Կապանի միջազգային երաժշտական փառատոն․ օր վեցերորդ

Փառատոնը բնականոն հուն է մտել և շարունակում է գեղագիտական հաճույք պատճառել հանդիսատեսին։ Փառատոնի հուլիսի 9-ի օրն անցավ ջազի հնչյունների ներքո։ Նախ` ցերեկային համերգն ամբողջովին նվիրված էր «Kapan Fest» փառատոնի ջազային ֆակուլտետի նվագախմբի ելույթին (գեղարվեստական ղեկավար՝ ջազմեն, շեփորահար Տիգրան Սուչյան)։ Իսկ երեկոյան Կապանի արվեստի քոլեջի երգեհոնային դահլիճում «Բեկա Գոչիաշվիլի և ընկերներ» ջազային անսամբլն էր։

Բեկա Գոչիաշվիլին վրացի ջազ դաշնակահար է, ծնվել է 1996 թ․ Թբիլիսիում։ Երիտասարդ տարիքից ցուցաբերելով բացառիկ տաղանդ՝ յուրացրել է ինչպես դասական, այնպես էլ ջազային երաժշտություն և արդեն պատանեկան տարիքում ելույթ է ունեցել միջազգային բեմերում։ 2010 թվականից բնակվում է Նյու Յորքում, որտեղ շարունակում է միջազգային ստեղծագործական գործունեությունը։

Բեմահարթակում ջազն էր՝ տաք ու կրքոտ ռիթմերով, իմպրովիզացիաների ազատություն ապահովող հնարավորություններով, ինչն անկրկնելի մթնոլորտ էր ստեղծել դահլիճում։ Երկու ժամ շարունակ հանդիսատեսը ջազի անիմանալի հնչյունների աշխարհում էր և հերթական անգամ անկրկնելի տրամադրությամբ թողեց դահլիճը։

Վահրամ Օրբելյան