Ներքին Հանդի եկեղեցին, որ ադրբեջանական գերության մեջ է

Ներկայիս Ներքին Հանդից հարավ–արևմուտք՝ Ծավ կամ Բասուտա գետի ստորին հոսանքում գտնվող Ներքին Հանդ լքված գյուղատեղիում է գտնվում 18-19-րդ դարերում կառուցված եկեղեցին՝ միանավ սրահի տեսքով։

Ըստ Ալիշանի՝ Բասուտա գետն իր անունն առել է Կովսականի Բոստ գյուղանունից։

Գյուղանունն էլ, ըստ Ռոբերտ Էջանանցու, հավանաբար իրենց հետ բերել են ներգաղթողները Ղարադաղից, ովքեր եկել են 1828 թ․ Թուրքմենչայի պայմանագրից հետո։

2020 թ․ սեպտեմբերյան ադրբեջանական ագրեսիայի հետևանքով լքված Ներքին Հանդ հին գյուղատեղիի տարածքը բռնազավթվել է թշնամու կողմից։

Այդ տարածքում են գտնվում գյուղի եկեղեցին, Մեծ հայրենականում զոհված համագյուղացիների հիշատակը հավերժացնող հուշարձանը (1965 թ․ կառուցված), ինչպես և գյուղի գերեզմանատունը։

Գյուղը հանրապետության բնական սոսիների միակ պուրակի մոտակայքում է, գեղատեսիլ վայրում։

Նախկին քսենոֆոնյան տներով գյուղը, որ Ծավ (Բասուտա) գետի աջ կողմում էր, 1980-ականներին տեղափոխվել է նոր կառուցված բարեկարգ բնակավայր։

Ժամանակին մոտ 400 բնակիչ ունեցող գյուղն այժմ երեք կողմից ադրբեջանական շրջափակման մեջ է։