Category: Hayelia.am

ՀՀ նախագահ Վահագն Խաչատուրյանի օգոստոսի 14-ի կարգադրությամբ Արմեն Մարկոսյանը նշանակվել է Հանրապետության նախագահի աշխատակազմի ղեկավարի տեղակալ։

Նախագահի մեկ այլ կարգադրությամբ Մարկոսյանը 2026 թվականի օգոստոսի 14-ից ազատվել է Հանրապետության նախագահի օգնականի պաշտոնից։

«Ժողովուրդ» օրաթերթը գրում է. «Ազգային ժողովի «Ուժեղ Հայաստան» խմբակցությունում վերջին միջադեպից հետո լուրջ քննարկում է տեղի ունեցել խմբակցության անդամների և պատգամավոր Էդգար Ղազարյանի միջև։

«Ժողովուրդ» օրաթերթի տեղեկություններով՝ քննարկման առանցքում եղել է նախօրեին խորհրդարանում տեղի ունեցած միջադեպը, որը վերջին օրերին դարձել է իշխանության քաղաքական օրակարգի հիմնական թեմաներից մեկը։

Խմբակցության ներսում Ղազարյանին հիշեցրել են, որ խորհրդարանի աշխատանքի մեկնարկից առաջ պայմանավորվածություն է եղել պահպանել խորհրդարանական էթիկայի և վարքագծի կանոնները, ուստի անհրաժեշտ է առավել զգուշավոր լինել և չխախտել այդ պայմանավորվածությունները։

Միաժամանակ, քննարկումներից հետո խմբակցությունը որոշել է ներողություն չհնչեցնել, քանի որ դրան կտրականապես դեմ է եղել հենց Էդգար Ղազարյանը՝ հայտարարելով, որ չի պատրաստվում նման քայլի գնալ, քանի դեռ իշխանության ներկայացուցիչներն էլ իր հասցեին վիրավորական և կոշտ արտահայտություններ են հնչեցնում։

Այդուհանդերձ, «Ժողովուրդ»-ի տեղեկություններով՝ խմբակցության ներսում Ղազարյանի պահվածքը միանշանակ չի ընդունվել։

Պայմանավորվածություն է ձեռք բերվել նաև, որ առաջիկա մի քանի օրերին Էդգար Ղազարյանը Ազգային ժողովի ամբիոնից հարցերով կամ ելույթներով հանդես չի գա։ Այս մոտեցումը կիրառվում է երեկվանից և, ըստ մեր տեղեկությունների, կպահպանվի նաև երկուշաբթի՝ մինչև խորհրդարանում ստեղծված լարվածությունը որոշ չափով հանդարտվի։

Հիշեցնենք՝ նախօրեին իշխանության ներկայացուցիչները տարբեր ձևաչափերով կոշտ արձագանքել էին Ղազարյանի օգտագործած արտահայտությանը՝ նրան անգամ «սրիկա» անվանելով։

Ավելին՝ «Ժողովուրդ» օրաթերթի տեղեկություններով՝ իշխանական շրջանակներում տրամադրված են Էդգար Ղազարյանի հարցում գործել առավել կոշտ և անզիջում»։

Առավել մանրամասն թերթի այսօրվա համարում

Օգոստոսի 13-ին խուլիգանության դեպք է տեղի ունեցել Երևանում։ Ժամը 09։15-ի սահմաններում ՀՀ ներքին գործերի նախարարության ոստիկանության համայնքային ոստիկանության գլխավոր վարչության «Զվարթնոց» օդանավակայանի գծային բաժնում տեղեկություն է ստացվել, որ «Visa Concord» ավիաընկերության գրասենյակի մոտ մի խումբ քաղաքացիների միջև վիճաբանություն է տեղի ունենում։

Ինչպես հայտնում է ֆոտոլրագրող Գագիկ Շամշյանը, դեպքի վայր է մեկնել ՀՀ ՆԳՆ ոստիկանության համայնքային ոստիկանության գլխավոր վարչության «Զվարթնոց» օդանավակայանի գծային բաժնի օպերատիվ խումբը, որտեղ պարզել են, որ մի խումբ քաղաքացիներ, կոպտորեն խախտելով հասարակական կարգը, միմյանց հասցեին հնչեցրել են սեռական բնույթի հայհոյանքներ և փոխադարձ հարվածներ են հասցրել՝ խաթարելով ավիաընկերությունների գրասենյակների բնականոն աշխատանքը։

Գ․ Շամշյանի տեղեկություններով՝ ոստիկանները նրանց խուլիգանություն և ֆիզիկական ներգործություն կատարելու անմիջականորեն ծագած հիմնավոր կասկածանքով ձերբակալել և տեղափոխել են «Զվարթնոց» օդանավակայանի ոստիկանության գծային բաժին, որտեղ պարզվել է, որ վերջիններս են Երևանի բնակիչներ են՝ 41-ամյա Լիլիթ Մ․-ն, 19-ամյա Իլեն Հ․-ն, 39-ամյա Նելլի Մ․-ն և 25-ամյա Դիանա Հ․-ն։Դեպքի փաստով ոստիկանության «Զվարթնոց» օդանավակայանի գծային բաժնում փաստաթղթեր են կազմվել, որոնք նշված անձանց հետ ներկայացվել են ՀՀ քննչական կոմիտեի Երևան քաղաքի քննչական վարչության «Զվարթնոց» օդանավակայանի քննչական բաժին։

Գ․ Շամշյանի տեղեկություններով՝ Դիանա Հ․-ն աշխատում է «Վիզա Կոնկորդ Չարթերզ» ՍՊԸ-ում՝ որպես ավիաընկերությունների ներկայացուցիչ։

Երեկ՝ օգոստոսի 15-ին, ավտովթար է տեղի ունեցել Կոտայքի մարզում։ Ժամը 19։45-ի սահմաններում Աբովյան քաղաքում, ժողովրդին հայտնի «Բենզինների խաչմերուկում» բախվել են 40-ամյա Միհրան Մ․-ի վարած «Opel Astra» մակնիշի և Տիգրան Մ․-ի վարած «Chevrolet» մակնիշի ավտոմեքենաները։

Ինչպես հայտնում է ֆոտոլրագրող Գագիկ Շամշյանը, վթարի հետևանքով Միհրան Մ․-ի ուղևոր, Կոտայքի մարզի բնակիչ 39-ամյա Գոհար Մ․-ն մարմնական վնասվածքներով տեղափոխվել է «Սուրբ Գրիգոր Լուսավորիչ» բժշկական կենտրոն։Դեպքի վայր են ժամանել ՀՀ Ներքին գործերի նախարարության ոստիկանության Պարեկային ծառայության Կոտայքի մարզի գումարտակի 2-րդ վաշտի 1-ին դասակի պարեկները՝ գումարտակի հրամանատար Ալբերտ Մարտիրոսյանի, գումարտակի հրամանատարի տեղակալ Վահագն Կարապետյանի, գումարտակի ծառայության ավագ տեսուչ, օրվա պատասխանատու Արտակ Ասատրյանի, գումարտակի ծառայության տեսուչ Կառլեն Բաղյանի գլխավորությամբ։Տարածքը սահմանազատել են նույն վաշտի պարեկներ Վարշամ Հովհաննիսյանը և Պատվական Թովմասյանը։

Վթարի մասին ՊԾ Կոտայքի մարզի գումարտակից տեղեկությունը փոխանցել են ՀՀ Քննչական կոմիտեի Կոտայքի մարզային քննչական վարչության Աբովյանի քննչական բաժին, որտեղից ժամանել է քննչական խումբը՝ Աբովյանի քննչական բաժնի պետ Գոռ Դավթյանի և օրվա հերթապահ քննիչի գլխավորությամբ։Վթարի փաստով Աբովյանի քննչական բաժնում նախաձեռնվել է քրեական վարույթ։

Գ․ Շամշյանի տեղեկություններով՝ վարորդները տեղում ենթարկվել են սթափության փորձաքննության, «Chevrolet»-ի վարորդ Տիգրան Մ․-ն եղել է ոչ սթափ և պարեկների կողմից տեղափոխվել է ՀՀ ՆԳՆ ոստիկանության համայնքային ոստիկանության գլխավոր վարչության Կոտայքի բաժին։

Թուրքիայի նախագահ Ռեջեփ Թայիփ Էրդողանը հայտարարել է, որ Թուրքիան մենակ չի թողնի իր հարևան երկրներին տարածաշրջանային ցնցումներին դիմակայելու հարցում՝ առանձնացնելով Սիրիան, Գազան և Լիբանանը։«Արմենպրես»-ի փոխանցմամբ՝ Թուրքիայի նախագահն այդ մասին խոսել է «Ալ Ջազիրա» հեռուստաընկերությանը տված հարցազրույցում։ Նա նշել է, որ Անկարան իր հնարավորությունների սահմաններում ամեն ինչ կանի Սիրիայում կայունությանը աջակցելու համար՝ հավելելով, որ ծրագրում է այցելել այդ երկիր։

Էրդողանի խոսքով՝ Սիրիայի քրդերը «խաղաղության և կայունության իրենց բաժինը կունենան»։ Նա նաև ընդգծել է, որ Թուրքիան շարունակելու է ամրապնդել կապերը տարածաշրջանի քրդական համայնքների հետ և պաշտպանել նրանց իրավունքները։Գազայի վերաբերյալ Էրդողանը հայտարարել է, որ Թուրքիան «չի կարող Գազային միայնակ թողնել» և անելու է անհրաժեշտ ամեն ինչ՝ նրան աջակցելու համար։ Նրա խոսքով՝ ՀԱՄԱՍ-ը բարեխղճորեն կատարում է իր ստանձնած պարտավորությունները, մինչդեռ Իսրայելը շարունակում է պատերազմը։

Անդրադառնալով Լիբանանին՝ Թուրքիայի նախագահը նշել է, որ Իսրայելի շարունակվող հարձակումները լուրջ մտահոգության աղբյուր են Անկարայի համար։ Նա ասել է, որ ԱՄՆ նախագահ Դոնալդ Թրամփի՝ Թուրքիա վերջին այցի ընթացքում վերջինիս հետ քննարկել է Լիբանանում պատերազմը դադարեցնելու անհրաժեշտությունը՝ ընդգծելով, որ Վաշինգտոնը կարևոր դեր ունի ռազմական գործողությունների ավարտին հասցնելու հարցում։

Ամենայն հայոց կաթողիկոս Գարեգին Բ-ն կոչ է արել Հայաստանում և Սփյուռքում ապրող հայերին հավատով ու հույսով շարունակել կերտել և ամրապնդել հայրենիքը։ Այս մասին նա հայտարարել է օգոստոսի 16-ին Մայր Աթոռ Սուրբ Էջմիածնում՝ Խաղողօրհնեքի արարողությունից հետո, որը կատարվել է Սուրբ Աստվածածնի Վերափոխման տոնի առթիվ։

Դիմելով հավատացյալներին՝ Կաթողիկոսը ավանդական եկեղեցական արարողությունը կապել է ժողովրդի, Հայաստանի և նրա ապագայի բարօրության համար աղոթքի հետ։

«Սիրելի բարեպաշտ հավատացյալներ, մեր Սուրբ Եկեղեցու սիրելի զավակներ, մենք կատարեցինք Խաղողօրհնեքի արարողությունը, օրհնեցինք խաղողի ողկույզները, ինչպես նաև Հայաստանի այն այգիներն ու խաղողի այգիները, որտեղից պտուղները բերվում են մեր ժողովրդի համար։

Միաժամանակ մենք առ Աստված բարձրացրինք խնդրանք և աղոթք, որպեսզի Սուրբ Աստվածածնի բարեխոսությամբ առատորեն հեղվեն շնորհն ու օրհնությունը մեր կյանքի վրա։ Թող մեր կյանքը պտղաբեր լինի բարությամբ և բարի գործերով, և մենք՝ մեր ժողովրդի զավակներս Հայաստանում և Սփյուռքում, լավատեսությամբ, հույսով և հավատով շարունակենք կերտել ու ամրապնդել մեր հայրենիքը և մեր ժողովրդի կյանքն առավել բարեկեցիկ դարձնել։

Թող մեզ միշտ տրվի հնարավորություն մեզնից հեռու պահելու ժամանակի բերած բոլոր փորձությունները և միասին կերտելու մեր ժողովրդի լուսավոր, բարեկեցիկ և երջանիկ ապագան։

Թող Տիրոջ սերը, շնորհն ու օրհնությունը միշտ լինեն մեր ժողովրդի զավակների հետ՝ այժմ և հավիտյանս հավիտենից։ Ամեն», – նշել է հայոց հայրապետը։

ԱԺ նախկին պատգամավոր Արման Աբովյանը տեսանյութ է հրապարակել, որտեղ Հայաստանում Իրանի դեսպանը ժենգյալով հաց է ուտում և արտաբերում Արցախ անունը։

«Այն դեպքն է, երբ Իրանի դեսպանը առանց կաշկանդվելու, առանց բարդույթների փորձում է արցախյան «ժենգյալով հացը» և համտեսի ընթացքում կրկնում «Արցախ» բառը, մինչդեռ սրանք “тупо” խուսափում են նույնիսկ շշուկով արտասանել մեր Հայրենիքի օկուպացված տարածքի ճիշտ անվանումը։

Շնորհակալություն հարգարժան դեսպանին և հավերժական ամոթ նրանց, ովքեր վախենում են անգամ արտասանել մեր Հայրենիքի մասերի հայկական անվանումները»,-գրել է Աբովյանը։

Բարձրագույն դատական խորհրդի՝ օգոստոսի 14-ի որոշմամբ դադարեցվել են Երևան քաղաքի առաջին ատյանի ընդհանուր իրավասության քրեական դատարանի դատավոր Արուսյակ Հարությունի Ալեքսանյանի լիազորությունները: Լիազորությունները դադարեցնելու հիմք է հանդիսացել Արուսյակ Ալեքսանյանի հրաժարականի դիմումը:

Նրա լիազորությունները կասեցված էին:

Ինդոնեզիայում տեղի ունեցած երկրաշարժի հետևանքով զոհերի թիվը գերազանցել է 50-ը, շուրջ 5 հազար մարդ էվակուացվել է։

«Արմենպրես»-ի փոխանցմամբ՝ այդ մասին հայտնում է Reuters գործակալությունը՝ հղում անելով տեղի իշխանություններին։Նշվում է, որ ավելի վաղ Straits Times թերթը հայտնել էր, որ երկրաշարժի զոհերի թիվը հասել է 47-ի, շուրջ 2000 մարդ էլ տարհանվել է Ինդոնեզիայի Արևելյան Նուսա-Թենգարա նահանգի Նագակեո շրջանից․ որը գտնվում է երկրաշարժի էպիկենտրոնից ոչ հեռու։

«Շուրջ 5 հազար մարդ է տարհանվել այն բանից հետո, երբ 7․7 մագնիտուդ հզորությամբ երկրաշարժ է տեղի ունեցել Ինդոնեզիայի արևելքում, որի հետևանքով մահացել էնվազագույնը 51 մարդ»,- ասված է երկարաշարժի վերաբերյալ թարմացված հաղորդագրության մեջ։

Եվրամիության անդամ պետություն դառնալն այլևս Թուրքիայի առաջնահերթություններից չէ։«Արմենպրես»-ի փոխանցմամբ՝ «Ալ Ջազիրա» հեռուստաալիքին տված հարցազրույցում այդ մասին ասել է Թուրքիայի նախագահ Ռեջեփ Թայիփ Էրդողանը։ Նա հայտարարել , որ Եվրոպական միությունը, ըստ երևույթին, պատրաստ չէ ընդունել Թուրքիային, և հավելել, որ ԵՄ-ին անդամակցությունն այլևս Անկարայի առաջնահերթություններից չէ։ Էրդողանի խոսքով՝ դրանից ի վերջո կտուժի հենց Եվրոպան։

Թուրքիան 1995 թվականից Եվրամիության անդամության թեկնածուի կարգավիճակ ունի։ Դրանից հետո 2005 թվականին մեկնարկել են ԵՄ-ին Թուրքիայի անդամակցության շուրջ բանակցությունները, որոնք, սակայն, կանգ են առել ու հայտնվել փակուղում։ ԵՄ-ն տարիներ շարունակ քննադատել է Թուրքիայում ժողովրդավարական ինստիտուտների, հիմնարար իրավունքների, դատական համակարգի անկախության և իրավունքի գերակայության հետ կապված խնդիրները։ Եվրոպական հանձնաժողովի գնահատմամբ՝ այս ոլորտներում հետընթացը դարձել է անդամակցության գործընթացի կանգի հիմնական պատճառներից մեկը։ 2016 թվականի հեղաշրջման փորձից հետո Թուրքիայում տեղի ունեցած քաղաքական զարգացումները, լայնածավալ ձերբակալությունները և իշխանության կենտրոնացումը ավելի են խորացրել Բրյուսելի և Անկարայի տարաձայնությունները։ ԵՄ խորհուրդը 2018 թվականին արձանագրեց, որ Թուրքիայում ժողովրդավարության, հիմնարար իրավունքների և դատական անկախության ոլորտներում շարունակվող հետընթացի պատճառով անդամակցության բանակցությունները փաստացի հայտնվել են փակուղում։