Category: SyunyacErkir

Հուլիսի 14-ի գիշերը Միացյալ Նահանգները հինգ ժամ տևողությամբ հարվածներ է հասցրել Իրանում գտնվող թիրախներին։ ԱՄՆ կենտրոնական հրամանատարությունը (CENTCOM) հայտնել է, որ հարվածները թիրախավորել են Բուշեհր, Չաբահար, Ջասկ, Քոնարակ, Աբու Մուսա և Բանդար Աբբաս նահանգների ռազմական օբյեկտները։

ԱՄՆ զինվորականների պնդմամբ՝ ռմբակոծությունը իրականացվել է Հորմուզի նեղուցում «Իրանի քաղաքացիական նավերին հարձակվելու կարողությունը նվազեցնելու» համար։

Հուլիսի 13-ի երեկոյան ԱՄՆ նախագահ Դոնալդ Թրամփը պաշտոնապես տեղեկացրել է Կոնգրեսին Իրանի դեմ ռազմական գործողությունների վերսկսման մասին։ CNN-ի հաղորդմամբ՝ Թրամփը հայտարարել է, որ դրանք «սահմանափակ հարվածներ» են եղել, որոնք իրականացվել են «քաղաքացիական զոհերի նվազագույնի հասցնելու» նպատակով։

Իր հերթին` Իրանը, ըստ Reuters-ի, հայտարարել է, որ հարձակվել է Հորդանանում ԱՄՆ զինվորականների կողմից օգտագործվող ավիաբազայի վրա։ Հորդանանի և Բահրեյնի իշխանությունները հայտնել են, որ իրենց հակաօդային պաշտպանությունը հաջողությամբ հետ է մղել իրանական հարձակումները։

Իրանական հրթիռները հարվածել են նաև Հորմուզի նեղուցում գտնվող «Մոմբասա» և «Ալ-Բահիա» լցանավերին: Իրանի իշխանությունները պնդում են, որ լցանավերը խախտել են Հորմուզի նեղուցով անցման արգելքը։

Միացյալ Նահանգները և Իսրայելը փետրվարի վերջին սկսել են հարվածներ հասցնել Իրանին: Իրանը հրթիռային և անօդաչու թռչող սարքերով հարձակումներ է իրականացրել Պարսից ծոցի այլ երկրների վրա, որոնց Թեհրանը համարում է ԱՄՆ դաշնակիցներ։

Հունիսի կեսերին Վաշինգտոնը և Թեհրանը ստորագրել են փոխըմբռնման հուշագիր: Փաստաթղթում նախատեսվում էր 60-օրյա հրադադար և Հորմուզի նեղուցով նավագնացության վերսկսում: Իրանը և Միացյալ Նահանգները շարունակել են հարվածներ հասցնել՝ պնդելով, որ հրադադարը պահպանվում է: Հուլիսի սկզբին ԱՄՆ նախագահ Դոնալդ Թրամփը հայտարարել է, որ կարծում է, որ Իրանի հետ հրադադարը «ավարտվել է»:

https://meduza.io/news/2026/07/14/ssha-pyat-chasov-nanosili-udary-po-iranu-tramp-ofitsialno-uvedomil-kongress-o-vozobnovlenii-voennoy-operatsii

 

 

Ամենայն հայոց կաթողիկոսն այցելել է ՀՀ–ում Իրանի դեսպանատուն և իր հարգանքի տուրքը մատուցել Իրանի նահատակ գերագույն առաջնորդ Այաթոլա Սեյեդ Ալի Խամենեիի հիշատակին Հայաստանում Իրանի դեսպան Խալիլ Շիրղոլամիի հետ հանդիպման ժամանակ նա իր ցավակցությունն ու կարեկցանքն է հայտնել Իրանի կառավարությանն ու ժողովրդին և հոիյ հայտնել, որ Իրանի խաղաղասեր ժողովուրդը կկարողանա վերականգնել անվտանգությունը։

@ArmeniaSputnik

Փառատոնի հուլիսի 12-ի ծրագիրը հագեցած էր և բազմազան՝ երաժշտական ստեղծագործությունների առումով։ Երաժիշտ-կատարողները տարբեր սերնդի ներկայացուցիչներ էին, ուստի միահյուսվել էին փորձն ու երիտասարդական ներշնչանքը։ Փառատոնի կազմակերպիչներն անընդհատ փոփոխում են նախօրոք հայտարարված երկացանկը՝  անակնկալներ մատուցելով հանդիսատեսին։

Համերգային ծրագիրը բացվեց Յոհան Սվենդսենի «Օկտետ լյա մաժոր, մաս 1-ին» ստեղծագործության կատարմամբ։ Բեմահարթակում երաժիշտների ութնյակն էր՝ Սելմա Թայլման (առաջին ջութակ),  Հելդեր Սոարես (երկրորդ ջութակ), Օվսաննա Հարությունյան (երրորդ ջութակ), Հաննա Շիրինյան-Ռոդե (չորրորդ ջութակ)՝  Իբեն Թայլման (առաջին ալտ), Հայկ Շահբազյան (երկրորդ ալտ), Ալեքսանդր Շիրինյան-Ռոդե (առաջին թավջութակ), Դենիս Պուստովգար (երկրորդ թավջութակ)։

Այնուհետև Անդրեյ Բարանովը (ջութակ), Աննա Սարկիսովան (դաշնամուր) հնչեցրին Ֆրից Կրայսլերի «Լիբեսլայդ» ստեղծագործությունը։

Հաջորդիվ հնչեց Լուիջի Բոկերինիի «Ֆանդանգո» գործը։ Բեմահարթակում էին Էդուարդ Հրմուշյանը (կիթառ), Կարեն Շահգալդյանը (առաջին ջութակ), Սելմա Թայլմանը (երկրորդ ջութակ), Փոլ Թալլոքը (ալտ), Նարեկ Հեքեքյանը (թավջութակ)։ Փառատոնի համերգների երկացանկում հաստատուն տեղ ունի գերմանացի կոմպոզիտոր Յոհան Բրամսը։ Այս անգամ հնչեց հանրաճանաչ կոմպոզիտորի «Դաշնամուրային կվինտետ» ստեղծագործության առաջին մասը՝ Մարիաննա Շիրինյանի, Էլլի Սուի, Հրաչյա Ավանեսյանի, Պոլ Թալլոքի, Ֆրանցիսկո Վիլայի կատարմամբ։

Ընդմիջումից հետո հանդիսատեսին երաժշտական հրավառություն էր սպասվում։ Նախ հնչեց Դմիտրի Շոստակովիչի «Լարային կվարտետ թիվ 8» հինգ մասանոց ստեղծագործությունը։ Կոմպոզիտորի՝ քառյակի համար գրված այս գործը հնչեցրին՝ Անդրեյ Բարանով (առաջին ջութակ), Հրաչյա Ավանեսյան (երկրորդ ջութակ), Լուան Կազալ (ալտ), Սևակ Ավանեսյան (թավջութակ)։

Ծրագրի ավարտը հետաքրքրական էր․ հնչեց 20-րդ դարի սկզբի ռումինացի կոմպոզիտոր Ջորջ Էնեսկուիի «Ջութակի սոնատ թիվ 3, օպուս 25» ստեղծագործությունը, որ նրա ամենահայտնի գործերից է։ Այն հնչեցրին 2 վիրտուոզ երաժիշտ-կատարողներ՝ Մարիաննա Շիրինյանը և ֆրանսիացի ջութակահար Ժիլ Ապապը։ Ինքնատիպ մի արվեստագետ, որ համադրում է դասական երաժշտությունը ֆոլկի, ջազի և համաշխարհային երաժշտության ավանդույթների հետ։

Վահրամ Օրբելյան

Ադրբեջանը միակողմանիորեն վերացրել է Հայաստանի նկատմամբ սահմանված բոլոր տարանցիկ սահմանափակումները` հայտարարել է Ադրբեջանի նախագահ Իլհամ Ալիևը Շուշիի 4-րդ գլոբալ մեդիա ֆորումի բացման ժամանակ։

Նա նշել է, որ Ռուսաստանից, Ղազախստանից և այլ երկրներից Ադրբեջանի միջոցով Հայաստան է տեղափոխվել ավելի քան 40,000 տոննա տարբեր բեռներ։

«Ավելին՝ Ադրբեջանն ինքն է սկսել նավթամթերք արտահանել Հայաստան։ Եթե չեմ սխալվում, մինչ օրս մատակարարվել է ավելի քան 10,000 տոննա նավթամթերք։ Հատկապես ներկայիս իրավիճակում, երբ շատ երկրներ վառելիքի պակասի են բախվում, Հայաստանն ունի վառելիքի հուսալի աղբյուր, և այդ աղբյուրն Ադրբեջանն է։ Առանց դրա, Հայաստանը, հավանաբար, ստիպված կլիներ բենզին և դիզելային վառելիք փնտրել աշխարհի տարբեր մասերում», – կարծում է Ալիևը։

Նա նաև հավելել է, որ այս ամենի ֆոնին՝ ԱՄՆ Կոնգրեսի «Ազատության աջակցության մասին» օրենքի 907-րդ կոչվող փոփոխությունը լիովին հնացած է և պետք է ամբողջությամբ չեղյալ հայտարարվի։ Նա ընդգծել է, որ Ադրբեջանն ու Հայաստանը նախաստորագրել են խաղաղության համաձայնագիր՝ ԱՄՆ նախագահ Թրամփի մասնակցությամբ։

 

 

Կապանի ժամանակակից արվեստի թանգարանում հուլիսի 10-ին բացվեց Սերգեյ Փարաջանովի արվեստին նվիրված ցուցադրություն։ Թանգարանի ցուցասրահներից մեկում ներկայացված էր 45 ցուցանմուշ՝ տիկնիկներ, գլխարկներ, կոլաժներ։ Կան նկարահանված և չնկարահանված ֆիլմերի էսքիզներ, իր ստեղծած Ջոկոնդաների շարքից երկուսը, արվեստի գործեր, որոնք բանտում է ստեղծել։ Ընդհանրապես Փարաջանովը անդրադարձել է տարբեր թեմաների, և ստեղծել մնայուն արժեքներ։

Կոլաժներից մեկը խորագիր ունի՝ «Խանդի պահին պատռած հորս դիմանկարը»։ Ինչպե՞ս է այդ կոլաժի գաղափարը ծնվել։ Փարաջանովը պատմում էր, որ հոր մահից հետո մայրը պատահաբար գտել է նամակը, որ ամուսինը սիրուհուն է ուղղել, և այդ պատկառելի տարիքում, խանդով լցված, պատառոտել է ամուսնու յուղաներկ դիմանկարը։ Այդ փաստը Փարաջանովի համար դարձել է ներշնչանքի աղբյուր՝ ևս մի գործ ստեղծելու։ Այսօր արդյունքում ունենք այդ կոլաժը։

Ինչպես բացման խոսքում նշեց Փարաջանովի տուն-թանգարանի տնօրեն Անահիտ Միքայելյանը, Փարաջանովն առհասարակ իր արվեստի մասին հատուկ բացատրություններ չէր տալիս։ Ասում էր․ «Մարդիկ թող իմ գործերը տեսնեն, ընկալեն այնպես, ինչպես նրանց մտքի թռիչքն է թույլ տալիս»։ Բայց Փարաջանովի արվեստի յուրահատկություններից մեկն էլ այն էր, որ դրա միջոցով բացահայտում ենք և՛ իրեն, և՛ իր աշխարհը, և՛ այն աշխարհը, որտեղ ինքն ապրում և ստեղծագործում էր։

Փարաջանովի թանգարանը երեք տարի է, ինչ իրականացնում է մարզային ցուցադրություններ։ Քանի որ մայրաքաղաքից հեռու լինելով, շատերը հնարավորություն չեն ունենում այցելել Երևանում գտնվող տուն-թանգարանը, այս շրջիկ ցուցադրությունը փոքրիշատե հնարավորություն է ընձեռում գոնե որոշակի պատկերացում կազմել մեծն Փարաջանովի արվեստի մասին։ Դրանից զատ՝ Փարաջանովի կյանքի առանձին դրվագների մասին անիմացիոն ֆիլմ է ստեղծվել, որը ներկայացվեց ցուցադրության բացմանը ներկա արվեստասերներին։ Ցուցադրությունը կգործի երկու ամիս։

Վահրամ Օրբելյան

Ռազմական փորձագետ Վահագն Սարոյանի ֆեյսբուքյան գրառումը․ «Բաքվում պահվող մեր հայրենակիցների հարցում իշխանությունների հանցավոր անգործությունը ոչ միայն հարվածում է Հայաստանի հեղինակությանը, այլև Ադրբեջանին տալիս է վստահություն, որ իր գործողությունները լուրջ հակազդեցության չեն արժանանա, ոչ միայն Հայաստանի կողմից, այլ նաև միջազգային ասպարեզում:

Հայաստանը ցույց է տալիս Ադրբեջանին, որ պատրաստ է համակերպվել իր ցանկացած քաղաքացու գերության հետ։

Բաքվում դատվում է հայի հավաքական խիղճն ու արժանապատվությունը, ինչը դեռ երկար ժամանակ իրեն զգացնել կտա»։

Վահագն Սարոյան

Մարդու իրավունքների պաշտպան Անահիտ Մանասյանի հանձնարարությամբ հուլիսի 13-ին Պաշտպանի ներկայացուցիչներն այցելել են ՀՀ արդարադատության նախարարության «Աբովյան» քրեակատարողական հիմնարկ։

Այցի շրջանակում Պաշտպանի ներկայացուցիչներն առանձնազրույցներ են ունեցել ազատությունից զրկված անձանց, այդ թվում՝ ՀՀ Ազգային ժողովի 8-րդ գումարման պատգամավոր Արեգնազ Մանուկյանի հետ։

Այցի ընթացքում դիտարկվել է ազատությունից զրկված անձանց իրավունքների ապահովման վիճակը։ Նրանց կողմից բարձրացված հարցերը քննարկվել են նաև քրեակատարողական հիմնարկի վարչակազմի ներկայացուցիչների հետ։

Ազատությունից զրկման վայրերում մարդու իրավունքների ապահովման հարցերը մշտապես գտնվում են Մարդու իրավունքների պաշտպանի անմիջական ուշադրության կենտրոնում։ Այցի շրջանակում ազատությունից զրկված անձանց կողմից ներկայացված հանգամանքները, ինչպես նաև վերհանված խնդիրները, մանրամասն կամփոփվեն և կհասցեագրվեն իրավասու մարմիններին։

ՀՀ կրթության, գիտության, մշակույթի եւ սպորտի նախարար ԺԱՆՆԱ ԱՆԴՐԵԱՍՅԱՆԸ հերթական անգամ հանրությանը ներկայացրեց «բարեփոխում», որը գործնականում վերածվեց կրթական խայտառակության։

ԿԳՄՍ նախարարի հրամանով՝ հաստատվել էր մասնագիտական ուսումնական հաստատությունների ընդունելության նոր կարգը, որը ներկայացվում էր որպես ժամանակակից, թվայնացված եւ քաղաքացիների կյանքը հեշտացնող համակարգ։ Նախարարությունը հայտարարում էր, թե կրթության տարբեր մակարդակների տեղեկատվական բազաները փոխկապակցվել են, դիմորդների տվյալներն ու փաստաթղթերը ներբեռնվելու են ինքնաշխատ եղանակով, իսկ ամբողջ գործընթացը կատարվելու է միասնական թվային հարթակում։

Թղթի վրա ամեն ինչ գեղեցիկ էր։ Սակայն իրականությունը, ինչպես արդեն բազմիցս եղել է այս իշխանությունների «բարեփոխումների» դեպքում, բոլորովին այլ պատկեր ցույց տվեց։

Համակարգի գործարկման հենց առաջին ժամերին ծնողները բախվեցին անհավատալի իրավիճակների։ Շատերի համար պարզվեց, որ պետական տվյալների բազայում իրենց երեխաները… պարզապես գոյություն չունեն։

«Այսօր առավոտյան ժամը 9։00-ին երեխայիս գրանցելիս բացահայտեցի, որ նման անուն–ազգանունով երեխա չունեմ, մինչդեռ 16 տարի նրան մեծացրել եմ»,- գրել է ծնողներից մեկը։

Մյուսը նշում է. «Ես անգամ չեմ հասել երեխային նույնականացնելու փուլին։ Խնդրում եմ՝ պատասխանատուները մի փոքր հետամուտ լինեն իրենց իսկ ստեղծած ծրագրին, որպեսզի կարողանանք ժամանակին գրանցվել»։

Սոցիալական ցանցերում դժգոհությունների ալիքը ժամերի ընթացքում դարձավ զանգվածային. «MyEmis-ով աղջկաս ՀԾՀ–ն բացեց, բայց իմ տվյալները չկան, հետո գրում է, որ 18 տարին լրացած անձանց մուտքը արգելվում է, մինչդեռ աղջիկս 14 տարեկան է», «Գրանցվելիս պարզվում է, որ այդ տարիքի երեխա չունես», «Էջը կիսատ է բացվում, մասնագիտությունը հնարավոր չէ ընտրել, փաստաթղթերը չի բեռնում»:

«Տվյալները չեն գտնվել», «Խնդրում ենք վերստուգել տվյալները եւ փորձել կրկին»՝ այս հաղորդագրություններն էին հերթով ստանում քաղաքացիները, մինչդեռ նախարարության հրապարակած հեռախոսահամարները, նրանց խոսքով, պարզապես չէին պատասխանում։

Խնդիրը միայն տեխնիկական չէ։ Այն նաեւ կազմակերպչական խայտառակ ձախողում է։

ԿԳՄՍ նախարարի թիվ 29-Ն հրամանը ստորագրվել է հունիսի 25-ին, սակայն պաշտոնապես հրապարակվել է միայն հունիսի 30-ին՝ ընդունելության մեկնարկից ընդամենը տասը օր առաջ։ Այդ ընթացքում ո՛չ քաղաքացիները, ո՛չ քոլեջները, ըստ բազմաթիվ արձագանքների, չեն հասցրել պատշաճ պատրաստվել նոր համակարգին։

Ավելին՝ ծնողները բարձրացնում են նաեւ տրամաբանական հարցեր։ Եթե հայտագրումն ավարտվում է հուլիսի 24-ին, իսկ հաջորդ օրվանից արդեն սկսվում են ընդունելության քննությունները, ինչպե՞ս պետք է վերջին օրը հայտագրված դիմորդը հասցնի տեղեկանալ քննության օրվա մասին, եթե, ինչպես հենց քոլեջներն են ասում, դրա մասին տեղեկացվում են 3-5 օր հետո։

Դժգոհ են նաեւ հենց ուսումնական հաստատությունները։ Քոլեջների ներկայացուցիչները նշում են, որ նույնիսկ իրենք չեն կարողանում հետեւել դիմորդների գրանցման ընթացքին, քանի որ համակարգը լիարժեք չի աշխատում։

Առանձին խնդիր է նաեւ չափահաս դիմորդների ընդունելությունը։ Համակարգը, ըստ քաղաքացիների, թույլ չի տալիս, որ 18 տարին լրացած անձը սեփական անունից դիմի քոլեջ ընդունվելու համար՝ անընդհատ պահանջելով ծնողի տվյալներ կամ հայտարարելով, որ տվյալները չեն համադրվում։

Այս ամենը տեղի է ունենում այն դեպքում, երբ նախարարությունը խոսում էր թվայնացման, արդյունավետության եւ գործընթացների պարզեցման մասին։ Փոխարենը քաղաքացիները ստացան չաշխատող հարթակ, անհասանելի պատասխանատուներ, աննպատակ կորցրած ժամանակ եւ լիակատար անորոշություն։

Սա առաջին դեպքը չէ, երբ Ժաննա Անդրեասյանի ղեկավարած նախարարության հերթական «բարեփոխումը» վերածվում է տեխնիկական եւ կառավարչական ձախողման։ Սակայն այս անգամ դրա գինը վճարում են հազարավոր դիմորդներ եւ նրանց ծնողները, որոնք պարզապես ցանկանում էին ժամանակին գրանցվել քոլեջ ընդունվելու համար։

Հարցը մնում է բաց՝ եթե նախարարությունը չէր ապահովել համակարգի լիարժեք աշխատանքը, ինչո՞ւ էր այն գործարկվում ընդունելության մեկնարկի օրը՝ քաղաքացիներին դարձնելով հերթական չստուգված փորձարկման մասնակից։

ՀՐԱՆՏ ՍԱՐԱՖՅԱՆ

https://iravunk.com/

«Մուլտի Գրուպ» կոնցեռնի կազմում գտնվող մի շարք ընկերությունների աշխատակիցներ այսօր միաժամանակյա բողոքի ակցիաներ են անցկացնում ձեռնարկությունների տարածքներում՝ պահանջելով նախաքննական մարմիններից բացել կապարակնիքները և թույլ տալ վերադառնալ աշխատանքի։

Բողոքի ակցիա են անկացնում նաև «Երևանի Արարատ կոնյակի-գինու-օղու կոմբինատ»-ի աշխատակիցները։

Արդեն ութերորդ օրն է, ինչ Ծառուկյանին պատկանող մի շարք ձեռնարկություններ փակ են։ Ծառուկյանին ձերբակալելու օրը քննչական գործողություններ են իրականացվել նաև նրան պատկանող տարբեր օբյեկտներում։ Կապարանակնքվել են Ծառուկյանին պատկանող մի շարք կառույցներ։

Աշխատակիցների խոսքով՝ իրենք գտնվում են անորոշության մեջ։ Նրանք նշում են, որ ոստիկանները նույն օրը և նույն ժամին մուտք են գործել ընկերությունների տարածքներ, ինչից հետո աշխատակիցներին թույլ չեն տվել մտնել աշխատանքի։

«Մենք ուզում ենք գոնե իմանալ՝ մեկ օրից, տասը օրից, թե ընդհանրապես երբ է բացվելու գործարանը։ Եթե չի բացվելու, գոնե ասեն, որ մարդիկ իրենց գլխի ճարը տեսնեն»,- ակցիայի ժամանակ լրագրողներին ասաց աշխատակիցներից մեկը։

Նրանց խոսքով՝ փակման հետևանքով բազմաթիվ ընտանիքներ մնացել են առանց եկամտի, մինչդեռ շատերն ունեն վարկային պարտավորություններ, վճարում են բնակարանի վարձավճար և կոմունալ ծառայությունների վճարներ։

Աշխատակիցները նշել են նաև, որ եթե պատասխան չստանան, կփակեն Երևան-Սևան մայրուղին։

«Մենք միայն ուզում ենք աշխատել։ Եթե պետական մարմինները ստուգումներ են իրականացնում, թող դա արվի այնպես, որ աշխատակիցները չտուժեն»,- ասել է աշխատակիցներից մեկը՝ հավելելով, որ դիմում են նաև վարչապետին՝ խնդրելով հնարավորինս արագ կարգավորել իրավիճակը։

Հուլիսի 6-ին Գագիկ Ծառուկյանը ձերբակալվեց, ապա կալանավորվեց երկու ամսով։ Քննչական կոմիտեն հայտարարում է, որ Ծառուկյանը մեղադրվում է առանձնապես խոշոր չափերով խարդախություն և փողերի լվացում կազմակերպելու համար։ Նրա փաստաբանը, իր հերթին, պնդում է, որ գործը քաղաքական ենթատեքստ ունի, իսկ Ծառուկյանը պետք է ճանաչվեր տուժող, ոչ թե մեղադրյալ։