Նոյեմբերի 14-ը Դիաբետի համաշխարհային օրն է։ Այն ևս մեկ առիթ է խոսելու դիաբետի ոչ միայն բժշկական, այլև հոգեբանական կողմի մասին։Այս առիթով Hayacq.com-ը զրուցեց Ֆոտոթերապիայի ստուդիայի հիմնադիր, հ․գ․թ․, դոցենտ Սոնա Հարությունյանի հետ:
-Ինչպե՞ս է դիաբետի ախտորոշումն ազդում մարդու հոգեբանական վիճակի վրա։
-Դիաբետի ախտորոշումը մարդու կյանքում կարող է հոգեբանական վիճակի որոշակի փոփոխությունների պատճառ դառնալ։ Բնականաբար, յուրաքանչյուր մարդ յուրովի է արձագանքում այդ լուրին՝ կախված իր անձնային առանձնահատկություններից, կենսափորձից, տարիքից և սոցիալական միջավայրից։ Սկզբնական շրջանում կարող են առաջանալ անհանգստություն, անորոշություն, վախ ապագայի նկատմամբ կամ մտահոգություն՝ կապված կյանքի սովորական ռիթմի փոփոխության հետ։ Մարդը սկսում է մտածել, թե ինչպես է կազմակերպելու իր առօրյան։
-Ի՞նչ կապ կա սթրեսի և դիաբետի միջև։
-Ինչպես գիտենք, սթրեսը կարող է ազդել օրգանիզմի աշխատանքի վրա, այդ թվում՝ նպաստել դիաբետի զարգացմանը։ Մյուս կողմից՝ դիաբետով ապրելն ինքնին կարող է սթրեսի պատճառ դառնալ, քանի որ մարդը ստիպված է մշտապես հետևել իր առողջությանը, սննդակարգին և բուժման ռեժիմին։ Այսպիսով, կարելի է եզրակացնել, որ սթրեսն ու դիաբետը փոխադարձաբար ազդում են միմյանց վրա։
-Ի՞նչ հոգեբանական գործոնների է բախվում դիաբետով ապրող մարդը առօրյա կյանքում։
-Դիաբետով ապրող մարդը կարող է զգալ անհանգստություն, հոգնածություն, ունենալ սահմանափակվածության զգացում կամ մտահոգություն ապագայի վերաբերյալ։ Որոշ դեպքերում դժվար կարող է լինել նաև սոցիալական միջավայրում հարմարվելը, օրինակ՝ սննդի ընտրության, ճանապարհորդությունների կամ տարբեր միջոցառումների ժամանակ։ Այսպիսի իրավիճակներում շատ կարևոր են տեղեկացվածությունը, սեփական վիճակի կառավարումը և շրջապատի աջակցությունը։
Ի՞նչ նշանակություն ունի մասնագետի՝ հոգեբանի աջակցությունը։
-Հոգեբանը կարող է օգնել մարդուն գտնել հոգեբանական անհարմարավետությունների անհատական հաղթահարման ռազմավարություններ, պահպանել մոտիվացիան և չկենտրոնանալ միայն դիաբետի վրա։ Հոգեբանական աջակցության հիմնական նպատակն է նպաստել հոգեբանական բարեկեցությանն ու կյանքի որակի պահպանմանը։
Leave a Reply