CivilNet-ին տված բացառիկ հարցազրույցում Խաղաղության առաքելությունների հարցերով ԱՄՆ հատուկ բանագնացի ավագ խորհրդական Արյե Լայթսթոունն անդրադարձել է 2025 թվականի օգոստոսի 8-ին Սպիտակ տանը կայացած գագաթնաժողովում ստորագրված համաձայնագրերի առաջին տարելիցին։
Լայթսթոունը ներկայացրել է նաեւ ԱՄՆ տեսլականը TRIPP-ի վերաբերյալ՝ որպես տարածաշրջանային հարթակի, որը Հարավային Կովկասը կապելու է Միջին միջանցքի հետ։
Մեդիամաքսը ներկայացնում է որոշ հատվածներ Լայթսթոունի խոսքից:
«Անհավանական է»
Եթե փորձեինք կանխատեսել, թե ինչ տեղի կունենա մինչեւ այսօր՝ TRIPP գագաթնաժողովի եւ Ադրբեջանի ու Հայաստանի միջեւ համաձայնագրերի նախաստորագրման առաջին տարեդարձին, դժվար թե սպասեինք, որ
կլինենք հենց այս հանգրվանում։
Այս մեկ տարվա ընթացքում ոչ միայն հրադադարի ռեժիմի խախտումներ չեն եղել, այլեւ երկրները սովորել են աշխատել միասին՝ աստիճանաբար, դանդաղ, բայց արդյունավետ։ Անհավանական է։ Դա կատարվածի մի մասն է։
Մյուս մասն այն է, որ ԱՄՆ-ն օգտագործեց պահը՝ վերագործարկելու կամ նոր լիցք հաղորդելու Ադրբեջանի եւ Հայաստանի հետ մեր հարաբերություններին։ Եվ եթե դիտարկենք, թե ինչի ենք հասել Հայաստանի հետ համապարփակ ռազմավարական գործընկերության ոլորտում վերջին 11.5 ամիսների ընթացքում, ապա, հավանաբար, ձեռք ենք բերել ավելին, քան նախորդ 5 տարիներին միասին վերցված։
«Քաղաքական խիզախություն»
Նախագահ Ալիեւն ու վարչապետ Փաշինյանը կայացրել են կարեւոր որոշումներ, որոնք խիզախություն էին պահանջում։ Նրանք ընտրել են քաղաքականությունն ու խաղաղությունը՝ քաղաքական շահարկումների փոխարեն։
Ձեզ մոտ վերջերս ընտրություններ եղան։ Հայ ժողովուրդը քվեարկեց այն արդյունքի օգտին, որին նրան բերել է վարչապետ Փաշինյանը։
«Անբեկանելի ուղի»
Մենք մտադիր ենք ապահովել, որ Ադրբեջանի եւ Հայաստանի միջեւ այլեւս պատերազմ չլինի։ Մենք մտադիր ենք երկու երկրներն առաջնորդել դեպի խաղաղության եւ բարգավաճման անբեկանելի ուղի։ Անկախ նրանից՝ դա երկու ամիս, թե երկու տարի կպահանջի, այն անբեկանելի է։
Լուսանկարը` ՀՀ կառավարություն
Նախագահ Թրամփը TRIPP-ին տվել է իր անունը՝ Trump Route for International Peace and Prosperity (Թրամփի ուղի՝ հանուն միջազգային խաղաղության եւ բարգավաճման)։
Նախագահ Թրամփն իր անունը չի տալիս որեւէ նախագծի, եթե վստահ չէ դրա հաջողության եւ իր թողած ժառանգության հարցում։ Այս խաղաղ նախաձեռնության հաջողության եւ ժառանգության հարցում նա վստահ է։
«Ոչ մի գաղտնի գործարքներ չկան»
Ստվերային գործարքներ չկան: Գաղտնի գործարքներ չկան: Սա հանրային փաստաթուղթ է, որը հասանելի է յուրաքանչյուրին:
Միացյալ Նահանգները Հայաստանի Հանրապետության հետ համագործակցում են TRIPP-ի շրջանակում: Ես չեմ կարող ԱՄՆ ներկայացնող նախագծի գործընկեր լինել՝ առանց վարձատու ունենալու: Վարձատուն Հայաստանի Հանրապետությունն է:
Ես անշարժ գույք ունեմ աշխարհի բազմաթիվ անկյուններում: Երբեմն ես վարձատու եմ, երբեմն՝ վարձակալ: Վարձատուն ինքնիշխանություն ունի այդ հողի նկատմամբ: Դա չի նշանակում, թե վարձակալը իրավունքներ չունի: Ուստի բոլորին կոչ կանեի զգույշ լինել շտապողական ենթադրություններ անելիս:
Նաեւ խորհուրդ կտամ ուշադիր վերընթերցել փաստաթղթերը: Մենք ամբողջությամբ կենտրոնացած ենք նրա վրա, որ Հայաստանն իրական ինքնիշխանություն ունենա:
«Դուք բարդ միջավայրում եք գտնվում»
Դուք բարդ միջավայրում եք գտնվում։
Դուք դժվարին ընտրություններ անցկացրեցիք, որոնք ավարտվեցին վարչապետ Փաշինյանի ու նրա կուսակցության համոզիչ ու պատմական հաղթանակով: Դա տեղի ունեցավ, քանի որ ժողովուրդը սատարեց նրա կայացրած որոշումներին։
Լուսանկարը` ՀՀ կառավարություն
Նրա կայացրած որոշումներից մեկն Ամերիկայի Միացյալ Նահանգների հետ առավել սերտ հարաբերություններ կառուցելն է: Այս որոշումը նա կայացրել է մի շարք հաշվարկների արդյունքում,եւ մենք դա գրկաբաց ողջունել ենք:
ԱՄՆ-ն փնտրում է ռազմավարական բարեկամներ եւ դաշնակիցներ, որոնք ունակ են իրենց աշխարհագրական դիրքը ընկալել ոչ թե որպես թերություն, այլ որպես առավելություններ ստեղծելու ելակետ: Միջին միջանցքը կդառնա դրա կարեւոր մասը: Ձեր տեխնոլոգիական ոլորտը նույնպես կարեւոր մաս կդառնա:
Leave a Reply