Category: Oratert.am

«Ժողովուրդ» օրաթերթը գրում է. «ՀՀ վարչապետ Նիկոլ Փաշինյանը նոր մամուլի խոսնակի փնտրտուքի մեջ է։

«Ժողովուրդ» օրաթերթի տեղեկություններով՝ վարչապետը նշել է, որ նոր խոսնակը պետք է անպայման լինի իգական սեռի ներկայացուցիչ։

Այս փուլում արդեն քննարկվում են 3-4 թեկնածուների անուններ, սակայն Փաշինյանը վերջնական որոշում դեռևս չի կայացրել։

Ըստ կառավարական աղբյուրների՝ վարչապետին ներկայացվել են նաև «Քաղաքացիական պայմանագիր» կուսակցության երիտասարդական կառույցի երեք ներկայացուցիչների թեկնածությունները։ Խոսքը վերաբերում է ՔՊ երիտասարդական կառույցի անդամներ Էլինա Իշխանյանին, Մելանյա Հարությունյանին և Սյուզաննա Սայադյանին։

Երեք թեկնածուներն էլ ակտիվ մասնակցություն են ունեցել ՔՊ-ի նախընտրական քարոզարշավներին՝ հայտնի «16 երգի» ներքո կազմակերպված ելույթների ընթացքում։

Այս փուլում, մեր տեղեկություններով, բավականին թեժ մրցակցություն է ընթանում վարչապետի մամուլի խոսնակի պաշտոնը զբաղեցնելու համար։

Հավելենք, որ վարչապետի գործող մամուլի խոսնակ Նազելի Բաղդասրյանը մտադիր է վերցնել պատգամավորական մանդատը և կրկին տեղափոխվել օրենսդիր՝ շարունակելով իր գործունեությունն Ազգային ժողովում»։

Առավել մանրամասն թերթի այսօրվա համարում

«Իրավունք» թերթը գրում է. «ԱԺ ընդդիմադիր փոխխոսնակի պաշտոնի համար կռիվ է ընկել ուժեղների թիմում։ Պարզվում է, այդ պաշտոնը փափագում է Գոհար Մելոյանը, սակայն, թիմը նրան, որպես «սվոյ» այդպես էլ մինչեւ վերջ չի ընկալում։

Ավելին, ասում են չի բացառվում, փոխնախագահի պաշտոնը ստանձնի անձամբ Նարեկ Կարապետյանը.«Ոնց ասի հոպարը»,-մտերիմների շրջանում ասել է վերջինս։ 

Առավել մանրամասն թերթի այսօրվա համարում

Ֆրանսիայի հարավ-արևմուտքում անվերահսկելի կերպով տարածվող անտառային հրդեհների պատճառով Իսպանիայի սահմանին մոտ գտնվող երկու տասնյակ փոքր քաղաքներից և գյուղերից տարհանվել է մոտ 10,000 մարդ։

Իշխանությունները հայտնել են, որ հուլիսի 6-ի ուժեղ քամիները կարող են էլ ավելի ուժեղացնել կրակի տարածումը։

Ինչպես հաղորդում է «Արմենպրես»-ը, այս մասին հայտնում է Reuters-ը։Ֆրանսիայի Պիրենեյների նախալեռներում հրդեհը այրել է մոտ 4,600 հեկտար տարածք։

«Այս առավոտ պայմանները կրկին վատթարանում են։ Այսօր վերսկսվում է պայքարը», – ասել է Ֆրանսիայի ներքին գործերի նախարար Լորան Նյունեզը TF1 հեռուստաալիքի եթերում։

Ֆրանսիայում և ողջ Արևմտյան Եվրոպայում մայիսին և հունիսին գրանցված  բարձր ջերմաստիճանները մեծ տարածքներ են չորացրել՝ դրանք դարձնելով հատկապես խոցելի անտառային հրդեհների համար։Սահմանի այն կողմում՝ Իսպանիայում հրդեհը վնասել է 2,200 հեկտար տարածք։

Կատալոնիայի հարավում՝ արևելյան Կաստելյոն նահանգում, 500 մարդ տարհանվել է այն բանից հետո, երբ հրդեհը ներթափանցել է Սիեռա դե Էսպադան ազգային պարկ։

Իսրայելի իշխանությունները ԱՄՆ-ին են փոխանցել հետախուզական տվյալներ, որոնք վկայում են Իրանում ԱՄՆ նախագահ Դոնալդ Թրամփի դեմ մահափորձի ենթադրյալ նախապատրաստման մասին։ Այդ մասին՝ վկայակոչելով աղբյուրները, հայտնել է The Wall Street Journal թերթը։

Ինչպես կարծում է հրատարակությունը, այս տեղեկատվությունը կարող է հանգեցնել ԱՄՆ-ի դիրքորոշման կոշտացմանը և Իրանի հետ հակամարտության սրմանը։ Իսրայելի վարչապետ Բենյամին Նեթանյահուն շարունակում է հանդես գալ Իրանի դեմ ռազմական գործողությունների օգտին, թեև Թրամփը մինչև վերջերս մնում էր դիվանագիտական լուծման կողմնակից՝ վախենալով էսկալացիայի տնտեսական հետևանքներից, պարզաբանվում է հրապարակման մեջ։

Հիշեցնենք, որ ԱՄՆ-ը և Իսրայելը Իրանի դեմ պատերազմը սկսել են փետրվարի 28-ին։ Օդային հարվածների հետևանքով, ի թիվս այլոց, զոհվել է Իրանի գերագույն առաջնորդ Ալի Խամենեին։ Հունիսին Վաշինգտոնն ու Թեհրանը ստորագրեցին փոխըմբռնման հուշագիր, որը նախատեսում է բոլոր ճակատներում, այդ թվում՝ Լիբանանում, մարտական գործողությունների անհապաղ դադարեցում։

Այնուհետև Շվեյցարիայի Բյուրգենշտոք քաղաքում Դոհայի և Իսլամաբադի միջնորդությամբ տեղի ունեցան ԱՄՆ-ի և Իրանի բանակցությունները հուշագրի իրականացման շուրջ։ Ինչպես նշվում էր բանակցությունների առաջին փուլից հետո Կատարի և Պակիստանի համատեղ հայտարարության մեջ, Իրանի և ԱՄՆ-ի ներկայացուցիչների մասնակցությամբ հանդիպումն անցել է դրական և կառուցողական մթնոլորտում, ձեռք է բերվել հուսադրող առաջընթաց, այդ թվում՝ ստեղծվել է հիմք հետագա տեխնիկական խորհրդակցությունների անցկացման համար։

Սակայն հուլիսի 8-ի գիշերը ԱՄՆ-ն վերսկսեց Իրանի դեմ լայնածավալ հարվածները՝ մեղադրելով նրան Հորմուզի նեղուցին վերաբերող ձեռք բերված պայմանավորվածությունների պայմանները խախտելու մեջ։

Այսօր՝ հուլիսի 10-ին շղթայական ավտովթար է տեղի ունեցել Երևանում։ Ժամը 00:30-ի սահմաններում Կոմիտասի պողոտա-Վաղարշյան փողոցի խաչմերուկում բախվել են «Volkswagen», «Kia Forte», «Kia» և «Chevrolet Volt» մակնիշի ավտոմեքենաները։

Shamshyan.com-ի տեղեկություններով՝ վթարի հետևանքով երկու անչափահաս ուղևորներ տեղափոխվել են «Ուիգմոր» բժշկական կենտրոն։

Վթարի փաստով քննչական բաժնում նախաձեռնվել է քրեական վարույթ, որտեղ էլ պարզվում են ավտոմեքենաների սեփականատերերի, վարորդների և վիրավորների ինքնությունը։

Բախման հետևանքով «Kia» մակնիշի ավտոմեքենաներից մեկը հայտնվել է հետիոտնի համար նախատեսված մայթին, իսկ «Chevrolet Volt»-ն ու «Kia» մակնիշի մյուս ավտոմեքենան ունեցել են ճակատային բախում։

Իրանը չի վերահսկում Հորմուզի նեղուցը: Այս մասին գրված է ԱՄՆ կենտրոնական հրամանատարության X-ի էջում:

ԱՄՆ զինված ուժերի կենտրոնական հրամանատարությունը (CENTCOM) հերքել է իրանական պետական լրատվամիջոցների հաղորդագրություններն այն մասին, որ ներկայումս առևտրային նավերի տարանցումը Հորմուզի նեղուցով իրականացվում է բացառապես Թեհրանի կողմից հաստատված երթուղով։

«Իրանը չի վերահսկում Հորմուզի նեղուցը», – հայտարարել են CENTCOM-ում։ Այնտեղ ընդգծել են, որ ամերիկյան զինված ուժերն ամեն կերպ աջակցում են առևտրային նավերի անվտանգ անցմանը նեղուցով։

«Մայիսի սկզբից ամերիկյան զորքերը նպաստել են ավելի քան 800 առևտրային նավերի և 380 մլն բարել հում նավթի հաջող տարանցմանը այս կենսական միջազգային առևտրային միջանցքով», – շեշտել են հրամանատարությունում։

Ուկրաինան մոտ ժամանակներս ԱՄՆ-ից կստանա PAC-3 տեսակի կալանիչ հրթիռների խմբաքանակ՝ Patriot համակարգերի համար: Այդ մասին մամուլի ասուլիսի ժամանակ հայտնել է Վլադիմիր Զելենսկին, հաղորդում է ՏԱՍՍ-ը:

«Առաջիկա օրերին մենք կստանանք փաթեթ ԱՄՆ-ից, ինչպես նաև եվրոպացիների հետ առանձին պայմանավորվածություններ ունեինք, այնտեղ դեռ կոնկրետ ժամկետներ չկան, բայց կլինեն լրացուցիչ PAC-3 հրթիռներ», – հայտարարել է Զելենսկին՝ պատասխանելով լրագրողի այն հարցին, թե արդյոք Անկարայում ՆԱՏՕ-ի գագաթնաժողովի արդյունքներով Ուկրաինային սպասվո՞ւմ են գործընկերներից PAC-3 հրթիռների արագ մատակարարումներ։

Զելենսկին նաև նշել է, որ Կիևի և Վաշինգտոնի միջև պայմանավորվածություններ են ձեռք բերվել Ուկրաինայի տարածքում Patriot-ի համար հրթիռների արտադրության շուրջ։

ԱՄՆ նախագահ Դոնալդ Թրամփն ավելի վաղ հայտարարել էր, որ Վաշինգտոնը Կիևին կփոխանցի Patriot զենիթահրթիռային համալիրների արտադրության լիցենզիա։ Bloomberg գործակալությունը գրել էր, որ Ուկրաինայում Patriot հակաօդային պաշտպանության համակարգերի համար կալանիչ հրթիռների հնարավոր արտադրության գործարկումը երկար ժամանակ կպահանջի և թույլ չի տա Կիևին արագորեն համալրել զինանոցները։

Ուկրաինացի զինվորականներին հաջողվել է կանգնեցնել ռուսական առաջխաղացումը ցամաքում և ՌԴ նավատորմը դուրս մղել Սև ծովից, և այժմ «վճռորոշ ճակատամարտը» ծավալվել է երկնքում, հայտարարել է Ուկրաինայի նախագահ Վլադիմիր Զելենսկին։ Նրա խոսքով՝ Ուկրաինան ցուցադրել է իր մարտունակությունը օդում, իսկ նման «երկնային» դիմակայությունում «շատ ավելի քիչ նշանակություն ունի, թե ում տարածքն է ավելի մեծ»։ «Ես կարծում եմ, որ այս պատերազմում հաղթանակը պատկանում է նրան, ով ավելի խելացի է», — ասել է Զելենսկին երկուշաբթի օրը Financial Times-ին տված հարցազրույցում՝ նշելով Ռուսաստանի առավելությունները աշխարհագրության և մարդկային ռեսուրսների առումով։

«Եթե մեր գործընկերները, — ընդգծել է Զելենսկին, — չթողնեն Ուկրաինան առանց ֆինանսական աջակցության, եթե մեր զինվորները շարունակեն պահել ճակատը, եթե ռուսական հարձակման յուրաքանչյուր կիլոմետրը նրանց համար նախկինի պես արժենա տասնյակ հազարավոր, իսկ երբեմն նաև հարյուր հազարավոր մարդկանց կյանքեր, ապա վճռորոշ պայքարը կծավալվի երկնքում»։ Նախագահն ընդգծել է, որ պատերազմի ելքը որոշելու է «հենց երկինքը»։ Կիևի կենտրոնում գտնվող իր գրասենյակում լրագրողի հետ զրույցում, որը նույն օրը կրկին ենթարկվել էր ՌԴ ԶՈւ հերթական մահաբեր հարձակմանը, Զելենսկին սպառնացել է էլ ավելի ուժեղացնել հարվածները Ռուսաստանի մայրաքաղաքի ուղղությամբ։ «Երբ դեպի Մոսկվա կթռչեն արդեն ոչ թե հարյուր, այլ հազար անօդաչու… նա [նախագահ Վլադիմիր Պուտինը] կհասկանա»։

«Հենց որ նա սկսի դա անձամբ զգալ, հենց որ սկսի դա տեսնել իր աչքերով, դուք կտեսնեք, թե ինչպես խորհրդականները նրան կհամոզեն տեղափոխվել Ուրալից այն կողմ», — հայտարարել է ուկրաինացի նախագահը, որը նախկինում խոստացել էր անել այնպես, որ Մոսկվան «կայրվի», եթե Ուկրաինայի դեմ հարձակումները շարունակվեն։ Զելենսկին հավելել է, որ, իր կարծիքով, պատերազմի ավարտն այնքան ավելի մոտ կլինի, «որքան հեռու Պուտինը լինի Մոսկվայից», ինչպես նաև ընդգծել է, որ Ուկրաինան ցուցադրել է որոշակի վայրում և որոշակի պահին երկնքի նկատմամբ «օպերատիվ վերահսկողություն» հաստատելու կարողություն։

Նրա խոսքով՝ Մոսկվայի և Սանկտ Պետերբուրգի դեմ ուկրաինական ԱԹՍ-ների զանգվածային հարվածների հոգեբանական ազդեցությունը, ինչպես նաև ուժգնացող տնտեսական հետևանքները, ի վերջո, կփոխեն Պուտինի հաշվարկները։ Ավելի վաղ FT-ի աղբյուրները Մոսկվայում ասում էին, որ ռուսաստանցի նախագահը դեռևս կենտրոնացած է մաքսիմալիստական նպատակների վրա (նրան անհրաժեշտ են Կիևից լայնածավալ զիջումներ և ամբողջ Դոնեցկի մարզի հանձնումը) և դժվար թե սկսի իմաստալից բանակցություններ ռազմական գործողությունների ավարտի շուրջ մինչև 2027 թվականի փետրվարը։