Category: Ambion.news

Փաստաբան Նարեկ Ալոյան գրում է.Սպանության փորձի մեջ մեղադրվող և ավելի քան 2 տարի կալանքի տակ գտնվող վստահորդիս կալանավորման ժամկետը երկարաձգվեց ևս 3 ամսով, իսկ կալանավորումը տնային կալանք և 7 միլիոն ԱՄՆ դոլարին համարժեք 2 միլիարդ 541 միլիոն ՀՀ դրամ գրավով փոխարինելու մասին իմ միջնորդությունը դատավոր Հակոբ Մանուկյանի կողմից մերժվեց։

Մի շարք երկրներ 7 միլիոն ԱՄՆ դոլարով կարող են զարգացնել հսկայական ռազմաարդյունաբերական համալիրներ, իսկ Հայաստանում այդ գումարի դիմաց հնարավոր չէ վերահսկել ավելի քան 2 տարի կալանքի տակ գտնվող ընդամենը մեկ անձի տնային կալանքը…

Հատուկ ընդգծեմ, որ տվյալ դեպքում խոսքը ոչ թե անձին ազատ արձակելու, այլ ավելի քան 2 տարի ձգվող դատավարության հետագա ընթացքը նրա՝ տնային կալանքում գտնվելու պայմաններում շարունակելու մասին է։

Պարտք ունեցող պետությունը կարող է և պարտավոր է օգտագործել իր բոլոր ռեսուրսները և փնտրել առաջադեմ մոտեցումներ` նոր պարտքերից խուսափելու և առկա պարտքերը մարելու համար։

Մեր դեպքում մոտեցումները մնում են նույնը, իսկ պարտքն աճում է…

Շիրակի պետական համալսարանի ռեկտոր Երվանդ Սերոբյանն իր «Infinity»-ով վրաերթի է ենթարկում 63-ամյա մարդու, պատճառում բազմաթիվ կոտրվածքներ, ու հանկարծ այդ ծանր վնասվածքներով մարդուն շուտափույթ «դուրս են գրում» հիվանդանոցից։ Իսկ երբ իմ գործընկեր Անահիտը գնում է տուժողի տուն՝ հասկանալու կատարվածը, բախվում է բացահայտ սպառնալիքների ու լռեցնելու փորձերի։

Կարո՞ղ ա 90-ականներում ենք ապրում, որ «հարցեր լուծելով» ու մարդկանց վախեցնելով հանցագործություն կոծկեք։ Սա պարզապես ճանապարհատրանսպորտային պատահար չէ, սա պաշտոնական լկտիության, վախի մթնոլորտի և քրեական գործը «ջրելու» դասական ու գարշելի օրինակ է։

Սա առաջին դեպքը չէ, երբ ՇՊՀ ռեկտորը հայտնվում է աղմկահարույց պատմությունների կենտրոնում․ որոշ ժամանակ առաջ էլ աշխատողի աղմկահարույց հեռացման սկանդալն էր, որին հաջորդեց բուհի ղեկավարությանը խայտառակող ձայնագրության տարածումը։

2018-ից հետո սրընթաց կարիերա արած ու ամենաքաղաքականացվածը համարվող ռեկտորն այսօր էլ թաքնվում է «խիստ զբաղված լինելու» հետևում, մինչդեռ տեղի ունեցածի շուրջ բազմաթիվ անպատասխան հարցեր են օդում կախված մնում։

Արամ Դավթյան

Մեսրոպ Մաշտոցի անվան հին ձեռագրերի գիտահետազոտական ինստիտուտ-Մատենադարանում, մասնավորի աջակցությամբ, պաշտոնապես բացվել են նոր գրախանութ, հուշանվերների կրպակ և սրճարան՝ ամբողջացնելով Մատենադարանի այցելուների համար նախատեսված նոր ենթակառուցվածքները։

Միջոցառմանը ներկա են եղել ՀՀ կրթության, գիտության, մշակույթի և սպորտի նախարար Ժաննա Անդրեասյանը, ԿԳՄՍ նախարարի տեղակալ Արթուր Մարտիրոսյանը, Մատենադարանի տնօրեն Արա Խզմալյանը, գործընկեր կազմակերպությունների ներկայացուցիչներ, հյուրեր:

Նախաձեռնության նպատակն է Մատենադարանի հարուստ ձեռագրական և մշակութային ժառանգությունը ներկայացնել նոր ձևաչափերով՝ այն հասանելի և ճանաչելի դարձնելով մշակութային ինքնատիպ արտադրանքի միջոցով։

Ավելին՝ https://escs.gov.am/articles/news/203

Վանաձորում և Գյումրիում իրականացված շուրջ 4 միլիոն եվրո արժողությամբ ծրագրի շրջանակում ձերբակալվել են ծրագրի ղեկավար Նատալյա Լափաուրին և նույն ծրագրի փորձագետ Դավիթ Հակոբյանը, հայտնում է «Ազատությունը»։

Ըստ հրապարակման՝ Նատալյա Լափաուրին ծրագրի ղեկավարությունն իրականացրել է շուրջ չորս տարի, իսկ Դավիթ Հակոբյանը հանդես է եկել որպես ծրագրի փորձագետ։ Հակոբյանը ներկայում զբաղեցնում է Վանաձորի համայնքապետարանի գնումների բաժնի պետի պաշտոնը։ Այս հանգամանքը հաստատվում է նաև համայնքապետարանի պաշտոնական կայքում։

Ծրագրի շրջանակում Վանաձորի և Գյումրու ուղղությամբ իրականացված աշխատանքների և դրանց ֆինանսական օգտագործման վերաբերյալ իրավապահների գործողությունները, ըստ հրապարակված տեղեկությունների, շարունակվում են։

Միաժամանակ, անհրաժեշտ է հաշվի առնել անմեղության կանխավարկածը․ ձերբակալված անձինք համարվում են անմեղ, քանի դեռ նրանց մեղավորությունն ապացուցված չէ դատարանի՝ օրինական ուժի մեջ մտած դատավճռով։