Երեւան: Մեդիամաքս: Ադրբեջանի նախագահ Իլհամ Ալիեւն այսօր ասել է, որ Հայաստանը պետք է տրամադրի պատերազմի հետեւանքով անհետ կորած ադրբեջանցիների ճակատագրերի, զանգվածային եւ անհատական գերեզմանների վայրերի վերաբերյալ ողջ տեղեկատվությունը։
«Չնայած հակամարտության ավարտին՝ անհետ կորածների ճակատագրի պարզաբանումը շարունակում է մնալ Ադրբեջանի համար կարեւորագույն հարցերից մեկը։
Ադրբեջանի կողմից ինքնիշխանության եւ տարածքային ամբողջականության ամբողջական վերականգնումը, ինչպես նաեւ մեր երկրի վարած քաղաքականությունը պատմական հնարավորություն են ստեղծել Հարավային Կովկասում կայուն խաղաղության եւ համագործակցության համար»,- անհետ կորած անձանց վերաբերյալ Բաքվի երկխոսության շրջանակում անցկացվող IV միջազգային համաժողովի մասնակիցներին ուղղված ուղերձում ասել է Ադրբեջանի նախագահը:
Իլհամ Ալիեւը նշել է, որ կայուն խաղաղության հաստատումը, քաղաքական պայմանավորվածություններից բացի, «պահանջում է նաեւ վստահության ամրապնդում եւ հակամարտության հումանիտար հետեւանքների վերացում»։
«Պատերազմից հետո նոր հնարավորություններ են ստեղծվել անհետ կորած քաղաքացիների որոնման համար: Մարդկային ճակատագրերին առնչվող տեղեկատվությունը չպետք է լինի քաղաքական պայմանների առարկա: Հայաստանը պետք է պայմաններ ստեղծի համապատասխան արխիվների բացման եւ վկաների ցուցմունքների հավաքագրման համար»,- ասել է նա:
Leave a Reply