Category: Hayelia.am

«Հրապարակ» թերթը գրում է. «Օգոստոսի 19-ին Ճամբարակ-Վահան ճանապարհին զինվորներին վրաերթի ենթարկելու դեպքի առթիվ քննվող քրեական վարույթի շրջանակում տրանսպորտային միջոցի վարորդի նկատմամբ հարուցվել է հանրային քրեական հետապնդում:

Հիշեցնենք, որ վրաերթի հետեւանքով մահացել է զինծառայող Սուրեն Մամբրեի Վարդանյանը, իսկ մյուս 5 վիրավոր զինծառայողները տեղափոխվել են զինվորական հոսպիտալ, երկուսի վիճակը դեպքից հետո ծանր է գնահատվել, ունեն կոտրվածքներ։ Ավելի վաղ լրատվամիջոցները գրել էին, որ վեց զինվորներին, որպես պատիժ, հակագազ են հագցրել եւ ստիպել են վազել ճանապարհին, եւ հակագազերն են եղել պատճառը, որ չեն նկատել մոտեցող բեռնատարը: Վրաերթի դեպքի առթիվ նախաձեռնվել է քրեական վարույթ՝ Քրեական օրենսգրքի 342-րդ հոդվածի 1-ին եւ 4-րդ մասերով (Ճանապարհային երթեւեկության անվտանգության ապահովմանն ուղղված պահանջները կամ ճանապարհային երթեւեկության կամ տրանսպորտային միջոցների շահագործման անվտանգությունն ապահովող կանոնները խախտելը): Վարորդը ձերբակալվել է, նրան, ամենայն հավանականությամբ, կկալանավորեն: Գրվել է նաեւ, որ նա վարորդական վկայական չի ունեցել:

Մենք տեղեկացանք, որ վարորդը երեք անչափահաս երեխայի հայր է, նրա կինն այժմ հղի է սպասում են չորրորդ երեխայի լույս աշխարհ գալուն: Անհայր մնացած երեխաները, հավանաբար, քիչ էին մեր երկրում, եւս չորսն ավելացան նրանց: Պարզ է, որ աղմուկ հանած ողբերգական դեպքի մեղավորին խիստ պատիժ կտան երկար ժամանակով մեկուսացնելով հասարակությունից:

Առավել մանրամասն թերթի այսօրվա համարում

«Ժողովուրդ» օրաթերթը գրում է. «Իշխանական շրջանակներում կարծես թե որոշում կա «Ուժեղ Հայաստան» խմբակցության ամենաքաղաքականացված ու սուր պատգամավոր Էդգար Ղազարյանի շուրջ ստեղծված իրավիճակից։ Իշխանական որոշ շրջանակներ, «Ժողովուրդ» օրաթերթի տեղեկություններով, Ղազարյանի հարցը լուծված է համարում ոչ թե քաղաքական, այլ դատական ճանապարհով։

Բանն այն է, որ Էդգար Ղազարյանի նկատմամբ արդեն իսկ կայացվել է մեղադրական վերդիկտ։ Օգոստոսի 6-ին հրապարակված տեղեկությունների համաձայն՝ դատարանը Ղազարյանին մեղավոր է ճանաչել Սահմանադրական դատարանի դատավորների վերաբերյալ հրապարակումների գործով։ Սակայն այս փուլում խոսքը դեռ վերջնական դատավճռի մասին չէ․ դատարանը պետք է շարունակի դատական գործընթացը և որոշի պատժաչափը, իսկ կայացված վերդիկտը ենթակա է բողոքարկման։

Հենց այս հանգամանքն էլ քաղաքական շրջանակներում հարցեր է առաջացնում։ Եթե հետագայում կայացվի և օրինական ուժի մեջ մտնի այնպիսի դատական ակտ, որը հանգեցնի պատգամավորական մանդատի դադարեցման իրավական հիմքի առաջացմանը, ապա Ղազարյանը կարող է կանգնել խորհրդարանից հեռանալու փաստի առաջ։

Եվ այստեղ ուշագրավ է մեկ այլ հանգամանք։ Նոր ձևավորված խորհրդարանում Էդգար Ղազարյանը բավական ակտիվ է, կոշտ քննադատություններ է հնչեցնում իշխանության հասցեին և պարբերաբար հայտնվում է քաղաքական իշխանության համար ոչ այնքան հարմար իրավիճակների կենտրոնում։ Ուստի իշխանական շրջանակներում, ըստ մեր տեղեկությունների, նրա հետ կապված դատական գործընթացին հետևում են առանձնահատուկ ուշադրությամբ։

Սակայն այստեղ ամենակարևոր հարցը հենց սա է՝ արդյո՞ք գործ ունենք բացառապես իրավական գործընթացի հետ, թե՞ իշխանության համար անհարմար քաղաքական գործչի հարցը փորձում է լուծվել դատարանի միջոցով։

Այս հարցի պատասխանն առավել կարևոր է դառնում այն ֆոնին, որ Ղազարյանն ինքը, ըստ հրապարակային հայտարարությունների, չի պատրաստվում հրաժարվել մանդատից։ Օգոստոսի 14-ին լրագրողների հետ զրույցում նա հայտարարել էր, որ մանդատը վայր դնելու հարց խմբակցությունում չի քննարկվել, և ինքը շարունակելու է իր գործունեությունը։

Այսինքն՝ պատգամավորի հեռացման քաղաքական ճանապարհ այս պահին չի ուրվագծվում։ Փոխարենը նրա ճակատագիրը կարող է կախված լինել դատական գործընթացի վերջնական արդյունքից։

Հատկանշական է նաև, որ Ղազարյանի նկատմամբ հարուցված գործը վերաբերում է Սահմանադրական դատարանի դատավորների վերաբերյալ նրա հրապարակումներին։ Հրապարակված տվյալներով՝ մեղադրանքը վերաբերում է Քրեական օրենսգրքի 490-րդ հոդվածի 2-րդ մասին»։

Առավել մանրամասն թերթի այսօրվա համարում

«Հրապարակ» թերթը գրում է. «Իշխող թիմում միանշանակ չեն ընդունել «Ուժեղ Հայաստան»-ի թեկնածուներին մերժելու որոշումը: ՔՊ-ն, հիշեցնենք, նախօրեին չընտրեց ԱԺ ֆինանսավարկային եւ բյուջետային, տարածքային կառավարման եւ շրջակա միջավայրի, եվրոպական ինտեգրման հանձնաժողովների նախագահներին:

Առաջադրվել էին «Ուժեղ Հայաստանից» համապատասխանաբար Հայկ Ֆարմանյանը, Դավիթ Ղազինյանը եւ Արեգա Հովսեփյանը: Մի քանի օրվա քննարկումներից հետո իշխանականները չընտրեցին ընդդիմադիր թեկնածուներին՝ պատճառաբանելով, թե անձերն են խնդիրը թեկնածուներին չեն հավանել: Մինչդեռ ՔՊ-ում մի ստվար հատված կողմ չէ այդ մոտեցմանը:

Մեզ ասացին, որ, անկախ թեկնածուների ով լինելուց, իրենք պետք է հարգեին սահմանադրության նորմը: Ավելին մեր աղբյուրների փոխանցմամբ, խնդիրը ոչ թե ընդդիմադիր թեկնածուներն են եղել, այլ իշխանական նախագահացուները, որոնք պետք է հիշյալ հանձնաժողովների նախագահ դառնային: Նրանցից մեկը, օրինակ, Փաշինյանի քավորի եղբայր Վահե Ղալումյանն է, որը, ասում են, ծանր է տարել, որ զրկվել է տարածքայինի նախագահի պաշտոնից եւ իր մտերիմների հետ լոբբինգ է արել ընդդիմադիրների դեմ, որ չքվեարկեն հօգուտ նրանց, եւ հանձնաժողովի նախագահի պաշտոնն անցնի ՔՊ-ին, այսինքն իրեն: Մյուսն էլ սորոսականների կարկառուն ներկայացուցիչ Սոնա Ղազարյանն է, որը պետք է դառնար եվրաինտեգրման հանձնաժողովի նախագահ: Սորոսական թեւը ոչ մի կերպ չի ուզում այս հանձնաժողովը զիջել ռուսամետներին: Նրանք էլ հույս ունեին, որ կտապալեն նախագահի ընտրությունը, «ուժեղներն» այլեւս թեկնածու չեն առաջադրի, եւ իշխանական փոխնախագահները դե ֆակտո կնախագահեն:

Առավել մանրամասն թերթի այսօրվա համարում

Շիրակի մարզի Արթիկ համայնքի ղեկավար Անանիկ Ոսկանյանը, որը Մանվել Գրիգորյանի սանիկն է, եւ որին 50 տարով արգելել են մուտք գործել Ռուսաստան, որովհետեւ փորձել է Հայրենական մեծ պատերազմի զոհերին նվիրված հուշարձանը հանել քաղաքից, պարզվում է՝ մեդալներ եւ պարգեւներ ստանալու հանդեպ մեծ սեր ունի եւ այս առումով՝ հարուստ կենսագրություն։ Ավելի «մեծ պատմություն», քան իր աշխատանքային գործունեությունն է: Իհարկե, քավորի՝ Մանվել Գրիգորյանի անունն արդեն հուշում է, թե ում շնորհիվ է նա հասել այդ «փառքին»:

Ըստ պաշտոնական կենսագրության՝ Անանիկ Ոսկանյանը 1989 թվականին դպրոցն ավարտելուց հետո անմիջապես մասնակցել է Հայաստանի Հանրապետության եւ Լեռնային Ղարաբաղի Հանրապետության ինքնապաշտպանական մարտերին (1989-1994թթ․): 1994-1997թվականներին աշխատել է Պեմզաշենի շինիրերի կոմբինատում` որպես վարպետ, եւ 28.05.1997 թվականին պարգեւատրվել է Մարտական գործողությունների մասնակցի կրծքանշանով:
31 տարեկան հասակում (2003-2007թթ.) նա սովորել եւ ավարտել է Էջմիածնի «Գրիգոր Լուսավորիչ» համալսարանի ֆինանսատնտեսական ֆակուլտետը, միաժամանակ աշխատել է որպես «Արթուր-91» ՍՊԸ-ի քարարդյունաբերական հիմնարկի տնօրեն եւ զբաղեցրել ԵԿՄ Արթիկի բաժանմունքի նախագահի պաշտոնը: 2005թ․ պարգեւատրվել է ԼՂՀ նախագահի «Մարտական ծառայություն» եւ ԼՂՀ «Մայրական երախտագիտություն» մեդալներով, 2006 թվականին՝ «Վազգեն Սարգսյան» մեդալով, 2007 թ․՝ ՀՀ Երկրապահ կամավորական միության նախագահի «Սպարապետ Վազգեն Սարգսյան» շքանշանով եւ «Հայաստանի Երկրապահ» հուշամեդալով: 2010 թվականին ՀՀ նախագահի կողմից «Մարտական ծառայություն» մեդալ է ստացել, իսկ 2012 թվականին՝ «ՀՀ զինված ուժեր 20 տարի» հոբելյանական մեդալ, «5-րդ բրիգադի ազատամարտիկների խորհուրդ» հուշամեդալ եւ «ԵԿՄ 20 տարի» հոբելյանական մեդալ:
2014 թվականին ՀՀ վարչապետի կողմից «ՀՀ վարչապետի անվանական զենք» է նվեր ստացել, 2015թ․՝ «ԵԿՄ 25 տարի» հոբելյանական մեդալ, 2017թ․՝ ՀՀ Ազգային ժողովի նախագահի «ՀՀ Ազգային ժողով» հուշամեդալ, 28.11.2017 թ․ ՀՀ վարչապետի հուշամեդալ։ Սակայն այսքանով ցանկը չի ավարտվում: Մեր աչքից չվրիպեց, որ 2014 թվականին Անանիկ Ոսկանյանը պարգեւատրվել է նաեւ ՀՀ արտակարգ իրավիճակների նախարարության «Անվեհեր փրկարար» մեդալով: «Անվեհեր փրկարար» մեդալը Հայաստանի Հանրապետության փրկարարներին տրվող գերատեսչական պարգեւ է, շնորհվում է ծառայողական պարտականությունները եւ հատուկ առաջադրանքները բարեխղճորեն ու բարձր պատասխանատվությամբ կատարելու համար։ Մեդալով պարգեւատրվում են բացառապես փրկարար ծառայության աշխատակիցները։ Պարգեւը շնորհելու իրավասություն ունի համապատասխան պաշտոնում նշանակելու իրավասություն ունեցող պաշտոնատար անձը:

Մի խոսքով, Արթիկի համայնքապետը ե՛ւ մեր երկրի լավագույն երկրապահներից է, ե՛ւ լավագույն մարտիկներից ու ծառայողներից, ե՛ւ լավագույն փրկարարը։

«Հրապարակ օրաթերթ»

Երեկվանից հանրությունը ցնցվել է Ճամբարակի զինվորների հետ տեղի ունեցած դաժան դեպքից: Հիշեցնենք, որ, ըստ որոշ հրապարակումների, զինվորներին, որպես պատիժ, հակագազ են հագցրել եւ ստիպել են վազել Ճամբարակ-Վահան ավտոճանապարհին` ժամը 22-ին, սակայն բանակում ժամը 21:00-ից հետո արգելված է զինվորի՝ զորամասի տարածքից դուրս գտնվելը: Արդյունքում` վրաերթ, 6 զինծառայող է տուժել, մեկը մահացել է, երկուսի վիճակը ծանր է, մյուսները բժշկական հաստատությունում են գտնվում:

Չնայած պաշտպանության նախարարությունից եւ Քննչական կոմիտեից զինվորներին հակագազով վազեցնելու մասին լուրերը հերքեցին, սակայն ՊՆ-ի մեր աղբյուրն ասում է, որ բանակում հակագազ հագցնելով զինվորներին վազեցնելը բավականին հին եւ ընդունված պատժամիջոց է, որը կիրառվել է դեռ նախկին իշխանությունների ժամանակներից: Բանակում զինծառայող ունեցած ընտանիքներում դա շատ լավ գիտեն:

Մեր աղբյուրն ասում է, որ նախօրեի դժբախտ դեպքից հետո հրամանատարական կազմին խիստ զգուշացվել է, որ այսուհետ որեւէ զինվորի հակագազով չպատժեն, հակառակ պարագայում հետեւանքներն իրենց համար կարող են անկանխատեսելի լինել:

«Հրապարակ օրաթերթ»

Օգոստոսի 21-ին եւ 22-ին տեղի է ունենալու «Վարչաֆեստ»-ը` վարչապետի փառատոնը, որի այցելուներին արգելված է միջոցառման տարածք դրսից սնունդ եւ ըմպելիքներ բերել։ Ավելին՝ խստիվ արգելվում է անգամ դրսից ջուր բերելը։

Միջոցառման օրակարգը բավական հագեցած է․ օգոստոսի 21-ին միջոցառումները մեկնարկում են ժամը 12։00-ին, օգոստոսի 22-ին՝ 09։00-ին եւ շարունակվում մինչեւ կեսգիշեր։ Նման երկարատեւ միջոցառման ընթացքում, բնականաբար, առանց սնվելու եւ հեղուկներ օգտագործելու հնարավոր չէ։ Պարզելու համար, թե ինչով է պայմանավորված սնունդն ու ըմպելիքները փառատոնի տարածք ներս բերելու արգելքը, ինչպես նաեւ այն, թե արդյո՞ք տեղում այցելուներին սնունդ եւ ըմպելիքներ տրամադրվելու են, զանգահարեցինք «Վարչաֆեստ»-ի պաշտոնական հեռախոսահամարով։

Մեր հարցին, թե ինչու է սնունդ ներս տանելն արգելված, եւ արդյո՞ք այն հնարավոր է ձեռք բերել միջոցառման տարածքում, պատասխանեցին․ «Տարածքում կան սննդի կետեր, որտեղից կարող եք սնունդ գնել»։ Հետաքրքրվեցինք նաեւ, թե արդյոք նախատեսվա՞ծ է գիշերակացի հնարավորություն։ Մեզ տեղեկացրին․ «Վրաններ ենք տրամադրում՝ մեկ հոգանոց եւ երկու հոգանոց, որոնց արժեքները համապատասխանաբար 8 հազար եւ 12 հազար դրամ են։ Այս արժեքն իր մեջ ներառում է միայն վրանում գիշերակացը»։

Ստացվում է, որ մարդկանց հրավիրում են երկօրյա միջոցառման, որի առաջին օրը 12 ժամ է տեւելու, երկրորդ օրը՝ 15 ժամ, միեւնույն ժամանակ արգելում են սնունդ եւ նույնիսկ ջուր ներս բերել: Եվ պարզվում է` «Վարչաֆեստի» անվան տակ ոմանք մեծ փողեր են աշխատելու` գիշերելու համար նախատեսված վրաններից օգտվելու, սնվելու եւ անգամ ծարավ լինելու դեպքում: Իսկ այս «Վարչաֆեստ»-ը նախապես ներկայացնում էին որպես անվճար միջոցառում՝ ազատ մուտքով։

 «Հրապարակ օրաթերթ»

Հուլիսի 15-ին Գեղարքունիքի մարզպետ Կարեն Սարգսյանին տեղեկատվական հարցում եմ արել՝ մարզպետի աշխատակազմի ստացած պարգեւավճարների եւ մարզի սոցիալապես անապահովներին 2025 եւ 2026 թվականների նշված ժամանակահատվածում ցուցաբերված դրամական աջակցության չափերի մասին։ Մարզպետի աշխատակազմի պատասխանը տեղադրում եմ առանց խմբագրման․ «2026թ․ ընթացքում՝ հուլիսի 15-ի դրությամբ, ՀՀ Գեղարքունիքի մարզպետի աշխատակազմի աշխատակիցները ստացել են 22 մլն 348 հազար 400 ՀՀ դրամ՝ պարգեւատրումներ, դրամական խրախուսումներ եւ հատուկ վճարներ տնտեսագիտական դասակարգման 4112 հոդվածով եւ 31 մլն 100 հազար 918 ՀՀ դրամ պարգեւավճար՝ քաղաքացիական, դատական եւ պետական ծառայողների պարգեւատրում տնտեսագիտական դասակարգման 4113 հոդվածով։ 2026թ․ ընթացքում՝ հուլիսի 15-ի դրությամբ, սոցիալական աջակցություն ստանալու նպատակով Գեղարքունիքի մարզպետի աշխատակազմ դիմում է ներկայացրել 548 քաղաքացի, որից 267 սոցիալապես անապահով կարիքավոր ընտանիքների մարզպետի աշխատակազմի «Այլ նպաստներ բյուջեից» տրամադրվել է 7 մլն 640 հազար ՀՀ դրամ։ 2025 թվականի նույն ժամանակահատվածում սոցիալական աջակցություն ստանալու նպատակով Գեղարքունիքի մարզպետի աշխատակազմ դիմում ներկայացրած 645 քաղաքացիներից 573 սոցիալապես անապահով կարիքավոր ընտանիքների տրամադրվել է 15 մլն 355 հազար ՀՀ դրամ»։

Համեմատաբար բարձր աշխատավարձ ստացող Գեղարքունիքի մարզպետի աշխատակազմը կես տարում ընդհանուր ավելի քան 53 միլիոն դրամ պարգեւավճարներ, դրամական խրախուսումներ եւ հատուկ վճարներ է ստացել, իսկ մարզի սոցիալապես անապահով 267 քաղաքացի ստացել է դրանից մոտ 7,5 անգամ պակաս՝ 7 միլիոն 640 հազար դրամ աջակցություն: Ուշագրավ է, որ անցած մեկ տարում, նույն ժամանակահատվածում, մարզի կարիքավորներին տրված դրամական աջակցության գումարը կրկնակի նվազել է՝ 15 միլիոն 355 հազար դրամից հասնելով 7 միլիոն 640 հազար դրամի։

«Հրապարակ օրաթերթ»

«Քանզի այդպիսիներինն է Աստծու արքայությունը» (Մարկոս Ժ 14)։
Ոսկետափի Սուրբ Սահակ-Մեսրոպ եկեղեցու հոգևոր-բակային ճամբարի 4-րդ օրը նշանակալի էր երեխաների համար։ Եկեղեցու հոգևոր հովվի հրավերով մանուկներին ու պատանիներին այցելեց Մասյացոտնի թեմի առաջնորդ Գերաշնորհ Տեր Ռուբեն եպիսկոպոս Զարգարյանը։

Սրբազան Հայրը, ջերմորեն ողջունելով մասնակիցներին, անցկացրեց օրվա հոգևոր զրույցը։ Նա անդրադարձավ միասնության, համերաշխության և ընկերասիրության, ինչպես նաև Հայրենիքի, Եկեղեցու ու ընտանիքի հանդեպ սիրո կարևորությանը՝ առանձնակի ընդգծելով մայրենի լեզվին լավ տիրապետելու անհրաժեշտությունը։

Այնուհետև Սրբազան Հայրը հետևեց առաջին բուժօգնության գործնական դասընթացին, իսկ օրվա ավարտին ունկնդրեց երեխաների կողմից ճամբարի ընթացքում սովորած աղոթքներն ու հոգևոր երգերը։

Սրբազան հայրն իր գնահատանքի խոսքը հղեց եկեղեցու հոգևոր հովիվ Արժանապատիվ Տեր Արտաշես քահանա Հակոբյանին և օրհնեց բոլոր ջոկատավարներին ու ճամբարականներին։
Մասյացոտնի թեմ

2026 թվականի սեպտեմբերի 27-ին Արմավիրի մարզի Ֆերիկ, Լոռու մարզի Թումանյան և Լերմոնտովո, ինչպես նաև Կոտայքի մարզի Արզնի համայնքներում կայանալիք տեղական ինքնակառավարման մարմինների ընտրությունների ընթացքում թեկնածուներին անհրաժեշտ տեղեկանքների տրամադրումն ապահովելու նպատակով՝ օգոստոսի 22-ին և 23-ին, ժամը 09։00-ից մինչև 17։00-ն, կաշխատեն ՀՀ ՆԳՆ Միգրացիայի և քաղաքացիության ծառայության հետևյալ բաժինները՝
Վաղարշապատի բաժին
Թումանյանի բաժին
Վանաձոր 3 բաժին
Եղվարդի բաժին
ՆԳՆ-ից հայտնում են՝ նշված բաժիններում քաղաքացիների սպասարկումը կիրականացվի սահմանված աշխատանքային ժամերին։
«Առաջիկայում կայանալիք ընտրությունների վերաբերյալ անհրաժեշտ տեղեկատվություն ստանալու համար գործում է նաև Զանգերի սպասարկման կենտրոնը՝ 84-22 հեռախոսահամարով։
Միաժամանակ տեղեկացնում ենք, որ Ներքին գործերի նախարարության elections.mia.gov.am հարթակում, ՀՀ ընտրական օրենսգրքով սահմանված կարգի համաձայն, հրապարակվել են համապատասխան համայնքներում հաշվառում ունեցող ընտրողների ցուցակները՝ ներբեռնման հնարավորությամբ։
Ընտրելու իրավունք ունեցող քաղաքացիներին հորդորում ենք նախապես ստուգել իրենց տվյալները և ճշտել իրենց ընտրատեղամասը։
Մուտք գործե՛ք elections.mia.gov.am կայք և ընտրե՛ք «ՏԻՄ ընտրություններ 2026» բաժինը։
Ձեր ընտրատեղամասը նախապես ճշտելը կօգնի ընտրության օրը գործընթացը կազմակերպել առավել արագ, սահուն և հարմարավետ»,-հայտնում են նախարարությունից։