Category: YN.am

Գիտնականների միջազգային խումբը բացահայտել է կլիմայական ռիսկերի գլոբալ գնահատականներում առկա լուրջ բացը՝ վտանգ, որը ներկայացնում են փոքր ալպյան լճերը, որոնք ձևավորվում են սառցադաշտերի հալման և մշտական սառածության քայքայման հետևանքով։

Nature Sustainability ամսագրում հրապարակված հետազոտության արդյունքները ցույց են տալիս, որ նույնիսկ լեռներում գտնվող շատ փոքր լճերը կարող են հանկարծակի ճեղքվել և լայնածավալ հեղեղումներ առաջացնել։ Միաժամանակ, դրանցից շատերն այնքան փոքր են, որ չեն ներառվում բնական վտանգների վերաբերյալ առկա տվյալների բազաներում։

Գիտնականները ներմուծել են նոր տերմին՝ SALOs (small alpine lake outbursts, փոքր ալպյան լճերի ճեղքումներ)։ Այս կատեգորիային են պատկանում փոքր սառցադաշտային և հալոցքային լճերը, որոնք կարող են վտանգավոր վարարումների աղբյուր դառնալ լեռնային ապարների փլուզումների, սառույցի անկման, սողանքների կամ ջուրը պահող բնական պատնեշների քայքայման հետևանքով։ Լրացուցիչ ռիսկի գործոններ են նաև երկրաշարժերը և ծայրահեղ տեղումները։

Հետազոտողները նշել են, որ սպառնալիքն աճում է կլիմայի փոփոխության արագացմանը զուգընթաց․ սառցադաշտերի նահանջը և մշտական սառածության հալումը լեռնային շրջաններն ավելի ու ավելի անկայուն են դարձնում։

Միևնույն ժամանակ, վտանգը կախված է ոչ այնքան լճի չափից, որքան գործոնների համակցությունից՝ շրջակա լանդշաֆտի վիճակից, հնարավոր խթանիչներից և ներքևում գտնվող բնակավայրերի խոցելիությունից։

«Ոչ մի լիճ այնքան փոքր չէ, որ վտանգավոր չլինի», — հայտնել է Աբերդինի համալսարանի սառցագետ, դոկտոր Լիդիա Սեմը։ Նրա խոսքով՝ մասնագետների ուշադրությունը երկար ժամանակ կենտրոնացած էր խոշոր սառցադաշտային լճերի վրա, քանի որ դրանք ավելի հեշտ է հայտնաբերել արբանյակներից, սակայն վերջին դեպքերը ցույց են տվել, որ նույնիսկ թաքնված փոքր ջրավազանները կարող են լուրջ հետևանքների հանգեցնել։

Գիտնականներն օրինակներ են բերել տարբեր տարածաշրջաններից։ Նեպալի հեռավոր Լիմի հովտում նախկինում չուսումնասիրված փոքր լիճն առաջացրել է հեղեղում, որն ավերել է կամուրջներ, ոռոգման համակարգեր և հիդրոէներգետիկայի օբյեկտներ։ Պերուում Վալյունարախու սառցադաշտի մոտ գտնվող լճի ճեղքումը հանգեցրել է մարդկանց մահվան և զգալի վնասի։

Հետազոտության հեղինակները կարծում են, որ նոր տեխնոլոգիաները կարող են փոխել իրավիճակը։ Նման լճերը հայտնաբերելու համար առաջարկվում է օգտագործել բարձր հնարավորություններով արբանյակային համակարգեր, ռադիոլոկացիոն դիտարկում, անօդաչու թռչող սարքեր և արհեստական բանականություն։ Գիտնականներն առանձնահատուկ հույսեր են կապում NASA–ISRO NISAR առաքելության հետ, որը հնարավորություն կտա ավելի ճշգրիտ տվյալներ ստանալ արագ փոփոխվող լեռնային տարածքների մասին։

Հետազոտողները կոչ են անում վերանայել բնական վտանգների մոնիթորինգի միջազգային համակարգերը և հրաժարվել այն մոտեցումից, որի դեպքում վտանգը գնահատվում է միայն լճի չափով։

Իսլամական հեղափոխության պահապանների կորպուսը (ԻՀՊԿ) հայտնել է Հորդանանում և Բահրեյնում գտնվող ամերիկյան ավիաբազաներին հաջողությամբ հարվածելու և Քուվեյթում ռազմական օբյեկտներ ոչնչացնելու մասին:

Հորդանանի բազային հասցված հարվածի հետևանքով հրդեհվել են զինամթերքի պահեստներ և վառելիքի ամբարներ: Հորդանանի բազայի վրա հարձակումը ԻՀՊԿ-ն անվանել է «վրեժխնդրության օպերացիայի առաջին փուլ», իսկ երկրորդ փուլը եղել է Բահրեյնի «Շեյխ Իսա» բազայի վրա հարձակումը:

«Իսլամական հեղափոխության պահապանների կորպուսի ռազմաօդային ուժերի մարտիկները վրեժխնդրության օպերացիայի երկրորդ փուլում ոչնչացրել են Բահրեյնի Շեյխ Իսա ամերիկյան ռազմաբազայում տեղակայված ուղղաթիռների վերանորոգման և սպասարկման կարևոր կենտրոններ, P-8 ինքնաթիռի ամբարն ու ԱՄՆ բանակի անօդաչու թռչող սարքերի կառավարման կենտրոնը», – նշված է ԻՀՊԿ հայտարարության մեջ, որը մեջբերում է Fars գործակալությունը:

Իսկ Քուվեյթում իրանական զինված ուժերը խոցել են վառելիքի ամբարներ, Patriot հակաօդային պաշտպանության համակարգ, ինչպես նաև ռազմավարական FPS ռադիոլոկացիոն համակարգ:

«ԻՀՊԿ օդատիեզերական ուժերի մարտիկները վրեժխնդրության օպերացիայի երրորդ փուլում ոչնչացրել են Քուվեյթի Ալի ալ-Սալեմ ամերիկյան բազայում գտնվող վառելիքի ամբարներն ու Patriot հակաօդային պաշտպանության համակարգը, ինչպես նաև Ահմեդ ալ-Ջաբեր բազայում գտնվող FPS ռազմավարական ռադիոլոկացիոն համակարգը», – ասված է ԻՀՊԿ հայտարարության մեջ, որը փոխանցում է Mehr գործակալությունը:

ԱՄՆ զինված ուժերը ավարտել են Իրանի տարածքի դեմ ևս մեկ հարվածային գործողություն, հայտարարել է ԱՄՆ կենտրոնական հրամանատարությունը (CENTCOM):

ԱՄՆ ռազմական գերատեսչության տվյալներով՝ գործողության ընթացքում հարվածներ են հասցվել երկրի մի քանի շրջաններում գտնվող տասնյակ թիրախների։ Հարվածներում օգտագործվել են ճշգրիտ կառավարվող զինամթերք, կործանիչներ, ռազմանավեր և անօդաչու թռչող սարքեր։

Հրամանատարության X-ում հայտարարության համաձայն՝ ԱՄՆ զինված ուժերը օգտագործել են ոչ միայն անօդաչու թռչող սարքեր, այլև «առաջին անգամ հարձակվել են ծովային անօդաչու թռչող սարքերի» վրա։ CENTCOM-ը հայտարարել է, որ գործողության նպատակն էր նվազեցնել Իրանի կարողությունը Հորմուզի նեղուցում միջազգային նավագնացության վրա հարձակվելու համար։

Հրամանատարության տվյալներով՝ հարվածի թիրախների թվում են եղել հակաօդային պաշտպանության համակարգեր, ափամերձ ռադարային կայաններ և նավակներ։

NourNews-ը հաղորդել է, որ ԱՄՆ զինված ուժերը Իսլամական Հանրապետության դեմ նոր ավիահարվածների շրջանակներում հարվածել են առնվազն 13 իրանական քաղաքների։

Ըստ գործակալության՝ թիրախային քաղաքների թվում են Աբադանը, Ահվազը, Բանդար Աբբասը, Բանդար Մահշահրը, Բեհբահանը, Բուշեհրը, Ջասկը, Դեզֆուլը, Քեշմը, Սիրիկը, Խոնդաբը, Խորամշահրը և Էնդիմեշկը։

Ավիահարվածների հետևանքով զոհերի մասին տեղեկություններ չեն եղել։

Ավելի վաղ ԱՄՆ կենտրոնական հրամանատարությունը հայտարարել էր, որ ամերիկյան զինված ուժերը սկսել են հարվածների նոր ալիք Իրանում գտնվող թիրախների դեմ։

Սփյուռքի գլխավոր հանձնակատարի գրասենյակը հայտնում է. «Սփյուռքահայ կամավոր բժիշկները հայրենիքում են ԱՄՆ-ից, Ֆրանսիայից ու Ռուսաստանից: Նեղ մասնագիտացմամբ` նրանք բժշկում են վիրավորում ստացած զինվորներին: Գործընթացը համակարգում է մեր գրասենյակը ՀՀ առողջապահության նախարարության հետ համագործակցությամբ»:

Դավիթ Խաժակյանը լքում է Էդմոն Մարուքյանի ղեկավարած «Լուսավոր Հայաստան» կուսակցությունը։ Այս մասին տեղեկանում ենք Դավիթ Խաժակյանի ֆեյսբուքյան էջում հրապարակված հայտարարությունից։

«21 տարեկանում հեշտ չէր որոշել դառնալ կուսակցական և զբաղվել քաղաքականությամբ: Գիտակցված և բարդ ընտրություն էր, որի համար ափսոսանք չունեմ:

Այս տարիներն ինձ համար եղել են քաղաքական հասունացման և զարգացման կարևոր շրջան։ Հումորի էր վերածվել այն, որ ամեն հաջորդ ընտրությանը իմ տարիքը չէր բավականացնում թեկնածու առաջադրվել: Բարեբախտաբար այդ «խոչընդոտները» ևս հաղթահարվեցին:

Փորձել եմ լինել թիմային խաղացող՝ հպարտանալով մեր համատեղ ձեռքբերումներով և պատասխանատվություն կրել ձախողումների համար։

Շնորհակալ եմ բոլոր նրանց, ում հետ այս ճանապարհը միասին անցել ենք՝ գործընկերներիս, նախկին և ներկա թիմակիցներիս, ինչպես նաև կուսակցության նախագահ Էդմոն Մարուքյանին, ում վստահել եմ, ումից սովորել և ում հետ միասին ծառայել եմ մեր պետությանն ու ժողովրդին։

Խորհրդարանական ընտրություններին չմասնակցելը իմ ընտրությունն էր, իսկ այժմ նաև Լուսավոր Հայաստան կուսակցությունում իմ առաքելությունը համարում եմ ավարտված՝ թողնելով ջերմեռանդ երիտասարդական ջանքս և ինձ հետ վերցնելով մեծ փորձառություն, ջերմ հիշողություններ և բազմաթիվ լավ ընկերներ:

«Ես հեռանում եմ, որ դառնամ, հազար փակված դռներ բանամ։ Հիմա գնամ, բարով մնաք…» – Մեսչյանական այս խոսքերով ավարտում եմ հաղորդագրությունս՝ անցած ճանապարհը վերարժևորելով և շարժվելով առաջ՝ Նոր Շնչով»։

Օրերս Երևանում կայացավ Լոս Անջելեսում բնակվող ամերիկահայ լրագրող և ակտիվիստ Վիկ Գերամիի նկարահանած «Մայր հայրենիք» փաստավավերագրական ֆիլմի ցուցադրությունը, որը «Կաննի համաշխարհային փառատոն» կոչվող մրցանակաբաշխությունում ճանաչվել է 2022թ․-ի հուլիս ամսվա լավագույն վավերագրական ֆիլմ։ Այն պատմում է 2020 թվականի Ադրբեջանի և Թուրքիայի կողմից սանձազերծված ցեղասպանության և բռնի էթնիկ զտումների մասին:

Առավել մանրամասն՝ տեսանյութում  

Արագ փոփոխվող տնտեսական միջավայրը բանկերից պահանջում է ոչ միայն ճկունություն, այլև ռազմավարական մոտեցումներ։ Ֆինանսական կառավարման դերը վաղուց դուրս է եկել սոսկ թվային ցուցանիշներ արձանագրելու շրջանակից՝ դառնալով կայունության և աճի գլխավոր շարժիչ ուժը։

Հայէկոնոմբանկի Գործադիր տնօրենի` ֆինանսական գծով տեղակալ Ռուբեն Բադալյանը խոսել է ֆինանսական ռիսկերի զսպման արդյունավետ մեխանիզմների, ներքին գործընթացների ավտոմատացման ու թվայնացման ազդեցության, ինչպես նաև շուկայում երկարամյա վստահության ամրապնդման և հանրության ֆինանսական գրագիտության բարձրացմանն ուղղված բանկի առաքելության մասին։

Պարո՛ն Բադալյան, այսօր համաշխարհային ֆինանսական շուկաները շարունակում են գործել բավական փոփոխական և անկայուն միջավայրում։ Ինչպե՞ս է Հայէկոնոմբանկին հաջողվում տնտեսական անորոշությունների պայմաններում պահպանել կայունությունը, և ի՞նչ քայլեր են ձեռնարկվում ֆինանսական ռիսկերի զսպման ուղղությամբ։

Վերջին տարիներին ֆինանսական շուկաներն իսկապես աչքի են ընկնում բարձր տատանողականությամբ: Աշխարհաքաղաքական զարգացումները և տնտեսական մարտահրավերները բանկերից պահանջում են ճկունություն, արագ արձագանքման և, միաժամանակ, երկարաժամկետ պլանավորման կարողություն։

Մեր առաջնահերթությունը ֆինանսական կայունության, իրացվելիության բարձր մակարդակի և հաճախորդների վստահության պահպանումն է։ Այդ նպատակով մենք մշտապես վերահսկում ենք ակտիվների ու պարտավորությունների կառուցվածքը, պահպանում ենք իրացվելիության բավարար պաշարներ և առանձնակի ուշադրությամբ հետևում տոկոսադրույքի, արժութային և իրացվելիության ռիսկերին։

Միաժամանակ, մենք պարբերաբար իրականացնում ենք սթրես-թեստավորումներ և տարբեր սցենարային վերլուծություններ, ինչը թույլ է տալիս հնարավոր մարտահրավերներին պատրաստ լինել նախապես։ Մեծ ուշադրություն ենք դարձնում նաև ֆինանսավորման աղբյուրների դիվերսիֆիկացմանը, ավանդային բազայի կայունությանը և կապիտալի բավարար մակարդակի պահպանմանը։

Ֆինանսական կայունությունը պատահական արդյունք չէ. այն ամենօրյա կարգապահ աշխատանքի, պատասխանատու ռիսկերի կառավարման և ռազմավարական մտածողության արդյունք է։

Ժամանակակից բանկն այլևս հնարավոր չէ պատկերացնել առանց տեխնոլոգիական լուծումների: Ի՞նչ ազդեցություն է ունենում թվայնացումը Ձեր ամենօրյա աշխատանքի վրա, և արդյո՞ք այդ փոփոխություններն ուղղակիորեն զգում է հաճախորդը:

Այսօր արդեն դժվար է պատկերացնել արդյունավետ ֆինանսական կառավարում առանց թվայնացման։ Եթե տարիներ առաջ բազմաթիվ գործառույթներ կատարվում էինաշխատակիցների կողմից առանձին ծրագրերի միջոցով, ապա այժմ ավտոմատացված համակարգերը հնարավորություն են տալիս դրանք իրականացնել զգալիորեն ավելի արագ և ճշգրիտ՝ նվազեցնելով գործառնական ռիսկերն ու բարձրացնելով հաշվետվությունների որակը։ Արդյունքում մեր թիմը կարողանում է ավելի շատ ժամանակ հատկացնել խորքային վերլուծություններին, ֆինանսական պլանավորմանն ու ռազմավարական որոշումների կայացմանը։

Այս ամենն անմիջական ազդեցություն ունի նաև հաճախորդի վրա։ Երբ ներքին գործընթացներն ավելի արդյունավետ են, բանկը կարողանում է ճկուն կառավարել իր ծախսերը, արագացնել ծառայությունների մատուցումը և հաճախորդներին առաջարկել ավելի մրցունակ պայմաններ։

Թվայնացման հիմնական նպատակը միայն ծախսերի կրճատումը չէ. այն առաջին հերթին բարձրացնում է սպասարկման արագությունը, անվտանգությունն ու հարմարավետությունը:

Գաղտնիք չէ, որ բանկային ավանդների շուկան բավականին մրցակցային է: Ի՞նչն է, ըստ Ձեզ, այսօր ձևավորում հաճախորդների վստահությունը, և ֆինանսական ի՞նչ գործիքակազմով է Հայէկոնոմբանկն ապահովում հաճախորդների հավատարմությունը։

Մեր փորձը ցույց է տալիս, որ հաճախորդներն իրենց ընտրությունը վաղուց արդեն չեն կատարում միայն տոկոսադրույքի հիման վրա։ Ոչ պակաս կարևոր են բանկի հուսալիությունը, պատմությունը, սպասարկման որակն ու թվային հնարավորությունները։

Մեր նպատակը ոչ թե պարզապես միջոցներ ներգրավելն է, այլ երկարաժամկետ հարաբերություններ կառուցելը, որոնց հիմքում կանխատեսելիությունն է։ Դրա համար մենք առաջարկում ենք տարբեր ժամկետայնությամբ և տարբեր արժույթներով ավանդներ, թողարկում պարտատոմսեր, վարում շուկային համահունչ տոկոսադրույքային քաղաքականություն և շարունակաբար զարգացնում մեր թվային հարթակները, որ յուրաքանչյուր հաճախորդ կարողանա հեշտ և հարմար կառավարել իր ֆինանսները:

Վստահությունը ձևավորվում է ոչ թե մեկ առաջարկով, այլ տարիների հետևողական աշխատանքով, թափանցիկ գործունեությամբ և պատասխանատու վերաբերմունքով։

Ձեր կարծիքով՝ ի՞նչ նշանակություն ունի ֆինանսական գրագիտությունը հաճախորդների պատասխանատու վարքագծի ձևավորման գործում, և ինչպե՞ս կարող են բանկերը նպաստել այդ գործընթացին։

Ֆինանսական գրագիտությունն այսօր արդեն հավելյալ գիտելիք չէ, այլ ֆինանսական կայունության կարևոր նախապայման։ Որքան բարձր է հանրության իրազեկվածությունը ֆինանսական գործիքների, ռիսկերի և հնարավորությունների վերաբերյալ, այնքան ավելի հիմնավորված և հեռանկարային են նրանց որոշումները՝ լինի դա խնայողությունների կառավարում, ներդրումների իրականացում, թե վարկային պարտավորությունների ստանձնում։

Տեղեկացված հաճախորդն արդյունավետ է կառավարում ոչ միայն իր բյուջեն, այլև նպաստում է ամբողջ ֆինանսական համակարգի առողջ զարգացմանը, և բանկերն այստեղ լրջագույն կրթական ու տեղեկատվական առաքելություն ունեն:

Ֆինանսական գծով փոխտնօրենի դերը ժամանակակից աշխարհում վաղուց դուրս է եկել միայն թվեր արձանագրելու շրջանակից. այն ունի ընդգծված ռազմավարական նշանակություն: Այս համատեքստում, առաջիկա տարիներին զարգացման ի՞նչ գլխավոր նշաձողեր եք սահմանել Ձեր թիմի համար:

Բանկի ռազմավարական առաջընթացն անհնար է առանց ներքին գործընթացների արդյունավետ կառավարման:

Մենք շարունակում ենք աշխատել գործընթացների ավտոմատացումը խթանելու, տվյալների վերլուծությունն ընդլայնելու, ռիսկերի արդյունավետ զսպման և կայունության ապահովման, ինչպես նաև ռեսուրսների դիվերսիֆիկացման ուղղությամբ: Սրանք այն ուղղություններն են, որոնք սահմանում են մեր այսօրվա օրակարգը և երաշխավորում Բանկի կայուն զարգացումն ապագայում։

Ֆինանսական կայունությունն ու աճը երբեք պատահական չեն. դրանք ամենօրյա կանոնակարգված աշխատանքի և պատասխանատու կառավարման արդյունք են: Դա հենց այն հիմքն է, որ ձևավորում է Հայէկոնոմբանկի նկատմամբ երկարամյա վստահությունն ու ամրապնդում մեր դիրքերը շուկայում՝ որպես կայուն և հեռանկարային գործընկեր յուրաքանչյուր հաճախորդի համար:

86 86 | aeb.am
Հայէկոնոմբանկը վերահսկվում է ՀՀ Կենտրոնական բանկի կողմից:

 

 

 

Եվրոպայի չեմպիոն Իսպանիայի հավաքականը նվաճեց աշխարհի առաջնության կիսաեզրափակիչի ուղեգիր։ Լուիս դե լա Ֆուենտեի գլխավորած թիմը քառորդ եզրափակիչում 2:1 հաշվով պարտության մատնեց Բելգիային։

Լոս Անջելեսում տեղի ունեցած հանդիպման հաշիվը 30-րդ րոպեին բացեց Ֆրանսիայի չեմպիոն եւ Չեմպիոնների լիգայի գավաթակիր ՊՍԺ-ի 30-ամյա կիսապաշտպան Ֆաբիան Ռուիսը (տեսանյութ)։

41-րդ րոպեին պատասխան գոլը խփեց Բելգիայի հավաքականի եւ իտալական «Ատալանտայի» 25-ամյա կիսապաշտպան Շառլ Դե Կետելարեն (տեսանյութ)։

88-րդ րոպեին Իսպանիայի հաղթական գոլը խփեց Անգլիայի չեմպիոն Լոնդոնի «Արսենալի» 30-ամյա կիսապաշտպան Միկել Մերինոն (տեսանյութ)։

Կիսաեզրափակիչում Իսպանիայի մրցակիցը կլինի աշխարհի փոխչեմպիոն Ֆրանսիան, որը պայքարից դուրս էր թողել Մարոկկոյին։

 

 

 

Երբ ֆրանսիական «Վեոլիա Ջուր»-ը ստանձնեց Հայաստանի ջրամատակարարման համակարգի կառավարումը, խոստումները մեծ էին՝ եվրոպական փորձ, ժամանակակից կառավարում, որակյալ ծառայություն և սպառողակենտրոն մոտեցում։ Տարիներ անց, սակայն, խմբագրությանը հասնող բազմաթիվ ահազանգերը բոլորովին այլ պատկեր են ներկայացնում։

Այս հրապարակման նպատակը մեկ անձի դժգոհությունը ներկայացնելը չէ։

Վերջին ամիսներին մեզ դիմած քաղաքացիների պատմությունները հաճախ կրկնում են միմյանց՝ անկախ բնակավայրից։ Այդ պատճառով առաջանում է հարց՝ խոսքը առանձին դեպքերի՞ մասին է, թե՞ համակարգային խնդիրների։

Գրաֆիկ կա, բայց ջուր՝ ոչ միշտ

Քաղաքացիները պատմում են, որ հրապարակված ջրամատակարարման գրաֆիկները հաճախ չեն պահպանվում։ Նրանց փոխանցմամբ՝ ընկերության ներկայացուցիչները երբեմն պատճառաբանում են, թե սպառողների թիվն ավելացել է, և գործող համակարգը չի հասցնում ապահովել նախատեսված ծավալները։

Եթե այդպես է, առաջանում է տրամաբանական հարց. ինչո՞ւ են նոր բաժանորդներ միացվում այն ցանցերին, որոնց սպասարկման հնարավորությունները, ըստ նույն հիմնավորման, արդեն սահմանափակ են։ Եթե ենթակառուցվածքը ծանրաբեռնված է, ապա ինչպե՞ս է գնահատվում դրա թողունակությունը մինչև նոր միացումների թույլտվությունը։

Մարզերում պատկերը հաճախ ավելի ծանր է

Մարզերից ստացվող ահազանգերն ավելի մտահոգիչ են։ Բնակիչների խոսքով՝ կան համայնքներ, որտեղ ջուրն իրականում մատակարարվում է օրական ընդամենը 6-8 ժամ, մինչդեռ պաշտոնական գրաֆիկներում նշվում է զգալիորեն ավելի երկար ջրամատակարարում մինչև 20 ժամ։

Եթե այս տարբերությունները համապատասխանում են իրականությանը, ապա անհրաժեշտ է պարզաբանել՝ ինչու է պաշտոնական տեղեկատվությունը տարբերվում բնակիչների առօրյա փորձից և ինչ մեխանիզմներով է վերահսկվում գրաֆիկների պահպանումը։

Պետությունը ստանձնեց պարտքերը, բայց դժգոհությունները չպակասեցին

Վերջին տարիներին պետությունը ներգրավվել է ընկերության ֆինանսական խնդիրների կարգավորման գործընթացում՝ ստանձնելով որոշ պարտավորություններ։ Սակայն քաղաքացիների գնահատմամբ՝ այդ քայլերը դեռևս չեն վերածվել սպասարկման որակի տեսանելի բարելավման։

Հարցն այստեղ միայն ֆինանսական չէ։ Եթե համակարգում իրականացվում են պետական աջակցություն պահանջող լուծումներ, ապա հանրությունն ակնկալում է նաև ծառայության որակի համարժեք աճ։

Հինգ տարի առանց տեխնիկական աուդիտի

Մասնագետների շրջանում քննարկվող հարցերից մեկն այն է, որ երկար ժամանակ չի իրականացվել համակարգի ամբողջական տեխնիկական աուդիտ։ Եթե դա համապատասխանում է իրականությանը, առաջանում է հերթական հարցը՝ ինչպե՞ս են գնահատվում ցանցի վիճակը, կորուստները, ներդրումների առաջնահերթությունները և ռիսկերը՝ առանց համապարփակ տեխնիկական գնահատման։

Երբ սպառողը չի գտնում պատասխանատուին

Քաղաքացիների ամենատարածված դժգոհություններից մեկը վերաբերում է տեղային պատասխանատուների՝ տեսուչների բացակայությանը։

ArmLur.am-ին դիմած քաղաքացիներից մեկն պատմեց, որ երեք ամիս փակ բնակարանի համար շարունակել է ստանալ սպառման հաշվարկներ, վճարել է դրանք։ Այնուհետև զանգահարել է ընկերություն և տեղեկացրել, որ բնակարանը դատարկ է եղել։ Նրա խոսքով՝ պատասխանել են, որ այո դուք ունեք գերավճար, հարցը պետք է քննարկի տարածքային տեսուչի հետ, սակայն չի հաջողվել պարզել, թե ով է այդ տեսուչը և ինչպես կարելի է նրա հետ կապ հաստատել։

Սպառողն ինքն է կատարում ընկերության աշխատանքը

Հայտնի փաստ է նաև, որ ջրաչափերի ցուցմունքները հաճախ իրենք են լուսանկարում և ուղարկում ընկերության տրամադրած հեռախոսահամարներին կամ առցանց հարթակներին։

Թվայնացումը, անկասկած, կարող է հեշտացնել գործընթացները։ Սակայն երբ սպառողը ստիպված է ինքնուրույն հավաքագրել տվյալները, համոզվել, որ դրանք տեղ են հասել, և հետո էլ ստուգել՝ արդյոք ճիշտ են հաշվառվել, բնական հարց է առաջանում՝ որտե՞ղ է ծառայություն մատուցողի պատասխանատվության սահմանը։

Պլոմբի վնասում՝ երկար վարչարարության սկիզբ

Քաղաքացիները դժգոհում են նաև այն դեպքերից, երբ ջրաչափի պլոմբը վնասվում կամ պոկվում է։ Նրանց խոսքով՝ դրան հաջորդող վարչարարությունը հաճախ երկար է, բարդ և ֆինանսական լրացուցիչ բեռ է ստեղծում, նույնիսկ այն դեպքերում, երբ վնասումը դիտավորյալ չի եղել։

Բաժանորդ դառնալը՝ երկար ճանապարհ

Մեկ այլ խնդիր կապված է նոր բաժանորդների միացման հետ։ Դիմողների խոսքով՝ պահանջվող փաստաթղթերի ցանկը հաճախ մեծ է, գործընթացը՝ երկար, իսկ միացման ժամկետները երբեմն ձգվում են ամիսներով։

Եթե ջրամատակարարումը հանրային ծառայություն է, ապա դրա հասանելիությունը նույնպես պետք է կազմակերպվի պարզ, կանխատեսելի և ողջամիտ ժամկետներում։

Կոյուղին՝ մշտական ցավոտ թեմա

Առանձին դժգոհություններ վերաբերում են կոյուղու ցանցին։ Բնակիչները պատմում են հաճախակի վթարների, օրերով չվերացող արտահոսքերի և բնակավայրերում տարածվող գարշահոտության մասին։ Նրանց խոսքով՝ խնդիրը հաճախ ժամանակավորապես է լուծվում, սակայն համակարգային վերանորոգումներ չեն իրականացվում։

Ընկերության պատասխանը

Հրապարակման ընթացքում ներկայացված հարցերի վերաբերյալ դիմեցինք «Վեոլիա Ջուր» ընկերությանը։ Ընկերությունից պատասխանեցին, որ պետք կլինի հասցեական խնդիրներ, որ իրենք դրանց պատասխանեն: Իհարկե, դրանք տրվել են, բայց մինչ արձագանքը հասցեական խնդիրների, պետք է համակարգային խնդիրների մասին խոսել՝ արձանագրելով, որ ՀՀ Կառավարությունը մատը մատին չի տալս փաստացի՝ ՀՀ սպառողների իրավունքները պաշտպանելու համար: Եթե լիներ քաղաքականացված, ընդդիմադիր հայացքների տեր սեփականատեր, բնականաբար, պետությունը վաղուց գործադրել էր ջանքեր՝ պետականացնելու կամ կառավարումն իր ձեռքը վերցնելու համար ինչպես ՀԷՑ-ի դեպքում կամ ինչպես փորձում են անել արարատցեմենտի հետ, որը Գագիկ Ծառուկյանին է պատկանում:

Փաստ է, որ հանրային ծառայություն մատուցող ընկերության գործունեությունը գնահատվում է ոչ թե գովազդային կարգախոսներով, այլ սպառողի առօրյա փորձով։ Իսկ երբ տարբեր բնակավայրերից հնչող բողոքները տարիներ շարունակ կրկնում են նույն խնդիրները, դրանք այլևս չեն կարող դիտվել որպես մեկուսացված դեպքեր։ Դրանք պահանջում են հրապարակային, փաստարկված և չափելի պատասխաններ՝ ոչ միայն ընկերությունից, այլև ոլորտը վերահսկող պետական մարմիններից։