Category: FreeNews

«Մենք էլ ենք ուզում, որ Հայաստանը լինի ուժեղ պետություն, բայց մենք Հայաստանը չենք պատկերացնում որպես ուժեղ կծիկ պետություն, այլ որպես ուժեղ ցանց, որը հազարավոր թելեր ունի կապված, և եթե այդ թելերից 1-ը, 2-ը, 3-ը կտրես, այդ ցանցը մի քիչ կարող է թուլանալ, բայց չի պատռվի, իր կենսականությունը չի կորցնի»:

Այս մասին ԱԺ-ի օգոստոսի 7-ի նիստին ասել է «Քաղաքացիական պայմանագիր» խմբակցության պատգամավոր Արման Եղոյանը՝ անդրադառնալով իշխանության և ընդդիմության տարբերություններին:

«Մենք չենք ասում՝ ա՛ռ քեզ կոմբայն, տո՛ւր մեզ իշխանություն: Մենք այդպես չենք ասում: Մենք ասում ենք՝ ժողովո՛ւրդ ջան, կոմբա՞յն է պետք, ուրեմն պետք է աշխատենք բոլորով, ստեղծենք արժեք, ձեր գեներացրած հարկերով գնանք և գնենք կոմբայն, տանք ձեզ, մյուս տարի ավելի արդյունավետ աշխատեք, նոր հողեր մշակեք, նոր հողերով նոր արժեք և այդպես շարունակ:

Մեր և ձեր տարբերությունը ո՞րն է՝ դուք ուզում եք ժողովրդին գործի ընդունել ձեզ մոտ, մենք ուզում ենք գործի ընդունվել ժողովրդի մոտ: Սա ֆունդամենտալ տարբերություն է: Դուք ուզում եք մարդկանց վարձով որպես ժողովուրդ գործի ընդունել, ասել, ա՛յ, դուք կլինեք մեր ժողովուրդը»,- շեշտել է նա՝ հավելելով, որ ընդդիմությունը ժողովրդին ասում է՝ մենք ձեզ կապահովենք գործով, դուք մեզ՝ ձայներով:

Շվեդիայի Թագավորության Ռիկսդագի խոսնակ Անդրեաս Նորլենը շնորհավորական ուղերձ է հղել Ռուբեն Ռուբինյանին՝ Հայաստանի Հանրապետության Ազգային ժողովի նախագահի պաշտոնում ընտրվելու կապակցությամբ։

Շնորհավորական ուղերձում Ռիկսդագի խոսնակը նշել է, որ Շվեդիան և Հայաստանն ունեն գերազանց հարաբերություններ՝ ընդգծելով երկու երկրների միջև հասարակության բոլոր մակարդակներում ձևավորված համագործակցության և փոխանակումների պատմությունը։

Անդրեաս Նորլենը համոզմունք է հայտնել, որ երկու խորհրդարանների միջև ձևավորված արդյունավետ համագործակցությունը, որը հիմնված է ընդհանուր հիմնարար արժեքների և սկզբունքների վրա, շարունակելու է զարգանալ կառուցողական և դրական հունով։

Հակակոռուպցիոն դատարանը 2026 թվականի հուլիսի 30-ին բավարարել է Սյունիքի մարզի դատախազության հայցն ընդդեմ Սյունիքի մարզի Տաթև համայնքի նախկին ղեկավար Մուրադ Սիմոնյանի:

Վճիռն օրինական ուժի մեջ մտնելուց հետո Մուրադ Սիմոնյանից կբռնագանձվի 4 միլիոն 454 հազար դրամ՝ որպես պետությանը պատճառված վնասի հատուցում, կբռնագանձվի նաև 4 միլիոն 454 հազար դրամի նկատմամբ հաշվարկված տոկոսագումարը:

Սյունիքի մարզի դատախազությունը, պետական (համայնքային) շահերի պաշտպանության լիազորության շրջանակներում, ուսումնասիրելով քրեական վարույթով ձեռք բերված ապացույցները, համաձայն որոնց՝ Տաթև համայնքի նախկին ղեկավար Մուրադ Սիմոնյանը, համայնքային սեփականություն հանդիսացող էքսկավատորը 2018-2020 թվականներին տրամադրել է ՍՊ ընկերությանն ու շահագործումից ստացված 13 միլիոն 600 հազար դրամից 4 միլիոն 454 հազար դրամը հափշտակել է, 2026 թվականի մարտի 31-ին հայցադիմում էր ներկայացրել Հակակոռուպցիոն դատարան՝ Տաթև համայնքին պատճառված վնասի գումարը Մուրադ Սիմոնյանից բռնագանձելու պահանջով:

«Դուք իշխանություն եք եղել, իշխանության մաս եք եղել, ՌԴ-ն Ադրբեջանին 5 միլիարդի զենք է վաճառել, Դաշնակցությունն այդ ամբողջ ընթացքում այստեղ խմբակցություն է ունեցել: 5 միլիարդի մահաբեր զենքեր են վաճառվել Ադրբեջանին: Բա Հանրապետական խմբակցությանը, պաշտպանության նախարարին հարցուպատասխանի ժամանակ կամ ձեր կոալիցիոն անդամ գործընկերներին հարցնեիք՝ դա սպառնալի՞ք է, թե՞ սպառնալիք չէ»:

Այս մասին Կառավարության՝ օգոստոսի 7-ի նիստի ժամանակ ասել է ԱԺ փոխնախագահ Վահագն Ալեքսանյանը՝ անդրադառնալով «Հայաստան» խմբակցության պատգամավոր Քրիստինե Վարդանյանի հարցին, թե արդյոք ՌԴ-ն սպառնալի՞ք է ՀՀ-ի համար, թե՞ սպառնալիք չէ:

«5 միլիարդի զենքի վաճառքը սպառնալի՞ք էր, թե՞ սպառնալիք չէր: Ձեզ եմ հարցնում, տիկի՛ն Վարդանյան: Ակնհայտ է, որ սպառնալիք էր: Բա ո՞նց եք դիմագրավել այդ սպառնալիքին, ասեմ՝ ոնց: Ձեր և Հանրապետական խմբակցության գործընկերները ասել են՝ դա բիզնես է: Այդպես եք դիմագրավել այդ սպառնալիքին: Ի՞նչ կա, բիզնես է, էլի:

Ոնց որ մենք հիմա ենք ասում»,- ասել է Ալեքսանյանը:

Վարչապետ Նիկոլ Փաշինյանը Չոլպոն-Ատա քաղաքում մասնակցել է Եվրասիական միջկառավարական խորհրդի ընդլայնված կազմով նիստին։ Վերջինիս, բացի Եվրասիական տնտեսական միության անդամ պետությունների վարչապետներից, մասնակցել են նաև Իրանի, Ուզբեկստանի և Կուբայի ներկայացուցիչները։

Կառավարությունից հայտնում են, որ մինչ նիստը տեղի է ունեցել վարչապետների համատեղ տեսալուսանկարահանման արարողությունը։