Author: Balance2

Եվրոպայի չեմպիոն Իսպանիայի հավաքականը նվաճեց աշխարհի առաջնության կիսաեզրափակիչի ուղեգիր։ Լուիս դե լա Ֆուենտեի գլխավորած թիմը քառորդ եզրափակիչում 2:1 հաշվով պարտության մատնեց Բելգիային։

Լոս Անջելեսում տեղի ունեցած հանդիպման հաշիվը 30-րդ րոպեին բացեց Ֆրանսիայի չեմպիոն եւ Չեմպիոնների լիգայի գավաթակիր ՊՍԺ-ի 30-ամյա կիսապաշտպան Ֆաբիան Ռուիսը (տեսանյութ)։

41-րդ րոպեին պատասխան գոլը խփեց Բելգիայի հավաքականի եւ իտալական «Ատալանտայի» 25-ամյա կիսապաշտպան Շառլ Դե Կետելարեն (տեսանյութ)։

88-րդ րոպեին Իսպանիայի հաղթական գոլը խփեց Անգլիայի չեմպիոն Լոնդոնի «Արսենալի» 30-ամյա կիսապաշտպան Միկել Մերինոն (տեսանյութ)։

Կիսաեզրափակիչում Իսպանիայի մրցակիցը կլինի աշխարհի փոխչեմպիոն Ֆրանսիան, որը պայքարից դուրս էր թողել Մարոկկոյին։

Երբ ֆրանսիական «Վեոլիա Ջուր»-ը ստանձնեց Հայաստանի ջրամատակարարման համակարգի կառավարումը, խոստումները մեծ էին՝ եվրոպական փորձ, ժամանակակից կառավարում, որակյալ ծառայություն և սպառողակենտրոն մոտեցում։ Տարիներ անց, սակայն, խմբագրությանը հասնող բազմաթիվ ահազանգերը բոլորովին այլ պատկեր են ներկայացնում։

Այս հրապարակման նպատակը մեկ անձի դժգոհությունը ներկայացնելը չէ։

Վերջին ամիսներին մեզ դիմած քաղաքացիների պատմությունները հաճախ կրկնում են միմյանց՝ անկախ բնակավայրից։ Այդ պատճառով առաջանում է հարց՝ խոսքը առանձին դեպքերի՞ մասին է, թե՞ համակարգային խնդիրների։

Գրաֆիկ կա, բայց ջուր՝ ոչ միշտ

Քաղաքացիները պատմում են, որ հրապարակված ջրամատակարարման գրաֆիկները հաճախ չեն պահպանվում։ Նրանց փոխանցմամբ՝ ընկերության ներկայացուցիչները երբեմն պատճառաբանում են, թե սպառողների թիվն ավելացել է, և գործող համակարգը չի հասցնում ապահովել նախատեսված ծավալները։

Եթե այդպես է, առաջանում է տրամաբանական հարց. ինչո՞ւ են նոր բաժանորդներ միացվում այն ցանցերին, որոնց սպասարկման հնարավորությունները, ըստ նույն հիմնավորման, արդեն սահմանափակ են։ Եթե ենթակառուցվածքը ծանրաբեռնված է, ապա ինչպե՞ս է գնահատվում դրա թողունակությունը մինչև նոր միացումների թույլտվությունը։

Մարզերում պատկերը հաճախ ավելի ծանր է

Մարզերից ստացվող ահազանգերն ավելի մտահոգիչ են։ Բնակիչների խոսքով՝ կան համայնքներ, որտեղ ջուրն իրականում մատակարարվում է օրական ընդամենը 6-8 ժամ, մինչդեռ պաշտոնական գրաֆիկներում նշվում է զգալիորեն ավելի երկար ջրամատակարարում մինչև 20 ժամ։

Եթե այս տարբերությունները համապատասխանում են իրականությանը, ապա անհրաժեշտ է պարզաբանել՝ ինչու է պաշտոնական տեղեկատվությունը տարբերվում բնակիչների առօրյա փորձից և ինչ մեխանիզմներով է վերահսկվում գրաֆիկների պահպանումը։

Պետությունը ստանձնեց պարտքերը, բայց դժգոհությունները չպակասեցին

Վերջին տարիներին պետությունը ներգրավվել է ընկերության ֆինանսական խնդիրների կարգավորման գործընթացում՝ ստանձնելով որոշ պարտավորություններ։ Սակայն քաղաքացիների գնահատմամբ՝ այդ քայլերը դեռևս չեն վերածվել սպասարկման որակի տեսանելի բարելավման։

Հարցն այստեղ միայն ֆինանսական չէ։ Եթե համակարգում իրականացվում են պետական աջակցություն պահանջող լուծումներ, ապա հանրությունն ակնկալում է նաև ծառայության որակի համարժեք աճ։

Հինգ տարի առանց տեխնիկական աուդիտի

Մասնագետների շրջանում քննարկվող հարցերից մեկն այն է, որ երկար ժամանակ չի իրականացվել համակարգի ամբողջական տեխնիկական աուդիտ։ Եթե դա համապատասխանում է իրականությանը, առաջանում է հերթական հարցը՝ ինչպե՞ս են գնահատվում ցանցի վիճակը, կորուստները, ներդրումների առաջնահերթությունները և ռիսկերը՝ առանց համապարփակ տեխնիկական գնահատման։

Երբ սպառողը չի գտնում պատասխանատուին

Քաղաքացիների ամենատարածված դժգոհություններից մեկը վերաբերում է տեղային պատասխանատուների՝ տեսուչների բացակայությանը։

ArmLur.am-ին դիմած քաղաքացիներից մեկն պատմեց, որ երեք ամիս փակ բնակարանի համար շարունակել է ստանալ սպառման հաշվարկներ, վճարել է դրանք։ Այնուհետև զանգահարել է ընկերություն և տեղեկացրել, որ բնակարանը դատարկ է եղել։ Նրա խոսքով՝ պատասխանել են, որ այո դուք ունեք գերավճար, հարցը պետք է քննարկի տարածքային տեսուչի հետ, սակայն չի հաջողվել պարզել, թե ով է այդ տեսուչը և ինչպես կարելի է նրա հետ կապ հաստատել։

Սպառողն ինքն է կատարում ընկերության աշխատանքը

Հայտնի փաստ է նաև, որ ջրաչափերի ցուցմունքները հաճախ իրենք են լուսանկարում և ուղարկում ընկերության տրամադրած հեռախոսահամարներին կամ առցանց հարթակներին։

Թվայնացումը, անկասկած, կարող է հեշտացնել գործընթացները։ Սակայն երբ սպառողը ստիպված է ինքնուրույն հավաքագրել տվյալները, համոզվել, որ դրանք տեղ են հասել, և հետո էլ ստուգել՝ արդյոք ճիշտ են հաշվառվել, բնական հարց է առաջանում՝ որտե՞ղ է ծառայություն մատուցողի պատասխանատվության սահմանը։

Պլոմբի վնասում՝ երկար վարչարարության սկիզբ

Քաղաքացիները դժգոհում են նաև այն դեպքերից, երբ ջրաչափի պլոմբը վնասվում կամ պոկվում է։ Նրանց խոսքով՝ դրան հաջորդող վարչարարությունը հաճախ երկար է, բարդ և ֆինանսական լրացուցիչ բեռ է ստեղծում, նույնիսկ այն դեպքերում, երբ վնասումը դիտավորյալ չի եղել։

Բաժանորդ դառնալը՝ երկար ճանապարհ

Մեկ այլ խնդիր կապված է նոր բաժանորդների միացման հետ։ Դիմողների խոսքով՝ պահանջվող փաստաթղթերի ցանկը հաճախ մեծ է, գործընթացը՝ երկար, իսկ միացման ժամկետները երբեմն ձգվում են ամիսներով։

Եթե ջրամատակարարումը հանրային ծառայություն է, ապա դրա հասանելիությունը նույնպես պետք է կազմակերպվի պարզ, կանխատեսելի և ողջամիտ ժամկետներում։

Կոյուղին՝ մշտական ցավոտ թեմա

Առանձին դժգոհություններ վերաբերում են կոյուղու ցանցին։ Բնակիչները պատմում են հաճախակի վթարների, օրերով չվերացող արտահոսքերի և բնակավայրերում տարածվող գարշահոտության մասին։ Նրանց խոսքով՝ խնդիրը հաճախ ժամանակավորապես է լուծվում, սակայն համակարգային վերանորոգումներ չեն իրականացվում։

Ընկերության պատասխանը

Հրապարակման ընթացքում ներկայացված հարցերի վերաբերյալ դիմեցինք «Վեոլիա Ջուր» ընկերությանը։ Ընկերությունից պատասխանեցին, որ պետք կլինի հասցեական խնդիրներ, որ իրենք դրանց պատասխանեն: Իհարկե, դրանք տրվել են, բայց մինչ արձագանքը հասցեական խնդիրների, պետք է համակարգային խնդիրների մասին խոսել՝ արձանագրելով, որ ՀՀ Կառավարությունը մատը մատին չի տալս փաստացի՝ ՀՀ սպառողների իրավունքները պաշտպանելու համար: Եթե լիներ քաղաքականացված, ընդդիմադիր հայացքների տեր սեփականատեր, բնականաբար, պետությունը վաղուց գործադրել էր ջանքեր՝ պետականացնելու կամ կառավարումն իր ձեռքը վերցնելու համար ինչպես ՀԷՑ-ի դեպքում կամ ինչպես փորձում են անել արարատցեմենտի հետ, որը Գագիկ Ծառուկյանին է պատկանում:

Փաստ է, որ հանրային ծառայություն մատուցող ընկերության գործունեությունը գնահատվում է ոչ թե գովազդային կարգախոսներով, այլ սպառողի առօրյա փորձով։ Իսկ երբ տարբեր բնակավայրերից հնչող բողոքները տարիներ շարունակ կրկնում են նույն խնդիրները, դրանք այլևս չեն կարող դիտվել որպես մեկուսացված դեպքեր։ Դրանք պահանջում են հրապարակային, փաստարկված և չափելի պատասխաններ՝ ոչ միայն ընկերությունից, այլև ոլորտը վերահսկող պետական մարմիններից։

Իրանի արտաքին գործերի նախարար Աբբաս Արաղչին հայտարարել է, որ Թեհրանը շարունակում է կատարել իր վրա վերցրած պարտավորությունները, մինչդեռ ԱՄՆ-ն, նրա խոսքով, խախտում է փոխըմբռնման հուշագրի պայմանները։

X սոցիալական ցանցում հրապարակման մեջ Իրանի արտաքին քաղաքական գերատեսչության ղեկավարը մեղադրել է ամերիկյան կողմին ձեռք բերված պայմանավորվածությունները չկատարելու մեջ՝ նշելով, որ խոսքը վերաբերում է հուշագրի իններորդ կետի խախտմանը։

«Իրանը մինչ այժմ հավատարիմ է մնացել իր խոսքին՝ ի տարբերություն այսպես կոչված ԱՄՆ ֆինանսների նախարարի, որը խախտում է փոխըմբռնման հուշագրի 9-րդ կետը։ Այդ խախտմանը նախորդել են Միացյալ Նահանգների կողմից այլ խախտումներ և սխալ քայլեր։ Իրականության ստուգումն այս է․ պայմանավորվածությունների պահպանումը կարող է լինել միայն փոխադարձ», — գրել է Արաղչին։

Եվրոպական երկրները դիտարկում են Հորմուզի նեղուցում նավարկության ծառայությունների համար կամավոր վճարների համակարգ ներդնելու հնարավորությունը՝ համաշխարհային կարևորագույն ծովային երթուղիներից մեկի շուրջ ստեղծված ճգնաժամի ֆոնին։ Այս մասին գրում է The Guardian պարբերականը։

Խոսքը նավերի անցման համար պարտադիր տուրքեր սահմանելու մասին չէ, այլ նավագնացության անվտանգության ապահովման հետ կապված կոնկրետ ծառայությունների հնարավոր վճարման։ Աղբյուրների տվյալներով՝ նման սխեման կարող է հիմնված լինել Մալակայի նեղուցում և միջազգային այլ ջրային ուղիներում կիրառվող մոդելի վրա։

Միացյալ Թագավորության փոխվարչապետ Դեվիդ Լեմին հայտարարել է, որ Հորմուզի նեղուցով անցման համար պարտադիր վճարների սահմանումը «աղետալի» կլիներ։ Միևնույն ժամանակ, բրիտանական իշխանությունները նշում են, որ նավարկության ծառայությունների դիմաց կամավոր վճարները կարող են համապատասխանել միջազգային պրակտիկային՝ Միջազգային ծովային կազմակերպության (IMO) հետ համաձայնեցման պայմանով։

Այս առաջարկը, որը հիմնված է Մալակայի նեղուցի կառավարման սկզբունքների վրա, ավելի վաղ մշակվել էր Օմանի կողմից՝ բրիտանացի իրավաբանների հետ համատեղ։ Մասկատն առաջարկել է իր մասնագետներին գործուղել Թեհրան՝ նախաձեռնության մանրամասները պարզաբանելու համար։

Իրավիճակը քննարկվում է այն ֆոնին, երբ ԱՄՆ-ը Իրանից պահանջում է հրապարակայնորեն հաստատել Հորմուզի նեղուցի բաց լինելն ու երաշխավորել առևտրային նավերի վրա հարձակումների դադարեցումը։ Վաշինգտոնն ավելի վաղ հայտարարել էր, որ պայմանավորվածությունների պահպանման հետ կապված խնդիրները պայմանավորված են իրանական ղեկավարության ներսում առկա տարաձայնություններով։

ԱՄՆ նախագահ Դոնալդ Թրամփն ուրբաթ հայտարարել է, որ հրադադարի մասին ժամանակավոր համաձայնագիրը համարում է ավարտված, սակայն նշել է, որ երկարաժամկետ կարգավորման շուրջ բանակցությունները կշարունակվեն։

Իրանից հայտնել են, որ արտգործնախարար Աբաս Արաղչին կայցելի Օման՝ Հորմուզի նեղուցում նավագնացության անվտանգության հարցերի շուրջ բանակցություններ վարելու նպատակով։ Իրանի ԱԳՆ խոսնակ Էսմայիլ Բաղային հայտարարել է, որ այս այցը կլինի Օմանի հետ խորհրդակցությունների շարունակությունը։

Պարբերականի տեղեկություններով՝ Օմանը, որը վերահսկում է նեղուցի նավարկելի ջրերի զգալի մասը, դեմ է պարտադիր տուրքերին։ Երկրի ներկայացուցիչներն ընդգծում են, որ միջազգային նեղուցներով տարանցիկ անցման իրավունքը երաշխավորված է միջազգային իրավունքով։

Միևնույն ժամանակ, Մասկատը հնարավոր է համարում նավարկության ծառայությունների դիմաց վճարման կամավոր մեխանիզմների քննարկումը, ինչը կարող է բարձրացնել նավագնացության անվտանգությունը, նվազեցնել վթարների ռիսկերն ու պաշտպանել ծովային միջավայրը։

Իրանական նախագիծը դեռևս տարաձայնությունների տեղիք է տալիս։ Տարածաշրջանի երկրների որոշ ներկայացուցիչներ մտավախություն ունեն, որ նեղուցի նկատմամբ Թեհրանի կողմից փաստացի վերահսկողության սահմանումը կարող է վտանգել նավագնացության ազատությունը։ Դիվանագետները նաև նշում են, որ տարաձայնություններ կան հենց Իրանի ներսում՝ համագործակցության կողմնակիցների և ավելի կոշտ գծի կողմնակիցների միջև։

Հորմուզի նեղուցն աշխարհի առանցքային էներգետիկ երթուղիներից մեկն է. դրանով է անցնում նավթի և հեղուկացված բնական գազի համաշխարհային մատակարարումների զգալի մասը։

«Հետքը» գրում է. «Վարչապետ Նիկոլ Փաշինյանը հայցեր է ներկայացրել նախկին պատգամավորներ Սոֆիա Հովսեփյանի և Էդմոն Մարուքյանի դեմ՝ պահանջելով ներողություն խնդրել ու հերքել վիրավորանք և զրպարտություն պարունակող տեղեկությունները։ Ն. Փաշինյանը պահանջում է նաև դրամական փոխհատուցում։

Հայցով պահանջվում է, որ Սոֆիա Հովսեփյանը, դատարանի վճիռն օրինական ուժի մեջ մտնելուց հետո հինգ աշխատանքային օրվա ընթացքում, hraparak.am լրատվական կայքում և ֆեյսբուքյան էջում հրապարակային ներողություն խնդրի վարչապետ Նիկոլ Փաշինյանից՝ 2026թ. հունիսի 9-ին «Այդ տականքին ես վաղուց եմ ճանաչում՝ գիտեի, թե ոնց է նկարելու թվերը» վերնագրով հրապարակված հոդվածում նրան «տականք» անվանելու համար։

Ներողությունը պետք է հրապարակվի բոլորի համար տեսանելի և հասանելի եղանակով, առանց ժամկետի սահմանափակման, իսկ դրա ձևավորումը, տեղակայումը և տառաչափը չպետք է զիջեն սկզբնական հրապարակման ձևաչափին։

Պահանջվում է նաև, որ Սոֆիա Հովսեփյանը նույն ժամկետում նույն լրատվամիջոցով և ֆեյսբուքյան էջում հրապարակայնորեն հերքի Նիկոլ Փաշինյանի վերաբերյալ տարածած այն հայտարարությունները, որոնցում պնդել է, թե վարչապետը նախապես գիտեր ընտրությունների արդյունքները, կեղծել է դրանք, ստախոս է և ընտրությունների արդյունքները «նկարել» է։ Ն. Փաշինյանը դրանք համարում է զրպարտություն։

Մասնավորապես՝ վարչապետը վիճարկում է հետևյալ արտահայտությունները. «Փաշինյանը շտապեց իրեն հաղթող հայտարարել, ինքը շատ լավ գիտեր, թե ինչպես է նկարելու այդ ամեն ինչը, դրա համար էլ հայտարարեց այն, ինչն արել է և զարմանում եմ, թե ինչու ենք մենք զարմանում», «Բայց ինքը շատ լավ գիտեր, թե ինչ են նկարելու իրենք և, բնականաբար, հայտարարեց: Սա մեզ համար զարմանալի չի, մենք վաղուց ենք իրեն ճանաչում, իր ստախոսությունը մեզ համար նորություն չի, իր ժողովրդավարության կեղծիքն էլ մեզ համար նորություն չի և բնականաբար այդ ամեն ինչի արդյունքում գիտենք ինչ պետք է անի», «Ինչ վերաբերում է ընտրությունների արդյունքներին, ապա այս տականքին ես վաղուց եմ ճանաչում ու գիտեի, թե ինչպես է ընտրության արդյունքները նկարելու»։

Հերքման մեջ պետք է նշվի, որ այդ տեղեկությունները կեղծ են, չեն համապատասխանում իրականությանը և զրպարտում են Նիկոլ Փաշինյանին։ Հերքման հրապարակման պայմանները պետք է լինեն նույնը, ինչ սկզբնական հրապարակման դեպքում, իսկ դրա անհնարինության դեպքում այն պետք է հրապարակվի առնվազն 5000 տպաքանակով և ՀՀ ամբողջ տարածքում տարածվող որևէ տպագիր թերթում։

Նիկոլ Փաշինյանը պահանջում է նաև դրամական փոխհատուցում՝ 2 միլիոն դրամ՝ վիրավորանքի համար ոչ նյութական վնասի և 4 միլիոն դրամ՝ զրպարտությամբ պատճառված ոչ նյութական վնասի համար։

Ինչ վերաբերում է Էդմոն Մարուքյանին, ապա նա նույնպես ընտրական թեմայով է խոսել և իր ֆեյսբուքյան էջում ընտրակեղծարար է անվանել նրան։ Վարչապետը այդ արտահայտությունը համարել է վիրավորանք։

Է. Մարուքյանի դեմ ներկայացված հայցի մանրամասները և ամբողջական պահանջը հայտնի չեն, քանի որ «Դատալեքս» տեղեկատվական համակարգում տվյալները թերի են լրացված։

Նիկոլ Փաշինյանը Սոֆիա Հովսեփյանի դեմ հայցը ներկայացրել է Շիրակի մարզի, իսկ Մարուքյանի դեմ՝ Երևան քաղաքի ընդհանուր իրավասության դատարաններ՝ հուլիսի 9-ին։ Վարույթ ընդունելու հարցը դեռ որոշված չէ»։

Աշխեն Հայրապետյանը ազատվել է Ազգային ժողովի նախագահի խորհրդականի պաշտոնից: Որոշումն ուժի մեջ կմտնի օգոստոսի 3-ից։

Այս մասին կարգադրությունը հուլիսի 10-ին ստորագրել է Ազգային ժողովի նախագահ Ալեն Սիմոնյանը։

ԱՄՆ նախագահ Դոնալդ Թրամփը, որն ավելի վաղ հայտնել էր իրեն սպանելու՝ Իրանի ենթադրյալ ծրագրերի մասին, հայտարարել է, որ հրահանգել է աննախադեպ ուժգնությամբ ռմբակոծել Իրանը, եթե իր հետ որևէ բան պատահի։

«Ես հրահանգներ եմ տվել. եթե որևէ բան պատահի, պարզապես ռմբակոծե՛ք նրանց այնպես, ինչպես երբեք չեն տեսել»,-հայտարարել է Սպիտակ տան ղեկավարը New York Post-ին տված հարցազրույցում։

Ինչպես հաղորդում է Wall Street Journal-ը՝ վկայակոչելով իրազեկ աղբյուրներին, Իսրայելը ԱՄՆ-ի հետ կիսվել է հետախուզական տվյալներով, որոնք, իբր, վկայում են Թրամփի դեմ մահափորձ իրականացնելու Իրանի ծրագրերի մասին։ Մարտ ամսին Ռուսաստանում Իրանի դեսպան Քազեմ Ջալալին «ՌԻԱ Նովոստի»-ին տված հարցազրույցում հերքել էր այն պնդումները, թե Թեհրանը ծրագրում է մահափորձ իրականացնել Թրամփի դեմ։