Category: Hayelia.am

Մարդիկ մեր զոհերի մարմինների մասունքները գետնին գցված են տեսել, թքած ունենալուց մի խոսեք: Այս մասին ԱԺ-ում ասել է ԱԺ փոխնախագահ Արամ Վարդևանյանը:

«Դավիթ Ղազինյանը ապօրինի քաղաքական բնույթի կալանքից ազատվել է, անձին կալանքից հետո կրկին կալանավորելու հարց բարձրացնելու համար պետք է լինի նոր էական հանգամանք ոչ պատշաճ վարքագծի տեսանկյունից, իսկ այստեղ ես կարծում եմ նշված ռիսկը իսպառ բացառվում է, եթե իհարկե պատգամավոր լինելը ինքնին ոչ պատշաճ վարքագիծ չէ: Ի վերջո, ես կարծում եմ, որ թքած ունենալու մասին երբևէ պետք չէ խոսի վերջին 8 տարվա պատասխանատվությունը կրող իշխանության որևէ ներկայացուցիչ:

Դուք հաշվի առեք, որ մենք այս վերջին 8 տարիների ընթացքում տեսել ենք մեր հայոց պատմության ամենածանր, ամենասև էջերը, հազարավոր զոհեր ենք տեսել, ի դեպ, երբ այդպիսի բառակապակցություններ եք օգտագործում, գիտակցում եք չէ՞, որ մարդիկ կարող են լինել, որոնք հիշեն մեր զոհված հերոսների սառնարանում գետնին գցված դիակները և մասունքները։ Իսկապես տպավորություն է, որ դուք այնքան նայեցիք անդունդին, որ անդունդն էլ նայեց ձեզ»,- նշել է Վարդևանյանը:

Լքված նորածին աղջիկն անվանակոչվել է Սոսե՝ ի պատիվ Սոսե Մայրիկի։ Այս մասին 24News-ի հետ զրույցում աղջկան գտած Նարեկ Պետրոսյանն ասել է, որ անունը սոցծառայության կողմից է դրվել։

Նա հայտնեց, որ պարբերաբար տեսակցում է երեխային, դրական դինամիկա կա, բայց իր խոսքով, թոքերի հետ դեռևս խնդիր կա։ Նարեկը հայտնեց նաև, որ մինչև ամսվա վերջ աղջիկը կմնա հիվանդանոցում։

«Արդեն համաձայնություն կա, որ դուրսգրմանը ես ամեն ինչ կազմակերպեմ»,-ասաց նա։

Հիշեցնենք, որ օգոստոսի 10-ին Հալաբյան փողոցի բակերից մեկում բնակիչներից Նարեկ Պետրոսյանը նորածին աղջկա էր գտել։ Երեխան սառած է եղել, նա տեղափոխվել է հիվանդանոց։ Նորածինը շնչառական անբավարարություն ուներ, բայց կյանքին վտանգ չէր սպառնում։

Նշենք, որ Քննչական կոմիտեում դեպքի վերաբերյալ նախաձեռնվել է քրեական վարույթ։ Աղջկա ծնողներին հայտնաբերելու վերաբերյալ դեռ որևէ պաշտոնական տեղեկատվություն չի հրապարակվել։ Նշենք, որ հիվանդանոցից դուրս գրվելուց հետո Սոսեին կտեղափոխեն մանկատուն։

Երևանի քաղաքապետի խորհրդական Կամո Արեյանի վերաբերյալ օգոստոսի 4-ին երկրորդ քրեական վարույթն է մուտքագրվել Հակակոռուպցիոն դատարան և մակագրվել դատավոր Տիգրան Դավթյանին։ Այս մասին տեղեկանում ենք «Դատալեքս» դատական տեղեկատվական համակարգից:

Ըստ մեղադրական եզրակացության՝ Կամո Արեյանը, 2003-2009 թվականներին զբաղեցնելով Երևանի քաղաքապետի 1-ին տեղակալի պաշտոնը և միաժամանակ հանդիսանալով Երևանի քաղաքապետարանի պետական սեփականություն հանդիսացող հողամասերի հրապարակային սակարկությունների կազմակերպման և անցկացման հանձնաժողովի նախագահ, կատարել է պաշտոնեական կեղծիք և խոչընդոտները վերացնելու եղանակով օժանդակել է Երևան քաղաքապետ Երվանդ Զախարյանի կողմից պաշտոնական լիազորություների անցմանը և լիազորություններից ակնհայտորեն դուրս եկող գործողությունների կատարմանը, ինչի արդյունքում էական վնաս է պատճառվել պետության օրինական շահերին. պետության կողմից ստեղծված «Որբ, ծնողական խնամքից զրկված երեխաների հատուկ դպրոց» ՊՈԱ կազմակերպությունը զրկվել է դպրոցին անհատույց օգտագործման համար տրամադրված, դեռևս Խորհրդային տարիներին կառուցված դպրոցի սպասարկման համար անհրաժեշտ կենսական նշանակություն ունեցող հողամասիg, խաթարվել է պետական սեփականություն հանդիսացող հողամասերը օրենսդրությամբ սահմանված կարգով օտարելու ընթացակարգը, պետական ոչ առևտրային կազմակերպության հիմնադիրը զրկվել է իրեն պատկանող անշարժ գույքը սեփական հայեցողությամբ օգտագործելու իրավունքից, որի արդյունքում Հայաստանի Հանրապետության համար անզգուշությամբ առաջացել են ծանր հետևանքներ՝ Հայաստանի Հանրապետությունը զրկվել է 105.000.000 ՀՀ դրամ շուկայական արժեք ունեցող հողամասի սեփականության իրավունքից:
Կամո Արեյանի նկատմամբ խափանման միջոց է ընտրվել բացակայելու արգելքը։

Այս գործով մեղադրանք է առաջադրվել նաև Նաիրա Տեր-Ստեփանյանին, որը 2007 թվականին զբաղեցրել է Երևանի քաղաքապետարանի «Հողի և ունեցվածքի գործառնություններ» ՊՓԲԸ գլխավոր մասնագետի պաշտոնը և միաժամանակ հանդիսացել է հանձնաժողովի քարտուղար։

Հիշեցնենք, որ Կամո Արեյանի վերաբերյալ առաջին քրեական վարույթը հուլիսի 22-ին էր մուտք եղել դատարան և մակագրվել էր Հակակոռուպցիոն դատարանի դատավոր Սարգիս Պետրոսյանին։

Այդ վարույթով Արեյանը մեղադրվում է այն բանի համար, որ 2003 թվականի հուլիսի 12-ից մինչև 2009 թվականի հուլիսի 6-ը, զբաղեցնելով Երևանի քաղաքապետի առաջին տեղակալի պաշտոնը, հանդիսանալով տեղական ինքնակառավարման մարմնում մշտապես կազմակերպական-տնօրինչական գործառույթներ իրականացնող պաշտոնատար անձ, պետական սեփականություն հանդիսացող` Ազատության պողոտայի և Բաբայան փողոցի հատման մասում գտնվող և ՀՀ հողային օրենսգրքի 60-րդ հոդվածով նախատեսված սահմանափակումների ցանկում ընդգրկված 6000,0քմ մակերեսով հողամասը «Հայրենիք-Սփյուռք կամուրջ» ՀԿ-ին օտարելու, 6000,0քմ մակերեսով հողամասը «Սուրբ Լազար» առողջապահական ՀԿ-ին օտարելու գործընթացներում չարաշահել է իր պաշտոնեական լիազորությունները, ինչով ծանր հետևանք է առաջացրել հասարակության և պետության օրինական շահերի համար:

24news.am

Երեկ՝ օգոստոսի 16-ն, խոշոր ավտովթար է տեղի ունեցել Երևանում։ Ժամը 23:20-ի սահմաններում Վազգեն Առաջին (նախկինում՝ Կասյան) փողոցում բախվել են Երևանի բնակիչներ 21-ամյա Նարեկ Հ.-ի վարած «BMW» մակնիշի, 36-ամյա Խաչիկ Խ.-ի վարած «Tesla» մակնիշի և Լոռու մարզի բնակիչ 28-ամյա Վահագն Վ.-ի վարած էլեկտրական «Honda» մակնիշի ավտոմեքենաները։

Ինչպես դեպքի վայրից հայտնում է ֆոտոլրագրող Գագիկ Շամշյանը, բախման հետևանքով ըստ նախնական տեղեկությունների բարեբախտաբար տուժածներ չկան։ Սակայն «BMW»-ն դուրս է եկել երթևեկելի գոտուց և հայտնվել հետիոտնի համար նախատեսված անցման վայրում։

Մինչ կժամանեին ՀՀ Ներքին գործերի նախարարության ոստիկանության Պարեկային ծառայության Երևան քաղաքի գնդի 3-րդ գումարտակի պարեկները, «BMW»-ի վրայից երկու երիտասարդ «դեղնակտուցներ» համարանիշները հանեցին, իսկ երբ դեպքի վայր ժամանեցին պարեկները, համարանիշները նույն «դեղնակտուցները» տեղադրեցին ավտոմեքենայի վրա։

Վթարի փաստով ՊԾ Երևան քաղաքի գնդի 3-րդ գումարտակում փաստաթղթեր են կազմվում։

Ֆոտոլրագրողը հայտնում է, որ ավտոմեքենաներից «Honda»-ն և «Tesla»-ն եղել են ճանապարհի թույլատրելի հատվածում կայանված։

Իրանի առաջին փոխնախագահ Մոհամմադ Ռեզա Արեֆը հայտարարել է, որ ԱՄՆ-ն փորձում է փոխհատուցում ստանալ իր ռազմական անհաջողությունների համար՝ Իրանի վրա տնտեսական ճնշում գործադրելով։ Ըստ նրա, սակայն, Իսլամական Հանրապետությունը կարող է հաղթահարել «տնտեսական պատերազմն» այնպես, ինչպես գերիշխել է ռազմադաշտում։ «Արմենպրես»-ի փոխանցմամբ՝ այս մասին հաղորդում է IRNA գործակալությունը։

«Թշնամին այժմ ցանկանում է ռազմական ճակատում իր պարտությունը փոխհատուցել տնտեսական պատերազմի միջոցով, և կառավարությունը պետք է վճռականորեն դիմակայի այս մոտեցմանը՝ պատշաճ պլանավորմամբ», – ասել է փոխնախագահը Շուկայի կարգավորման շտաբի նիստում։

Արեֆն ընդգծել է, որ վարչակազմը երկիրը կառավարել է դժվարին պատերազմական պայմաններում՝ համախմբվածությամբ և համակարգվածությամբ։

Նա հավելել է, որ չնայած թշնամին կարող է ավելի մեծ ռեսուրսներ ունենալ տնտեսական պատերազմում, սակայն վերջերս Իրանին պարտադրված երկու պատերազմների փորձն ապացուցել է, որ ազգային միասնության և համախմբվածության պահպանումը կարող է հանգեցնել թշնամու նկատմամբ հաղթանակի։

«Նման հանգամանքներում խմբակցական, քաղաքական և կուսակցական տեսանկյունները պետք է մի կողմ դրվեն՝ հանուն ազգային շահի», – նշել է նա։

Փոխնախագահը նաև ընդգծել է շուկայի վերահսկողության ուժեղացման անհրաժեշտությունը՝ կոչ անելով կարգավորող և տեսչական մարմիններին լուրջ գործողություններ ձեռնարկել գների բարձրացման, թերկշռման և կուտակումների դեմ։

Հունիսին Վաշինգտոնը և Թեհրանը հայտարարել էին Պակիստանի միջնորդությամբ կնքված փոխըմբռնման հուշագրի մասին, որը նպատակ ուներ դադարեցնել ռազմական գործողությունները բոլոր ճակատներում, այդ թվում՝ Լիբանանում, վերաբացել Հորմուզի նեղուցը և վերացնել Իրանի ծովային շրջափակումը։ Սակայն Վաշինգտոնը հուլիսին վերսկսեց հարվածները Իրանում տարբեր օբյեկտների ուղղությամբ՝ նրան մեղադրելով Հորմուզի նեղուցում նավերի թիրախավորման համար։ Ի պատասխան՝ Իրանը հարվածներ հասցրեց Մերձավոր Արևելքում ամերիկյան օբյեկտներին։ Վերջին շաբաթներին կողմերն անուղղակի բանակցություններ են վարում կարգավորման հասնելու ուղղությամբ։

Օգոստոսի 16-ին՝ ժամը 16:33-ից սկսած, Շիրակի մարզային օպերատիվ կառավարման կենտրոնում ստացվել են ահազանգեր, որ քամու և հորդառատ անձրևի հետևանքով ջրալցվել են Գյումրի քաղաքի մի շարք հասցեների նկուղներ, բակային հատվածներ, կոտրվել ծառի ճյուղեր և թեքվել էլեկտրասյուն։

Դեպքի վայր են մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատներից մարտական հաշվարկներ և օպերատիվ խմբեր։

Փրկարարները, օպերատիվ արձագանքելով բոլոր դեպքերին, իրականացրել են տարածքների սահմանազատման, մոտոպոմպերի միջոցով նկուղներից, բակային հատվածներից ջրահեռացման (ընդհանուր մոտ 85 խմ), ինչպես նաև կոտրված ճյուղերի մասնատման և հեռացման աշխատանքներ։

Եվրամիությունը նախատեսում է այս աշնանը զգալիորեն մեծացնել Ռուսաստանի նկատմամբ պատժամիջոցները, այս մասին գերմանական Die Welt հրատարակությանը տված հարցազրույցում հայտարարել է ԵՄ արտաքին քաղաքականության ու անվտանգության գծով բարձր հանձնակատար Կայա Կալլասը։

Կալլասի խոսքով, նոր պատժամիջոցների փաթեթը կլինի ամենածավալունը 2022 թվականից ի վեր, չնայած Ռուսաստանը արդեն վճարել է «ծանր գին»։

«Եթե ընդունվի, պատժամիջոցների տակ գտնվող ռուս անհատների, ընկերությունների և կազմակերպությունների թիվը կաճի մեկ երրորդով միաժամանակ։ Ճնշումը պետք է ուժեղացվի»,- ասել է նա։

Կալլասը, սակայն, չի նշել նախատեսված սահմանափակումների բնույթը։

Դիվանագետը հավելել է, որ Ռուսաստանի դեմ պատժամիջոցների մասին օրինագծի ընդունումը ԱՄՆ Սենատում, որը հեղինակել էր հանգուցյալ սենատոր Լինդսի Գրեհեմը, «հույս է տալիս Եվրոպայի և Միացյալ Նահանգների միջև մերձեցման համար»։

Նույն հարցազրույցում Կալլասը կոչ է արել «ԵՄ գործիքների ավելի լավ համակարգման՝ Եվրոպայի շահերից ելնելով», այդ թվում՝ դիվանագիտական ​​մակարդակով։

ԵՄ վերջին՝ 21-րդ պատժամիջոցների փաթեթը հաստատվել է հուլիսի 23-ին։ Այն ներառում էր 170 իրավաբանական անձ և 48 անհատ։ Հուլիսի վերջին Bloomberg-ի աղբյուրները հայտնել են, որ դաշինքը նախատեսում է սահմանափակումներ կիրառել «Ռուսաստանի հետ կապված» ավելի քան 1600 ընկերությունների նկատմամբ։

ՀՀ արդարադատության նախկին նախարար Արփինե Հովհաննիսյանը գրել է․
«Եկեք լինենք բարեկիրթ» առաջարկն առաջին հայացքից դժվար է վիճարկել։ Սովորական քաղաքական միջավայրում այն կարող էր լինել քաղաքակիրթ բանավեճի շատ նորմալ մեկնարկ։

Բայց քաղաքական խոսքը չի սկսվում խորհրդարանի առաջին նիստից։ Դրան նախորդել է ընտրարշավ, որի ընթացքում հնչած կոշտ գնահատականները, մեղադրանքներն ու որակումները ոչ միայն բևեռացրել են քաղաքական դաշտը, այլև ձևավորել են ընտրողների համապատասխան սպասումները։ Իշխանությունն ու ընդդիմությունը հենց այդ խոսքի պայմաններում և նաև այդ խոսքի դիմաց են ստացել իրենց քվեները։
Հետևաբար ընտրություններից հետո հնարավոր չէ այդ ամբողջ նախապատմությունը պարզապես ջնջել և քաղաքական հարաբերությունները սկսել «մաքուր էջից»։ Դրանք երկուսի հարաբերություններ չեն: Դրանք մարդկանց ու մարդկանց սնած ասելիքի մասին են:
Իշխանությունն այսօր շարունակում է սպասարկել և՛ իր քաղաքական վարքագիծը, և՛ իր ընտրողների սպասումները։ Այդ պայմաններում «բարեկրթության» կոչը նրա համար քաղաքականապես հարմար է։ Այն կարող էր նույնքան օգտակար լինել նաև ընդդիմությանը, եթե չլիներ իր իսկ նախընտրական քաղաքական խոսքի բեռը։
Եթե դու ամիսներ շարունակ ընտրողիդ ներկայացրել ես իշխանության վերաբերյալ ծայրահեղ կոշտ գնահատականներ, եթե քո ցուցակում ներառել ես մարդկանց, որոնք հենց այդպիսի կոշտ քաղաքական լեզվով են առանձնացել, դրանով առնվազն ցույց ես տվել, որ այդ լեզուն քո քաղաքական դաշտի համար ընդունելի է։ Լավ է դա, թե վատ՝ այլ քննարկում է։ Բայց դա փաստ է, որի հետ ընտրություններից հետո պետք է հաշվի նստել։
Հենց այստեղ էլ բարեկրթության վերաբերյալ մեկնված ձեռքը կարող է վերածվել թակարդի։ Ոչ թե որովհետև բարեկրթությունը վատ բան է, այլ որովհետև այն կարող է քաղաքական խոսքի մշակույթի պահանջից վերածվել քաղաքական խոսքի թույլատրելի սահմանները որոշելու գործիքի։
Քաղաքական բանավեճի սահմաններն ավելի լայն են, քան առօրյա քաղաքավարի խոսակցության սահմանները։ Կոշտ, սուր, անգամ վիրավորական թվացող քաղաքական գնահատականը դեռ ինքնաբերաբար անձնական վիրավորանք չէ։
Եվ այսօրվա դրվագում, կարծում եմ, ակնհայտ էր նաև մեկ այլ բան. անհանդուրժողականության իրական պատճառը հազիվ թե մեկ մակբայն էր։ Առիթն, իհարկե, կոնկրետ արտահայտությունն էր, բայց արձագանքի հիմքում տարիների ընթացքում տվյալ անձի բառապաշարի, վարքագծի և խոսքի նկատմամբ կուտակված անհանդուրժողականությունն էր։
Այս դեպքում իշխանությունը կարողացավ կոնկրետ արտահայտությունը տեղավորել իր իսկ նախապես առաջարկած «բարեկրթության» շրջանակի խախտման մեջ և այդ դրվագի վրա կենտրոնացնել տվյալ անձի նկատմամբ կուտակված ամբողջ բացասական վերաբերմունքը։ Իսկ ընդդիմությունը, արդեն ընդունած լինելով այդ խաղի կանոնը, շատ սահմանափակ տարածք ուներ հակադարձելու համար։
Սա էլ հենց «բարեկրթության» թակարդն է․ նախ ընդունում ես հակառակորդիդ առաջարկած չափանիշը, հետո առաջին սահմանային դեպքի ժամանակ արդեն հակառակորդդ է որոշում՝ խախտե՞լ ես այն, թե՞ ոչ։
Իշխանությունը, կարծես, այս մեխանիզմը շատ լավ հասկանում է։ Ընդդիմությունը՝ դեռ ոչ այնքան։
Հետգրություն։ «Սրիկայաբար շահարկել»-ը գործողության ձևին տրված կոշտ գնահատական է՝ «սրիկայաբար»-ը մակբայ է։ «Սրիկա»-ն արդեն անձին բնութագրող գոյական է։ Առաջինը կարող է լինել շատ կոշտ, անընդունելի համարվել և արժանանալ նույնքան կոշտ քաղաքական հակադարձման։ Բայց այդ երկուսը նույնացնել և դրանով քաղաքական խոսքի սահմաններ գծել՝ արդեն բոլորովին այլ հարց է։