Category: TIV 1

Էկոնոմիկայի նախարար Գևորգ Պապոյանը կառավարության նիստում հայտնել է, որ ծաղկի արտահանումն ավելացել է։

«Երեկ, օրինակ, 139 հազար հատ արտահանում ենք ունեցել և կարծում ենք, որ որոշակի մեխանիզմներ կան գործարկված, որոնք հնարավորություն կտան այս հարցը լուծել»,- ասել է Գևորգ Պապոյանը։

Վարչապետ Նիկոլ Փաշինյանը հավելել է, որ այս տարի ծիրանի գերբերքատվություն չկա․ «Բայց դեպի Հայաստան շատ լավ ուղևորահոսքեր կան, ուզում եմ դա էլ արձանագրենք որպես արտահանման մի ճյուղ, որովհետև զբոսաշրջիկները գալիս են՝ համարյա ամեն օր 10 հազարից ավելի ուղևոր մուտք է գործում ՀՀ»,- շեշտել է վարչապետը։

Անկարայում կայացած ՆԱՏՕ-ի գագաթնաժողովի ժամանակ դաշինքի գլխավոր քարտուղար Մարկ Ռյուտեն խորհուրդ է տվել Կրեմլի առաջնորդին չսադրել դաշինքին։

«Մեզ հետ մի խաղացեք: Մենք երբեք ոչ մեկի վրա չենք հարձակվի։ Մենք միայն կպաշտպանենք մեր ապրելակերպը, ժողովրդավարությունն ու տարածքը»,- ասել է Ռյուտեն՝ դիմելով Վլադիմիր Պուտինին։

Նա նաև ընդգծել է, որ ուկրաինական քաղաքների վրա Ռուսաստանի զանգվածային հրթիռային հարվածները վկայում են Կրեմլի առաջնորդի հուսահատությունը՝ մարտադաշտում հաջողության բացակայության պատճառով։

«Կարծում եմ՝ սա ևս մեկ անգամ ցույց է տալիս, թե որքան հուսահատ է Պուտինը, քանի որ ուկրաինացիները լավ են կռվում»,- նշել է ՆԱՏՕ-ի գլխավոր քարտուղարը։

Նրա համոզմամբ՝ Ուկրաինան իսկապես հասել է զարմանալի հաջողությունների։ Առաջին հերթին դա վերաբերում է Ռուսաստանի տնտեսությանը հասցված հզոր հարվածներին, էներգետիկ ենթակառուցվածքներին հասցված վնասին, Ռուսաստանի պաշտպանական արդյունաբերական ներուժի ոչնչացմանը խոր թիկունքում։

Ռյուտեն ընդգծել է, որ ռուսական բանակն այլևս չի կարող լայնածավալ առաջխաղացումներ գրանցել ճակատում, ինչպես եղավ մի քանի ամիս առաջ։

Վերջերս դաշինքի գլխավոր քարտուղարը նաև հնարավոր է համարել խաղաղության բանակցությունները Պուտինի հետ՝ ռազմաճակատում և դրա սահմաններից դուրս Ուկրաինայի զինված ուժերի նոր հաջողությունների ֆոնին:

Տավուշի մարզի դատախազությունը, պետական (համայնքային) շահերի պաշտպանության հայց հարուցելու լիազորության շրջանակներում իրականացված ուսումնասիրության արդյունքում, 2026 թվականի հունիսի 22-ին հայցադիմում է ներկայացրել Հակակոռուպցիոն դատարան՝ ընդդեմ Մանվել Գրիգորյանի ընտանիքին պատկանող «Արա և Այծեմնիկ» ԲԲ ընկերության՝ Տավուշի մարզի Դիլիջան քաղաքի Մաքսիմ Գորկի 27 հասցեում գտնվող՝ 189 միլիոն 903 հազար դրամ շուկայականին մոտարկված կադաստրային արժեքով անշարժ գույքի աճուրդն անվավեր ճանաչելու և անվավերության հետևանքներ կիրառելու պահանջով:

Հակակոռուպցիոն դատարանը 2026 թվականի հուլիսի 1-ին հայցադիմումն ընդունել է վարույթ և կիրառել հայցի ապահովման միջոց՝ արգելելով «Արա և Այծեմնիկ» ԲԲ ընկերությանը ցանկացած եղանակով օտարել, գրավադրել վերոնշյալ անշարժ գույքը:

Վերոնիկա Զոնաբենդի հայտարարությունը` կանանց միջազգային մարդասիրական պատվիրակության՝ Բաքու այցի նախապատրաստման շրջանակում.

«Ադրբեջանում պահվող հայ բանտարկյալներին այցելելու նպատակով կանանց միջազգային մարդասիրական պատվիրակության՝ Բաքու այցի նախապատրաստման շրջանակում հրապարակային նամակներ եմ հղել միջազգային և պետական այն կառույցներին, որոնց մասնակցությունից կարող է կախված լինել այցի կազմակերպումն ու պատվիրակության անդամների անվտանգությունը։

Եվրամիության ավիացիոն անվտանգության գործակալությունը (EASA) ավիաընկերություններին խորհուրդ է տվել մինչև օգոստոսի 31-ը չօգտագործել Իրանի և Իրաքի օդային տարածքը՝ ԱՄՆ-ի կողմից Իրանի ուղղությամբ իրականացվող հարվածների պատճառով։

Գործակալությունը նաև կոչ է արել զգուշություն ցուցաբերել Պարսից ծոցի երկրների, Իսրայելի, Հորդանանի, Լիբանանի և Մերձավոր Արևելքի մի շարք այլ պետությունների օդային տարածքներում թռիչքներ իրականացնելիս։

Եվրոպական միությունը նախատեսում է Հայաստանում կառուցել երեք սահմանային անցակետ, իսկ այդ ծրագրերի իրականացման առաջին նախապայմանը կլինի տարածքների ականազերծումը։ Այս մասին Երևանում լրագրողների հետ ճեպազրույցում ասել է Հայաստանի Հանրապետությունում Եվրոպական միության դեսպան Վասիլիս Մարագոսը՝ ներկայացնելով ԵՄ-ի կողմից Հայաստանին նվիրաբերված ժամանակակից ականազերծման մեքենան։

Անդրադառնալով այն հարցին, թե արդյոք մեքենան կծառայի՞ միայն սահմանամերձ բնակչության անվտանգությանը, թե՞ նաև ենթակառուցվածքային ծրագրերին՝ Մարագոսը պատասխանեց, որ այն կարևոր նշանակություն կունենա երկու ուղղություններով։

«Կապի նախագծերը պահանջում են մաքրել այն տարածքները, որոնցով դրանք պետք է անցնեն։ Ինչպես գիտեք, մենք արդեն պարտավորվել ենք կառուցել երեք սահմանային անցակետ և այժմ աշխատում ենք այդ ծրագրի մանրամասների վրա։ Սակայն ականազերծումը կլինի առաջին անհրաժեշտ քայլը, որպեսզի այդ կարևոր շինարարական աշխատանքները կարողանան առաջ շարժվել»,-նշել է Մարագոսը՝ առանց մանրամասնելու, թե որ հատվածներում է նախատեսվում սահմանային անցակետերի կառուցումը։

Նա հավելեց, որ Եվրոպական միությունը շարունակում է խորացնել Հայաստանի հետ համագործակցությունը՝ ներդրումներ կատարելով ինչպես անվտանգության, այնպես էլ ենթակառուցվածքային զարգացման ուղղությամբ։

ՀՀ-ում ԵՄ դեսպանի բնորոշմամբ՝ ԵՄ-ն հետևողականորեն աշխատում է Հայաստանի հետ հարաբերությունների խորացման ուղղությամբ, և այդ համագործակցությունն արդեն շոշափելի արդյունքներ է տալիս Հայաստանի քաղաքացիների համար։

«Մենք աշխատում ենք ԵՄ-ի և Հայաստանի միջև հարաբերությունները խորացնելու ուղղությամբ, և սա շատ կոնկրետ օգուտներ է բերում հայ ժողովրդին։ Եվրոպական միությունը ներդրումներ է կատարել հակամարտությունից տուժած բնակչության անվտանգության ապահովման գործում՝ տարբեր ծրագրերի, ինչպես նաև Հայաստանում Եվրոպական միության դիտորդական առաքելության (EUMA) գործունեության միջոցով։ Այժմ մենք ներդրումներ ենք կատարում նաև կյանքեր փրկելու գործում՝ համագործակցելով Հայաստանի ականազերծման գործողությունների կառույցի հետ»,-շեշտել է Վասիլիս Մարագոսը՝ մանրամասնելով, որ Հայաստանին փոխանցված ականազերծման մեքենան արտադրվել է Խորվաթիայում և եվրոպացի հարկատուների համերաշխության կոնկրետ դրսևորումն է Հայաստանի նկատմամբ։

ՀՀ քննչական կոմիտեի հատկապես կարևոր գործերի քննության գլխավոր վարչության կիբեռհանցագործությունների և բարձր տեխնոլոգիաների ոլորտում կատարված հանցագործությունների քննության վարչությունում հանցավոր կազմակերպության կողմից առանձնապես խոշոր չափերով համակարգչային հափշտակության և փողերի լվացման դեպքերի առթիվ նախաձեռնված քրեական վարույթի նախաքննության ընթացքում հանցավոր ծագում ունեցող 704 մլն ՀՀ դրամից բացի՝ շուրջ 29 մլն 491 հզր ՀՀ դրամ փոխանցվել է պետական բյուջե:

Քրեական վարույթի նախաքննությունը շարունակվում է:

ԲՀԿ առաջնորդ Գագիկ Ծառուկյանի վերաբերյալ քննվող քրեական վարույթով երեք անձ, այդ թվում Ծառուկյանը, կալանավորված է. Radar Armenia-ն տեղեկացավ քննչական կոմիտեից։

Հիշեցնենք՝ Գագիկ Ծառուկյանի կազմակերպմամբ մի շարք անձինք 2022-2024 թվականների ընթացքում առերևույթ կատարել են առանձնապես խոշոր չափերով խարդախություն և առանձնապես խոշոր չափերով փողերի լվացում:

«Հայաստան» դաշինքի՝ երկու օր առաջ տարածված հայտարարության մեջ ամեն ինչ հստակ է։ Սակայն երեկ հրապարակված տեսագրությունները՝ ինչպես են «Բարգավաճ Հայաստան» կուսակցության նախագահ Գագիկ Ծառուկյանին ԱԱԾ աշխատակիցների ուղեկցությամբ տանում Քննչական կոմիտե՝ բացահայտ ոտնահարելով օրենքի, բարոյականության և մարդկային տրամաբանության բոլոր նորմերը` հրապարակային նվաստացնելով, ստորաբար գետնին պառկեցնելով, իսկ այնուհետև Դատարանի վճռով կալանավորելով նրան, ևս մեկ անգամ փաստում են, որ Սրբազանների, հայազգի նշանավոր բարերար Սամվել Կարապետյանի, մեր գործընկեր Արթուր Սարգսյանի, ընդդիմադիր դաշինքների, կուսակցությունների, լրատվամիջոցների բազմաթիվ անդամների դեմ իրականացվող գործընթացները քաղաքական հաշվեհարդար են՝ թույլ, մանրախնդիր, անբարոյական միավորի վրեժխնդրություն, գրում է ՀՀ ԱԺ պատգամավոր Սեյրան Օհանյանը։

«Հասարակության յուրաքանչյուր գիտակից անդամ հասկանում է, որ սա նրանց ձեռագիրն է, և այլ բան չէինք էլ կարող սպասել նրանցից։ Բայց պարտված, Հայաստանը այս օրին հասցրած, Արցախը հանձնած, Հայ Առաքելական Եկեղեցին հալածող, հակապետական, հակաազգային իշխանությունները որքան մնան մեր պետության կառավարման ղեկին, նրանց թիրախում է հայտնվելու ազգային արժեքներ կրող յուրաքանչյուր ընդդիմադիր գործիչ կամ պարզապես իշխանությանը քննադատող քաղաքացի։

Սակայն հատուցման, արդարության վերականգնման օրը գալու է։ Եվ այս հանցավոր ամենաթողության թե պատվիրատուն, թե հրաման տվողը, թե այսպես կոչված ոհմակով «հրաման կատարող» ոչնչությունները իրականում իրենք իրենց են նվաստացնում, ստորացնում և անկասկած կանգնելու են դատարանի առաջ, իսկ վախը Աստծո դատաստանից՝ նրանց հալածելու է ամեն վայրկյան, ողջ կյանքի ընթացքում»։

ՀԷՑ ժամանակավոր կառավարիչ Ռոմանոս Պետրոսյանը սոցցանցի իր էջում գրել է.

«Նախօրեին լրատվամիջոցների ներկայացուցիչների հետ զրույցի ընթացքում ՀԷՑ-ի օրվա սեփականատերն, ի պատասխան ՀԷՑ-ի վերաբերյալ հնչեցված հարցադրումների, առնվազն երեք «ՈՒԺԵՂ» ՍՈՒՏ է ասել․

Ս.Կ – «Ընդամենը 100 հատ նոր միացում են արել՝ 3000-3500-ի փոխարեն» (ենթադրաբար, ժամանակավոր կառավարման ողջ շրջանը նկատի ուներ)։

ՓԱՍՏ – Միայն 2026թ. 1-ին կիսամյակում ՀԷՑ-ն իրականացրել է 4103 նոր բաժանորդի միացում ցանցին (միջինը՝ օրական 31 հայտ)։

Ս.Կ. – «Չեն կարողանում ձեռք բերել, դրա համար չեն կարողանում ներդրումային ծրագրերը կատարել»։

ՓԱՍՏ – Վարույթի մեկնարկից ի վեր՝ մինչ օրս, շուրջ 11 ամսում, բացառապես բաց, թափանցիկ մրցութային գնումների միջոցով ՀԷՑ-ը ձեռք է բերել շուրջ 14,5 մլրդ դրամի էլեկտրատեխնիկական սարքավորումներ և ապրանքանյութական արժեքներ։ Այս պահին ՀԷՑ-ի պահեստներում առկա են ավելի քան 27 մլրդ դրամի նյութեր՝ նախատեսված ներդրումային ծրագրի և ցանցի ընթացիկ սպասարկման համար։

Ս.Կ. – «40%-ից ավելի ավելացել են անջատումները»։

ՓԱՍՏ – Ընթացիկ տարվա մարտ, ապրիլ և մայիս ամիսներին հոսանքազրկումների միջին տևողության ցուցանիշը բարելավվել է շուրջ 36,7%-ով, ինչը պաշտոնապես ներկայացվել է նաև ՀԾԿՀ-ին։

Հ.Գ. Ահա այսպիսի անփառունակ վիճակագրություն և մերկապարանոց գնահատականներ՝ #Իրենց_ձևով…»։