Կբացվի «Գրիգոր Խանջյան-100. Նկարիչը եւ գիրքը» ցուցահանդեսը

Երեւան: Մեդիամաքս: Օգոստոսի 4-ին Կոմիտասի թանգարան-ինստիտուտում կբացվի «Գրիգոր Խանջյան-100. Նկարիչը եւ գիրքը» ցուցահանդեսը։

Այն նվիրված է Պարույր Սեւակի «Անլռելի զանգակատուն» պոեմի Գրիգոր Խանջյանի  նկարազարդումների ստեղծման պատմությանը։ 

Ցուցադրությունը բացահայտում է, թե ինչպես է աշխատել նկարիչը, աշխատանքային ինչ փուլեր է անցել։

Այս պատկերազարդումները շատ ավելին են, քան գրքի պարզ նկարազարդումներ. դրանք ինքնուրույն գրաֆիկական աշխատանքներ են, որոնք հանդիսանում են ինչպես հեղինակի, այնպես էլ հայկական գրքային գրաֆիկայի գլուխգործոցներից։ 

Առաջին անգամ ցուցադրվելու են  Պարույր Սեւակի «Անլռելի զանգակատուն» պոեմի տպագրության  համար արված շուրջ 40 էսքիզներ  եւ օֆորտի թերթեր, արխիվային լուսանկարներ, փաստաթղթեր, որոնք տրամադրել է նկարչի դուստրը՝ Սեդա Խանջյանը։ 

Ցուցադրության ընթացքում  կկազմակերպվեն լինոփորագրության աշխատարան, որի ընթացքում հնարավորություն կլինի  նկարչի կողմից ստեղծված տախտակով իրականացնել լինոտպագրություն։