Category: FreeNews

ՀՀ վարչապետ Նիկոլ Փաշինյանի օգոստոսի 10-ի N 689-Ա որոշմամբ՝ ՀՀ ներքին գործերի նախարարի տեղակալի պաշտոնակատար Արմեն Ղազարյանը նշանակվել է Հայաստանի Հանրապետության Ազգային ժողովում Կառավարության ներկայացուցիչ։

 

Որոշման համաձայն՝ Ղազարյանը ԱԺ-ում Կառավարության ներկայացուցիչ կլինի «Անկախ Պետությունների Համագործակցության մասնակից պետությունների իրավասու մարմինների կողմից միջազգային վերահսկելի մատակարարման կազմակերպման և իրականացման կարգի մասին» պայմանագիրը վավերացնելու մասին» Հայաստանի Հանրապետության օրենքի նախագիծը քննարկելիս։

 

Որոշումն ընդունվել է՝ հիմք ընդունելով «Ազգային ժողովի կանոնակարգ» ՀՀ սահմանադրական օրենքի 66-րդ հոդվածի 2-րդ մասը։

ՀՀ վարչապետ Նիկոլ Փաշինյանի՝ օգոստոսի 10-ի որոշմամբ Շահանե Մնացականյանը նշանակվել է Հայաստանի Հանրապետության առողջապահության նախարարի տեղակալ։

 

Այսպիսով, ինչպես հայտարարել էր ՀՀ վարչապետը, արտերկրում կրթություն ստացած հայերը շարունակում են նշանակվել բարձր պաշտոններում:

 

«Արմենպրես»-ը ներկայացնում է Շահանե Մնացականյանի կենսագրությունը:

 

Շահանե Մնացականյանը ծնվել է 1989 թվականի հուլիսի 10-ին Երևանում։

 

1996 թվականից միջնակարգ կրթությունը ստացել է Չարենցի և Բելինսկու անվան դպրոցներում։

 

2005-2006 թվականներին կրթությունը շարունակել է ԱՄՆ-ում՝ Washington Township High School-ում։

 

2006–2013 թվականներին սովորել է Երևանի Մխիթար Հերացու անվան պետական բժշկական համալսարանում՝ ստանալով բժշկագիտության բակալավրի աստիճան։

 

2013–2015 թվականներին նույն համալսարանում սովորել է հանրային առողջապահության մագիստրոսական ծրագրով։

 

2015–2017 թվականներին սովորել է Հայաստանի ամերիկյան համալսարանի Հանրային առողջության ֆակուլտետում և ստացել հանրային առողջապահության մագիստրոսի աստիճան։

 

2020–2021 թվականներին սովորել և ավարտել է Հարվարդի բժշկական դպրոցի «Անվտանգություն, որակ, ինֆորմատիկա և առաջնորդություն» հետբուհական հավաստագրման ծրագիրը։

 

2024–2025 թվականներին սովորել է ԱՆ «Ակադեմիկոս Ս. Ավդալբեկյանի անվան առողջապահության ազգային ինստիտուտ» ՓԲԸ-ում՝ «Համաճարակաբանություն» մասնագիտությամբ և ստացել բժշկի դիպլոմ։

 

Աշխատանքային գործունեությունը սկսել է 2015 թվականից։

 

2015–2018 թվականներին աշխատել է ԱՆ «Հիվանդությունների վերահսկման և կանխարգելման ազգային կենտրոն» ՊՈԱԿ-ի Ռեֆերենս լաբորատոր կենտրոնում՝ որպես որակի ապահովման մենեջեր։

 

2018–2020 թվականներին աշխատել է «Ուիգմոր Քլինիք» ՓԲԸ-ում՝ որպես որակի մենեջեր։

 

2019–2022 թվականներին համակարգել է «EcoSence Laboratories»-ի գիտական ծրագրերը։

 

2020–2024 թվականներին աշխատել է «Ուիգմոր Քլինիք» ՓԲԸ-ում՝ որպես փոխտնօրեն, 2022–2025 թվականներին եղել է «Ուիգմոր Գրուպ» ՓԲԸ-ի՝ Ուիգմոր կանանց և երեխաների հիվանդանոցի գործառնական գծով փոխտնօրեն, և մինչև 2026 թվականը զբաղեցրել է «Ուիգմոր Քլինիք» ՓԲԸ-ի տնօրենի պաշտոնակատարի պաշտոնը:

 

2021–2022 թվականներին աշխատել է Առողջապահության համաշխարհային կազմակերպության Հայաստանի գրասենյակում՝ որպես լաբորատորիայի ազգային խորհրդատու։

 

2026 թվականից զբաղեցրել է «Նորք-Մարաշ» բժշկական կենտրոն ՓԲԸ-ի գլխավոր տնօրենի խորհրդականի պաշտոնը։

 

Զբաղվել է նաև դասախոսական աշխատանքով:

 

2023–2025 թվականներին դասավանդել է Առաջնորդության և նորարարության ակադեմիայում` առողջապահության ոլորտում որակի կառավարման և այլ թեմաներով։

 

2017–2019 թվականներին եղել է Ամերիկյան մանրէաբանների ասոցիացիայի Հայաստանի երիտասարդ դեսպանը։ Այդ ընթացքում մասնակցել է Հայաստանի երիտասարդ գիտնականների ցանցի ստեղծմանը, գիտական համագործակցությունների զարգացմանը և մասնագիտական աշխատարանների կազմակերպմանը։

 

ԱՄՆ-ի FSA FLEX ապագա առաջնորդների փոխանակման ծրագրի շրջանավարտ է (2005–2006թթ.)։

 

Իրականացրել է նաև կամավորական աշխատանք: Մասնակցել է միջազգային մասնագիտական վերապատրաստումների և գիտաժողովների։ Հեղինակ և համահեղինակ է առողջապահության և վարակիչ հիվանդությունների ոլորտներին վերաբերող գիտական հրապարակումների։

 

Ամուսնացած է, ունի երեք դուստր։

Օգոստոսի 10-ին Երևանում ՝ ժամը 11։20-ի սահմաններում, տեղեկություն է ստացվել, որ Նար-Դոս փողոցի 21 շենքի բակում դի կա։

 

Shamshyan.com-ի տեղեկություններով՝ հայտնաբերվածը Երևանի բնակիչ, 79-ամյա Անժիկ Ս.-ի դին է։

 

Տեղի ունեցածը սպանություն է, ինքնասպանություն, թե դժբախտ պատահար՝ պարզվում է։

Արամ Վարդևանյանն ընտրվել է 9-րդ գումարման ԱԺ փոխնախագահի պաշտոնում՛:

Նրա թեկնածությանը կողմ է քվեարկել 53 պատգամավոր, հենց այդքան ձայն էր պետք ընտրվելու համար: Դեմ քվեարկողներ չեն եղել:

ԱԺ «Քաղաքացիական պայմանագիր» խմբակցությունը, ինչպես ավելի վաղ հայտնել է, անհրաժեշտ ձայներով կողմ է քվեարկել Արամ Վարդևանյանի թեկնածությանը՝ ԱԺ փոխնախագահի պաշտոնում ընտրվելու համար:

Հիշեցնենք՝ իշխող ուժից Հայկ Կոնջորյանը և Վահագն Ալեքսանյանն արդեն ընտրվել են ԱԺ փոխնախագահներ:

9-րդ գումարման խորհրդարանն արդեն երկրորդ շաբաթն է՝ շարունակում է աշխատանքը:

Մի քանի նիստ անընդմեջ ԱԺ-ում քննարկվում է «Ուժեղ Հայաստան» խմբակցության պատգամավոր Արամ Վարդևանյանին ԱԺ փոխխոսնակներից մեկի պաշտոնում ընտրելու հարցը:

Օգոստոսի 6-ին իշխող «Քաղաքացիական պայնանագիր» խմբակցության պատգամավորները հարցեր էին հղում Վարդևանյանին, հաջորդ օրը՝ օգոստոսի 7-ին, պատգամավորները հանդես են եկել ելույթներով: Նիստը դեռ չավարտված, խմբակցությունը լքել էր ԱԺ նիստերի դահլիճն ու ուղևորվել դատարան՝ Գարեգին Բ-ին (Կտրիճ Ներսիսյան) և մյուս եպիսկոպոսներին առնչվող դատավարությանը ներկա գտնվելու:

Հիշեցնենք, որ իշխող ուժից Հայկ Կոնջորյանը և Վահագն Ալեքսանյանն արդեն ընտրվել են ԱԺ փոխնախագահներ:

Արամ Վարդևանյանը կդառնա երրորդ փոխնախագահը, եթե նրան ընտրեն:

ՀՀ Վարչապետի որոշումներով՝ ԲՏԱ փոխնախարարն ու Քաղաքաշինության կոմիտեի փոխնախագահն ազատվել են պաշտոններից:

«Ղեկավարվելով «Հանրային ծառայության մասին» օրենքի 5-րդ հոդվածի 6.1-ին մասով և 9-րդ հոդվածի 1-ին մասով՝ Բարձր տեխնոլոգիական արդյունաբերության նախարարի տեղակալի ժամանակավոր պաշտոնակատար Ռուբեն Սիմոնյանին ազատել զբաղեցրած պաշտոնից»,- ասվում է որոշումներից մեկում:

«Ղեկավարվելով «Հանրային ծառայության մասին» օրենքի 9-րդ հոդվածի 4-րդ մասով՝ Արման Պետրոսյանին 2026 թվականի օգոստոսի 10-ից ազատել քաղաքաշինության կոմիտեի նախագահի տեղակալի պաշտոնից»,- ասվում է մյուս որոշման մեջ: