիծ հաւատոյն եւ յարծաթ լուսատեսիլ բանին՝ պղինձ ժանգահոտ եւ կապար սեւաթոյր ո՛չ գտաւ։ Եւ այսոքիկ խնդրուածովք Մեծ Նահատակին Քրիստոսի Սրբոյն Գրիգորի՝ Քեզ շնորհեցան»։

Արդ, հայ քրիստոնյա, կարդա՛ եւ խորհի՛ր, թող բացվեն հոգուդ, սրտիդ եւ մտքիդ աչքերը, որպեսզի տեսնես, զգաս եւ ընկալես Ճշմարտությունը։ Իսկ հայ իրականության մեջ հավիտենական եւ հաղթական Ճշմարտությունն այս է՝ Հայոց Եկեղեցու հավատքը, վարդապետությունը, կարգերն ու կանոնական դրվածքը «ոչ է հնացյալ զի նորոգեսցի, եւ ոչ է թերի՝ զի լրասցի»։

Արդ, մնանք ամուր եւ հաստատուն խարսխված «յանսասանելի վէմն Քրիստոս»»,- նշել է Հայր Ասողիկը։