Նազարեթ Սեֆերյանը կղեկավարի Իմփաքթ Հաբ Երեւանը

Երեւան: Մեդիամաքս: Նազարեթ Սեֆերյանը նշանակվել է Իմփաքթ Հաբ Երեւանի գործադիր տնօրենի ժամանակավոր պաշտոնակատար։

«Նազարեթը երկար տարիներ եղել է մեր համայնքի մի մասը՝ որպես խորհրդի անդամ, խորհրդատու, մենթոր եւ ծրագրերի ակտիվ աջակից։ Մենք վստահ ենք, որ նրա փորձն ու նվիրվածությունը կօգնեն շարունակել Իմփաքթ Հաբ Երեւանի առաքելությունն ու աշխատանքը՝ խթանելով նորարարությունը, համագործակցությունն ու դրական փոփոխությունների զարգացումը Հայաստանում եւ դրա սահմաններից դուրս», – ասված է կազմակերպության հաղորդագրության մեջ:

2026 թվականի մայիսի 26-ին Նազարեթ Սեֆերյանը մասնակցել էր Մեդիամաքս մեդիա ընկերության կազմակերպած Impacture 2026 կոնֆերանսին, որտեղ քննարկվեցին բարեգործությանը, կորպորատիվ սոցիալական պատասխանատվությանը (ԿՍՊ) եւ հանրօգուտ ներդրումներին (impact investments) վերաբերող հարցեր: 

Ելույթ ունենալով կոնֆերանսի «Բարեգործություն, CSR եւ հանրօգուտ ներդրումներ՝ հակասություն, թե՞ փոխլրացում» պանելային քննարկման ժամանակ, Նազարեթ Սեֆերյանը, մասնավորապես, ասել էր.

«Դասական ներդրում դիտարկելիս ամենակարեւոր հարցը միջոցների վերադարձն է: 

Բայց երբ խոսում ենք հանրօգուտ ներդրումների մասին, ֆինանսական վերադարձը գործոններից միայն մեկն է: Շատ կարեւոր է հասկանալ եւ հաշվարկել սոցիալական կամ բնապահպանական ազդեցությունը, որը կլինի այդ ներդրման արդյունքում: 

Այստեղ խոսքը սոցիալական ձեռնարկությունների մասին է, որոնք ստեղծվել են սոցիալական կամ բնապահպանական խնդիր լուծելու նպատակով: Սա կարեւոր ուղղություն է մեր երկրի համար: Շատ կարեւոր է նաեւ սպառողի մտածելակերպը: Պետք է յուրաքանչյուրս հասկանանք՝ որպես սպառող ամեն օր ընտրություն ենք կատարում, ընտրում ենք այս կամ այն ընկերությունը եւ մասնակցում սոցիալական ազդեցությանը»: