Նախկինում Կապանի բնակիչները սրտի հետ խնդիրներ ունենալու դեպքում բռնում էին մայրաքաղաքի ճամփան: Արդեն վեցերորդ տարին է, ինչ մարզկենտրոնում գործում է «Հիգեա» բժշկական կենտրոնը, որը համալրված է առաջնակարգ բժիշկ-սրտաբաններով, ինտերվենցիոն սրտաբաններով և ժամանակակից բուժսարքավորումներով: Կենտրոնում իրականացվում է կորոնար զարկերակների ստենտավորում և սրտային հիվանդությունների ստացիոնար բուժում։
Ով գեթ մեկ անգամ եղել է այդ կենտրոնում, անպատճառ զգացած կլինի բուժանձնակազմի հոգատար վերաբերմունքն ու բարձրակարգ սպասարկումը։
Վերջերս բժշկական կենտրոնը հանդես է եկել մարդասիրական մի նախաձեռնությամբ․ «Հիգեայի» բուժանձնակազմը ժամանակ առ ժամանակ այցելում է Կապանի տարածաշրջանի սահմանամերձ գյուղեր` տեղում բարձրորակ բուժսպասարկում մատուցելով բնակչությանը: Նման այցեր արդեն եղել են Ներքին Հանդ, Սրաշեն, Շիկահող, Ճակատեն, Եղվարդ գյուղեր, ընդ որում Ծավ գյուղում եղել են երկու անգամ:
Նախաձեռնության շրջանակում սահմանամերձ գյուղերի մոտ 240 բնակիչ անվճար ստացել է սրտաբանի խորհրդատվություն, իրականացվել է էլեկտրասրտագրություն, էխոսրտագրություն և նշանակվել բուժում։ Բոլորը գտնվում են ամբուլատոր հսկողության տակ՝ «Հիգեա» բժշկական կենտրոնում։
Բժշկական կենտրոնը պլանավորում է առաջիկայում այցելել Վարդավանք, Կաղնուտ, Դավիթբեկ գյուղեր:
Վահրամ Օրբելյան
Leave a Reply