Կլոդ Նոբսի տունը, Հելմուտ Նյութոնի վնասված ալբոմը եւ Ազնավուր-Գորիոն

Օրերս աչքովս հոդված ընկավ շվեյցարական Մոնտրյոի ջազ-փառատոնի 60-ամյակի մասին: Մի քանի շաբաթ առաջ հոբելյանական փառատոնը բացել էր բրիտանացի սոուլ-երգչուհի Ռեյը։ 2.5 ժամից ավելի տեւած համերգով հանդես էին եկել Նիկ Քեյվն ու The Bad Seeds-ը, իսկ Սթինգը ներկայացրել էր իր վաղ շրջանի ստեղծագործությունները՝ ձայնագրված The Police խմբի կազմում։

Deep Purple-ը գրեթե միշտ մասնակցում է փառատոնին եւ այս տարին էլ բացառություն չէր։ Խմբի ամենահայտնի երգը՝ Smoke On The Water-ը, պատմում է 1971 թվականին Մոնտրյոյի կազինոյում բռնկված հրդեհի մասին։ Փառատոնն այդ շենքում անցկացվում էր 1967 թվականից, եւ Deep Purple-ը մտադիր էր հենց այնտեղ ձայնագրել իր Machine Head ալբոմը, սակայն հրդեհը գրեթե ամբողջությամբ ոչնչացրեց շենքը։ Ի վերջո ալբոմը ձայնագրվեց Մոտրյոի Grand Hotel-ում՝ Rolling Stones-ի շարժական ստուդիայի միջոցով, իսկ երբ կազինոյի շենքը վերակառուցվեց, այնտեղ բացվեց Mountain Studios ստուդիան։ Հետագայում այն պատկանում էր 
Queen խմբին, որն այնտեղ վեց ալբոմ ձայնագրեց։

«Լեռնային հատվածում է գտնվում փառատոնի հիմնադիր Կլոդ Նոբսի շալեն, որտեղ նրան այցելում էին Ֆրեդի Մերկյուրին, Դեյվիդ Բոուին եւ The Rolling Stones-ը՝ բերելով նվերներ, որոնք մինչ օրս կարելի է տեսնել էքսկուրսիաների ժամանակ։ Շալե այցելելը հնարավոր է միայն նախապես էքսկուրսիա ամրագրելով, բայց արժե դա անել», – գրում է հոդվածի հեղինակ Քեյսի Կուպեր-Ֆիսկը։

Ես եղել եմ այդ շալեում: 

2003 թվականին Հայաստանի նախագահ Ռոբերտ Քոչարյանն այցելում էր Շվեյցարիա՝ ՏՏ ոլորտի գագաթնաժողովին մասնակցելու նպատակով, ես էլ այցը լուսաբանող լրագրողների խմբում էի: 

Շվեյցարիայում Հայաստանի դեսպան Զոհրաբ Մնացականյանը խնդրել էր Կլոդ Նոբսին հյուրընկալել Ռոբերտ Քոչարյանին: Լրագրողներիս շալե ավելի շուտ բերեցին, քան պետք է ժամաներ նախագահը: Մեզ դիմավորեցին աշխատակիցները եւ ասացին, որ կարող ենք մեզ ազատ զգալ առաջին հարկի ընդարձակ հյուրասենյակում: 

Սենյակի անկուններից մեկում, եռաոտ հարմարանքի վրա դրված էր nude լուսանկարների թերեւս ամենահայտնի լուսանկարիչ Հելմուտ Նյութոնի մեծադիր ալբոմը: Թերթեցի, բայց հարմար չէր այդպես նայելը՝ որոշեցի վերցնել, նստել բազմոցին եւ հանգիստ նայել: Վերցրեցի մեկ ձեռքով ու չհաշվարկեցի ալբոմի քաշը՝ գրքի կազմը կիսով չափ պոկվեց բուն գրքից: Սիրտս կանգնեց: Բայց լավ էր, ոչ ոք չնկատեց: Գիրքը դրեցի տեղը ու սենյակի այդ հատված այլեւս ոտք չդրեցի: 

Որոշ ժամանակ անց եկան Ռոբերտ Քոչարյանն ու Կլոդ Նոբսը, իսկ մոտ կես ժամից նրանց միացավ Շառլ Ազնավուրը, որը սովորականից ավելի երկար մազեր ուներ, քանի որ այդ շրջանում նկարահանվում էր «Հայր Գորիո» ֆիլմում:

2012 թվականի հունվարի 24-ին դահուկ քշելուց Կլոդ Նոբսը վայր էր ընկել եւ հայտնվել կոմայում: Մեկ տարի անց նա հեռացավ կյանքից:

Արա Թադեւոսյանը Մեդիամաքսի տնօրենն է