Երեւան: Մեդիամաքս: Հայաստանի վարչապետ Նիկոլ Փաշինյանը ներկայացրել է իր աշխատակազմի նորանշանակ ղեկավար Լիլիթ Մակունցին։
Կառավարությունից հայտնում են, որ Նիկոլ Փաշինյանը շնորհակալություն է հայտնել Արայիկ Հարությունյանին վարչապետի աշխատակազմի ղեկավարի պաշտոնում կատարած աշխատանքի համար՝ նշելով, որ նախորդած 5 տարիների ընթացքում նա «վարչապետի աշխատանքային առաջնահերթություններն ուղեկցել է գոհացուցիչ կերպով»։
«Հաջորդ փուլում տիկին Մակունցը պետք է ուղեկցի այդ առաջնահերթությունները։ Վարչապետի աշխատակազմի ղեկավարն այն կարգավիճակն է, որն առավել ուղիղ առնչվում է վարչապետի աշխատանքային առաջնահերթությունների հետ: Պետք է շարունակենք աշխատանքը՝ առաջնահերթությունների որոշակի ճշգրտմամբ», – ասել է Նիկոլ Փաշինյանը։
Լուսանկարը` ՀՀ կառավարություն
Նիկոլ Փաշինյանը Արայիկ Հարությունյանին հաջողություններ է մաղթել Ազգային ժողովի պատգամավորի կարգավիճակում գործունեության մեջ եւ հավելել, որ «այն շատ կարեւոր է հրապարակային քաղաքական գործչի համար»:
Վարչապետը հիշեցրել է, որ Լիլիթ Մակունցը 2018 թվականին զբաղեցրել է մշակույթի նախարարի պաշտոնը, ապա տեղափոխվել է խորհրդարան, եղել «Իմ քայլը» խորհրդարանական խմբակցության ղեկավար, ԱՄՆ-ում Հայաստանի Հանրապետության դեսպան, այնուհետեւ՝ վարչապետի գլխավոր խորհրդական։
Լուսանկարը` ՀՀ կառավարություն
Նիկոլ Փաշինյանը նշել է, որ առաջիկայում «մեծ աշխատանք է սպասվում»։
«Այդ մեծ օրակարգը ես ձեւակերպում եմ՝ որպես Հայաստանի պետականության հարատեւության օրակարգ: Առաջիկա հինգ տարիների շրջափուլը մեզ համար բացում է նոր հնարավորություններ եւ իր հետ բերում նոր մարտահրավերներ։ Հույս ունեմ, որ մենք կկարողանանք նկատել եւ իրացնել հնարավորությունները եւ կառավարել մարտահրավերները։
Լուսանկարը` ՀՀ կառավարություն
Մենք արդեն փորձառու իշխանություն ենք։ Եվ սա իր հետ բերում է եւ՛ առավելություններ, եւ՛ թերություններ։ Առավելությունն այն է, որ կուտակված փորձը ռեսուրս է, որը պետք է կարողանանք կիրառել: Իսկ թերությունն այն է, որ այս աշխատանքի առօրեական դառնալը կարող է իսկապես որոշակի թմրածություն բերել, եւ պետք է ամեն ինչ անել՝ դրանից խուսափելու համար»,– ասել վարչապետը:
Leave a Reply