Category: Oratert.am

«Ժողովուրդ» օրաթերթը գրում է. «Օգոստոսի 3-ին գումարվելու է Ազգային ժողովի նորընտիր կազմի անդրանիկ նիստը։ Ինչպես սահմանված է Սահմանադրությամբ և արդեն ձևավորված ավանդույթով, մինչև Ազգային ժողովի նախագահի ընտրությունը նիստը կվարի տարիքով ավագ պատգամավորը՝ 1945 թվականի հունվարի 17-ին ծնված Կնյազ Հասանովը։

Սա արդեն չորրորդ անգամն է, երբ հենց նա է վարելու խորհրդարանի առաջին նիստը։ Կնյազ Հասանովը նույն առաքելությունն իրականացրել է նաև 2017, 2018 և 2021 թվականներին։

Հասանովը 2026 թվականի խորհրդարանում ևս մանդատ է ստացել «Քաղաքացիական պայմանագիր» կուսակցության համապետական ցուցակով՝ որպես ազգային փոքրամասնության ներկայացուցիչ։ Նա հանդիսանում է նաև Հայաստանի քրդական համայնքի ղեկավարը։

«Ժողովուրդ» օրաթերթը ուսումնասիրել է Կնյազ Հասանովի վերջին հինգ տարիների հայտարարագրերը՝ հասկանալու համար, թե ինչ ունեցվածքով է նորընտիր խորհրդարանի ամենատարեց պատգամավորը շարունակում իր պաշտոնավարումը։

2025 թվականի հայտարարագրի համաձայն՝ պատգամավորի հիմնական անշարժ գույքը շարունակում է մնալ Կոտայքի մարզի Աբովյան համայնքում գտնվող համատեղ սեփականությամբ բնակարանը, որը ձեռք է բերվել 2008 թվականի հոկտեմբերի 22-ին՝ գնման եղանակով։ Հատկանշական է, որ եթե նախորդ տարիներին հայտարարագրերում առկա էր նաև 2000 թվականի արտադրության VOLKSWAGEN մակնիշի ավտոմեքենան, ապա 2025 թվականի հայտարարագրում որևէ ավտոմեքենա կամ այլ տրանսպորտային միջոց այլևս նշված չէ։

Դրամական միջոցների մասով 2025 թվականի սկզբին նա ունեցել է 1 մլն դրամ կանխիկ գումար, իսկ տարվա վերջում՝ արդեն 1,5 մլն դրամ, այսինքն՝ կանխիկ միջոցներն աճել են 500 հազար դրամով։

2025 թվականին Կնյազ Հասանովի ընդհանուր եկամուտը կազմել է 13 մլն 831 հազար 244 դրամ։ Այդ գումարից 1 մլն 32 հազար դրամը եղել է կենսաթոշակ, իսկ 12 մլն 799 հազար 244 դրամը՝ Ազգային ժողովի աշխատակազմից ստացած աշխատավարձն ու դրան հավասարեցված վճարումները։

2024 թվականի հայտարարագիրը նույնպես էական փոփոխություններ չի արձանագրել։ Պատգամավորը շարունակել է հայտարարագրել նույն բնակարանը՝ Աբովյանում, ինչպես նաև 2000 թվականի արտադրության VOLKSWAGEN ավտոմեքենան, որը ձեռք էր բերել 2010 թվականի մարտի 23-ին՝ գնման եղանակով։

2024 թվականի սկզբին նրա կանխիկ միջոցները կազմել են 1 մլն դրամ, իսկ տարվա վերջում՝ 1,5 մլն դրամ։

2024 թվականի ընդհանուր եկամուտը կազմել է 11 մլն 4 հազար 472 դրամ, որից 900 հազար դրամը՝ կենսաթոշակ, իսկ 10 մլն 104 հազար 472 դրամը՝ Ազգային ժողովից ստացած աշխատավարձը։

2023 թվականի հայտարարագրի համաձայն՝ պատգամավորի գույքային պատկերը կրկին նույնն է եղել։ Նա հայտարարագրել է Աբովյանի բնակարանը և 2000 թվականի արտադրության VOLKSWAGEN ավտոմեքենան։

Տարվա սկզբին կանխիկ դրամ չի ունեցել, սակայն տարվա վերջում հայտարարագրել է 1 մլն դրամ կանխիկ միջոց։

Նրա ընդհանուր տարեկան եկամուտը կազմել է 11 մլն 677 հազար 710 դրամ, որից 919 հազար 800 դրամը՝ կենսաթոշակ, իսկ 10 մլն 757 հազար 910 դրամը՝ Ազգային ժողովից ստացած աշխատավարձը։

2022 թվականի հայտարարագրում ևս փոփոխություններ գրեթե չեն եղել։ Պատգամավորը պահպանել է Աբովյանում գտնվող համատեղ սեփականությամբ բնակարանը և 2000 թվականի արտադրության VOLKSWAGEN ավտոմեքենան։ Տարվա ընթացքում նոր գույք կամ մեքենա չի ձեռք բերել և որևէ գույք չի օտարել։

Տարվա ընդհանուր եկամուտը կազմել է 9 մլն 272 հազար 530 դրամ, որից 876 հազար դրամը՝ կենսաթոշակ, իսկ 8 մլն 396 հազար 530 դրամը՝ Ազգային ժողովի աշխատակազմից ստացած աշխատավարձը։

2021 թվականի հայտարարագրի համաձայն՝ պատգամավորը նույնպես ունեցել է միայն Աբովյանի բնակարանը և 2000 թվականի արտադրության VOLKSWAGEN ավտոմեքենան։ Այդ տարի ևս նոր գույք կամ մեքենա չի ձեռք բերել, ոչ էլ օտարել է ունեցվածքը։

2021 թվականի ընդհանուր եկամուտը կազմել է 8 մլն 647 հազար 250 դրամ։ Այդ գումարից 7 մլն 807 հազար 250 դրամը եղել է պատգամավորական աշխատավարձ, իսկ 840 հազար դրամը՝ կենսաթոշակ։

Այսպիսով, վերջին հինգ տարիների հայտարարագրերը ցույց են տալիս, որ Կնյազ Հասանովի գույքային վիճակում էական փոփոխություններ չեն եղել։ Նրա հիմնական անշարժ գույքը շարունակում է մնալ Աբովյանում գտնվող բնակարանը, մինչև 2024 թվականը հայտարարագրերում առկա է եղել նաև 2000 թվականի արտադրության VOLKSWAGEN ավտոմեքենան, որը 2025 թվականի հայտարարագրում այլևս չի նշվում։ Միաժամանակ, տարեցտարի աճել են պատգամավորի հայտարարագրված եկամուտները՝ 2021 թվականի 8,6 մլն դրամից հասնելով 2025 թվականին 13,8 մլն դրամի, իսկ 2023 թվականից սկսած նա նաև սկսել է հայտարարագրել կանխիկ դրամական միջոցներ, որոնք 2025 թվականի վերջի դրությամբ կազմել են 1,5 մլն դրամ»։

Առավել մանրամասն թերթի այսօրվա համարում

Եվրամիությունը ագրեսիվ կերպով կառուցում է արևային էլեկտրակայաններ, և էլեկտրացանցերը այլևս չեն կարողանում կառավարել դրանց արտադրությունը: Դա հանգեցնում է գների բացասական մակարդակի, և մեծ քանակությամբ հզորություններ են վատնվում: Միայն առաջիկա ամիսներին մենք կարող ենք խոսել 40 ՏՎտ/ժ-ի մասին, գրում է eadaily.com–ը:

«Վերջին տասնամյակի ընթացքում Սիցիլիայից մինչև Լապլանդիա տեղադրվել են հարյուր միլիոնավոր արևային վահանակներ, որոնք մի ժամանակ նիշային տեխնոլոգիան վերածել են Եվրոպայի ամառային էլեկտրաէներգիայի ամենամեծ աղբյուրի: Այս արագ ընդլայնումն այժմ բախվում է նոր մարտահրավերի. ցանցը չի կարող դիմակայել: Հզորությունների աճը դանդաղում է, եկամուտները նվազում են, և էլեկտրաէներգիայի ռեկորդային քանակություններ են վատնվում, քանի որ ցանցերը չեն կարողանում հաղթահարել արտադրության աճը», – գրել է Bloomberg-ը: Գործակալությունը նշել է, որ արևային սեզոնը լիարժեք ընթացքի մեջ է, և այս գարնանը հիմնական շուկաներում, այդ թվում Գերմանիայում, Մեծ Բրիտանիայում և Ֆրանսիայում, արդեն գերազանցվել են բացասական գների ռեկորդները: Առաջիկա ամիսներին սպասվում է նույնիսկ ավելին։

«Սա ավելին է, քան տարածաշրջանը կարող է կարգավորել, քանի որ գեներատորները ստիպված են լինում արևոտ օրերին մի քանի ժամով անջատել էլեկտրակայանները, մի պրակտիկա, որը հայտնի է որպես կրճատում։ Առաջիկա ամիսներին կարող է վատնվել մոտավորապես 40 տերավատտ-ժամ էլեկտրաէներգիա, որը բավարար է Մեծ Լոնդոնը մեկ տարի էլեկտրաէներգիայով ապահովելու համար։ Սա մեկ քառորդով ավելի է, քան 2025 թվականին», – գրել է գործակալությունը։

Այս իրավիճակը պահանջում է լայնածավալ էներգիայի կուտակում և ցանցի արդիականացում։ Սակայն դա միայն ժամանակի հարց է։ Ներկայումս արևային նախագծերի շահութաբերությունը նվազում է, և նոր կայանների կառուցումը սկսել է դանդաղել։ «Եվրոպային այժմ անհրաժեշտ են ոչ միայն նոր արևային կայաններ, այլ նաև մարտկոցների և ցանցի արդիականացման լայնածավալ ներդրումներ։ Հակառակ դեպքում մաքուր էներգիան բառացիորեն կշարունակի «ծխի վերածվել»», – գրել է գործակալությունը։ 

Վերականգնվող էներգիայի արտադրությունը նպաստում է էլեկտրաէներգիայի գների իջեցմանը, բայց նաև ստեղծում է մի շարք խնդիրներ։ Դրանց թվում են անկայուն արտադրությունը, ցանցի գերբեռնվածությունը և վերականգնվող էներգիայի աղբյուրների կողմից դեռևս օգտվող սուբսիդիաները։

Հայաստանում արևային պանելներ արտադրող առաջին և միակ ընկերությունը Սոլարոնն է։

Տեղադրե՛ք  SolarOn արևային կայան և զրոյացրեք էլեկտրաէներգիայի ծախսը։

Գրե՛ք կամ զանգահարեք և ստացեք անվճար հաշվարկ Ձեզ անհրաժեշտ արևային կայանի հզորությանն ու արժեքի վերաբերյալ։

Զանգահարեք 8757, 010 440055

էլ. փոստ ֊ [email protected]

Հուլիսի 4-ին պաշտոնապես մեկնարկել է «Կապան Ֆեստ 2026» միջազգային երաժշտական փառատոնը՝ արդեն չորրորդ տարին անընդմեջ Սյունիքի սրտում համախմբելով համաշխարհային երաժշտարվեստի նշանավոր ներկայացուցիչներին, երիտասարդ տաղանդներին և արվեստասեր հանդիսատեսին։

Փառատոնի բացման հանդիսավոր արարողությանը ներկա են եղել ՀՀ կրթության, գիտության, մշակույթի և սպորտի նախարարի տեղակալ Տիգրան Վիրաբյանը, պաշտոնատար այլ անձինք, երաժիշտներ, մշակութային գործիչներ, բազմաթիվ հյուրեր:

Փառատոնն անցկացվում է ԿԳՄՍ նախարարության ֆինանսական աջակցությամբ: Փառատոնի կայացմանն աջակցում են նաև Կապանի համայնքապետարանը, Զանգեզուրի պղնձամոլիբդենային կոմբինատը և գործընկեր այլ կազմակերպություններ:

10 օր նախատեսվող «Կապան Ֆեստ 2026»-ի շրջանակում Կապանում հյուրընկալվել են աշխարհահռչակ մենակատարներ, կամերային երաժշտության հեղինակավոր արտիստներ։ Փառատոնի համերգային ծրագրերը ներառում են դասական, կամերային և ժամանակակից երաժշտության բացառիկ կատարումներ, ստեղծագործական համագործակցություններ և երաժշտական նոր ձևաչափեր։

Փառատոնի կարևոր բաղադրիչներից է «Կապան Ֆեստ Ակադեմիան», որի շրջանակում աշխարհի տարբեր երկրներից ընտրված երիտասարդ երաժիշտները մասնակցում են ինտենսիվ վարպետության դասերի, աշխատում միջազգային հեղինակություն վայելող արվեստագետների հետ և բեմ են բարձրանում նրանց կողքին։

Այս տարի ևս փառատոնի հատուկ իրադարձություններից է համաշխարհային ճանաչում ունեցող Florian Leonhard Fine Violins ընկերության բացառիկ ցուցադրությունը։ Փառատոնի հյուրերը հնարավորություն կունենան տեսնելու և ծանոթանալու լեգենդար վարպետներ Անտոնիո Ստրադիվարիուսի և Ջուզեպպե Գվարների դել Ջեզուի եզակի լարային գործիքներին, որոնք համաշխարհային մշակութային ժառանգության բացառիկ նմուշներ են։

«Կապան Ֆեստ 2026»-ի շրջանակում առաջին անգամ Հայաստանում կներկայացվի նաև «Վիեննական երեկո Կապանում» հատուկ ծրագիրը։ Դիմակահանդեսային մթնոլորտում անցկացվող միջոցառունը կմիավորի վիեննական վալսը, օպերային երաժշտությունը և ջազային կատարումները՝ ստեղծելով եվրոպական մշակութային ավանդույթների յուրահատուկ շունչ Կապանում։

Դերասանուհի Մարինկա Խաչատրյանն ինստագրամյան իր էջում Եգիպտոսից կիսվել է նոր ֆոտոշարքով: 

«Արևմուտը երբեք ուշադրություն չի պահանջում, բայց այն գողանում է բոլորի սիրտը»,- լուսանկարներին կից գրել է նա: 

Ճիշտը մեր կողմից մանդատների վերցնելն է, որպեսզի ապահովվի այն ներկայությունը, որը վաղը կաջակցի փողոցային պայքարին։ Այս մասին հայտնել է «Ուժեղ Հայաստան» կուսակցության խորհրդի անդամ, պատգամավորի թեկնածու Նարեկ Կարապետյանը:

«Մենք արգելափակել ենք Ալիևի սահմանադրական փոփոխությունները:

Պատմության մեջ առաջին անգամ Փաշինյանը չունի սահմանադրական մեծամասնություն, նա առաջին անգամ կորցրեց ժողովրդի մեծամասնության վստահությունը։

Մենք կհաղթենք համայնքային ընտրություններում և կշարունակենք ընդլայնել ժողովրդի վստահությունը, իսկ վերջնական փուլում Հայաստանի ժողովուրդը ժողովրդավարական ճանապարհով կփոխի գործող իշխանությանը:

Մենք պայքարելու ենք քեզ համար»,- ասել է Նարեկ Կարապետյանը։

Այսօր՝ հուլիսի 4-ին, Սահմանադրական դատարանը հրապարակելու է վճիռը, համաձայն որի, կա՛մ կբավարարվի ընդդիմադիր 7 ուժերի ներկայացրած հայցը, ու ընտրությունները կհամարվեն անվավեր, ինչը նշանակում է, որ պետք է պատրաստվենք արտահերթ ընտրությունների, կա՛մ Բարձր դատարանը կգտնի, որ չի եղել այնպիսի խախտում, որը կազդեր ընտրությունների արդյունքների վրա, ինչն էլ իր հերթին կնշանակի, որ «հաղթել» է ժողովրդավարությունը, ու մենք ևս մեկ քայլով մոտեցել ենք այդ «բաստիոնի» գագաթին։

Քաղաքական որոշ վերլուծական շրջաններից հնչում են կարծիքներ, որ այնուամենայնիվ հնարավոր է իրոք ընտրությունները չեղարկվեն, քանի որ ՔՊ-ն չի ստացել սահմանադրական մեծամասնություն, ու արտահերթ ընտրությունները հնարավորություն կտան ձևավորել այնպիսի խորհրդարան, որում եթե նույնիսկ մի 10 ՔՊ-ական հանկարծ որոշեն բռնել մայր կուսակցությունից «գաղթի ճամփան», ապա դա որևէ ձևով չազդի իշխող ուժի բնականոն գործունեության վրա։

Իհարկե, այդքան էլ հասկանալի չէ, թե սցենարի նման ձևով զարգացման պարագայում ինչ օգուտ է ունենալու ընդդիմությունը, քանի որ այդ դեպքում մենք «մրից դուրս գալով՝ կընկնենք մրջուրը», սակայն դա քիչ հավանական է, որովհետև արդեն իսկ զգացվում է, որ իշխող ուժը նման «կասկադյորական» տրյուկների դիմելու ու արդեն իսկ ձևավորված քաղաքական պատկերը վտանգելու կարիք չունի, հատկապես, որ ցանկացած ընտրություն ամեն դեպքում ունի որոշակի ռիսկային չափաբաժին։

Ուստի, ամենայն հավանականությամբ, այսօր մենք կլսենք այնպիսի վճիռ, ինչպիսին կանխատեսում է մեր հասարակության գրեթե 90 տոկոսը, այն է՝ Հայաստանում տեղի են ունեցել «արդար ու թափանցիկ» ընտրություններ, իսկ եթե եղել են ընտրախախտումներ, ապա դրանց միակ հասցեատերն ընդդիմությունն է։

Եվ հենց այստեղ արդեն առաջ է գալիս ամենակարևոր հարցը։ Ի՞նչ է անելու ընդդիմությունը. համակերպվելո՞ւ է ՍԴ որոշման հետ ու մանդատները վերցնելով անցնի դասական խորհրդարանական գործունեության, թե՞ սկսելու է փողոցային պայքար։ Կամ գուցե մեկնարկելու է այն գաղտնի պլանը, որի մասին խոսում էր «Ուժեղ Հայաստան» կուսակցության առաջնորդ Սամվել Կարապետյանը։

Տարբերակները մի քանիսն են, սակայն դեպքերից առաջ չընկնենք ու սպասենք ժամեր անց հրապարակվող վճռին ու ընդդիմության հայտարարությանը, որից հետո պարզ կլինի՝ մենք զարկ ենք տալու քաղաքական նոր դաշտի ձևավորմա՛նը, թե՞ հավելյալ անգամ հաստատելու ենք ՌԴ նախկին վարչապետ Վիկտոր Չեռնոմիրդինի արդեն թևավոր դարձած խոսքերը. «Ցանկանում էինք ավելի լավ, ստացվեց ինչպես միշտ»։

Բացառում եմ 2013 թվականի իրավիճակը, երբ Հայաստանը մեկ գիշերում հրաժարվեց ԵՄ հետ ասոցացման գործընթացից ու գնաց ԵԱՏՄ։ Ֆոն դեր Լայենի հետ ասուլիսի ժամանակ հայտարարել է Փաշինյանը։

«Մյուս կողմից, մենք երբեք խնդիր չենք դրել, չունենք և չենք դնի Հայաստանի և Ռուսաստանի հարաբերությունների միջև ճգնաժամ ստեղծելու։ Մենք գործում ենք մեր երկրի շահերի շրջանակներում և, բնականաբար, մեր միջազգային ոչ մի գործընկերոջ շահերը չենք արհամարհում, բայց մյուս կողմից էլ որևէ այլ գործընկերոջ շահերը չենք կարող ավելի բարձր դասել, քան ՀՀ շահերը»,- նշել է նա։

Այս իշխանությունը շատ լավ գիտի, որ առանց ռեպրեսիաների իր դիրքերը չի կարող պահպանել. 

«Փաստ» օրաթերթը գրում է.

Պետական ինստիտուտները, մասնավորապես իրավապահ համակարգը իշխող ուժի անձնական գործիքի վերածելը ամենակարճ ճանապարհն է դեպի քաղաքական ինքնակործանում։ Այն գործընթացը, որը ներկայում իրականացվում է Գագիկ Ծառուկյանի դեմ՝ «գործեր կարելու», սեփականությունը զավթելու և քաղաքական ազդեցությունը չեզոքացնելու տեսքով, տիպիկ է այն վարչակարգերին, որոնք կորցրել են կառավարման ռացիոնալ ուղին և անցել են բռնաճնշումների ռելսերի։ Մեկ անձի հրամանով ամբողջ իրավապահ համակարգի մոբիլիզացումն ընդդեմ կոնկրետ գործչի, իրականում ոչ թե ուժի, այլ համակարգային վախի ու անելանելիության ցուցադրություն է։ Սակայն միջազգային փորձը հստակ հուշում է՝ իրավապահներին «դահիճի» դերում հանդես գալ ստիպող իշխանությունը հենց իր ձեռքով է սկսում իր իսկ կործանման հաշվարկը։

Նմանատիպ սցենարների պատմական օրինակները՝ Ֆիլիպինների Մարկոսի ռեժիմից մինչև Պերուի Ֆուխիմորիի կամ Ուկրաինայի Յանուկովիչի «ընտանիքի» իշխանավարումը, ապացուցում են մի պարզ իրողություն. դահիճները, որոնք այսօր կատարում են իշխանության «պատվերները» և «գործեր կարում» ընդդիմախոսների դեմ, երբեք հավատարիմ չեն մնում։ Այդ համակարգի գործիչները՝ քննիչները, դատախազները, դատավորները, չունեն սկզբունքներ, նրանք ծառայում են բացառապես ուժին։ Հենց իշխանությունը թուլանում է կամ քաղաքական կոնյունկտուրան փոխվում է, նույն այդ իրավապահներն առաջինն են դառնում նախկին «տերերի» դեմ ցուցմունք տվողները՝ սեփական կաշին փրկելու համար։ Գագիկ Ծառուկյանի նկատմամբ սանձազերծված այս արշավը ոչ միայն հարվածում է երկրի տնտեսական հեղինակությանն ու իրավական անվտանգությանը, այլև իշխանության համար ստեղծում է մի վտանգավոր բումերանգ։ Իրավապահ համակարգի անկախությունը ոչնչացնելով՝ իշխանությունը վերացնում է վաղվա օրվա իր սեփական անվտանգության միակ երաշխիքը։ Պատմությունը դաս չի տալիս նրանց, ովքեր կարծում են, թե օրենքը ոտնահարելով՝ հնարավոր է անվերջ պահպանել իշխանությունը, քանի որ վաղ թե ուշ այն նույն իրավական գործիքակազմը, որն օգտագործվում է Ծառուկյանի դեմ, հարվածելու է հենց հրահանգավորողներին, և այդ ժամանակ նրանց չեն օգնելու ո՛չ ինստիտուցիոնալ անհավատարմությունը և ո՛չ էլ այն նույն իրավապահները, որոնց այսօր սովորեցնում են կատարել ցանկացած անօրինական հրաման։

Մանրամասները՝ «Փաստ» օրաթերթի այսօրվա համարում