Գրքի երեւանյան միջազգային փառատոնը հայտարարում է գրական մրցույթ

Երեւան: Մեդիամաքս: ՀՀ կրթության, գիտության, մշակույթի եւ սպորտի նախարարության նախաձեռնությամբ իրականացվող Գրքի երեւանյան միջազգային 9-րդ փառատոնը հայտարարում է գրական մրցույթ:

Գործում է 4 անվանակարգ.

 

•    Արձակ

•    Դրամատուրգիա

•    Մանկապատանեկան գրականություն

•    Պոեզիա

 

Մասնակցության հայտ կարող են ներկայացնել 18 տարին լրացած ՀՀ քաղաքացիները։ Ստեղծագործությունները պետք է լինեն հայերեն:

 

Հաղթողները (ամեն անվանակարգում՝ մեկական) կստանան դրամական պարգեւ 400․000-ական դրամ (ներառյալ հարկերը):

 

Փառատոնում նախորդ տարիներին մրցանակային տեղեր զբաղեցրած հեղինակներն այս տարի նույն անվանակարգերում դիմել չեն կարող: Մրցույթին ներկայացվող աշխատանքները պետք է երբեւէ հրատարակված եւ հրապարակված չլինեն (էլեկտրոնային մամուլում, սոցիալական հարթակներում, միջոցառումների ժամանակ կազմակերպված ընթերցումներում): Նույն հեղինակը կարող է հայտ ներկայացնել միայն մեկ անվանակարգում։

 

Մրցույթին պետք է ներկայացնել՝

 

«Արձակ» անվանակարգում

 

•    կամ 2 պատմվածք

•    կամ վեպից (վիպակից) հատված (նվազագույնը՝ 4000, առավելագույնը՝ 4500 բառ, առանձին կցել նաեւ աշխատանքի բովանդակային նկարագրությունը՝ մինչեւ 400 բառ):

 

«Դրամատուրգիա» անվանակարգում

 

1 պիես (ծավալն էական չէ)

 

«Մանկապատանեկան գրականություն» անվանակարգում

 

•    կամ 2 հեքիաթ

•    կամ 2 պատմվածք

•    կամ 2 պատկերազարդ պատմություն

•    կամ 10 բանաստեղծություն

•    կամ վեպից (վիպակից) հատված (նվազագույնը՝ 4000, առավելագույնը՝ 4500 բառ, առանձին կցել նաեւ աշխատանքի բովանդակային նկարագրությունը՝ մինչեւ 400 բառ):

 

«Պոեզիա» անվանակարգում

 

10 բանաստեղծություն

 

Գործերը ժյուրիի գնահատմանն են ներկայացվելու անանուն։

 

Այն ստեղծագործությունները, որոնք կպարունակեն հեղինակի վերաբերյալ ուղղակի կամ անուղղակի տեղեկություն, չեն դիտարկվի: Եթե տեքստը գնահատման ներկայացվի ժյուրիի անդամներին, եւ ընթերցման փուլում վերջինները նկատեն նույնականացման փորձ, ապա հայտը կչեղարկվի:

 

Մասնագիտական ժյուրիի անդամներն են.

 

«Արձակ» անվանակարգ

 

•    Աննա Դավթյան

•    Արքմենիկ Նիկողոսյան

•    Հովհաննես Երանյան

•    Սարգիս Հովսեփյան

 

«Դրամատուրգիա» անվանակարգ

 

•    Անահիտ Արամունի Քեշիշյան

•    Դավիթ Խալաթյան

•    Նարինե Գրիգորյան

•    Սաթէ Խաչատրյան

 

«Մանկապատանեկան գրականություն» անվանակարգ

 

•    Անի Հովնանյան

•    Երազիկ Գրիգորյան 

•    Սաբեթ Հովհաննիսյան

•    Վարդուհի Բալոյան

 

«Պոեզիա» անվանակարգ

 

•    Ալվարդ Սեմերջյան

•    Կարեն Անտաշյան

•    Հասմիկ Սիմոնյան

•    Ներսես Աթաբեկյան

 

Հայտերի գնահատման չափանիշները.

 

•    «Արձակ» անվանակարգ՝ տեքստային իրացումը, լեզուն եւ ոճը, դիպաշարի կառուցումը, արդիականությունը, նորարարական-փորձարարական արժեքը:

 

•    «Դրամատուրգիա» անվանակարգ՝ ձեւն ու բովանդակությունը, կառուցումը, լեզուն եւ ոճը, արդիականությունը, նորարարական-փորձարարական արժեքը:

 

•    «Մանկապատանեկան գրականություն» անվանակարգ՝ գրավիչ եւ հագեցած սյուժեն, տեքստի համապատասխանությունը թիրախային խմբի հետաքրքրություններին, բովանդակության ուսանելիությունը, կառուցվածքը, շարադրանքի դյուրըմբռնելիությունը, ոճը:

 

•    «Պոեզիա» անվանակարգ՝ տեքստային իրացումը, լեզուն եւ ոճը, ազդեցության աստիճանը, արդիականությունը, նորարարական-փորձարարական արժեքը:

 

Հայտի փաթեթն անհրաժեշտ է ուղարկել info@yerevanbookfest.com հասցեին «word» ձեւաչափով (բոլոր գործերը՝ մեկ ֆայլում): «Թեմա» տողում պետք է նշել անուն-ազգանունը եւ անվանակարգը (օրինակ՝ Հովհաննես Գրիգորյան, «Պոեզիա» անվանակարգ): Նամակի դաշտում գրել հեռախոսահամար։

 

Հայտերի ընդունման վերջնաժամկետ՝ 2026 թ. օգոստոսի 10։

 

Հաղթողների անունները հայտնի կդառնան սեպտեմբերի 6-ին՝ Գրքի երեւանյան միջազգային 9-րդ փառատոնի փակման արարողության ժամանակ։

 

Փառատոնը տեղի կունենա սեպտեմբերի 4-ից 6-ը Հանրապետության հրապարակում՝ Հայաստանի ազգային պատկերասրահում, Հայաստանի պատմության թանգարանում եւ Ե. Չարենցի անվան գրականության եւ արվեստի թանգարանում։