TRIPP-ում որևէ այլ պետության անվտանգային ներկայություն չի լինելու. Սարգիս Խանդանյան | Քաղաքականություն

TRIPP-ը ենթակառուցվածքային նախագիծ է, ոչ թե տարածք կամ ռազմաբազա, և դրա շրջանակում որևէ այլ պետության անվտանգային ներկայություն չի նախատեսվում։«Արմենպրես»-ի հաղորդմամբ՝ Խանդանյանն այս մասին ասել է Ազգային ժողովում ունեցած ելույթում։

«Շատ խոսվեց TRIPP-ի մասին, և ես երեկ հարցուպատասխանի ընթացքում մի քանի անգամ այս միտքն ասացի։ Ուզում եմ ևս մեկ անգամ կրկնել, որ TRIPP-ը ենթակառուցվածքային նախագիծ է։ Երեկվա քննարկման և հատկապես «Հայաստան» դաշինքի կողմից հնչած հարցերի համատեքստն այնպիսին էր, որ TRIPP-ը Լաչինի միջանցքի նման մի բան է, բայց դա այդպես չէ։ Այդ մասին վկայում են TRIPP-ի վերաբերյալ մինչ օրս հրապարակված բոլոր փաստաթղթերը, ինչպես նաև համաձայնագիրը, որը խորհրդարանը կքննարկի»,- ասել է Խանդանյանը։

Նա ընդգծել է, որ TRIPP-ը նաև ինքնիշխան ռազմաբազա չէ։«Ընդհանրապես, TRIPP-ում որևէ այլ պետության անվտանգային ներկայություն չի լինելու։ Ինչպես համաձայնագիրն է փաստում, անվտանգային ամբողջ գործառույթը վերապահված է Հայաստանի Հանրապետությանը և Հայաստանի Հանրապետության համապատասխան մարմիններին»,- հայտարարեց Խանդանյանը։Պատգամավորը նաև անդրադարձավ տարածաշրջանային հաղորդակցությունների ապաշրջափակման գործընթացին՝ նշելով, որ այն արդեն սկսվել է, թեև դեռ ոչ բավարար ծավալով։«Հայաստանն արդեն մի քանի ամիս օգտվում է Ադրբեջանի երկաթուղիներից, նաև հանվել է Ախալքալաք–Կարս երկաթուղուց օգտվելու արգելքը։ Սրանք ևս լայն ապաշրջափակման գործընթացի դետալներ են»,- ասել է Խանդանյանը։