Կասպից ծովում նավի վրա հարձակման պատճառով Իրանը քննարկել է Ուկրաինային պատասխանելու ծրագիր

«The New York Times»-ը, հղում անելով իրանական և արևմտյան աղբյուրների, հայտնել է, որ Թեհրանը քննարկել է Ուկրաինայի ծովային նավահանգիստներից մեկին հարվածելու տարբերակը։

Ըստ աղբյուրների՝ Իրանը կարող էր կիրառել փոքր մարտագլխիկով բալիստիկ հրթիռ, քանի որ ենթադրվում էր, որ հարվածը լինելու էր «խորհրդանշական բնույթի» և մեծ վնաս չէր պատճառի։

Իրանական իշխանությունները, ըստ հրապարակման, ակնկալում էին, որ դրանից հետո հակամարտությունը կավարտվի, սակայն արևմտյան պաշտոնյաները զգուշացրել էին Ուկրաինայի հնարավոր անկանխատեսելի արձագանքի և ավելի լայն պատերազմի վտանգի մասին։

NYT-ի զրուցակիցները նշել են, որ դիվանագիտական շփումների արդյունքում հաջողվել է նվազեցնել լարվածությունը և համոզել Իրանին հրաժարվել նախնական ծրագրից։

Հուլիսի 25-ին Ուկրաինայի զինված ուժերը հարվածել էին Կասպից ծովում գտնվող իրանական առևտրային նավին։ Միջադեպի հետևանքով մեկ մարդ զոհվել էր, ևս մեկը՝ վիրավորվել։

Դրանից հետո Իրանի ԱԳՆ-ն կանչել էր Ուկրաինայի գործերի ժամանակավոր հավատարմատարին՝ հայտնելով բողոք։ Իրանի ԱԳ նախարար Աբբաս Արաղչին հայտարարել էր, որ ուկրաինական հարձակումը խախտում է ՄԱԿ-ի կանոնադրությունը և, ըստ նրա, նպատակ ունի Եվրոպային ներքաշել Իրանի ու ԱՄՆ-ի միջև հակամարտության մեջ։