Category: TIV 1

Բարձր տեխնոլոգիական արդյունաբերության նախարարության և ամերիկյան Starlink ընկերության միջև կայացած բանակցությունների արդյունքում ՀՀ կառավարությունը ստացել է Starlink-ի կողմից նվիրաբերված 56 սարքավորում՝ ապագա հնարավոր արտակարգ իրավիճակներին նախապատրաստվելու նպատակով։ Այս սարքավորումները հնարավորություն կտան ապահովել հուսալի և բարձր արագությամբ ինտերնետ կապ՝ աղետների և այլ արտակարգ իրավիճակների ընթացքում արդյունավետ արձագանքման համար։

Այս նախաձեռնությունն իրականացվել է ՀՀ բարձր տեխնոլոգիական արդյունաբերության և ներքին գործերի նախարարությունների համագործակցությամբ։

Նախարարությունից հայտնում են, որ սարքավորումներն արդեն Հայաստանում են, և նախատեսվում է դրանք հատկացնել ՀՀ ներքին գործերի նախարարությանը՝ Փրկարար ծառայության կարիքների համար։ Դրանք կնպաստեն Հայաստանի արտակարգ իրավիճակներում կապի բազմազանության հնարավորությունների ամրապնդմանը, մասնավորապես, փրկարարական գործողությունների, բնական աղետների, ճգնաժամային իրավիճակների, ինչպես նաև այն դեպքերում, երբ կապի ավանդական ենթակառուցվածքները սահմանափակված, գերծանրաբեռնված կամ խափանված են։

Starlink-ը Երկրի ցածր ուղեծրում գործող աշխարհի ամենաառաջատար արբանյակային «համաստեղությունն» է, որն ապահովում է հուսալի և բարձր արագությամբ լայնաշերտ ինտերնետ միլիոնավոր օգտատերերի համար ամբողջ աշխարհում։ Այն կարևոր դեր է կատարում արտակարգ իրավիճակներին արձագանքող ծառայությունների համար կապի անխափանությունն ապահովելու գործում, հատկապես հեռավոր բնակավայրերում և ճգնաժամային պայմաններում։

Այս նվիրատվությունը շարունակությունն է Starlink-ի և ՀՀ ԲՏԱ նախարարության միջև ձևավորված արդյունավետ համագործակցության, որի շրջանակում արդեն իսկ 110 Starlink սարքավորում ապահովում է հազարավոր սովորողների ինտերնետային կապը Հայաստանի հեռավոր բնակավայրերի դպրոցներում։

ՀՀ բարձր տեխնոլոգիական արդյունաբերության նախարարությունը բարձր է գնահատում Starlink-ի հետ համագործակցությունը և այս կարևոր ներդրումը Հայաստանի արտակարգ իրավիճակներին պատրաստվածության և արձագանքման կարողությունների ամրապնդման գործում։

ԱՄՆ նախագահ Դոնալդ Թրամփը հայտարարել է, որ Իրանի կողմից իր դեմ մահափորձի կամ նման փորձի դեպքում Միացյալ Նահանգների զինված ուժերը պատրաստ են հարվածներ հասցնել Իրանին։ Թրամփն այդ մասին գրել է Truth Social սոցիալական հարթակում։

«1000 հրթիռ պատրաստ վիճակում է և ուղղված է Իրանի Իսլամական Հանրապետությանը»,- գրել է Թրամփը՝ հավելելով, որ դրանց կարող են հաջորդել հազարավոր այլ հրթիռներ, եթե Իրանի կառավարությունը գործի իր սպառնալիքի համաձայն և փորձի սպանել ԱՄՆ գործող նախագահին։

Թրամփի խոսքով՝ համապատասխան հրամաններն արդեն տրված են, իսկ ԱՄՆ զինված ուժերը պատրաստ են, ցանկանում են և ունակ են գործելու։ Նա նշել է, որ հրամանները տրվել են մեկ տարվա ժամկետով՝ երկարաձգման հնարավորությամբ։

Քրեական վարույթի շրջանակում ձերբակալվել է Ա.Մ.-ն՝ դատարան ներկայացնելու համար: Այդ մասին Radar Armenia-ին հայտնեցին Քննչական կոմիտեից։

Նշենք, որ ավելի վաղ տեղեկություններ էին տարածվել, որ բերման է ենթարկվել «Մայր Հայաստան» կուսակցության անդամ և պատգամավորի թեկնածու Արեգնազ Մանուկյանը։

Ադրբեջանական կողմն ավարտել է խաղաղության համաձայնագրի վերջնական մշակումը։ Ադրբեջանական APA լրատվական գործակալությունը հաղորդում է, որ արտաքին գործերի նախարար Ջեյհուն Բայրամովը այս հայտարարությունն արել է լրագրողների հետ զրույցում։

Նախարարը նշել է, որ Վաշինգտոնում կայացած գագաթնաժողովի ժամանակ Ադրբեջանի և Հայաստանի միջև ստորագրվել է համատեղ հայտարարություն։

«Խաղաղության համաձայնագրի տեքստն արդեն հաստատվել է, և այն բաց է հանրության համար։ Ադրբեջանական կողմը պահպանում է սկզբունքային մոտեցում այս հարցում։ Նախագահ Իլհամ Ալիևը արտահայտել է պետության պաշտոնական դիրքորոշումը։ Մենք ակնկալում ենք, որ Ադրբեջանի նկատմամբ տարածքային պահանջները կհեռացվեն Հայաստանի Սահմանադրությունից։ Դրանից հետո կարող է ստորագրվել խաղաղության համաձայնագիր»,- ասել է նա։

Ջեյհուն Բայրամովը նշել է, որ Հայաստանում քայլեր են ձեռնարկվում նոր սահմանադրություն ընդունելու ուղղությամբ, ինչը Փաշինյանը հաստատել է խորհրդարանական ընտրություններից հետո։

«Մեզ հետաքրքրող և մտահոգող հիմնական հարցը Ադրբեջանի նկատմամբ տարածքային պահանջներն են, որոնք ամրագրված են Անկախության հռչակագրում։ Երբ այս հարցը լուծվի, մենք ակնկալում ենք, որ այն շուտով կավարտվի»,- ընդգծել է նա։

«Հայրենակիցներ ջան, ընտրություններից հետո էլ ենք գալիս: Մեր առաջին հետընտրական այցը Մասիս համայնքի Նիզամի և Սիս բնակավայրեր»,- ֆեյսբուքյան տեսանյութում նշում է  «Ուժեղ Հայաստան» կուսակցության խորհրդի անդամ, «Ուժեղ Հայաստան» դաշինքի պատգամավորության թեկնածու Նարեկ Կարապետյանը։ 

Նա ասում է. «Ընտրություններից առաջ երբ այցելում էինք համայնքներ, միշտ ասում էին՝  կուսակցությունները մենակ ընտրություններից առաջ են գալիս, հետո մոռանում են՝ ինչ են ասել, ինչ ենք խոսք տվել։ Մենք մոռացող չենք, այցելելու ենք, ծրագրեր ենք անելու այս համայքներում։ 

Մենք խնդրել ենք մեր հայրենակիցներին բարձրաձայնել այն հարցերը, որոնք իրենք ուզում են մենք բարձրաձայնել Ազգային ժողովում և պետական այլ մարմիններում»։

Գագիկ Ծառուկյանը «Երևան-Կենտրոն» ՔԿՀ-ից ուղերձ է հղել.

«Անկախ բոլոր անարդարություններից՝ շարունակելու եմ օգտակար լինել իմ երկրին, իմ ժողովրդին

Սիրելի՛ հայրենակիցներ,

Ինձնից կախված ամեն ինչ արել եմ։ Մտել եմ պայքարի մեջ, չեմ քաշվել մի կողմ, չեմ ասել՝ կարևորը իմ բարեկեցությունն է։ Հավաքել եմ լավ թիմ, մշակել ենք շատ լավ ծրագիր, հայտարարել եմ, որ չունեմ անձնական որևէ հավակնություն, չեմ հավակնել ոչ մի պաշտոնի։

Պատրաստվել էի լավ ծրագրային քարոզարշավի, որը տևեց, ցավոք, ընդամենը 4-5 օր։ Դրանից հետո՝ անձնական վիրավորանքներ, ընտանիքիս անդամների թիրախավորում, թիմակիցներիս ձերբակալություններ, քրեական գործեր և այլն։ Նույնիսկ այդ պայմաններում հայտարարել եմ, որ քաղաքական մրցակիցների և առավել ևս՝ նրանց ընտանիքների հանդեպ որևէ վիրավորանքը բացառում եմ։

Բոլոր հարվածներով ու հարձակումներով հանդերձ՝ ԲՀԿ-ն հավաքեց բավարար ձայներ՝ ԱԺ մտնելու համար։ Բոլորիդ աչքի առաջ տեղի ունեցավ պարզ գողություն։ Գործող իշխանությունների կամայական որոշմամբ՝ մի ամբողջ խմբակցության թույլ չտվեցին լինել ԱԺ-ում։ Մեր տասնյակ հազարավոր ընտրողների իրավունքները ոտնահարվեցին, ձայները փոշիացվեցին։ Ամեն ինչ կատարվեց հայ ժողովրդի աչքի առաջ, աշխարհի աչքի առաջ։

Շնորհակալ եմ բոլոր քաղաքական ուժերին, հանրային շրջանակներին, անհատներին, որոնք անկախ իրենց քաղաքական նախասիրություններից՝ իրենց ձայնը բարձրացրեցին անարդարության դեմ։ Սա շատ թանկ ու երբեք չմոռացվող պահվածք է։

Իմ հանդեպ իրականացվող ակնհայտ կեղծ, սարքովի գործը այս ամենի շարունակությունն է։ Մի դատարկ, փուչիկ գործ։ Իմ խիղճը հանգիստ է։

Ցավոք, Հայաստանը կանգնած է անխուսափելի մարտահրավերների առաջ։ Մեզ սպասում են բարդ ու ռիսկերով լեցուն ժամանակներ։ Դրանց դիմակայելու համար մեզ, առաջին հերթին, անհրաժեշտ է խոհեմություն։

Մեզ նաև շատ անհրաժեշտ է, ինչպես ասել եմ ընտրություններից առաջ և ասում եմ հիմա՝ ներքին, հանրային համերաշխություն։ Սա ասում եմ ես, ում հանդեպ կատարվեց ամենամեծ անարդարությունը։

ԿԸՀ և ՍԴ որոշումները, քրեական գործերը, կալանքը չեն կարող փոխել իմ մտածողությունը, իմ արժեհամակարգը։
Անկախ բոլոր անարդարություններից՝ ես շարունակելու եմ ուժերիս ներածին չափով օգտակար լինել իմ երկրին, իմ ժողովրդին։

Ես մնում եմ Ձեր Ծառուկյանը. ում կարող եմ՝ օգտակար կլինեմ, ինչով կարող եմ՝ կօգնեմ իմ երկրին»։

«Ասենք օտարերկրյա արտադրության սմորթ ժամացույց, սմարթ հեռախոս, սմարթ կոշիկ, գլխարկ ամեն ինչ կրում են, իրենց բոլոր տվյալները մեջը գրում են, ոչ ոք չի ասում լսի կարող ա այս տվյալները ուրիշ տեղերում կարդում են»,-ասել է վարչապետ Նիկոլ Փաշինյանը։ Նա հիշեցնելով բջջային հեռախոսների ներմուծման համար գրանցման համակարգի ներդրման նախագծի շուրջ քննարկումները,  հիշեցրել է, որ փոխարենը անձնական տվյալների մասին են բարձրաձայնում 

«Սոցիալական ցանցերում իրար հետ ինչ ասես խոսում են, կռիվ անում, ինչ են ուտում… որ այդ ինֆորմացիան կուտակվում է, որ ոք չի մտահգվում։ Եվ այն, որ այդ ինֆորմացիան կարող է գլոբալ օգտագործվել պետության և ժողովրդի դեմ, բացարձակապես ոչ ոքի չի հետարքրում»,-շեշտել է վարչապետը։

Նա պաշտոնապես հայտարարել է, որ բոլորի տվյալները ինչ-որ մի տեղ կուտակվում է. «Դուք ոչ մի գաղտնիք չունեք»,-շեշտել է վարչապետը։

Կառավարությունն այսօրվա նիստում չզեկուցվող նախագծերի թվում ընդունել է Հայաստանի և Վերակառուցման և զարգացման միջազգային բանկի միջև «Հայաստանի բնակարանային ապահովման և հիփոթեքային շուկայի զարգացման ծրագիր» ֆինանսական համաձայնագրի վավերացման և դրամաշնորհային համաձայնագրի հաստատման մասին նախագիծը։

Ըստ հիմնավորման՝ 2026 թվականի ապրիլի 29-ին և 30-ին ստորագրված համաձայնագրերով նախատեսվում է իրականացնել 284.4 մլն ԱՄՆ դոլար արժողությամբ ծրագիր, որն ուղղված է շուրջ 109 հազար տեղահանված անձանց բնակարանային լուծումների հասանելիության բարելավմանը, հիփոթեքային շուկայի զարգացմանը և բնակարանային քաղաքականության կատարելագործմանը։ Ֆինանսավորումը ներառում է 240 մլն ԱՄՆ դոլարի վարկ, 34.4 մլն ԱՄՆ դոլարի դրամաշնորհ և 10 մլն ԱՄՆ դոլարի վարկ Ազգային հիփոթեքային ընկերությանը՝ ծրագրի երկրորդ բաղադրիչի իրականացման համար։ Համաձայնագրի վավերացումը պետական բյուջեի համար առաջացնում է լրացուցիչ ֆինանսական պարտավորություններ, իսկ դրամաշնորհային համաձայնագիրը՝ ոչ։

«Առաջիկա մեկ տարվա ընթացքում մենք խնդիր ունենք պատրաստվելու այն իրավիճակին, որ արտահանումները մաքսիմալ դիվերսիֆիկացնենք, որպեսզի մեկ շուկայից անհամաչափ կախում չունենանք»,- ասել է վարչապետ Նիկոլ Փաշինյանը կառավարության նիստում՝ հավելելով, որ եթե մենք դեպի տասնյակ շուկաներ որևէ բան ենք արտահանում, այդ շուկաներից որևէ մեկում մեզ համար չկանխատեսված իրադարձությունը չի կարող ազդել մեր շուկայի վրա։

Նրա խոսքով՝ ամեն ինչի պարագայում պետք է գործել այդ տրամաբանությամբ։ «Եվ սա նաև Հայաստանի ինքնիշխանության, անկախության և պետականության ամրապնդման ճանապարհն է»,- շեշտել է նա։

Վարչապետ Նիկոլ Փաշինյանը նշել է, որ չնախատեսված այցեր է կատարել մի քանի վայրեր և անդրադարձել է մի միջադեպի։

«Նորակառույց մանկապարտեզներից մեկում ակնատես եմ եղել, որ սանհանգույցում զուգարանակոնքերի վրադիրները կա՛մ ջարդուփշուր են եղել, կա՛մ ընդհանրապես գոյություն չունեն։ Սանհանգույցը գտնվում է վատ սանիտարահիգիենիկ պայմաններում»,- ասել է վարչապետը և հավելել, որ դա, իհարկե, սովորական տեսարան է, բայց միայն այն դեպքում, երբ դա խարխուլ դպրոցներում է կամ մանկապարտեզներում․

«Բայց երբ խոսքը նորակառույցների մասին է, դա որևէ կերպ չի կարող հանդուրժվել։ Ընդ որում, երբ գնում եմ որևէ դպրոց կամ մանկապարտեզ ընդունելու, նկատում եմ, որ զուգարանակոնքերի վրադիրները բարձր որակի չեն»,- նշել է վարչապետը և հավելել, որ դրանք ժամանակ առ ժամանակ պետք է փոխվեն։

Նա հայտարարել է, որ չնախատեսված այցեր է կատարելու ամենուր․ «Դպրոցներ, մանկապարտեզներ․ ուր ասես։ Եթե նման բաներ տեսա, և եթե դա վերաբերում է վարչատնտեսական պատասխանատուին, ապա նա կազատվի աշխատանքից՝ առանց որևէ բանի»,- նշել է Նիկոլ Փաշինյանը։ Նրա խոսքով՝ եթե նախագծային շեղումներով իրավիճակ լինի, տվյալ դպրոցի կամ մանկապարտեզի տնօրենը պետք է ազատվի աշխատանքից։

«Եթե որևէ մարզում կամ համայնքում այս երևույթը կրկնվի, ապա անդրադարձ է լինելու այն պաշտոնյաներին, որոնք ի պաշտոնե պարտավոր են վերահսկողություն իրականացնել, որպեսզի այդ իրավիճակը չլինի»,- շեշտել է վարչապետը։