Երեւան: Մեդիամաքս: Այսօր Ղրղզստանի Չոլպոն-Աթա քաղաքում անցկացվում է Ադրբեջանի եւ Կենտրոնական Ասիայի երկրների պետությունների ղեկավարների ոչ պաշտոնական հանդիպումը։
Ինչպես հաղորդում է ԱԶԵՐԹԱՋ-ը, հանդիպմանը ելույթ ունենալով՝ Ադրբեջանի նախագահ Իլհամ Ալիեւը հայտարարել է, որ «Ադրբեջանը կլինի խորհրդակցական ձեւաչափի ակտիվ անդամ եւ բոլոր ջանքերը կգործադրի, որպեսզի էլ ավելի ընդլայնվի համագործակցությունը մեր երկրների ու ժողովուրդների միջեւ»։
Ղազախստանի նախագահ Կասիմ-Ժոմարտ Տոկաեւը նշել է, որ «Ադրբեջանի միացումը Կենտրոնական Ասիայի երկրների պետությունների ղեկավարների խորհրդակցական հանդիպումների լիիրավ մասնակցի կարգավիճակով նշանավորեց մեր ձեւաչափի դրական էվոլյուցիայի նոր փուլ»։
Իսկ Ուզբեկստանի ղեկավար Շավկաթ Միրզիյոեւն ասել է, որ Ադրբեջանի միանալը «համագործակցությունը դուրս է բերում որակապես նոր՝ մակրոտարածաշրջանային մակարդակի»։
«Մեր առջեւ զարգացման միասնական տարածք ձեւավորելու պատմական հնարավորություն է բացվում, որը կմիավորի Կենտրոնական Ասիան, Հարավային Կովկասը եւ մեր մերձավոր հարեւանին՝ Աֆղանստանը։ Անհրաժեշտ է լիարժեք օգտագործել այս պահը եւ համատեղ ջանքերով ամուր հիմքեր ստեղծել Եվրասիայի հենց սրտում կայուն զարգացման, փոխկապակցվածության եւ բարիդրացիության համար»,- ասել է նա։
Leave a Reply