Վարչապետ Նիկոլ Փաշինյանը Բիշքեկում անցկացվող Շանհայի համագործակցության կազմակերպության գագաթնաժողովում իր ելույթի ընթացքում խոսել է մի շարք երկրների հետ ռազմավարական հարաբերություններ հաստատելու գործընթացից։
«Վերջին տարիներին Հայաստանը ռազմավարական հարաբերություններ է հաստատել Վրաստանի, Չինաստանի, Ղազախստանի, ԱՄՆ-ի, Ֆրանսիայի, Նիդեռլանդների, Գերմանիայի, Լյուքսեմբուրգի, Միացյալ Թագավորության, Բուլղարիայի, Խորվաթիայի, Լիտվայի և ԵՄ-ի հետ։ Հնդկաստանի և Իրանի հետ մեր հարաբերությունները, ըստ էության, ռազմավարական բնույթի են։ Ներկայումս մենք աշխատում ենք դրանց պաշտոնականացման ուղղությամբ»,- հայտարարել է նա։
Ըստ վարչապետի՝ Հայաստանը վարում է բազմավեկտոր արտաքին քաղաքականություն, որը անվանել է հավասարակշռված և հավասարակշռման արտաքին քաղաքականություն։
Նրա խոսքով՝ աշխարհը պետք է լինի բազմաբևեռ, և սա խաղաղությունն ապահովելու ավել կամ պակաս հուսալի տարբերակ է:
«Այս ռազմավարությունը մշակելիս մենք եկանք այն եզրակացության, որ անհնար է լինել ինքնիշխան և անկախ՝ անընդհատ ապրելով հակամարտության մեջ: Եվ այս իմաստով բազմաբևեռությունը պետք է դրսևորվի հենց այն տարածաշրջանում, որտեղ դուք ապրում եք: Եվ հենց այս պատճառով է, որ մեր բարեկամ հարևանների՝ Իրանի և Վրաստանի հետ մեր հարաբերությունները ամրապնդելով՝ մենք շարժվում ենք միջպետական հարաբերություններ կառուցելու մեր մյուս երկու հարևանների՝ Թուրքիայի և Ադրբեջանի հետ: Սա ավելի կոնկրետացավ անցյալ տարվա օգոստոսի 8-ին, երբ Դոնալդ Թրամփի աջակցությամբ խաղաղություն հաստատվեց Հայաստանի և Ադրբեջանի միջև»,- ընդգծել է նա։
Leave a Reply