Եվրոպայի հայերի միության (ԵՀՄ) նախագահ Արթուր Հովհաննիսյանը հանդիպում ունեցավ Հայաստանի Հանրապետությունում Բուլղարիայի Հանրապետության արտակարգ և լիազոր դեսպան Նիկոլա Նիկոլովի հետ։ Հանդիպման ընթացքում քննարկվեցին Հայաստանի և Բուլղարիայի միջև երկկողմ հետաքրքրություն ներկայացնող մի շարք ծրագրեր, ինչպես նաև տնտեսական, գործարար և միջազգային համագործակցության զարգացման նոր հնարավորություններ։ Այս մասին տեղեկացնում է Եվրոպայի հայերի միություն (ԵՀՄ) Հայաստան–ԵՄ արտահանման կենտրոնը։
«Հատուկ անդրադարձ կատարվեց Հայաստանի և Եվրոպական միության երկրների միջև առևտրատնտեսական կապերի ընդլայնմանն ու հայկական արտադրանքի եվրոպական շուկաներ մուտք գործելու հնարավորությունների խթանմանը։
Հանդիպման ընթացքում ներկայացվեց նաև «Հայաստան–ԵՄ արտահանման կենտրոնի» առաջիկայում Հայաստանում իրականացվելիք նախաձեռնությունը։ Կենտրոնի նպատակն է աջակցել հայկական ընկերություններին և արտադրողներին՝ եվրոպական շուկաներ դուրս գալու, նոր գործընկերներ գտնելու և արտահանման հնարավորություններն ընդլայնելու գործում։
Կողմերը կարևորեցին շարունակական և արդյունավետ համագործակցության անհրաժեշտությունը և պատրաստակամություն հայտնեցին համատեղ աջակցելու նոր նախաձեռնությունների իրականացմանը։ Եվրոպայի հայերի միությունը նախատեսում է առաջիկայում ներկայացնել կենտրոնի գործունեության, ծրագրերի և համագործակցության հնարավորությունների վերաբերյալ լրացուցիչ մանրամասներ»,-ասված է հաղորդագրության մեջ։
Leave a Reply