Բրազիլի Կուրիտիբա քաղաքում ոստիկաններն ազատել են մանկապարտեզ ներխուժած տղամարդու կողմից պատանդ պահվող 13 երեխայի։ Հարձակվողը, որը սպառնացել էր հրդեհել տարածքը, սպանվել է ոստիկանության հատուկ գործողության ընթացքում։
«Արմենպրես»-ի փոխանցմամբ՝ Պարանա նահանգի հանրային անվտանգության քարտուղարության հաղորդագրության մեջ նշվում է, որ դեպքը տեղի է ունեցել հոկտեմբերի 9-ին «Սան Բրազ» նախադպրոցական կրթության կենտրոնում։ Տղամարդը դանակով, հրազենի նմանակով և դյուրավառ նյութով սպառնացել է 4–5 տարեկան երեխաներին։
Մոտ երեք ժամ տևած բանակցություններից հետո հատուկ նշանակության ոստիկանները միջամտել են այն բանից հետո, երբ տղամարդը սկսել է ագրեսիվ վարք դրսևորել երեխաների նկատմամբ։ Պաշտոնական հաղորդագրության համաձայն՝ նա սենյակում դյուրավառ նյութ էր տարածել և սպառնում էր հրդեհ առաջացնել։
«Կարողացանք չեզոքացնել այդ անձին և փրկել 13 երեխաներին, որոնք փոխանցվել են բուժաշխատողներին ու հրշեջներին»,– հայտնել է ոստիկանության հատուկ առաջադրանքների հրամանատար, գնդապետ Ալեքսանդրե Լոպես Դիասը։
Ազատված երեխաներից հինգին տեղափոխել են բուժհաստատություն՝ բժշկական զննության։ Նրանցից մեկի դեմքին, հարձակվողի գործողությունների հետևանքով, վնասվածքներ են արձանագրվել։ Մյուս երեխաներին օգնություն են ցուցաբերել տեղում։
Դեպքի հանգամանքներն ու հարձակման շարժառիթը քննվում են։
Հետևեք մեզ՝ այստեղ
Leave a Reply